Sɔɔmɔ Kpeei Kɛha August
Otsi ni Jeɔ Shishi August 1
Lala 159
15 min: Asafoŋ adafitswai kɛ Adafitswai ni sa ni jɛ Wɔ Maŋtsɛyeli Sɔɔmɔ lɛ mli. Afee otii kɛha sanegbaa, ni yɔɔ woji tɛtrɛbii heei lɛ amli, ni abaanyɛ awie he yɛ shiɛmɔ mli otsi nɛɛ naagbee lɛ ahe nɔkwɛmɔ nɔ.
15 min: “Hiɛmɔ Jwɛŋmɔ Kpakpa Mli Daa.” Sanebimɔi kɛ hetooi. Abibii gbɛgbalɔ aloo shiɛlɔ ko ni etsɛ saji, ni egba bɔ ni enyɛ ehiɛ jwɛŋmɔ kpakpa mli daa, yɛ shikpilikpii-feemɔ loo shitee-kɛ-woo ni ekɛkpeɔ yɛ shikpɔŋkuku lɛ mli lɛ fɛɛ sɛɛ.
15 min: “Woji Bibii—Dɛŋdadei ni He Yɔɔ Sɛɛnamɔ Kɛha Sɔɔmɔ Nitsumɔ Lɛ.” Akɛ toibolɔi lɛ agba sane. Ato gbɛjianɔ kɛha shiɛmɔ wiemɔi ni atsɔɔ lɛ ahe nɔkwɛmɔ nɔ feemɔ ni asaa he jogbaŋŋ yɛ mli. Akɛ woji bibii ni akɛbaatsu nii yɛ August mli lɛ ekomɛi atsɔɔ. Akai toibolɔi lɛ ni amɛyahe eko kɛha nitsumɔ yɛ sɔɔmɔ nitsumɔ lɛ mli otsi nɛɛ.
Lala 142 kɛ naagbee sɔlemɔ.
Otsi ni Jeɔ Shishi August 8
Lala 216
10 min: Asafoŋ adafitswai. Teokrase lɛ He Saji.
15 min: “Le Onyɛmimɛi lɛ Jogbaŋŋ.” Sanebimɔi kɛ hetooi. Abi toibolɔi lɛ ni amɛgba niiashikpamɔi kukuji ni tsɔɔ bɔ ni fee ni amɛnyɛ amɛle mɛi krokomɛi jogbaŋŋ kɛtsɔ ŋaawoi ni yɔɔ kuku 6 lɛ kɛ nitsumɔ nɔ.
20 min: Babaoo ni Wɔɔfee yɛ Trukaa Odaseyeli Mli. Shiɛlɔi akuu ni ji mɛi etɛ loo mɛi ejwɛ miisusu bɔ ni amɛaafee amɛha gbɛfaŋnɔ ni amɛnaa yɛ nitsumɔ nɛɛ mli lɛ aya hiɛ lɛ he. Amɛkɛ October 15, 1987, Watchtower, baafai 22-7 atsu nii, ni amɛkɛsusu nɔ ni mɛi krokomɛi efee lɛ he, ni amɛtsɔɔ gbɛjianɔ ni amɛto koni amɛtsu nitsumɔ nɛɛ babaoo. Sɛinɔtalɔ lɛ awo toibolɔi lɛ hewalɛ ni amɛsusu bɔ ni amɛaafee amɛna sɔɔmɔ lɛ fã nɛɛ mli gbɛfaŋnɔ lɛ he.
Lala 182 kɛ naagbee sɔlemɔ.
Otsi ni Jeɔ Shishi August 15
Lala 166
5 min: Asafoŋ adafitswai, kɛ shika he akɔntaabuu kɛ nɔ ni akɛmaje kɛke lɛ hu he saji.
15 min: “Miishɛɛ ni Wɔɔha Eya Hiɛ yɛ Sɛɛsaramɔi Amli.” Akɛ toibolɔi asusu he. Akɛ nɔkwɛmɔ nii enyɔ, ni eko fɛɛ eko heɔ minitii 3 afata he, ni akɛtsɔɔ bɔ ni abaanyɛ akɛ wiemɔi lɛ atsu nii ni akɛfee sɛɛsaramɔi. Awo hewalɛ ni abɔ mɔdɛŋ aje Biblia mli nikasemɔ shishi.
25 min: “Yaa nɔ Onyiɛ yɛ Hiɛyaa Mli yɛ Gbɛjianɔtoo Kpakpa Naa.” Sanebimɔ-kɛ-hetoo ni akɛaasusu nɔ ni aŋma ahɔ mli lɛ he.
Lala 96 kɛ naagbee sɔlemɔ.
Otsi ni Jeɔ Shishi August 22
Lala 218
5 min: Asafoŋ adafitswai.
