Okɛ Woji Tɛtrɛbii ni Hi Fe Fɛɛ Eko yɛ Je Lɛŋ lɛ Aha
1 Buu-Mɔɔ lɛ yiŋtoo ni aŋma afɔ shi lɛ ji “ni ewo Yehowa Nyɔŋmɔ nɔ akɛ jeŋ muu fɛɛ Nuŋtsɔ.” Awake! lɛ “gbeleɔ weku mlibii lɛ fɛɛ ajwɛŋmɔŋ. . . . Wolo tɛtrɛɛ nɛɛ kɛ jeŋ hee ni toiŋjɔlɛ kɛ shweshweeshwe shihilɛ yɔɔ mli lɛ he shiwoo ni Bɔlɔ lɛ kɛha lɛ mli nɔmimaa ni aaana lɛ haa.” Saji ni atsɛ́ sɛɛ ni aŋmala nɛɛ jɛ woji tɛtrɛbii lɛ diɛŋtsɛ amli. Otii nɛɛ asɛɛdii eha woji tɛtrɛbii lɛ efee miishɛjemɔ jɛɛhe kɛha kanelɔi akpekpei abɔ lɛ.
2 Wɔbaaha ashɛ woji nɛɛ yɛ April kɛ May yɛ wɔ sɔɔmɔ nitsumɔ lɛ mli. Bɔni afee ni wɔkɛha ni emɔ shi lɛ, ehe miihia ni wɔle amɛmli saji lɛ ojogbaŋŋ. Kanemɔ eko fɛɛ eko, ni okadi otii ni obaanyɛ okɛtsu nii beni okɛhaa lɛ. Susumɔ nɔ ni kɔɔ gbɔmɛi lɛ ahe. Mɛɛ shihilɛ mli saji, weku mli saji, loo henumɔ mli saji gbaa okuuŋbii lɛ ateŋ mɛi babaoo ajwɛŋmɔ naa lɛ? Bɔɔ mɔdɛŋ osusu nɔ ni obaanyɛ okɛɛ ni baabote amɛtsuii amli jogbaŋŋ lɛ he koni etsirɛ amɛ ni amɛna babaoo ni amɛaakase lɛ he suɔmɔ.
3 Kɛ ooma April 1 Buu-Mɔɔ lɛ nɔ mi: Mɛi babaoo miishwe ni amɛna jeŋ ni hi ni naagbai babaoo ni haaa amɛna miishɛɛ bei pii ŋmɛnɛ lɛ bɛ mli.
Beni ojie ohe kpo sɛɛ lɛ, obaanyɛ okɛɛ akɛ:
◼ “Masumɔ akɛ mikɛ miishɛɛ sane ko ni hiɛ yitso akɛ ‘Jeŋ ni Hi—Ani Eji Lamɔ ko Kɛkɛ?’ lɛ atsɔɔ bo. Ekɛɔ akɛ: ‘Eka shi faŋŋ akɛ, je nɛɛ, ni ji wɔje lɛ jeee he ko ni hi. . . . Abaanyɛ ato amrɔ nɛɛ haomɔi lɛ anaa kakadaŋŋ ni esɛɛ efooo.’ Shihilɛ ni tamɔ nɛkɛ lɛ haa ewaa akɛ wɔɔkpa nɔ ko kpakpa gbɛ yɛ wɔsɛɛ shihilɛ mli, aloo jeee nakai? Shi kɛlɛ, ha matsɔɔ bo nɔ ni Lala 37:11 kɛɔ yɛ wɔsɛɛ shihilɛ lɛ he.” Kɛ okane kuku lɛ ogbe naa lɛ, bi shiatsɛ lɛ ni etsɔɔ bɔ ni enuɔ shiwoo nɛɛ shishi ehaa. Kɛ eha hetoo ni ja lɛ, gbelemɔ kɛya sane ni ji “Jeŋ ni Hi—Ebɛŋkɛ!” yɛ baafa 4, ni okɛɛ akɛ: “Atsɛ Ŋmalɛi sɔrɔtoi asɛɛ, ni nɔ ni wɔkane amrɔ nɛɛ yɛ Lala 37:11 lɛ hu fata he. Miheɔ miyeɔ akɛ obaana saji nɛɛ akanemɔ kɛ saji ni atsɛ yisɛɛ ni oootao yɛ o-Biblia lɛ mli lɛ he miishɛɛ. Mana he miishɛɛ akɛ mashi enɛɛmɛi maha bo.” Nyiɛmɔ miishɛɛ ni atsɔɔ lɛ sɛɛ kɛtsɔ gbɛjianɔ ni oooto kɛha sɛɛsaramɔ lɛ nɔ.
4 Kɛ ooma April 15 Buu-Mɔɔ lɛ nɔ mi: Sane ni yɔɔ baafa 4 lɛ biɔ akɛ: “Nɛgbɛ Obaana Gbɛtsɔɔmɔ ni Akɛ He Fɔɔ nɔ Yɛ?”
Beni ojie ohe kpo sɛɛ lɛ, obaanyɛ okɛɛ akɛ:
◼ “Naagbai sɔrɔtoi babaoo yɛ je lɛŋ ŋmɛnɛ, tamɔ [tsɔɔmɔ nɔ ko ni ba nyɛsɛɛ nɛɛ ni kɔɔ akutso lɛ he aloo adafitswaa ko saneyitso]. Ehaa wɔsusuɔ kɛji be ko baaba ni mɔ fɛɛ mɔ baanyɛ aje shihilɛ kɛ emli naagbai babaoo nɛɛ amli lɛ he. Miishɛɛ sane ji akɛ, 2 Timoteo 3:16, 17 haa wɔnaa nɔmimaa akɛ Biblia lɛ ji gbɛtsɔɔmɔ kɛha shihilɛ ni miishɛɛ kɛ shweshweeshwe shihilɛ yɔɔ mli lɛ námɔ.” Kɛ okane kukuji nɛɛ ogbe naa lɛ, tsɔɔmɔ bɔ ni Buu-Mɔɔ lɛ yeɔ ebuaa ni wɔnuɔ nɔ hewɔ ni Biblia lɛ ji gbɛtsɔɔmɔ ni akɛ he fɔɔ nɔ lɛ shishi ni oto he gbɛjianɔ koni eshɛ woji lɛ.
5 Kɛ oosumɔ ni owie Awake! lɛ he lɛ, no lɛ obaanyɛ okɛ March 22 nɔ lɛ kɛ emli sane ni ji “How Can I Avoid Toying With Immorality?” lɛ atsu nii. Ekolɛ obaana akɛ mɛi babaoo miisusu yibii fɔji ni jeŋba shara woɔ lɛ he waa ni amɛmiisumɔ ni amɛle nɔ ni abaanyɛ afee yɛ he.
6 Kɛ wɔyɛ ekãa yɛ wɔwoji tɛtrɛbii ni hi fe fɛɛ eko yɛ je lɛŋ lɛ ahe lɛ, no lɛ wɔbaasumɔ waa akɛ wɔkɛaaha mɛi krokomɛi koni amɛ hu amɛmɔ Maŋtsɛyeli hiɛnɔkamɔ lɛ mli ni amɛfata he ni awo Yehowa nɔ akɛ jeŋ muu fɛɛ Nuŋtsɔ.—Lala 83:19.