“Jeŋmaji Fɛɛ Aaanyɛ Nyɛ”

¹ Wɔ fɛɛ wɔna miishɛɛ waa akɛ wɔɔnu amaniɛbɔi ni ŋɔɔ waa ni tsɔɔ jɔɔmɔi ni yɔɔ nyam ni Yehowa webii naa yɛ je lɛŋ he fɛɛ he lɛ nyɛsɛɛ nɛɛ. Bɔ ni akɛ nitsumɔ lɛ ewo mla shishi yɛ Malawi agbɛnɛ, yɛ afii 26 yiwaa ni mli wa sɛɛ lɛ ha miishɛɛ yaafo nui jɛ wɔhiŋmɛiiaŋ. Wɔmu waa kɛ miishɛɛ hu beni wɔna bɔ ni Komunist nɔyelii ni bɛ Nyɔŋmɔ gbeyeishemɔ yɛ Europa Boka lɛ butu kwraa ni no ha wɔnyɛmimɛi lɛ ateŋ mɛi akpei abɔ ye amɛhe kɛjɛ eyiwalɛ apã lɛ shishi lɛ. Wɔkɛ hehiamɔ henumɔ ko hu kwɛ beni ate shi awo jamɔ mli heyeli ni wɔyɔɔ lɛ yɛ Greece lɛ; ni wɔmli fili wɔ waa beni wɔye kunim kpeteŋkple yɛ kojomɔ he wulu fe fɛɛ ni yɔɔ Europa lɛ. Wɔmli efili wɔ hu akɛ wɔɔnu amaniɛbɔi ni tsɔɔ bɔ ni alɛɛ Asafo lɛ nitsumɔ he niji lɛ ekomɛi amli waa, ni no eha anyɛ afee woji babaoo kɛha mɛi ni taoɔ anɔkwale lɛ. Wɔnaa kpɛ wɔhe waa beni wɔnu akɛ abaptisi mɛi fe 7,400 yɛ kpee ni afee yɛ Kiev, yɛ Ukraine lɛ shishi lɛ. Hɛɛ, nɛkɛ hiɛyaa ni sa kadimɔ waa ni eba yɛ Maŋtsɛyeli nitsumɔ lɛ mli nɛɛ kanyaa wɔ ni ehaa wɔmiishɛɛ lɛ faa babaoo!

² Eyɛ mli akɛ nɔ ni haa wɔnaa miishɛɛ lɛ da moŋ, shi esa akɛ wɔkwɛ jogbaŋŋ ni wɔmli akafili wɔ fe nine. Amaniɛbɔi kpakpai ni wɔ­nuɔ kɛtsaraa nɔ lɛ baanyɛ aha wɔmu sane naa akɛ sanekpakpa lɛ shi­tee-kɛ-wolɔi lɛ miikumɔ miishwie shi, ni aakpɛlɛ Yehowa webii anɔ yɛ je lɛŋ he fɛɛ he. Susumɔ ni tamɔ nɛkɛ baanyɛ alaka mɔ. Eyɛ mli akɛ wɔye kunimii komɛi ni haa mɔ tsui nyɔɔ emli ni wɔnyɛ wɔye omanye bɔ ni sa yɛ nibii ni tsiɔ sanekpakpa lɛ naa yɛ shikpɔji komɛi anɔ lɛ anɔyeli mli moŋ, shi esaaa ni wɔhiɛ kpaa nɔ akɛ shihilɛ ni yɔɔ wɔkɛ je lɛ teŋ kɛjɛ shishijee lɛ tsakeko. Akɛ Yesu sɛɛnyiɛlɔi lɛ, ‘wɔjɛɛɛ je lɛ mli.’ Enɛ hewɔ lɛ, bɔ fɛɛ bɔ ni fee lɛ, “jeŋmaji fɛɛ aaanyɛ” wɔ. (Yoh. 15:19; Mat. 24:⁠9) Bei abɔ ni nibii agbɛjianɔtoo momo nɛɛ kã he eyɔɔ lolo lɛ, nɔ ko kwraa tsakeŋ shishijee mla nɛɛ, ákɛ, “mɛi fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi.”​—⁠2 Tim. 3:⁠12.