20 min: Mɛɛ Gbɛ nɔ Matsɔ Mabɛŋkɛ Nyɔŋmɔ Kpaakpa? Weku nikasemɔ he nɔkwɛmɔ nɔ. Fɔlɔi kɛ obalaŋtai baasusu sane ni yɔɔ Young People Ask wolo lɛ yitso 39 lɛ he. Asusu yitso bibioo ni ji ‘Ni Ooojaje Okɛ Nyɔŋmɔ Naanyobɔɔ lɛ Yɛ Faŋŋ Mli,’ yɛ baafai 315-18 lɛ he. Gbekɛbii lɛ wie akɛ kɛ amɛmiiya shia kɛ shia lɛ, amɛhiɛ gboɔ, ni amɛwie kpeei hu he akɛ nɔ kome lɛ nɔŋŋ he awieɔ, ni ayaa nɔtonɔto tsɔ. Fɔlɔi lɛ kɛ amɛ susu saji ahe yɛ mlihilɛ mli, ni amɛtsɔɔ amɛ Ŋmalɛ naa shishitoo mlai ni tsɔɔ akɛ kɛ amɛaaya nɔ amɛhiɛ amɛkɛ Yehowa teŋ wekukpaa kpakpa mli daa lɛ, no lɛ nɛkɛ nifeemɔi nɛɛ ahe miihia.
20 min: Wiemɔ ni onukpa ko baaha, ni damɔ saneyitso ni ji “Yakayaka Adesãi lɛ, Guu” nɔ, kɛjɛ April 1, 1994, Buu-Mɔɔ, baafa 29-31. Ha Ŋmalɛ naa yiŋtoi ahewɔ ni esaaa akɛ wɔtĩɔ ayɛi kɛ ŋkunyaayelɔi anifeemɔi amli wɔgbaa wɔtsɔɔ mɛi krokomɛi lɛ aje kpo jogbaŋŋ. Kanemɔ kukuji ni sa lɛ ni okɛmamɔ otii lɛ anɔ mi.
Lala 10 kɛ naagbee sɔlemɔ.
Otsi ni Jeɔ Shishi August 29
Lala 199
13 min: Asafoŋ adafitswai. Atsɔɔ shiɛmɔyaa he gbɛjianɔtoo kɛha otsi lɛ naagbee. Abi shiɛlɔ kome loo mɛi enyɔ ni nyɛ amɛfee gbɛgbalɔi awalɔ loo amɛnyɛ amɛlɛɛ amɛnitsumɔ mli yɛ gbɛ ko nɔ yɛ sɔɔmɔ afi lɛ mli lɛ saji. Amɛgba miishɛɛ ni amɛna lɛ ekomɛi amɛtsɔɔ.
15 min: “Ani Obaanyɛ Oyafata Amɛhe Ekoŋŋ?” Akɛ toibolɔi asusu he. Akɛ nyɛ asafo lɛ mli niiashikpamɔi ni tsɔɔ bɔ ni mɔ ko enyɛ ekɛ ehe ewo gbɛgbamɔ sɔɔmɔ lɛ mli ekoŋŋ, aloo bɔ ni weku ko efee ekome kɛye amɛbua weku lɛ mli nyo ko ni enyɛ eha hegbɛ nɛɛ he eba sɛɛnamɔ eha lɛ lɛ afata he.
17 min: Okɛ Obaanyɛ Ohi Shi Kɛya Naanɔ Wolo lɛ Aha yɛ September Mli. Awo hewalɛ ni abɔ mɔdɛŋ akɛ wolo nɛɛ aha ni akɛje nikasemɔi ashishi yɛ September mli. Ajie lɛ kpo yɛ 1982 mli, ni kɛjɛ nakai beaŋ kɛbaa nɛɛ, akɛtsu nii akɛ dɛŋdade krɛdɛɛ kɛha Biblia mli nikasemɔi afeemɔ. Nɔ ni ajie lɛ kpo yɛ kpokpaa wulu nɔ kpee lɛ shishi lɛ hiɛ shɛɛ sane nɛɛ akɛ: “Nibii ni he hiaa ni wɔkɛye wɔbua mɛi krokomɛi babaoo ni amɛ hu amɛna hiɛnɔkamɔ ni wɔyɔɔ lɛ eko lɛ, yɛ nikasemɔ wolo hee nɛɛ mli. . . . Biblia mli anɔkwalei fɛɛ ni he hiaa ni esa akɛ mɛi heei lɛ anu shishi, koni amɛjɔɔ amɛwala nɔ amɛha Yehowa, ni amɛsɔmɔ lɛ yɛ enɔkpɛlɛmɔ naa lɛ yɛ wolo nɛɛ mli.” Nɔ ni ejɛ mli eba ji shweremɔ yɛ shiɛlɔi ayifalɛ mli, kɛjɛ 2,652,323 yɛ 1983 mli kɛyashi 4,709,889 yɛ 1993 mli. Aha aŋkroaŋkroi agba bɔ ni fee ni amɛle anɔkwale lɛ kɛtsɔ wolo nɛɛ kasemɔ nɔ, loo bɔ ni amɛye amɛbua mɛi krokomɛi kɛtsɔ kasemɔ ni amɛkɛ amɛ kase lɛ nɔ. Kɛ be baaŋmɛ gbɛ lɛ, atsɔɔ wolo lɛ mli nibii krokomɛi ni abaanyɛ awie he yɛ be mli ni akɛhaa lɛ.
Lala 161 kɛ naagbee sɔlemɔ.