Okɛ Wɔ Woji Tɛtrɛbii lɛ Atsu Nii Jogbaŋŋ
1 Kɛ obɛŋkɛ adafitswaa woji ahɔɔmɔ he lɛ, mɛni onaa? Woji tɛtrɛbii. Kɛ oyɛ shwapo ko he yɛ gbɛjegbɛ koji lɛ eko naa lɛ, mɛni gbalaa ojwɛŋmɔ? Woji tɛtrɛbii. No hewɔ lɛ mɛni mɛi babaoo kaneɔ? Woji tɛtrɛbii. Akɔntaabui etsɔɔ akɛ obalahii kɛ obalayei bibii 10 fɛɛ 10 lɛ ateŋ mɛi 9 ni eye kɛjɛ afii 10 kɛmiiya 18 lɛ, kɛ yibɔ ni tamɔ nakai nɔŋŋ yɛ mɛi ni edara fe nakai lɛ agbɛfaŋ, kɛ hoo lɛ kaneɔ wolo tɛtrɛɛ kome daa nyɔŋ kome. Je lɛ sumɔɔ woji tɛtrɛbii waa.
2 Ani wɔbaanyɛ wɔha mɛi ni tsui ja lɛ asumɔ Buu-Mɔɔ kɛ Awake! lɛ kanemɔ waa? Hɛɛ, wɔbaanyɛ, kɛ́ wɔ diɛŋtsɛ lɛ WƆSUMƆƆ Buu-Mɔɔ kɛ Awake! lɛ kanemɔ waa lɛ. Mɛni baanyɛ aye abua wɔ? Susumɔ ŋaawoi nɛɛ ahe:
◼ Kanemɔ Woji Tɛtrɛbii Lɛ: Nɔkwɛlɔ gbɛfalɔ ko bɔ amaniɛ akɛ, kɛ aja mli lɛ, shiɛlɔi ni yɔɔ ekpokpaa lɛ mli lɛ ateŋ mɛi 3 mli 1 pɛ kaneɔ Buu-Mɔɔ kɛ Awake! muu lɛ fɛɛ eko ni baa. Ani bo hu okaneɔ lɛ nakai? Be mli ni okaneɔ emli saji lɛ fɛɛ eko lɛ, bi ohe akɛ, ‘Namɔ baana sane nɛɛ he miishɛɛ—nyɛ ko, mɔ ni susuɔ akɛ Nyɔŋmɔ bɛ, jarayelɔ ko, obalanyo fioo loo obalayoo fioo ko?’ Kadimɔ oti kome loo enyɔ ni obaanyɛ okɛtsu nii yɛ be mli ni okɛ woji tɛtrɛbii lɛ haa yɛ bo diɛŋtsɛ onɔ lɛ mli. No sɛɛ lɛ susumɔ bɔ ni ooofee otee miishɛɛ shi yɛ sane lɛ he yɛ wiemɔ kome loo wiemɔi enyɔ mli.
◼ Na Woji Tɛtrɛbii Ayibɔ ko ni Oheɔ Daa: Okɛ nyɛmi nuu ni kwɛɔ woji tɛtrɛbii anɔ lɛ ato gbɛjianɔ kpakpa ko kɛha ekomekomei ni baa lɛ fɛɛ eko yibɔ ko ni tsakeee. Kɛtsɔ nɛkɛ gbɛ nɔ lɛ, bo kɛ oweku lɛ baana woji tɛtrɛbii ni akɛhaa nyɛ lɛ yibɔ ni sa daa.
◼ Too Woji Tɛtrɛbii Agbi ni Okɛbaatsu Nii Daa He Gbɛjianɔ: Asafoi pii eto gbi ko ni amɛhala lɛ amɛma shi kɛha woji tɛtrɛbii kɛ odaseyeli pɛ. Ani obaanyɛ ofi asafo lɛ Woji Tɛtrɛbii Agbi lɛ sɛɛ? Kɛ jeee nakai lɛ, bɔɔ mɔdɛŋ ni oto be he gbɛjianɔ oha sɔɔmɔ lɛ kɛha woji tɛtrɛbii kɛhamɔ ni okɛ ohe aaawo mli diɛŋtsɛ, yɛ shinaai anaa kɛ agbɛnɛ yɛ hei ni okɛhaa mɛi daa yɛ lɛ.