³ Yinɔsane yeɔ bɔ ni nɛkɛ kɔkɔbɔɔ nɛɛ ji anɔkwale ha lɛ he odase. Beni Kristojamɔ Shishitolɔ, Yesu ye odase kpele yɛ nɔyeli ni yɔɔ hewalɛ babaoo kɛ amɛshishibii ahiɛ lɛ, afee lɛ nibii fɔji daa gbi, ni eyaje oshara mli be fɛɛ be akɛ amɛbaanyɛ amɛgbe lɛ. Eyɛ mli akɛ ebɔfoi lɛ ye amɛbua mɛi pii ni amɛtsɔmɔ kaselɔi, ni amɛna gbɛ­faŋ­nɔ yɛ Kristofoi a-Hela Ŋmalɛi lɛ aŋmalamɔ mli, ni amɛjie mumɔ lɛ nikeenii komɛi ni yɔɔ naakpɛɛ kpo moŋ, shi amɛ hu anyɛ amɛ ni awa amɛ yi nakai nɔŋŋ. Amɛ jeŋba kpakpa kɛ suɔmɔ ni amɛyɔɔ kɛha amɛ­nane­mɛi lɛ fɛɛ sɛɛ lɛ, mɛi pii bu Kristofoi fɛɛ akɛ “kuu fã” ko ni abuuu amɛ, ‘ni awieɔ amɛhe efɔŋ yɛ he fɛɛ he.’ (Bɔf. 28:22) Eyɛ mli akɛ Yehowa kɛ Kristofoi asafo ni yɔɔ jeŋ fɛɛ lɛ etsu nii yɛ naakpɛɛ gbɛ nɔ ŋmɛnɛ ni ekɛha eyiŋtoo eba mli moŋ, shi aaya nɔ aate shi aawo lɛ be fɛɛ be, ni nibii agbɛjianɔtoo fɔŋ nɛɛ fãi sɔrɔtoi lɛ fɛɛ wieɔ he efɔŋ. Yiŋtoo ko bɛ ni wɔɔdamɔ nɔ wɔkpa gbɛ akɛ shitee-kɛ-woo lɛ sɛɛ baafo.

⁴ Satan wa Yesu kaselɔi lɛ ayi yɛ klɛŋklɛŋ afii oha lɛ mli yɛ gbɛi sɔrɔtoi anɔ. Shitee-kɛ-wolɔi ni nyɛɔ amɛ lɛ je gbɛ amɛmale kɛ­folɔ amɛnaa. (Bɔf. 14:⁠2) Atsɔ ŋaa fɔŋ akɛwo amɛhe gbeyei koni akɛha ŋmiŋmi amɔmɔ amɛ. (Bɔf. 4:​17, 18) Gbɔmɛi asafo babaoo ko ka akɛ amɛaatsi amɛnaa ni amɛkawie. (Bɔf. 19:​29-34) Awo amɛ tsuŋ yɛ gbɛ ni ejaaa nɔ. (Bɔf. 12:​4, 5) Bei pii lɛ, yiwalɔi kɛ gbɔmɔtsoŋ awuiyeli tsuɔ nii. (Bɔf. 14:19) Bei komɛi lɛ, ajeɔ gbɛ agbeɔ mɛi ni efeko nɔ ko. (Bɔf. 7:​54-60) Bɔfo Paulo nyɛ edamɔ nɛkɛ niseniianifeemɔi sɔrɔ­toi nɛɛ eko fɛɛ eko naa. (2 Kor. 11:​23-27) Shitee-kɛ-wolɔi ahe fee oya ni amɛkɛ hegbɛ fɛɛ hegbɛ tsu nii koni amɛkɛtsi shiɛmɔ nitsumɔ lɛ naa, ni amɛkɛ amanehulu ba nɛkɛ nitsulɔi anɔkwafoi nɛɛ anɔ.

