Gbɛi ni Wɔɔtsɔ nɔ Wɔha Wɔ Maŋtsɛyeli Shiɛmɔ Aya Hiɛ
1 Wɔshiɛmɔ nitsumɔ lɛ he miihia waa bianɛ fe be fɛɛ ni eho. Kɛji mɛi aaahi shi loo amɛaagboi lɛ, ebaajɛ bɔ ni amɛfeɔ amɛnii yɛ sanekpakpa lɛ he amɛhaa lɛ. (1 Pet. 4:5, 6, 17; Kpoj. 14:6, 7) Yɛ enɛ hewɔ lɛ esa akɛ wɔtao gbɛi ni wɔɔtsɔ nɔ wɔha wɔ Maŋtsɛyeli shiɛmɔ lɛ aya hiɛ. Mɛni ji gbɛi ni wɔbaatsɔ nɔ koni wɔha eya hiɛ lɛ ekomɛi?
2 Saamɔ Ohe Jogbaŋŋ: Okɛ Wɔ Maŋtsɛyeli Sɔɔmɔ hee ni eba lɛ atsu nii, koni okɛhala shiɛmɔ wiemɔ ni osusuɔ akɛ mɛi ni yɔɔ oshikpɔŋkuku lɛ mli lɛ ateŋ mɛi pii baanya he. Ehe miihia ni otsake saji ni owieɔ he lɛ mli ni ekɔ shihilɛi ni yɔɔ jɛmɛ lɛ he. Aloo ooosumɔ ni bo diɛŋtsɛ ofee shiɛmɔ wiemɔ, ni okɛ saji kɛ Ŋmalɛi ni ona akɛ ehaa emɔɔ shi lɛ afee. Hiɛkpamɔ wiemɔ ni teeɔ miishɛɛ shi he baahia bo. (Kwɛmɔ Reasoning wolo lɛ, baafai 9-15.) Ekolɛ oto gbɛjianɔ akɛ obaabi sane ko ni baaha asusu nii ahe loo ni ooobi nɔ ni shiatsɛ lɛ yɔɔ kɛɛmɔ yɛ adafitswaa sane ko ni agbaa he sane yɛ jɛmɛ lɛ he. Kɛ oyɛ oshiɛmɔ wiemɔ lɛ yɛ ojwɛŋmɔ mli lɛ, okɛ weku lɛ mlinyo loo shiɛlɔ ko ni baanyɛ awo ŋaa komɛi kɛha hiɛyaa lɛ afee nyɛkwɛ.
3 Okɛ Mɛi Agba Sane: Wɔ yiŋtoo ji ni wɔkɛ shɛɛ sane ko ni he hiaa lɛ aha mɛi. Abaanyɛ afee enɛ kɛtsɔ wɔ toibolɔ lɛ ni wɔkɛ lɛ aaagba sane ni shishinumɔ yɔɔ mli lɛ nɔ. Kɛ shiatsɛ lɛ tee sane ko shi loo etsɔɔ ejwɛŋmɔ lɛ, bo nɔ ni eyɔɔ kɛɛmɔ lɛ toi jogbaŋŋ. Saji ni ebaawie lɛ baaye ebua bo koni okɛ hetoo ni jɛ Ŋmalɛ mli ni kɔɔ hiɛnɔkamɔ ni yɔɔ omli lɛ he lɛ aha. (1 Pet. 3:15) Kɛ ejwɛŋmɔ kɛ Biblia lɛ kpaaa gbee lɛ, obaanyɛ otsɔ ŋaa gbɛ nɔ owie akɛ: “Mɛi babaoo nuɔ he taakɛ onuɔ he ohaa lɛ. Kɛlɛ, naa gbɛ kroko ni abaanyɛ atsɔ akwɛ sane lɛ.” No sɛɛ lɛ kanemɔ ŋmalɛ ni sa, ni okwɛ nɔ ni ebaakɛɛ yɛ he.
4 Tsakemɔ Obe he Gbɛjianɔtoo lɛ Mli: Sɛɛnamɔ fioo ko pɛ baajɛ ohe ni osaa jogbaŋŋ lɛ mli aba kɛ onyɛɛɛ okɛ mɛi awie. Bei komɛi yɛ ni wɔnaa akɛ mɛi komɛi bɛ shia daa beni wɔtee mɛi aŋɔɔ lɛ. Kɛ nakai eji yɛ oshikpɔŋkuku lɛ mli lɛ, bɔɔ mɔdɛŋ ni otsake be he gbɛjianɔ ni oto lɛ mli koni onyɛ otsu nii yɛ shia kɛ shia beni mɛi pii yɔɔ shia. Obaana akɛ be ni hi fe fɛɛ ni okɛaaya mɛi aŋɔɔ ji yɛ otsii lɛ anaagbee; abaanyɛ ana mɛi krokomɛi titri yɛ otsi lɛ mli shi kɛmiiya gbɛkɛnaashi. Hei komɛi yɛ ni shiɛlɔi naa he sɛɛ akɛ amɛaaye odase waa yɛ je lɛŋ hejɔɔmɔ gbii amli, ejaakɛ amɛnaa mɛi babaoo yɛ shia. Mɛi pii yɛ ni jɔɔ amɛhe ni amɛbaasumɔ babaoo akɛ amɛkɛ mɛi aaagba sane yɛ bei ni tamɔ nɛkɛ mli. Ebaahi akɛ oootsake ohiɛkpamɔ wiemɔ lɛ mli koni ekɔ shihilɛ lɛ he koni no sɛɛ lɛ okɛ Ŋmalɛ mli saneyitso ko awie he.
5 Pɛimɔ Bɔ ni Oshiɛmɔ Wiemɔ lɛ Mɔɔ Shi Ehaa lɛ Mli: Kɛ oshi shinaa lɛ naa lɛ, bi ohe akɛ: ‘Ani minine shɛ shiatsɛ lɛ tsui nɔ? Ani miha etsɔɔ nɔ ni esusuɔ yɛ he, ni mibo nɔ ni eyɔɔ kɛɛmɔ lɛ toi? Ani mitsɔ ŋaa gbɛ nɔ miha lɛ hetoo? Yɛ shihilɛi lɛ ahewɔ lɛ, ani mikɛ gbɛ ni hi fe fɛɛ lɛ tsu nii?’ Eeefee nɔ ni baaye abua akɛ okɛ shiɛlɔ ni he esa loo gbɛgbalɔ aaatsu nii yɛ be kɛ beaŋ ni obo eshiɛmɔ wiemɔi lɛ atoi jogbaŋŋ kɛ yiŋtoo akɛ oooha bɔ ni otsuɔ sɔɔmɔ nitsumɔ lɛ he nii ohaa lɛ amɔ shi.
6 Kɛ ohe esa yɛ onitsumɔ lɛ mli lɛ, obaanyɛ ni okɛ Maŋtsɛyeli lɛ he anɔkwalei ni “[aaa]here bo diɛŋtsɛ kɛ mɛi ni boɔo toi lɛ fɛɛ yiwala” lɛ aha.—1 Tim. 4:16; Abɛi 22:29.