Sanebimɔ He
◼ Mɛɛ kɔkɔbɔɔ he hiaa kɛ wɔmiishiɛ yɛ shikpɔŋkukuji ni yɔɔ oshara mli lɛ?
1 Wɔnuɔ amaniɛbɔi babaoo yɛ awuiyeli, nii ni ajuɔ lɛ ekaa naa, efɔŋ ni afeɔ yɛ maŋ, kɛ nɔ ni eba nyɛsɛɛ nɛɛ ni ji wiemɔ ni mɔ ko wieɔ lɛ mli bei ahe. Eyɛ mli akɛ wɔnuɔ he akɛ ekɔɔ wɔ he moŋ, shi wɔle akɛ yɛ hei ni naagbai yɔɔ jɛmɛ po lɛ, mɛi yɛ ni yeɔ anɔkwa ni baahere Maŋtsɛyeli shɛɛ sane lɛ nɔ. No hewɔ lɛ yɛ be ni sa mli lɛ esa akɛ wɔna ekaa koni wɔya hiɛ yɛ wɔ shiɛmɔ nitsumɔ lɛ mli, ni wɔna hekɛnɔfɔɔ yɛ Yehowa hebuu mli.—Abɛi 29:25; 1 Tes. 2:2.
2 Kɛ wɔtee he ni oshara yɔɔ jɛmɛ waa diɛŋtsɛ lɛ, Yehowa kpaa gbɛ akɛ wɔkɛ ŋaa baatsu nii ni wɔkwɛ jogbaŋŋ. Ohiɛ ahi ohe nɔ. (Abɛi 22:3) Shiɛlɔi ni he esa lɛ ahiɛ sɔɔ nilee ni yɔɔ mli akɛ aaatsu nii kutuu akɛ mɛi enyɔ loo akɛ kui ni shiɛlɔi fa yɛ mli po, kɛ shihilɛ lɛ baabi enɛ feemɔ. Jajelɔ 4:9, 12 kɛɔ akɛ: “Mɛi enyɔ hi fe mɔ kome; . . . Kɛ mɔ ko batua amɛteŋ mɔ kome lɛ, mɛi enyɔ lɛ aaate shi awo lɛ.” Bei pii lɛ ojotswalɔi taoɔ mɛi ni amɛkome too pɛ amɛnyiɛ ni no hewɔ lɛ ewaaa akɛ aaatswa amɛ ojo.
3 Kwɛmɔ ohe nɔ jogbaŋŋ diɛŋtsɛ yɛ hei ni bei kɛ nɔmɔ yaa nɔ yɛ lɛ kɛ ooje kpo beni duŋ ewo sɛɛ. Wɔtsiɔ ta fioo pɛ akɛ ehe miihia lolo ni Kristofoi abo Hebribii 10:24, 25 lɛ toi ni amɛya kpeei. Kɛ ebaahi akɛ akpe dani duŋ awo lɛ, no titri hi waa, akɛ nɔkwɛmɔ nɔ lɛ, yɛ otsii lɛ naagbee. Kɛ enɛ feemɔ ehiŋ lɛ, no lɛ eji ŋaa ni awoɔ akɛ anyiɛ akɛ kui kɛya kɛ agbe kpee lɛ naa. Kaatsɔ hei ni bei kɛ nɔmɔ yaa nɔ yɛ jɛmɛ lɛ eyɛ mli akɛ ekolɛ jɛmɛ kɛ he ni oyaa lɛ jɛkɛɛɛ. Kɛ ebaahi lɛ, shi shia mra kɛya kpeei. Kɛ okɛ awuiyelɔi komɛi kpe lɛ okɛ amɛteŋ mɔ ko mɔ ko ni feɔ tamɔ eefa otsui loo ekɛ bo baafee gidigidi lɛ akaje ŋwane. Ye ohe oyai ni ojie ohe kpo akɛ Yehowa Odasefonyo ji bo. Shiɛlɔi komɛi hiɛɔ Biblia, Buu-Mɔɔ loo Awake! wolo tɛtrɛɛ lɛ eko be fɛɛ be bɔni afee ni anyɛ ayoo amɛ mra.
4 Nilee bɛ mli akɛ aaawo jwinei ni jara wawai yɛ hei ni yɔɔ oshara lɛ. Kɛ eeeba lɛ akɛ oooje kpo beni duŋ ewo sɛɛ lɛ, kaanyiɛ gbɛjegbɛi ni jɛmɛ ewo duŋ ni mɛi fioo pɛ tsɔɔ nɔ kɛhoɔ lɛ nɔ. Kɛ mɛi komɛi miishɔ nɔ ko yɛ odɛŋ akrana naa lɛ, kaatsi amɛnaa kɛ́ oshika loo onibii kɛkɛ amɛtaoɔ; owala jara wa kwraa fe heloonaa nii fɛɛ ni oyɔɔ lɛ.—Mar. 8:36.
5 Ehe miihia ni nyɛmimɛi hii ni nyiɛɔ hiɛ yɛ shiɛmɔ mli lɛ lɛ ahiɛ ahi amɛhe nɔ, koni amɛle he ni shiɛlɔi lɛ yɔɔ kɛ nɔ ni amɛfeɔ yɛ shikpɔŋkuku lɛ mli be fɛɛ be. Bei pii lɛ nɔ ni hi fe fɛɛ ji ni aha shiɛlɔi lɛ afá yɛ akutso kome too lɛ nɔŋŋ mli bɔni afee ni mɛi krokomɛi lɛ anyɛ abɛŋkɛ amɛhe. Kɛ awuiyeli loo naagba ko bɔi baa yɛ akutso lɛ mli lɛ, esa akɛ shiɛlɔi lɛ ashi shikpɔŋkuku lɛ mli oya nɔŋŋ.
6 Kɛ wɔhiɛ hi wɔhe nɔ ni wɔkɛ nilee tsu nii lɛ, wɔbaanyɛ wɔya nɔ ni wɔnine ashɛ mɛi ni yɔɔ tsui kpakpa lɛ anɔ yɛ shikpɔŋkukuji ni yɔɔ oshara lɛ amli, ni wɔkpe daa ni wɔkase Nyɔŋmɔ Wiemɔ lɛ yɛ hei ni bei kɛ nɔmɔ yaa nɔ yɛ jɛmɛ lɛ.