⁵ Satan kɛ ŋaa gbɛi ni tamɔ nakai miitsu nii ŋmɛnɛ. Aje gbɛ awie amale wiemɔi, ni atsɛ wɔ yɛ gbɛ ni ejaaa nɔ akɛ mligbalamɔ kuu aloo teemɔŋ jamɔ kuu ko ni eye jamɔ he sɛkɛ. Yɛ maji komɛi anɔ lɛ, nɔyelɔi lɛ buɔ wɔwoji lɛ akɛ ejwaa maŋ, ni no hewɔ lɛ amɛtsi naa. Aje gbɛ aye bulɛ ni wɔyɔɔ kɛha bɔ ni la yɔɔ krɔŋkrɔŋ ha lɛ he fɛo, ni ate shi awo enɛ yɛ faŋŋ mli. Yɛ 1940 afii lɛ amli lɛ, basabasa feelɔi ni mli efu yɛ aflaŋaa-ŋamɔ he sane lɛ he lɛ yatutua wɔnyɛmimɛi lɛ, ni amɛpila amɛ, ni amɛkpata amɛ nibii ahiɛ. Awo mɛi akpei abɔ tsuŋ yɛ amɛhe ni amɛkɛwooo maŋ saji amli lɛ hewɔ. Yɛ yiwalɛ nɔyeli maji amli hu lɛ, akɛ amale efolɔ wɔnyɛmimɛi lɛ anaa akɛ maŋ­jwalɔi ji amɛ, ni enɛ ha akɛ yiwalɛ piŋ amɛteŋ mɛi ohai abɔ ni agbe amɛ yɛ tsuŋ­woo hei loo gbokɛlɛfoi aŋsaraiaŋ. Nɔnyɛɛ lɛ baaa shi, ni tsɔɔ faŋŋ akɛ aanyɛ wɔ kɛkɛ ni shishinumɔ bɛ he.​—⁠Kwɛmɔ Pro­claim­ers, yitso 29.

⁶ Mɛni Wɔbaanyɛ Wɔkpa Gbɛ Wɔsɛɛ? Eyɛ mli akɛ Yehowa webii baanyɛ aye omanye yɛ be kɛ bei amli ni amɛkɛje nɔnyɛɛ shishi yɛ je lɛŋ hei komɛi moŋ, shi bɔ ni shihilɛ lɛ ji diɛŋtsɛ lɛ tsakeko. Abon­sam mli efu lolo yɛ shi ni aba lɛ yɛ 1914 lɛ hewɔ. Ele akɛ be ni eyɔɔ lɛ faaa dɔŋŋ. Ni eka shi faŋŋ akɛ emlifu lɛ mli baawo wu beni amanehulu kpeteŋkpele lɛ bɛŋ­kɛɔ lɛ. Etuu ehe fɛɛ eha ta ni ewuɔ eshiɔ Maŋtsɛ, Kristo Yesu ni akɛ lɛ eta maŋtsɛsɛi nɔ lɛ, ni etswa efai shi akɛ ebaawuu aahu kɛ­ya­shi naagbee. Ekɛ edaimonioi lɛ baanyɛ ajie amɛmlifu kpo yɛ Yehowa webii ni yɔɔ shikpɔŋ nɛɛ nɔ, ni kɛ anɔkwayeli “yeɔ Nyɔŋmɔ kitai lɛ anɔ ni amɛhiɛ Yesu Kristo Odase lɛ” pɛ nɔ.​—⁠Kpoj. 12:​12, 17.

⁷ No hewɔ lɛ, beni wɔkwɛɔ wɔsɛɛ be lɛ, esa akɛ wɔkɛ jwɛŋmɔ kpakpa asusu nɔ ni wɔkpaa gbɛ lɛ he. Yiŋtoo ko bɛ ni wɔɔdamɔ nɔ wɔsusu akɛ Abon­sam baagbɔjɔ enijiaŋ aloo enijiaŋ baaje wui. Wɔhe hetsɛ ni edũ ewo je nɛɛ mli lɛ baanyɛ ate shi be fɛɛ be, yɛ he fɛɛ he hu. Yɛ shikpɔji pii anɔ lɛ, wɔkɛ afii babaoo pele heyeli ni wɔkɛaashiɛ lɛ he dani wɔnine nyɛ eshɛ nɔ. Ekolɛ nakai heyeli lɛ laajemɔ waaa, ni nɔyelɔ ko ni sumɔɔ wɔsane, aloo mla ko ni maŋbii lɛ sumɔɔɔ, ni yɔɔ lɛ hewɔ heyeli lɛ yɔɔ lɛ. Maŋ hiɛ atuatsemɔ nifeemɔi baanyɛ ate shi trukaa, ni ekɛ basabasa kɛ yiwalɛ nifeemɔi baaba mɛi anɔ.