◼ Feemɔ Mɔ ni Sumɔɔ “Buu-Mɔɔ” kɛ “Awake!” lɛ Kanemɔ Waa: Ha woji tɛtrɛbii komekomei lɛ eko ahi ohe beni ofaa gbɛ loo oyaa shwapo mli oyahe nii. Okɛha beni okɛ nanemɛi nitsulɔi, akutsoŋbii, skul nanemɛi, loo tsɔɔlɔi wieɔ. Gbalashihilɛ mli hefatalɔi ni fɔɔ kɔɔyɔɔ lɛlɛ mli tamɔ kɛ gbɛfaa lɛ kɛ woji tɛtrɛbii heei lɛ eko mli oti kome tsu nii ni amɛkɛtee amɛkɛ gbɛfalɔ kroko ni ta amɛmasɛi lɛ sanegbaa shi. Amɛna niiashikpamɔi ni yɔɔ miishɛɛ babaoo mli ŋɔɔmɔ. Obalahii kɛ obalayei bibii komɛi kɛ emli saji ni amɛsusuɔ akɛ amɛtsɔɔlɔi kɛ nanemɛi nikaselɔi baana he miishɛɛ lɛ baa skul daa. Ha ekomɛi ahi ohe beni oyaa oyahe nɔ ko lɛ, ni okɛha jarayelɔi lɛ beni ogbe ojarayeli lɛ naa. Wɔteŋ mɛi babaoo heɔ pɛtro daa; mɛni hewɔ okɛ woji tɛtrɛbii lɛ haaa mɔ ni hɔɔ pɛtro lɛ? Hiɛmɔ eko yɛ be mli ni wekumɛi basaraa bo, be mli ni ota tsɔne ni maŋbii tara mli lɛ, loo be mli ni omɛɔ kɛha nɔ ko tsumɔ. Ani obaanyɛ osusu shihilɛi krokomɛi ni sa lɛ ahe?
◼ Okɛ Wolo Tɛtrɛɛ Kɛhamɔ He Shiɛmɔ Wiemɔ Kuku Asaa Ohe: Too gbɛjianɔ ni owie kuku, shi moŋ wiemɔ lɛ jogbaŋŋ. Okɛ miishɛɛ awie. Onine ashɛ tsui lɛ nɔ. Wiemɔ sane lɛ he pɔtɛɛ. Halamɔ oti kome ko kɛjɛ sane lɛ mli, ni owie lɛ kuku, ni okɛ woji tɛtrɛbii lɛ aha. Shiɛmɔ wiemɔ ni hi fe fɛɛ ji nɔ ni teeɔ sane ni ana he miishɛɛ lɛ he sanebimɔ shi, ni no sɛɛ lɛ etsɔɔ sane ni kɛ Ŋmalɛ mli hetoo haa lɛ. Susumɔ nɔkwɛmɔ nii fioo ko ni tsɔɔ bɔ ni abaanyɛ afee enɛ aha lɛ he:
3 Kɛ ooma sane ko ni kɔɔ bɔ ni awuiyeli yaa hiɛ lɛ nɔ mi lɛ, obaanyɛ obi akɛ:
◼ “Mɛni he baahia koni eha wɔnyɛ wɔwɔ gbɛkɛ ni wɔsheee awuiyeli ko gbeyei?” Ekolɛ shiatsɛ lɛ heee yeee akɛ nibii baahi. Obaanyɛ oha hetoo akɛ mɛi babaoo nuɔ he nakai nɔŋŋ, ni okɛfata he akɛ oyɛ sane ko ni oheɔ oyeɔ akɛ ebaana he miishɛɛ. No sɛɛ lɛ wiemɔ oti ni sa ni yɔɔ sane lɛ mli lɛ he.
4 Kɛ oowie sane ko ni kɔɔ weku shihilɛ he lɛ, obaanyɛ okɛɛ akɛ:
◼ “Mɛi babaoo naa akɛ ebafeɔ kaa diɛŋtsɛ akɛ aaana nitsumɔ koni akwɛ weku ko yɛ gbii nɛɛ amli. Aŋmala woji babaoo yɛ sane lɛ he, shi mɛi ni he esa po kɛ nɔ ni akɛha akɛ naagbai lɛ anaa tsabaa lɛ kpaaa gbee. Ani he ko yɛ ni wɔbaanyɛ wɔya ni wɔna gbɛtsɔɔmɔ ni akɛ he fɔɔ nɔ?” No sɛɛ lɛ tsɔɔmɔ wiemɔ pɔtɛɛ ko ni yɔɔ wolo tɛtrɛɛ lɛ mli ni jieɔ Biblia mli nilee lɛ kpo etsɔɔ.
