Fɔlɔi, Ani Nyɛbii lɛ Ji Shiɛlɔi?

¹ Esa akɛ ajie fɔlɔi lɛ ayi waa yɛ deŋmegbomɔ ni amɛkɛbɔɔ mɔdɛŋ yɛ amɛbii lɛ atsɔsemɔ gbɛfaŋ, kɛ agbɛnɛ bɔ ni amɛtsuɔ amɛ hiamɔ nii ahe nii bɔ ni sa, yɛ wɔ “jaramɔ bei” nɛɛ amli shihilɛ nɛɛ fɛɛ sɛɛ lɛ he. (2 Tim. 3:⁠1) Ani esaaa akɛ akpaa gbɛ akɛ fɔlɔi baabɔ mɔdɛŋ waa nakai nɔŋŋ ni amɛkɛtsɔse amɛbii lɛ yɛ anɔkwale lɛ mli, ni amɛto gbɛjianɔ ni sa kɛha amɛmumɔŋ hiamɔ nii ahe nitsumɔ? Wɔkɛ miishɛɛ mii­wo fɔlɔi lɛ hewalɛ ni amɛtsu nii waa kɛ ekaa yɛ enɛ hu gbɛfaŋ.

² Sanekpakpa lɛ Shiɛmɔ He Miihia Fe Fɛɛ: Nitsumɔ kroko ko bɛ ni he hiaa Yehowa kɛ eshikpɔŋ nɔ gbɛjianɔtoo lɛ tamɔ Maŋtsɛyeli sanekpakpa lɛ shiɛmɔ. (Mar. 13:10; okɛto Yohane 4:​13, 14 he.) Ákɛ fɔlɔ lɛ, mɛni ofeɔ ni okɛha obii lɛ abɔi shiɛmɔyaa, yɛ Romabii 10:​9, 10 lɛ kɛ gbeekpamɔ naa? Kɛ nyɛbii lɛ edara bɔ ni sa shi amɛjeee shiɛlɔi lɛ, akɛ fɔlɔi lɛ, ani nyɛbaanyɛ nyɛdamɔ sane ni aŋma nɛɛ nɔ nyɛkɛ hiɛdɔɔ asusu sane nɛɛ he kɛ nyɛku sɛɛ kɛtee shia? Eji anɔ­kwa­le akɛ Odasefoi abii pii yɛ ni amɛye fe afii nyɔŋma kɛ enumɔ kɛyaa, ni amɛbaa kpeei daa, shi amɛjeee Maŋtsɛyeli shiɛlɔi. Mɛni hewɔ?

³ Fɔlɔi ni amɛ diɛŋtsɛ lɛ, amɛji shiɛlɔi ni yɔɔ ekaa lɛ mii­fee nɔkwɛmɔ nɔ kpakpa ni haa efeɔ mlɛo kɛhaa amɛbii lɛ akɛ amɛaafee shiɛlɔi. (Okɛto Filipibii 4:9 he.) Kwɛ miishɛɛ ni eji kɛha gbekɛbii bibii, kɛ atsɔɔ amɛ ni amɛnyɛɔ amɛkɛ dɛhiɛmɔ woji haa shiatsɛmɛi lɛ, aloo amɛkɛ woji tɛtrɛbii haa, yɛ gbekɛbii ni edara fioo lɛ agbɛ­faŋ! Gbekɛbii ni nyɛɔ amɛkaneɔ nii lɛ naa Biblia lɛ kanemɔ he mii­shɛɛ kɛ akɛɛ amɛfee nakai yɛ shiɛmɔ mli. Ani ootsɔɔ obi lɛ ni­ka­ne­mɔ? Yɛ nɔ najiaŋ ni amɛaanyiɛ mɛi asɛɛ kɛkɛ lɛ, gbekɛbii naa shiɛ­mɔ­yaa he miishɛɛ jogbaŋŋ kɛ atsɔɔ amɛ ŋmalɛ kome loo ŋmalɛi enyɔ ni yɔɔ mlɛo, ni amɛnyɛɔ amɛkɛtsuɔ nii yɛ sanegbaa mli yɛ shi­naai anaa. Beni afeɔ shia Biblia mli nikasemɔi lɛ, abaanyɛ aje gbɛ abi saji ni waaa, ni aha gbekɛbii lɛ aha hetoo. Bei pii lɛ, shiatsɛmɛi lɛ naa he miishɛɛ waa, ni ehaa amɛnaa bulɛ babaoo amɛhaa Yehowa Odasefoi atsɔsemɔ lɛ.

⁴ Bɔ ni Ehe Hiaa ni Shiɛmɔyaa Tsɔsemɔ lɛ Atsa nɔ Daa: Abaanyɛ atsɔɔ gbekɛbii ni edara saŋŋ lɛ saneyitsei ni yɔɔ mlɛo kɛjɛ Bible Topics for Dis­cus­sion kɛ Rea­son­ing wolo lɛ mli. Sɛɛ mli lɛ, fɔlɔi lɛ baanyɛ atsɔ ŋaa gbɛ nɔ atsɔɔ amɛ bɔ ni amɛaafee amɛsaa sane­yi­tsei ni yɔɔ mlɛo kɛjɛ nɛkɛ woji nɛɛ amli amɛ diɛŋtsɛ. Shiɛmɔ wiemɔ lɛ kaa-kɛ-kwɛmɔ yɛ shia shii abɔ yeɔ ebuaa gbekɛbii lɛ ni amɛkɛ ekaa wieɔ. Abaanyɛ aka ŋaawoi ni akɛhaa yɛ Wɔ Maŋtsɛyeli Sɔɔmɔ lɛ mli lɛ hu akwɛ nakai nɔŋŋ.

⁵ Fɔlɔi, nyɛnyiɛa Yesu Kristo, mɔ ni tsɔse ekaselɔi lɛ, ni lɛ diɛŋtsɛ efata amɛhe kɛtee shiɛmɔ lɛ nɔkwɛmɔ nɔ lɛ sɛɛ. (Mat. 10:​1-12; Luka 10:⁠1) Shiɛmɔyaa he miihia kɛha gbekɛbii lɛ amumɔŋ he­wa­lɛ­namɔ, ni ehe hiaa Yehowa gbɛjianɔtoo lɛ waa hu. Enɛ hewɔ lɛ, saji krokomɛi ni baaje kpo yɛ Wɔ Maŋtsɛyeli Sɔɔmɔ lɛ mli wɔsɛɛ lɛ baa­su­su sane nɛɛ he lolo. Fɔlɔi ni kɛ ŋaawoi ni akɛha nɛɛ tsuɔ nii lɛ baanyɛ ana nɔmimaa akɛ Yehowa baajɔɔ amɛ mɔdɛŋbɔi lɛ anɔ.​—⁠Yoh. 13:17; Yes. 48:⁠18.