⁸ Shweremɔ kɛ heyeli ni wɔnaa mli ŋɔɔmɔ bianɛ yɛ shikpɔji ko­mɛi anɔ lɛ baanyɛ aba naagbee trukaa, ni eeeha wɔnyɛmimɛi lɛ ayaje nibii fɔji ni afee amɛ tsutsu ko lɛ amli ekoŋŋ. Wɔŋmɛŋ gbɛ ni alaka wɔ awo shikplikpii-feemɔ mumɔ ni wɔɔna mli, koni eha wɔsusu akɛ aba wɔhenyɛlɔi lɛ ashi. Jeee be fɛɛ be je nɛɛ hetsɛ lɛ baaje kpo jogbaŋŋ kɛmɔ shi, shi eka he emli wa lolo. Nɔ fɛɛ nɔ ni yɔɔ Nyɔŋmɔ Wiemɔ lɛ mli lɛ tsɔɔ akɛ je lɛ shitee-kɛ-woo lɛ mli baawa moŋ fe ni enaa aaaba shi, beni naagbee lɛ bɛŋkɛɔ lɛ. No hewɔ lɛ, esa akɛ wɔhiɛ ahi wɔhe nɔ, ni wɔ­ha ana wɔ akɛ ‘wɔhiɛ etɛ̃ tamɔ onufui, ni wɔyɛ kpoo tamɔ okpoi.’ (Mat. 10:16) Esa akɛ wɔyoo akɛ wɔbaawuu ‘ta ni mli wa’ aahu kɛyashi naagbee tɔ̃ɔ, ni tsuishiŋmɛɛ ji nɔ titri ni wɔkɛaana yibaamɔ.​—⁠Yuda 3; Mat. 24:⁠13.

⁹ Ekolɛ shiɛmɔ nitsumɔ lɛ miiya hiɛ waa yɛ je lɛŋ he ni wɔ­yɔɔ lɛ, ni wɔnaaa naatsii ko kɛjɛɛɛ shitee-kɛ-wolɔi aŋɔɔ. Enɛ baa­nyɛ aha wɔyiŋ afee wɔ kɔshikɔshi kɛji ehe miihia po ni wɔkpa nakai nɔ ko gbɛ. Shi kɛlɛ, ehe miihia ni wɔhiɛ ahi wɔhe nɔ jogbaŋŋ. Shi­hi­lɛi baanyɛ atsake trukaa. Shitee-kɛ-wolɔi baanyɛ ni amɛkɛ sane ko ni baaba lɛ atsu nii ni amɛkɛte shi amɛwo wɔ trukaa ni wɔkpaaa gbɛ. Hemɔkɛyeli kwalɔi miitao nɔ ni amɛaadamɔ nɔ amɛwie amɛshi wɔ be fɛɛ be. Osɔfoi ni mli efu, ni amɛsusuɔ akɛ wɔnitsumɔ lɛ miigba amɛnaa lɛ baanyɛ awie wɔhe wiemɔi fɔji yɛ faŋŋ mli. Ekolɛ gbɛjianɔ ni wɔtoɔ ni wɔma Maŋtsɛyeli Asa yɛ wɔ akutso mli lɛ baatee béi shi, ni ebaagba akutso lɛ mli bii fɛɛ anaa. Abaanyɛ akala heguɔgbee wie­mɔi awo woji amli, ni ebaaha mɛi ana wɔhe jwɛŋmɔ fɔŋ. Maŋbii ni ale amɛ waa baaje gbɛ amɛfolɔ wɔnaa, ni no baaha wɔ akutseiaŋbii akahere wɔ hiɛmɛɛ kɛji wɔtee amɛ ŋɔɔ. Wɔ suɔlɔi ni wɔkɛyɔɔ shia po baana wɔhe mlifu ni amɛbaawa wɔ yi. No hewɔ lɛ ehe miihia ni wɔhiɛ ahi wɔhe nɔ, ni wɔyoo akɛ nyɛ ni je lɛ nyɛɔ wɔ lɛ kã he eyɛ lolo, ni ebaanyɛ ewo ehe nɔ be fɛɛ be.