5 Obaanyɛ okɛ gbɛ ni tamɔ nɛkɛ atsu nii yɛ be mli ni owieɔ sane ko ni kɔɔ shihilɛ mli naagba ko he:
◼ “Mɛi babaoo ebaje nɔnyɛɛ shishi ŋmɛnɛ. Nyɔŋmɔ etoko eyiŋ kɔkɔɔkɔ akɛ wɔhi shi yɛ nɛkɛ gbɛ nɔ.” No sɛɛ lɛ tsɔɔmɔ bɔ ni sane ni damɔ Biblia nɔ lɛ ni yɔɔ nɔ ni asusuɔ he lɛ mli lɛ baanyɛ aye abua wɔ ni wɔdamɔ shihilɛ mli naagbai anaa amrɔ nɛɛ, ni otsɔɔ tsabaa ni hiɔ shi daa yɛ wɔsɛɛ be mli lɛ he hiɛnɔkamɔ.
6 Ni tooyeli he sane hu? Kɛ mɛi bi nɔ hewɔ ni wɔkɛ woji tɛtrɛbii lɛ ekeee lɛ, obaanyɛ okɛɛ akɛ: “Eyɛ mli akɛ mɛi ni kɛ amɛhe eha ji mɛi ni feɔ wɔ woji lɛ moŋ, shi tooyeli fioo ni wɔheɔ lɛ yeɔ ebuaa ni akɛwoɔ nyɔmɔ lɛ fioo ko pɛ.”
7 Gbɛjegbɛ nɔ Odaseyeli Mɔɔ Shi Jogbaŋŋ: January 1940 Informant (Wɔ Maŋtsɛyeli Sɔɔmɔ) lɛ mli ni awo shiɛlɔi ahewalɛ klɛŋklɛŋ kwraa akɛ amɛto be kɛha gbi krɛdɛɛ ko daa otsi ni akɛ woji tɛtrɛbii lɛ aha yɛ gbɛjegbɛ nɔ odaseyeli mli. Ani okɛ ohe woɔ gbɛjegbɛ nɔ odaseyeli mli yɛ be kɛ beaŋ? Kɛ ofeɔ nakai lɛ, ani gbɛ ni okɛtsuɔ nii lɛ mɔɔ shi lɛlɛŋ? Anaa ni shiɛlɔi komɛi damɔɔ gbɛjegbɛi ni ahoɔ yɛ jɛmɛ waa lɛ akoji ni amɛkɛ amɛhe miigba sane yɛ be mli ni mɛi nyɔŋma-nyɔŋmai abɔ hoɔ ni amɛnaaa. Ni nyɛaahiɛ woji tɛtrɛbii lɛ kɛaabɛŋkɛ nyɛhe kɛdamɔ he kome moŋ lɛ, ebaafee nɔ ni mɔɔ shi jogbaŋŋ akɛ nyɛaagbála nyɛmli koni nyɛbɛŋkɛ mɛi ni hoɔ lɛ. Ekolɛ gbɔi baadamɔ shi ni amɛbo toi fioo pɛ kɛ mɔ kome pɛ bɛŋkɛ amɛ, shi mɛi ni hoɔ lɛ ateŋ mɛi fioo pɛ baabɛŋkɛ mɛi ni kɛ amɛhe ewo sanegbaa mli vii lɛ. Akɛni mɛi pii kwɛɔ wɔ yɛ gbɛjegbɛ nɔ hewɔ lɛ, ehe miihia waa akɛ wɔɔsaa wɔhe jogbaŋŋ ni wɔwo atade ni hiɛshikamɔ yɔɔ mli taakɛ bɔ ni sa Nyɔŋmɔ sɔɔlɔi.—1 Tim. 2:9, 10.
