Sanebimɔ He

◼ Kɛ mɔ ko kɛ ehe wo gbalashihilɛ mli yɛ kusum naa lɛ, ani ebaanyɛ efee mɔ ni sa akɛ shiɛlɔ, yɛ be mli ni ekɛ egbala­shihilɛ lɛ woko woji amli loo mla shishi lɛ?

Klɛŋklɛŋ kwraa lɛ, esa akɛ ajaje akɛ, nɔ ni Kaisare biɔ ji ni akɛ gbalashihilɛi fɛɛ ni aboteɔ mli yɛ kusum naa yɛ maŋ nɛɛ mli lɛ awo mla shishi yɛ gbalashihilɛ mlibotemɔ lɛ sɛɛ nyɔji etɛ. Esa akɛ anɔkwa Kristofoi aye mla nɛɛ nɔ yɛ Romabii 13:​1, 2 kɛ gbeekpamɔ naa.

Abuɔ gbɔmɔ ni egbalashihilɛ yɛ kusum naa lɛ eye emuu lɛ akɛ egbalashihilɛ lɛ sa. Enɛ hewɔ ni July 1992 Wɔ Maŋtsɛyeli Sɔɔmɔ lɛ mli sane, “Mɛni Hewɔ Esa akɛ Oha Aŋma Ogbalashi­hilɛ Awo Woji Amli?” kɛɔ nɔ ni nyiɛ sɛɛ nɛɛ: “Kɛji gbalashihilɛ mli hefatalɔi lɛ kɛ amɛgbalashihilɛ lɛ ewo woji amli jio, amɛfeko nakai jio, esa akɛ aŋmɛ amɛ gbɛ ni amɛkɛ amɛhe awo shiɛmɔ nitsumɔ lɛ mli ni amɛkɛ amɛ akɔn­taa­buu aha. Kɛji amɛhe esa lɛ, atsiŋ amɛ bap­ti­simɔ hu naa.” (Kwɛmɔ baafa 2, kuku 6.) No hewɔ lɛ mɔ ni egbe egbalashihilɛ yɛ kusum naa lɛ naa kwraa ni ebaa ejeŋ yɛ hetsemɔ mli lɛ sa kɛha shiɛmɔ kɛ esɔɔmɔ nitsumɔ he akɔn­taa­buu, ni kɛ etee ehiɛ lɛ abaanyɛ abaptisi lɛ.

Shi eka he eji anɔkwale akɛ, mɛi ni amɛgbalashihilɛ yɛ kusum naa lɛ eye emuu shi amɛkɛ amɛgbalashihilɛ lɛ woko woji amli loo mla shishi lɛ ahe esaŋ kɛhaŋ gbɛgbamɔ nitsumɔ lɛ fã ko, ni akɛ amɛ tsuŋ nii yɛ Sɔɔmɔ Kpee lɛ mli ejaakɛ abuɔ nitsumɔi nɛɛ akɛ eji sɔɔmɔ hegbɛi krokomɛi ni fata he. Shi amɛbaanyɛ ni amɛkɛ amɛhe awo Teokrase Sɔɔmɔ Skul lɛ mli ni amɛha sanebimɔi ahetoo yɛ kpeei ashishi.

Kɛji akɛ mɔ ko kɛ egbalashihilɛ yɛ kusum naa lɛ wooo woji amli loo mla shishi, ni ebɛ yiŋtoo loo naajiemɔ kpakpa ko kɛha nɔ̃ hewɔ ni efeko nakai lolo lɛ, abaajie lɛ kɛjɛ esɔɔmɔ akɛ onukpa loo asafoŋ sɔɔlɔ loo akɛ gbɛgbalɔ lɛ mli. Aawo hewalɛ ni mɔ fɛɛ mɔ akadi nɛkɛ gbɛtsɔɔmɔi nɛɛ jogbaŋŋ bɔni afee ni “nyɛ fɛɛ nyɛyitsoŋ kɛ nyɛjwɛŋmɔ afee ekome.”​—⁠1 Kor. 1:10; 14:⁠40.