¹⁰ e Esa akɛ Enɛ Asa Wɔhe Aha Tɛŋŋ? Enɛɛmɛi fɛɛ saa bɔ ni wɔsusuɔ nii ahe wɔhaa kɛ nɔ ni wɔkpaa gbɛ wɔsɛɛ lɛ he yɛ gbɛ ni ja nɔ. Yɛ mɛɛ gbɛ nɔ? Ani esa akɛ enɛ aha wɔtsui afã, ni wɔshe nɔ ni esa akɛ wɔdamɔ naa lɛ gbeyei? Ani esa akɛ wɔjɔgbɔ wɔ shiɛmɔ nitsumɔ lɛ mli akɛni ekolɛ ehaoɔ mɛi komɛi yɛ wɔ akutso lɛ mli lɛ hewɔ? Ani yiŋtoo kpakpa ko yɛ ni baaha wɔhao wɔhe kɛji aafolɔ wɔnaa yɛ gbɛ ni ejaaa nɔ lɛ? Ani gbɛ fɛɛ gbɛ nɔ lɛ yiwalɛ nibii ni baaba wɔnɔ lɛ baafite miishɛɛ ni wɔyɔɔ yɛ Yehowa sɔɔmɔ mli lɛ? Ani wɔyiŋ feɔ enyɔ­nyɔ yɛ nɔ ni baajɛ mli aba lɛ he? Dabi kwraa! Mɛni hewɔ?

¹¹ Esaaa ni wɔhiɛ kpaa nɔ kɔkɔɔkɔ akɛ shɛɛ sane ni wɔjajeɔ wɔtsɔɔ lɛ, jeee wɔŋɔɔ ejɛ, shi moŋ ejɛ Yehowa ŋɔɔ. (Yer. 1:⁠9) Eji sɔ̃ ni ka wɔnɔ akɛ wɔbo nɛkɛ ŋaawoo wiemɔ nɛɛ toi, akɛ: “Nyɛtsɛa egbɛi lɛ! Nyɛhaa alea enifeemɔ nii lɛ . . . yɛ shikpɔŋ muu lɛ fɛɛ nɔ.” (Yes. 12:​4, 5) Eŋmɛ gbɛ ni aafee ewebii lɛ nibii fɔji yɛ yiŋtoo pɔtɛɛ ko hewɔ, ni ji akɛ, ‘koni atsĩ egbɛi atã yɛ shikpɔŋ lɛ nɔ fɛɛ.’ (2 Mose 9:16) Wɔmiitsu nitsumɔ ni Yehowa diɛŋtsɛ ewo akpɔ akɛ atsu, ni lɛ ji Mɔ ni woɔ wɔ hewalɛ koni wɔkɛwie kɛ ekaa. (Bɔf. 4:​29-31) Enɛ ji nitsumɔ ni he hiaa fe fɛɛ, ni sɛɛnamɔ yɔɔ he, ni biɔ oyai­yeli hu, ni abaanyɛ atsu yɛ nibii agbɛjianɔtoo momo lɛ naagbee gbii lɛ amli.

