Hiɛmɔ Jwɛŋmɔ Kpakpa Mli Daa
1 Kwɛ bɔ ni wɔna miishɛɛ wɔha beni wɔkane shweremɔ ni yɔɔ naakpɛɛ, ni yaa nɔ yɛ shikpɔji pii anɔ lɛ he sane lɛ! Ni kɛlɛ, wɔyooɔ akɛ bei pii lɛ, Maŋtsɛyeli shiɛlɔi kɛ ta ni sane etaaa mɔ tsuiŋ, shikpilikpii-feemɔ, aloo wɔ shiɛmɔ nitsumɔ lɛ he shitee-kɛ-woo diɛŋtsɛ po kpeɔ yɛ hei komɛi. Te wɔɔfee tɛŋŋ wɔhiɛ jwɛŋmɔ kpakpa be fɛɛ be kɛji nɛkɛ ji shihilɛ ni yɔɔ wɔshikpɔŋkuku lɛ mli? Mɛɛ gbɛ nɔ wɔɔtsɔ wɔtsĩ jwɛŋmɔ ni ejaaa, ni baanyɛ aha wɔmiishɛɛ lɛ alaaje, aloo eba ekaa ni wɔyɔɔ kɛha kaselɔ feemɔ nitsumɔ lɛ shi lɛ naa?
2 Jwɛŋmɔ kpakpa baaye abua wɔ ni wɔŋmɛ pɛpɛɛpɛ. Kɛ wɔyaje shihilɛi ni kaa mɔ shishi po lɛ, esaaa ni wɔhaa jwɛŋmɔi ni ejaaa yeɔ wɔsusumɔi anɔ. Yesu fee nɔkwɛmɔ nɔ ni yeɔ emuu efɔ shi eha wɔ. Mɛi fioo pɛ kpɛlɛ nii ni etsɔɔ lɛ nɔ. Mɛi pii anaji tɔ̃tɔ̃ yɛ enitsɔɔmɔ lɛ hewɔ. Ekɛ shihilɛi komɛi kpe ni ka etsuishiŋmɛɛ. Jamɔ mli hiɛnyiɛlɔi wie amɛshi enitsumɔ lɛ ni amɛtee eyinɔ apam akɛ amɛbaagbe lɛ. Atsɛ̃rɛ̃ lajɔ ashwie ehiɛ, agbala lɛ mãi, aye ehe fɛo, ayi lɛ, ni yɛ naagbee lɛ agbe lɛ. Shi kɛlɛ, ena miishɛɛ yɛ nitsumɔ ni etsuɔ lɛ mli. Mɛni hewɔ? Eyoo bɔ ni ehe hiaa akɛ efee Nyɔŋmɔ suɔmɔnaa nii, ni no hewɔ lɛ enijiaŋ ejeee wui.—Yoh. 4:34; 13:17; Heb. 12:2.