8 Mɛi ni Ayahaa Amɛ Woji Tɛtrɛbii Daa: Mɛi ni yɔɔ mɛi ni amɛyahaa amɛ woji tɛtrɛbii lɛ kɛ woji tɛtrɛbii babaoo haa, eyɛ mli moŋ akɛ atsuɔ shikpɔŋkuku lɛ mli nii daa. Mɛi ni ayahaa amɛ woji tɛtrɛbii lɛ daa lɛ ji he ni hi jogbaŋŋ fe fɛɛ ni abaanyɛ ana shia Biblia mli nikasemɔi kɛjɛ.
9 Kɛ ofee sɛɛsaramɔi daa koni okɛ woji tɛtrɛbii lɛ ayaha lɛ, obaana akɛ miishɛɛ kɛ naanyobɔɔ su ni ka bo kɛ shiatsɛ lɛ teŋ lɛ mli baawa. Kɛ nyɛlelee nyɛhe jogbaŋŋ lɛ, ebaafee mlɛo akɛ nyɛaagba Ŋmalɛ mli saneyitsei komɛi ahe sane. Enɛ baaha anyɛ aje shia Biblia mli nikasemɔ ni woɔ yibii lɛ shishi. Yɛ saramɔ lɛ fɛɛ eko mli lɛ, bɔɔ mɔdɛŋ ni oha ashɛ woji tɛtrɛbii lɛ. Ni kaimɔ akɛ, be fɛɛ be ni oooya shiatsɛ lɛ ŋɔɔ lɛ obaanyɛ okadi akɛ eji sɛɛsaramɔ.
10 Nyɛmi yoo ko kɛ woji tɛtrɛbii yahaa yoo ko ni heɔ be fɛɛ be lɛ daa, shi yoo lɛ kɛɛ: “Miheee nɔ ni okɛɔ mi lɛ miyeee.” Beni eyasara lɛ yɛ sɛɛ mli lɛ, nyɛmi yoo lɛ na ewu lɛ yɛ shia. Beni akɛ naanyobɔɔ su egba sane sɛɛ lɛ, ato gbɛjianɔ koni aje Biblia mli nikasemɔ shishi. Nyɛmi yoo lɛ kɛ bihii etɛ ni kɛ amɛhe bawo nikasemɔ lɛ mli lɛ bɔ naanyo. Yɛ naagbee mli lɛ, nyɛ lɛ kɛ ebihii lɛ jɔɔ amɛwala nɔ amɛha Yehowa ni abaptisi amɛ. Kɛbashi amrɔ nɛɛ, weku lɛ mli bii 35 emɔ anɔkwale lɛ mli. Enɛɛmɛi fɛɛ jɛ woji tɛtrɛbii ni nyɛmi yoo lɛ kɛyahaa lɛ ni edi sɛɛ lɛ hewɔ!
11 Gbɛi babaoo yɛ ni abaanyɛ atsɔ nɔ aná mɛi ni akɛ woji tɛtrɛbii baaha amɛ daa. Obaanyɛ oná mɔ ni obaaha lɛ woji tɛtrɛbii lɛ daa kɛtsɔ nɔ ni okɛha ni oooŋmala oshwie shi lɛ nɔ kɛkɛ, ni oto gbɛjianɔ koni oya ekoŋŋ otsii enyɔ fɛɛ otsii enyɔ ni okɛ eheei ni baa lɛ ayaha. Gbɛ kome ni oootsɔ nɔ ji ni okɛ saji ni yɔɔ saneyitso ni ji “Nɔ ni Nyiɛ Enɛ Sɛɛ” shishi lɛ atsu nii. Kɛ oku osɛɛ otee lɛ, kɛɛmɔ shiatsɛ lɛ akɛ oyɛ sane ni owie he nyɛsɛɛ ko lɛ. Aloo, kɛ oofee sɛɛsaramɔ lɛ, obaanyɛ okɛɛ akɛ: “Beni mikane sane nɛɛ, misusu akɛ obaanya he . . . ” No sɛɛ lɛ wiemɔ sane lɛ he kuku ni okɛha. Kɛ ogbe saramɔ lɛ naa lɛ, kadimɔ otii kukuji enumɔ yɛ oshia-kɛ-shia kadimɔ wolo lɛ nɔ: (1) shiatsɛ lɛ gbɛi, (2) adrɛs, (3) gbi ni otee eŋɔɔ, (4) woji tɛtrɛbii ni okɛha, kɛ (5) emli sane ni awie he. Shiɛlɔi komɛi eye omanye waa yɛ mɛi ni ayahaa amɛ woji tɛtrɛbii lɛ agbɛfaŋ, ni amɛŋmalaa mɛi babaoo aaashɛ 40 loo nɔ ni fe nakai agbɛi amɛshwieɔ shi!
