Nyɔŋmɔ Wiemɔ lɛ Yɛ Hewalɛ
1 Biblia lɛ ena mɛi akpekpei abɔ ashihilɛ nɔ hewalɛ waa diɛŋtsɛ. Nɔ ni ekɛɔ lɛ kanyaa mɔ waa fe nɔ fɛɛ nɔ ni gbɔmɔ baanyɛ afee yɛ shihilɛ mli. (Heb. 4:12) Kwɛmɔ nɔ ni efee kɛha wɔ. Lɛlɛŋ, Biblia lɛ he yɛ sɛɛnamɔ babaoo fe wolo fɛɛ wolo.
2 Yehowa Odasefoi kaseɔ Biblia lɛ waa fe mɛi fɛɛ ni amɛfaa he waa hu. Esa akɛ wɔbu Biblia kanemɔ akɛ wɔ daa teokrase he gbɛjianɔtoo lɛ fa ko ni he hiaa, koni wɔkɛye tɛlivishin kwɛmɔ kɛ hiɛtserɛjiemɔi fɛɛ ni adiɔ sɛɛ lɛ hiɛ.
3 Ha Efee Osubaŋ Daa: Yehowa webii ebale hewalɛ babaoo ni Biblia ni akaneɔ daa lɛ baanyɛ ana yɛ mɔ nɔ lɛ. Niŋmaa okadi wulu ko ni yɔɔ Asafo lɛ tsũi ni afeɔ woji yɛ mli lɛ he lɛ ni yɔɔ Brooklyn ni woɔ mɛi ni hoɔ yɛ jɛmɛ lɛ hewalɛ afii babaoo nɛ lɛ kaneɔ akɛ “Kanemɔ Biblia Krɔŋkrɔŋ ni Ji Nyɔŋmɔ Wiemɔ lɛ Daa Gbi.” Akwɛɔ koni Betel weku lɛ mlibii ni baa ehee lɛ akane Biblia muu lɛ fɛɛ yɛ klɛŋklɛŋ afi ni amɛkɛjeɔ Betel sɔɔmɔ shishi lɛ mli.
4 Yɛ nibii ni otsuɔ he nii ni haaa ona deka lɛ fɛɛ sɛɛ lɛ, ani ootsu daa otsi Biblia kanemɔ ni akɛha ni ato naa yɛ “Theocratic Ministry School Schedule” lɛ mli lɛ he nii? Kɛ okɛ naagba ekpe yɛ enɛ feemɔ mli lɛ, mɛni hewɔ otsuuu he nii koni oya hiɛ yɛ efeemɔ mli yɛ November? Biblia kanemɔ kɛha nyɔŋ muu lɛ fɛɛ ji Lalai 95-109 ni biɔ ni akane aaafee baafai etɛ loo ejwɛ daa otsi. Mɛi komɛi sumɔɔ ni amɛkane nii fioo ko daa gbi, ekolɛ yɛ leebi maaŋkpa loo dani amɛwɔ gbɛkɛ. Bɔ fɛɛ bɔ ni ooofee lɛ oha lɛ, nɔ ni he hiaa ji ni ona sɛɛnamɔi kpakpai kɛjɛ Nyɔŋmɔ Wiemɔ ni okaneɔ daa lɛ mli.
5 Okɛ Biblia lɛ Aha Yɛ November: Mɛi pii yɛ bulɛ lolo kɛha Biblia lɛ ni amɛmiisumɔ ni amɛbo toi be mli ni wɔkaneɔ. Wɔkɛ New World Translation kɛ The Bible—God’s Word or Man’s? wolo lɛ baaha yɛ November. Enɛ haa wɔnaa hegbɛ ni fe fɛɛ koni wɔtsɔɔ mɛi ni hiɛ tsui kpakpa lɛ bɔ ni sɛɛnamɔ yɔɔ Nyɔŋmɔ Wiemɔ lɛ he. Feemɔ ekaa yɛ enɛ feemɔ mli.
6 Okɛ nibii titrii komɛi ni yɔɔ New World Translation lɛ mli ni baatee mɛi lɛ amiishɛɛ shi koni amɛhe lɛ asaa ohe. Maa ehe sɛɛnamɔ ni abaanyɛ akɛtsu nii nɔ mi. Obaanyɛ owie saneyitsei ni yɔɔ fa ni kɛɔ akɛ “Bible Topics for Discussion” lɛ mli lɛ ekome he, ni owie he kɛgbala jwɛŋmɔ kɛya The Bible—God’s Word or Man’s? wolo lɛ nɔ. Aloo obaanyɛ otsɔɔ bɔ ni Biblia wiemɔi lɛ he index ni hiɛ baafai 92 lɛ he yɔɔ sɛɛnamɔ ha lɛ kɛtsɔ bɔ ni eyeɔ ebuaa nikanelɔ lɛ ni ena ŋmalɛi ni tamɔ nɔ ni ele lɛ ni oootsɔɔ lɛ lɛ nɔ. Shiɛlɔi komɛi baasumɔ ni amɛma “Appendix” loo “Table of the Books of the Bible” lɛ nɔ mi kɛtsɔ bɔ ni ehe baa sɛɛnamɔ yɛ Biblia kasemɔ mli lɛ tsɔɔmɔ nɔ.
7 Kwɛmɔ ni otsɔɔ akɛ aŋma New World Translation lɛ yɛ ŋmɛnɛŋmɛnɛ Blɔfo wiemɔ mli, ni ehaa eshishinumɔ feɔ mlɛo. Nibii komɛi ni yɔɔ King James Version lɛ mli ni abaanyɛ akɛto he akwɛ ni feɔ mɔ miishɛɛ ji 1 Korintobii 10:25 kɛ 16:22. New World Translation lɛ kɛ gbɛi krɔŋkrɔŋ, Yehowa, lɛ tsuɔ nii shii 7,210.
8 Hɛɛ, Biblia lɛ ji Nyɔŋmɔ Wiemɔ. Kɛ wɔkane, wɔhe wɔye, ni wɔkɛ emli ŋaawoo tsu nii yɛ wɔ shihilɛi amli lɛ, wɔbaana sɛɛnamɔi babaoo kɛjɛ mli. Aŋma koni eha wɔ ŋaawoo kɛ hiɛnɔkamɔ. (Rom. 15:4) Ehe miihia ni wɔkwɛ mli daa gbi koni wɔfee klalo akɛ wɔkɛaatsɔɔ mɛi krokomɛi anii.