3 Hiɛmɔ Jwɛŋmɔ Kpakpa yɛ Wɔ Sɔɔmɔ lɛ He Daa: Kɛ wɔɔfee enɛ lɛ, no lɛ ehe miihia ni wɔha otii babaoo ahi wɔjwɛŋmɔ mli. Kaimɔ akɛ wɔhiɛ shɛɛ sane ko ni mɛi pii tswaa amɛshɛɔ amɛfɔ̃ɔ loo amɛteɔ shi amɛwoɔ. (Mat. 13:14, 15) Eyɛ mli akɛ afã bɔfoi lɛ yɛ mla naa akɛ amɛkpa shiɛmɔ yɛ Yesu gbɛi amli moŋ, shi amɛtee nɔ amɛye nitsumɔ ni aha amɛ akɛ amɛshiɛ lɛ mli anɔkwa, ni nikpamɔ lɛ tee nɔ eba babaoo. (Bɔf. 5:28, 29; 6:7) Wɔle kɛtsɔ hiɛ momo akɛ mɛi fioo pɛ ji mɛi ni baabo wɔ toi, yɛ shikpɔŋkukuji komɛi amli. (Mat. 7:14) Enɛ hewɔ lɛ, wɔyɛ yiŋtoo ni wɔɔdamɔ nɔ wɔna miishɛɛ kɛji mɔ koome pɛ bo wɔ toi yɛ wɔshikpɔŋkuku lɛ mli. Kaimɔ hu akɛ, esa akɛ wɔha mɛi ni teɔ shi woɔ wɔ lɛ po hegbɛ ni amɛ hu amɛnu. (Ezek. 33:8) Yɛ naagbee lɛ, shitee-kɛ-wolɔi nɛɛ ekomɛi tsakeɔ ni amɛtsɔmɔɔ Yehowa jalɔi. No hewɔ lɛ, kɛ wɔsusu he yɛ gbɛ kpakpa nɔ lɛ, wɔ sɔɔmɔ nitsumɔ lɛ haa wɔnaa henumɔ akɛ wɔnyɛ nɔ ko wɔtsu, kɛji mɛi fioo pɛ bo wɔ toi po. Nyɔŋmɔ Maŋtsɛyeli lɛ he shɛɛ sane lɛ ni wɔkɛyaa shinaai anaa lɛ po kɛkɛ feɔ odaseyeli.—Ezek. 2:4, 5.
4 Wɔyɛ yiŋtoo kpakpa ni baaha wɔkɛ jwɛŋmɔ kpakpa asusu saji ahe. Esa akɛ bɔ ni jeŋ muu fɛɛ nitsumɔ lɛ shwereɔ ehaa, kɛ bɔ ni amanehulu kpeteŋkpele lɛ ebɛŋkɛ kpaakpa eha lɛ he odaseyeli ni faa babaoo daa nɛɛ, aye abua wɔteŋ mɔ fɛɛ mɔ ni wɔfee bɔ fɛɛ bɔ ni wɔɔnyɛ ni wɔkɛ Nyɔŋmɔ jamɔ hetuu-kɛhamɔ asɔmɔ. (2 Pet. 3:11, 14) Ekaa ni wɔkɛaatsu nii yɛ August mli lɛ baafee gbɛ kpakpa ni wɔɔtsɔ nɔ wɔjie hiɛsɔɔ ni wɔyɔɔ kɛha nɔ ni wɔkase lɛ kpo, kɛ gbɛ ni sa jogbaŋŋ hu ni wɔɔtsɔ nɔ wɔmu sɔɔmɔ afi lɛ naa. Wɔmiisumɔ ni mɛi heei ni kɛ wɔ ebɔi bɔɔ lɛ hu ana jwɛŋmɔ kpakpa yɛ nɔ ni atsɔɔ amɛ lɛ kɛ nitsumɔ mli. Kɛji wɔ Biblia kaselɔi lɛ ateŋ mɛi komɛi etee hiɛ kɛyashɛ he ni amɛfee klalo akɛ amɛaatsɔmɔ shiɛlɔi ni abaptisiko amɛ lɛ, no lɛ August nyɔŋ lɛ baafee nyɔŋ ni hi jogbaŋŋ ni amɛkɛaaje shishi.
5 Kɛji wɔmiisɔmɔ akɛ shiɛlɔi jio gbɛgbalɔi jio, kɛ wɔkai akɛ nɔ ni Yehowa taoɔ yɛ wɔdɛŋ lɛ jeee jatsu ni tsii lɛ, eyeɔ ebuaa wɔteŋ mɔ fɛɛ mɔ. (1 Yoh. 5:3) Ewo shi akɛ ebaawaje wɔ. (Heb. 13:5b, 6) Yɛ gbɔmɛi lɛ ashikpilikpii-feemɔ, ta ni sane etaaa mɔ tsuiŋ, aloo shitee-kɛ-woo lɛ fɛɛ sɛɛ lɛ, esa akɛ wɔna jwɛŋmɔ kpakpa ni wɔya nɔ wɔshiɛ ejaakɛ eji Nyɔŋmɔ suɔmɔnaa nii akɛ wɔfee nakai.—1 Tim. 2:3, 4.