¹² Nilee nɛɛ woɔ wɔ ekaa koni wɔkɔ shidaamɔ ni yɔɔ shiŋŋ ni wɔkɛte shi wɔwo Satan kɛ je nɛɛ. (1 Pet. 5:​8, 9) Le ni wɔɔle akɛ Yehowa kɛ wɔ yɛ lɛ haa ‘wɔfeɔ ekaa ni wɔhe waa,’ ni ejieɔ nɔ fɛɛ nɔ ni aaaha wɔshe gbeyei yɛ wɔyiwalɔi ahiɛ lɛ kɛyaa. (5 Mose 31:6; Heb. 13:⁠6) Eyɛ mli akɛ wɔɔbɔ mɔdɛŋ ni wɔkɛ ŋaalee, hiɛshikamɔ, kɛ nilee atsu nii be fɛɛ be ni shitee-kɛ-wolɔi aaawo wɔhe gbeyei moŋ, shi kɛlɛ, wɔbaaha efee faŋŋ akɛ wɔtswa wɔfai shi akɛ kɛ aate shi aawo wɔ jamɔ lɛ, ‘wɔbaabo Nyɔŋmɔ moŋ toi akɛ nɔyelɔ fe gbɔmɛi.’ (Bɔf. 5:29) Kɛ hegbɛ ni nilee yɔɔ mli yɛ ni wɔkɛaawie kɛfã wɔhe lɛ, no lɛ wɔbaafee nakai. (1 Pet. 3:15) Shi, wɔfiteŋ wɔbe yɛ shitee-kɛ-wolɔi ni ekpiliŋ amɛtsui, ni nɔ ni amɛtaoɔ pɛ ji ni amɛgbe wɔhe guɔ lɛ ahe ni wɔkɛ amɛ aje ŋwane. Ni ní wɔmli aaafu aloo wɔɔbɔ mɔdɛŋ ni wɔtɔ owele kɛ amɛgbe wɔhe guɔ aloo amɛmale kɛfolɔ wɔnaa lɛ, ‘wɔdiŋ amɛsɛɛ’ kɛkɛ.​—⁠Mat. 15:⁠14.

¹³ Wɔtsui shi ni wɔŋmɛɔ yɛ kaa mli lɛ saa Yehowa hiɛ. (1 Pet. 2:19) Mɛɛ nyɔmɔ esa akɛ wɔwo kɛha nakai kpɛlɛmɔ lɛ? Ani esa akɛ wɔfee mɛi ni bɛ miishɛɛ yɛ wɔsɔɔmɔ lɛ mli akɛni anyɛɔ wɔ ni ateɔ shi awoɔ wɔ lɛ hewɔ? Dabi kwraa! Yehowa ewo shi akɛ ekɛ “miishɛɛ kɛ hejɔlɛ” baawo wɔ toiboo lɛ he nyɔmɔ. (Rom. 15:13) Yɛ amanehulu ni naa wa waa ni Yesu kɛkpe lɛ fɛɛ sɛɛ lɛ, etee nɔ ena miishɛɛ yɛ “nyamɔ ni ka ehiɛ lɛ hewɔ.” (Heb. 12:⁠2) Nakai nɔŋŋ eji yɛ wɔ hu wɔhe. Akɛni wɔtsuishiŋmɛɛ he nyɔmɔwoo lɛ da waa hewɔ lɛ, etsirɛɔ wɔ ni ‘wɔnyaa ni wɔmli filiɔ wɔ,’ eyɛ mli akɛ wɔkɛ kaai ni mli wa kpeɔ. (Mat. 5:​11, 12) Ni yɛ jaramɔ bei amli po lɛ, nɛkɛ nyamɔ nɛɛ feɔ yiŋtoo ni wɔdamɔɔ nɔ wɔkɛ yijiemɔ kɛ woo haa Yehowa kɛfiɔ Maŋtsɛyeli shɛɛ sane lɛ sɛɛ.

¹⁴ Ani yiŋkɔshikɔshifeemɔ yɛ nɔ ni aaajɛ mli aba yɛ naagbee lɛ he, ní no hewɔ esa akɛ wɔshe gbeyei aloo wɔyiŋ afee wɔ enyɔnyɔ? Dabi, ájɛ mra beebe akpɛ yiŋ yɛ nɔ ni baajɛ béi ni ka Yehowa gbɛ­jia­nɔtoo lɛ kɛ Satan je lɛ teŋ lɛ mli aba lɛ he momo. (1 Yoh. 2:​15-17) Ekɔɔɔ he eko bɔ ni shitee-kɛ-woo lɛ naa baawa aha, Yehowa baaha wɔye kunim. (Yes. 54:17; Rom. 8:​31, 37) Eyɛ mli akɛ aaka wɔ waa kɛmiimɔ shi moŋ, shi nɔ ko bɛ ni baanyɛ atsĩ wɔnaa ni wɔnine akashɛ nyɔmɔwoo lɛ nɔ. Nɔ ko bɛ ni baaha ‘wɔhao wɔhe yɛ nɔ ko he,’ ejaakɛ Yehowa eha wɔ toiŋjɔlɛ yɛ wɔfaikpamɔi lɛ ahetoohamɔ mli.​—⁠Filip. 4:​6, 7.

