Okɛ Hiɛtɛ̃ɛ Atsu Nii Beni Oshiɛɔ Lɛ
1. Mɛni hewɔ ehe hiaa ni wɔkɛ hiɛtɛ̃ɛ atsu nii beni wɔshiɛɔ lɛ?
1 Nyɔŋmɔ tsuji miishiɛ “yɛ yinɔ kɔ̃ɔdɔ̃ŋ ni bɛ eŋɛlɛ nɔ nɛɛ teŋ,” “tamɔ toogwantɛŋi yɛ klaji ateŋ.” (Mat. 10:16; Fil. 2:15) Be fɛɛ be lɛ wɔnuɔ amaniɛbɔi ni kɔɔ maŋ tai, maŋbii ni feɔ basabasa, kɛ mɛi ni amɔmɔɔ atoɔ akrana naa lɛ ahe, ni enɛ tsɔɔ bɔ ni gbɔmɛi fɔji ‘miiwo wu yɛ efɔŋ mli.’ (2 Tim. 3:13) Mɛɛ Ŋmalɛ naa shishitoo mlai kɛ́ wɔkɛtsu nii lɛ ebaaye ebua wɔ koni ‘wɔhiɛ atɛ̃’ kɛ́ wɔmiishiɛ?—Mat. 10:16.
2. Mɛɛ shihilɛi amli nɛkɛ ebaabi ni oshi shikpɔŋkuku lɛ mli ni oyashiɛ yɛ he kroko?
2 Okɛ Hiɛtɛ̃ɛ Atsu Nii: Abɛi 22:3 lɛ maa bɔ ni nilee yɔɔ mli akɛ ‘wɔɔtee wɔhe’ yɛ oshara he lɛ nɔ mi. Ohiɛ ahi ohe nɔ waa! Shihilɛi baanyɛ atsake trukaa yɛ hei ni abuɔ akɛ jɛmɛ yɛ shweshweeshwe po. Ekolɛ obaana polisifoi ni miiya miiba loo mɛi ni eke yuu yɛ gbɛjegbɛ lɛ nɔ. Bei komɛi lɛ, shiatsɛ ko ni susuɔ mɔ he lɛ baabɔ bo kɔkɔ. Yɛ nɔ najiaŋ ni oooshashao shi koni ona nɔ ni yaa nɔ lɛ, nilee yɛ mli akɛ oooshi jɛmɛ oya nɔŋŋ ni oyatsa nɔ yɛ he kroko.—Abɛi 17:14; Yoh. 8:59; 1 Tes. 4:11.
3. Te shishitoo mla ni yɔɔ Jajelɔ 4:9 lɛ kɔɔ wɔshiɛmɔ nitsumɔ lɛ he tɛŋŋ?
3 Okome Okanyiɛ: Jajelɔ 4:9 lɛ kɛɔ akɛ: “Mɛi enyɔ hi fe mɔ kome.” Ekolɛ okome ofɔɔ shiɛmɔ yaa ni naagba ko baaa, shi amrɔ nɛɛ ani eyɛ shweshweeshwe akɛ ooofee nakai? Yɛ hei komɛi lɛ, naagba ko bɛ he. Shi yɛ hei krokomɛi hu lɛ, amrɔ nɛɛ, eyɛ oshara akɛ nyɛmi yoo loo oblanyo fioo kome pɛ aaatsu shĩa kɛ shĩa nitsumɔ lɛ, titri lɛ beni hulu enyɔ shi. Niiashikpamɔ tsɔɔ akɛ ehi jogbaŋŋ akɛ wɔɔha mɔ ko afata wɔhe kɛya shiɛmɔ. (Jaj. 4:10, 12) Kɛ́ nyɛmiishiɛ akɛ kuu lɛ, ha okuu lɛ mli bii krokomɛi lɛ ashweshweeshwefeemɔ akã otsui nɔ. Ha efee osu akɛ obaawó shiɛlɔi krokomɛi atoi nɔ akɛ ooshi shikpɔŋkuku lɛ mli.
4. Te wɔɔfee tɛŋŋ wɔye wɔbua kɛbu asafoŋbii lɛ fɛɛ ahe?
4 Akɛni asafoŋ onukpai lɛ ji mɛi ni ‘buɔ wɔsusumai lɛ ahe’ hewɔ lɛ, eji amɛsɔ̃ akɛ amɛkɛ shihilɛi ni yɔɔ he ni nyɛyɔɔ lɛ he gbɛtsɔɔmɔ ni sa aha. (Heb. 13:17) Kɛ́ wɔba wɔhe shi ni wɔbo amɛ toi lɛ, Yehowa baajɔɔ wɔ. (Mika 6:8; 1 Kor. 10:12) Ákɛ Nyɔŋmɔ tsuji lɛ, eba akɛ wɔ fɛɛ wɔɔye wɔbua wɔhe kɛye odase jogbaŋŋ yɛ wɔshikpɔŋkukuji lɛ amli, ni kɛlɛ nyɛhaa wɔkɛ hiɛtɛ̃ɛ atsua nii be fɛɛ be.