12 Shikpɔŋkuku ni Nitsumɔ Hei Fa Yɛ Mli: Shiɛlɔi ni tsuɔ nii yɛ shikpɔŋkuku ni nitsumɔ hei fa yɛ mli lɛ kɛ woji tɛtrɛbii babaoo haa. Ani oka shwapoi anaa nitsumɔ okwɛ pɛŋ? Amaniɛbɔi tsɔɔ akɛ, he ni akɛwoɔ sɔɔmɔ nitsumɔ lɛ fa nɛɛ mli lɛ eyaaa hiɛ kwraa yɛ asafoi komɛi amli. Be ko ni eho lɛ, mɛi komɛi sheɔ gbeyei yɛ nitsulɔi ni aaaya amɛŋɔɔ lɛ ahewɔ, shi be mli ni amɛka amɛkwɛ yɛ bei fioo komɛi amli lɛ, amɛna akɛ eyɛ miishɛɛ ni nyɔmɔwoo hu yɛ mli. Mɛni hewɔ obiii shiɛlɔ ko ni he esa loo gbɛgbalɔ ko ni eye ebua bo ni oje shishi?
13 Sɛɛnamɔi babaoo yɛ shwapoi anaa nitsumɔ lɛ mli. Mɛi fioo pɛ anaaa amɛ, kɛ hoo lɛ yɛ nitsumɔ be mli! Bei pii lɛ nitsulɔi kɛ bulɛ haa mɛi, kɛ ekolɛ amɛnyaaa Biblia lɛ he tsɔ po. Jee shishi mra; ekolɛ abaabo bo toi jogbaŋŋ. Beni ojie ohe kpo sɛɛ lɛ, obaanyɛ okɛɛ akɛ bei pii lɛ onaaa nitsulɔi yɛ shia, ni yɛ no hewɔ lɛ oosara amɛ be kuku pɛ yɛ amɛ nitsumɔ he koni okɛ Buu-Mɔɔ kɛ Awake! heei ni eba lɛ eko abaha amɛ. Tsɔɔmɔ mli akɛ nitsulɔi babaoo sumɔɔ wɔ woji tɛtrɛbii lɛ akɛni amɛmiisumɔ ni amɛle saji ni yaa nɔ yɛ je lɛŋ ŋmɛnɛ lɛ hewɔ, shi be fioo pɛ amɛnaa kɛkaneɔ nii. Woji tɛtrɛbii lɛ kɛ saji ni teeɔ sane hesusumɔ shi yɛ gbɛ kroko kwraa nɔ haa, yɛ be mli ni ewieee nɔ kome pɛ he yɛ jamɔ, maŋkwramɔ, loo jarayeli gbɛfaŋ. Abaanyɛ aha mɛi ni yɔɔ he miishɛɛ yɛ shikpɔŋkuku ni nitsumɔ hei fa yɛ mli lɛ afee mɛi ni ayahaa amɛ woji tɛtrɛbii daa.
14 Nyɛsaa Nyɛhe akɛ Weku: Abaanyɛ ato be ko ama shi yɛ nyɛ weku nikasemɔ lɛ mli koni agba woji tɛtrɛbii heei ni eba lɛ amli saji ni baasa kɛha nyɛ shikpɔŋkuku lɛ mli nitsumɔ. Weku mli bii—ni gbekɛbii fata he lɛ—baanyɛ afee amɛshiɛmɔ wiemɔi lɛ ahe nɔkwɛmɔ nɔ amɛtsɔɔtsɔɔ amɛhe ni amɛye shitee-kɛ-woo wiemɔi ni ateeɔ amɛ shi tamɔ: “Mibɛ dekã,” “Wɔyɛ wɔ diɛŋtsɛ wɔ jamɔ,” loo “Mibɛ he miishɛɛ” lɛ nɔ kunim. Ekomefeemɔ kpakpa baanyɛ aha weku muu lɛ fɛɛ ana woji tɛtrɛbii kɛhamɔ lɛ mli gbɛfaŋnɔ daa.