¹⁵ No hewɔ lɛ wɔdaa Yehowa shi be fɛɛ be ni wɔnuɔ amaniɛbɔɔi ni tsɔɔ bɔ ni ajie wɔnyɛmimɛi lɛ kɛjɛ yiwaa mli aloo aha amɛ heyeli ni amɛkɛshiɛ yɛ hei ni tsutsu ko lɛ atsi amɛnaa yɛ lɛ. Wɔmli filiɔ wɔ kɛji shihilɛi ni tsakeɔ lɛ gbele hegbɛi heei anaa eha gbɔmɛi anɔkwafoi akpei abɔ koni amɛnu Maŋtsɛyeli shɛɛ sane lɛ. Wɔhiɛ sɔɔ ni wɔdaa shi yɛ he lɛlɛŋ kɛ Yehowa hala akɛ eeeha wɔye nɔmɔ loo akaŋ­shii ni kã wɔkɛ shitee-kɛ-wolɔi ni nyɛɔ wɔ lɛ ateŋ lɛ mli kunim lɛ. Wɔle akɛ ebaajɔɔ wɔnitsumɔ lɛ ni ebaaha eshwere yɛ gbɛ fɛɛ gbɛ ni he hiaa nɔ bɔni afee ni ewó ewe kɛha anɔkwa jamɔ lɛ nɔ ni eha mɛi “ni jara wa” ni jɛ jeŋmaji fɛɛ mli lɛ ana hegbɛ amɛbabote mli.​—⁠Hag. 2:⁠7; Yes. 2:​2-4

¹⁶ Yɛ nakai beaŋ nɔŋŋ lɛ, wɔle jogbaŋŋ akɛ wɔhenyɛlɔ, Satan, he wa waa diɛŋtsɛ, ni ebaate shi ewo wɔ waa aahu kɛyashi naagbee tɔ̃ɔ. Ekolɛ etutuamɔi lɛ baafee faŋŋ ni enaa baawa waa hu, aloo amɛaafee nigii kɛ lakamɔ. Ekolɛ yiwaa baafɛ trukaa yɛ hei ni tsutsu ko lɛ toiŋjɔlɛ pɛ wɔle yɛ nakai hei lɛ. Shitee-kɛ-wolɔi yiwalɔi baafee wɔ efɔŋ ni amɛaaya nɔ amɛbɔ mɔdɛŋ ni amɛnyɛ wɔnɔ yɛ gbɛ ni ejaaa nɔ. Yɛ be ni sa mli lɛ, ebaafee faŋŋ eha nɛkɛ mɛi nɛɛ fɛɛ akɛ amɛji ‘mɛi ni kɛ Nyɔŋmɔ wuuɔ,’ ni ebaakpata amɛhiɛ kwraa. (Bɔf. 5:​38, 39; 2 Tes. 1:​6-9) Yɛ nɛkɛ be nɛɛ mli lɛ, wɔtswa wɔfai shi akɛ wɔɔya nɔ wɔdamɔ shi shiŋŋ yɛ anɔkwayeli ni wɔkɛsɔmɔɔ Yehowa lɛ kɛ Maŋtsɛyeli shɛɛ sane lɛ shiɛmɔ mli, ni nɔ ni wɔkɛaakpe lɛ kɔɔɔ he eko. Wɔji mɛi ni yɔɔ miishɛɛ fe fɛɛ yɛ shikpɔŋ nɛɛ nɔ, ejaakɛ wɔle akɛ ‘kɛ aka wɔ ni wɔsa lɛ, wɔnine baashɛ wala akekre lɛ nɔ.’​—⁠Yakobo 1:⁠12.