Ani Obaanyɛ Oha Oyijiemɔ ni Okɛhaa Yehowa lɛ Aya Hiɛ yɛ April Mli?

¹ Lalatsɛ David na tsuiŋ suɔmɔ ko akɛ eeejie Yehowa yi yɛ nɔkpɛlɛmɔ mli, no hewɔ lɛ ejaje akɛ: “Mikɛ minaabu aaada Yehowa shi babaoo, ni majie eyi yɛ mɛi babaoo ateŋ!” (Lala 109:30) April ji be ni hi jogbaŋŋ ni ‘akɛ nɔ ko aaafata eyijiemɔ lɛ he’ kɛtsɔ gbɛfaŋnɔ ni wɔnaa yɛ sɔɔmɔ nitsumɔ lɛ mli lɛ ni wɔɔha eya hiɛ lɛ nɔ. (Lala 71:14) Ani ooto gbɛjianɔ ni ofata mɛi babaoo ni feɔ enɛ lɛ ahe kɛtsɔ gbɛgbalɔi awalɔi ni ooofata amɛhe lɛ nɔ?

² Too Gbɛjianɔ Bianɛ: Akaiɔ wɔ yɛ Abɛi 21:5 akɛ: “Mɔdɛŋbɔlɔ jwɛŋmɔi lɛ, nifalɛ sɔŋŋ ekɛbaa.” Enɛ biɔ ni okɛ sane lɛ afɔ Yehowa hiɛ yɛ sɔlemɔ mli, ni okɛ lɛ aye klɛŋklɛŋ gbɛhe yɛ ogbɛjianɔtoo mli. (Abɛi 3:​5, 6) No sɛɛ lɛ, taomɔ obe he gbɛjianɔtoo lɛ mli fitsofitso okwɛ, ni ole he ni obaanyɛ ofee tsakemɔi yɛ, koni kɛ efaaa kwraa lɛ kɛ aja mli lɛ okɛ ŋmɛlɛtswaa enyɔ atsu nii gbi kome yɛ sɔɔmɔ lɛ mli. ‘Be ni ooohe’ kɛaajɛ nitsumɔi krokomɛi amli lɛ ŋmɛɔ bo gbɛ koni otuu be babaoo owo shiɛmɔ nitsumɔ lɛ mli.​—⁠Efes. 5:16.

³ Nyɛgbaa Sane ni Nyɛfea Ekome: Bɔfo Paulo wie mɛi komɛi ni “etsɔmɔ tsuiwoo” amɛha lɛ yɛ esɔɔmɔ nitsumɔ lɛ he nitsumɔ mli lɛ ahe. (Kol. 4:11) Okɛ mɛi krokomɛi ni sumɔɔ ni amɛkɛ amɛhe awo gbɛgbalɔi awamɔ sɔɔmɔ mli yɛ April mli lɛ agba sane. Amɛ sɛɛfimɔ kɛ naanyobɔɔ he baaba sɛɛnamɔ yɛ mumɔŋ aha nyɛ fɛɛ. Sɔɔmɔ nitsumɔ nɔkwɛlɔ lɛ baanyɛ aye abua bo kɛ oyɛ sanebimɔi komɛi ni kɔɔ sɔɔmɔ gbɛjianɔtoo lɛ loo shikpɔŋkuku ni obaatsu nii yɛ mli lɛ ahe.

⁴ Ekomefeemɔ kɛ sɛɛfimɔ ni jɛ weku lɛ mli hu baanyɛ aye abua aŋkroaŋkroi ni yɔɔ weku lɛ mli lɛ ni amɛkɛ amɛhe awo gbɛgbalɔi awamɔ sɔɔmɔ lɛ mli. Ekolɛ ehe baahia ni aja shia lɛ mli nitsumɔi lɛ ekoŋŋ yɛ be fioo ko mli. Ekolɛ ehe baahia ni atsake gbɛjianɔtoo kɛha nakai nitsumɔi lɛ hu mli. Kɛ weku lɛ kpe ni amɛsusu hiamɔ nii nɛɛ ahe lɛ eeeye ebua ni onyɛ otsu oyiŋtoo lɛ he nii. Sanegbaa kpakpa kɛ gbeekpamɔ loo ekomefeemɔ ji nibii titrii ni haa ayeɔ omanye.

⁵ Na Jwɛŋmɔ Kpakpa: Ohe akafee oya kɛmiijie gbɛgbalɔi awamɔ sɔɔmɔ lɛ kɛmiijɛ ojwɛŋmɔ mli yɛ shihilɛi komɛi ni ehiii tsɔ lɛ ahewɔ. Obalaŋtai ni yaa skul, mɛi ni amɛkpa nitsumɔ yɛ dalɛ hewɔ, ŋamɛi ni hiɛ bii, weku yitsei ni kɛ amɛbe fɛɛ tsuɔ nii, amɛ fɛɛ amɛnyɛ amɛkɛ nɔ ko eshã afɔle​—⁠kɛ miishɛɛ hu​—⁠koni amɛfee gbɛgbalɔi awalɔi yɛ April mli. Amɛkɛ lalatsɛ lɛ kpaa gbee akɛ, “esa mɛi ni ja lɛ akɛ amɛjie eyi,” ni amɛsusuuu he akɛ amɛaafite nɔ ko tsɔ yɛ mɔdɛŋ kroko ni ebiɔ ni amɛbɔ koni amɛkɛ ŋmɛlɛtswai 60 atsu sɔɔmɔ lɛ he nii. (Lala 33:⁠1) Kɛ onyɛɛɛ okɛ ohe awo mli lɛ, mɛni hewɔ okɛ ohe wooo miishɛɛnamɔ lɛ mli kɛtsɔ osɔɔmɔ nitsumɔ lɛ ni oooha eya hiɛ akɛ asafoŋ shiɛlɔ lɛ nɔ mɔ?

⁶ Kɛha mɛi pii lɛ, gbɛgbalɔi awamɔ ji gbɛ ni amɛtsɔɔ nɔ amɛboteɔ daa gbɛgbamɔ sɔɔmɔ lɛ mli. Akɛni amɛha amɛnitsumɔ lɛ etee hiɛ hewɔ lɛ, amɛna akɛ daa gbɛgbamɔ nitsumɔ lɛ mlibotemɔ waaa haaa amɛ kwraa.

⁷ Hɛɛ, be kɛha teokrase nitsumɔ ni fa ni yaa hiɛ yɛ April mli lɛ nɛ. Hɔɔ enumɔ ni yɔɔ April mli lɛ kɛ hejɔɔmɔ gbii ni fata he lɛ haa April feɔ be ni sa jogbaŋŋ kɛha sɔɔmɔ nitsumɔ ni yaa hiɛ. Wɔ­mii­sumɔ ni wɔfee bɔ fɛɛ bɔ ni wɔɔnyɛ ni wɔkɛjie Yehowa, wɔ-Nyɔŋmɔ lɛ yi. Gbɛgbalɔi awamɔ yɛ April mli lɛ ji gbɛ ni hi jogbaŋŋ ni wɔɔtsɔ nɔ wɔjie hiɛsɔɔ ni wɔyɔɔ kɛha eduromɔ babaoo ni ejie lɛ kpo etsɔɔ wɔ lɛ kpo wɔtsɔɔ.