15 Woloŋ Nikasemɔ Nɔkwɛlɔi Baanyɛ Aye Abua: Kɛ eeehi lɛ, nyɛtoa kpeei kɛha shiɛmɔyaa kɛha Woji Tɛtrɛbii Agbi lɛ he gbɛjianɔ yɛ woloŋ nikasemɔ hei lɛ, fe ni aaaha asafo muu lɛ fɛɛ akpe yɛ Maŋtsɛyeli Asa lɛ nɔ. Esa akɛ mɛi ni kwɛɔ kpeei kɛha shiɛmɔyaa nɔ lɛ kɛ ŋaawoi pɔtɛɛi komɛi asaa amɛhe jogbaŋŋ amɛha kuu lɛ. Nɔ ni fata enɛɛmɛi ahe ji shiɛmɔ wiemɔ he nɔkwɛmɔ nɔ kɛ oti kome loo enyɔ ni jɛ woji tɛtrɛbii heei lɛ amli ni abaanyɛ akɛtsu nii ni akɛtee miishɛɛ shi yɛ akutso lɛ mli. Kpeei kɛha shiɛmɔyaa—ni kuu lɛ he gbɛjianɔtoo fata he lɛ—afee kuku, ni ekatsɛ fe minitii 10 kɛmiiya 15. Esa akɛ nikasemɔ nɔkwɛlɔi lɛ akwɛ ni ana shikpɔŋkuku ni da koni aha kuu lɛ atsu nii babaoo yɛ shiɛmɔyaa be lɛ fɛɛ mli.
16 Ohiɛ Asɔ Woji Tɛtrɛbii Lɛ: Sane ni ji “Buu-Mɔɔ kɛ Awake! lɛ ni Wɔkɛaatsu Nii Jogbaŋŋ” lɛ ni aŋma yɛ August 1993 Wɔ Maŋtsɛyeli Sɔɔmɔ lɛ mli lɛ kɛ oti ni he hiaa nɛɛ ma shi akɛ: “Buu-Mɔɔ kɛ Awake! lɛ ahe sɛɛnamɔ lɛ elaajeee, kɛ akɛ fɛɛ po hako yɛ nyɔŋ nɔ ni eje kpo lɛ sɛɛ nyɔŋ kome loo nyɔji enyɔ mli. Saji ni yɔɔ mli lɛ efeee nɔ ni he ehiaaa dɔŋŋ yɛ be ni eshwie mli lɛ hewɔ . . . Ni wɔɔha woji tɛtrɛbii memeji lɛ atĩa kɛma shi ni wɔkɛtsuuu nii kwraa lɛ tsɔɔ hiɛsɔɔ ni wɔbɛ kɛha nɛkɛ dɛŋdadei ni he yɔɔ sɛɛnamɔ nɛɛ. . . . Yɛ nɔ najiaŋ ni wɔkɛ ememeji lɛ aaashwie afa ni wɔhiɛ akpa nɔ lɛ, ani ehiŋ moŋ akɛ wɔɔbɔ mɔdɛŋ yɛ gbɛ krɛdɛɛ nɔ ni wɔshi wɔha mɛi ni yɔɔ wiemɔ lɛ he miishɛɛ lɛ?”
17 Mɛi babaoo ni hiɛ tsui ni ja yɛ ŋmɛnɛ ni miitao anɔkwale lɛ. Ekolɛ saji ni yɔɔ wolo tɛtrɛɛ kome mli lɛ nɔŋŋ ji nɔ ni he baahia amɛ koni ekɛ amɛ aya anɔkwale lɛ he! Yehowa kɛ shɛɛ sane ni haa mɔ mli filiɔ lɛ lɛ eha wɔ koni wɔjaje, ni wɔ woji tɛtrɛbii lɛ tsuɔ gbɛfaŋnɔ ko ni he hiaa yɛ shɛɛ sane ni wɔkɛhaa mɛi krokomɛi lɛ mli. Ani okɛ ohe baawo woji tɛtrɛbii kɛhamɔ lɛ mli waa yɛ be ni ka wɔhiɛ lɛ mli? Ani okɛ ŋaawoi nɛɛ ekomɛi baatsu nii yɛ otsi naagbee ni baa nɛɛ mli? Abaajɔɔ bo babaoo kɛ ofee nakai.
Ŋaawoi Kpakpai:
◼ Kanemɔ woji tɛtrɛbii lɛ kɛtsɔ hiɛ, ni ole emli saji.
◼ Halamɔ sane ni kɔɔ nɔ ni asusuɔ he waa yɛ nyɛ akutso lɛ mli lɛ he.
◼ Okɛ shiɛmɔ wiemɔ ni baahi kɛha mɛi sɔrɔtoi babaoo, tamɔ hii, yei, loo obalahii kɛ obalayei bibii lɛ asaa ohe. Tsɔɔmɔ bɔ ni wolo tɛtrɛɛ lɛ kɔɔ shiatsɛ lɛ he ehaa kɛ bɔ ni weku muu lɛ fɛɛ baana he miishɛɛ amɛha.
◼ Too gbɛjianɔ ni okɛ ohe awo shiɛmɔ nitsumɔ lɛ mli yɛ be mli ni mɛi pii yɔɔ shia lɛ. Asafoi komɛi toɔ gbɛkɛnaashi odaseyeli kɛha woji tɛtrɛbii kɛhamɔ lɛ he gbɛjianɔ.
◼ Ha oshiɛmɔ wiemɔ lɛ afee kuku ni ekɔ oti lɛ he tɛɛ.
◼ Kaawie oyayaayai. Kɛ otoibolɔ lɛ bɛ he miishɛɛ lɛ, wiemɔ oyayaayai lɛ tsuŋ nɔ ko. Bɔɔ mɔdɛŋ ni ona tsui, ni oha shiatsɛ lɛ hegbɛ koni ewie.
Woji Tɛtrɛbii lɛ Kɛhamɔ yɛ Shia kɛ Shia:
◼ Okɛ naanyobɔɔ su afee ohiɛ ŋmɔlɔŋmɔlɔ ni owie kɛ gbèe kpakpa.
◼ Jiemɔ miishɛɛ kpo yɛ woji tɛtrɛbii lɛ ahe.
◼ Wiemɔ bɛlɛoo ni emli atse jogbaŋŋ hu.
◼ Wiemɔ saneyitso kome pɛ he; ni otee miishɛɛ shi kuku, ni otsɔɔ bɔ ni ehe yɔɔ sɛɛnamɔ kɛha shiatsɛ lɛ.
◼ Maa sane kome pɛ nɔ mi.
◼ Wiemɔ wolo tɛtrɛɛ kome pɛ he, ni okɛ ekome lɛ afata he kɛha.
◼ Okɛ woji tɛtrɛbii lɛ awo shiatsɛ lɛ dɛŋ.
◼ Ha shiatsɛ lɛ ale akɛ oto gbɛjianɔ akɛ obaaba ekoŋŋ.
◼ Okɛ wiemɔ lɛ aba naagbee yɛ naanyobɔɔ su mli, kɛ aheee woji tɛtrɛbii lɛ.
◼ Kadimɔ miishɛɛ kɛ woji fɛɛ ni ahe lɛ yɛ shia-kɛ-shia kadimɔ wolo lɛ nɔ.
Hegbɛi ni Aaana Kɛha Woji Tɛtrɛbii Kɛhamɔ:
◼ Shia-kɛ-shia odaseyeli
◼ Gbɛjegbɛ nɔ odaseyeli
◼ Shwapoi anaa nitsumɔ
◼ Mɛi ni ayahaa amɛ woji tɛtrɛbii ni akuɔ sɛɛ ayasaraa amɛ
◼ Gbɛkɛnaashi odaseyeli
◼ Be mli ni aafee sɛɛsaramɔi
◼ Tsutsu Biblia mli nikaselɔi ni ayasaraa amɛ
◼ Be mli ni ofaa gbɛ, oyaahe nii yɛ shwapo mli
◼ Be mli ni okɛ wekumɛi, nanemɛi nitsulɔi, akutsoŋbii, skulbii, tsɔɔlɔi wieɔ
◼ Be mli ni ota tsɔne ni maŋbii kɛfaa gbɛ lɛ mli, kɛ beni atara tsũi ni amɛɔ yɛ mli lɛ amli