Maŋtsɛyeli lɛ He Wiemɔ Lɛ—Eshishi ni Wɔɔnu
1 Yɛ ebɛbua ni kɔɔ nidulɔ lɛ he lɛ mli lɛ, Yesu kɛɛ akɛ wui ni shwieɔ “shikpɔŋ kpakpa” nɔ lɛ feɔ “mɔ ni nuɔ wiemɔ lɛ ni enuɔ shishi” lɛ he mfoniri. (Mat. 13:23, New World Translation) Beni wɔnu Maŋtsɛyeli lɛ he sane lɛ wɔgbe naa lɛ, ani ‘wɔnu shishi’? Te enáa wɔshihilɛi anɔ hewalɛ ehaa tɛŋŋ? Ani wɔkɛ Maŋtsɛyeli lɛ he nibii ye klɛŋklɛŋ gbɛhe, ni wɔkɛmiitsɔɔ akɛ wɔ́nu shɛɛ sane lɛ shishi?
2 Maŋtsɛyeli shɛɛ sane lɛ he shishinumɔ ni ja biɔ teemɔŋ nikasemɔ. Ehe miihia ni wɔto wɔtsui shi ni wɔkɛjwɛŋ mumɔŋ niyenii ni akɛhaa lɛ nɔ. Buu-Mɔɔ lɛ ni akɛ oyaiyeli aaakane lɛ feɔ tamɔ niyenii kpakpa ni ŋɔɔ ni aaye lɛ gidigidi ni atooo tsui shi. Ani otoɔ otsui shi koni osusu mumɔŋ niyenii lɛ fɛɛ he jogbaŋŋ? Kɛ aaana he sɛɛ jogbaŋŋ lɛ, esa akɛ nɔ ko akanya efeemɔ, ni ana mumɔŋ niyenii he akɔnɔ kpakpa hu. Kɛ enɛɛmɛi fataaa he lɛ, nifeemɔi krokomɛi baanyɛ aba teemɔŋ nikasemɔ mli sɛɛnamɔi ashi, loo ebaafite be ni ehe hiaa ni wɔkɛfee lɛ. Ebɛ mlɛo akɛ aaakpɛtɛ be he gbɛjianɔtoo kpakpa he. Yɛ be mli ni ebiɔ ni aŋmɛ pɛpɛɛpɛ yɛ nibii ni he hiaa lɛ ahe lɛ, mumɔŋ ninamɔ ni aaana lɛ jara wa waa diɛŋtsɛ.—Abɛi 3:13-18; Kol. 1:27.
3 Ŋmalɛi lɛ Amli ni Wɔɔkwɛ lɛ yeɔ ebuaa wɔ gbi fɛɛ gbi koni wɔhiɛ jwɛŋmɔ ni ja, ni tswaa mɔ emaa shi lɛ mli yɛ Maŋtsɛyeli lɛ he. Mɛi ni “hiɛ yɔɔ amɛmumɔŋ hiamɔ nii anɔ” lɛ toɔ gbɛjianɔ ni amɛkɛ minitii fioo ko akane ŋmalɛ lɛ kɛ ehe saji lɛ daa gbi. (Mat. 5:3, NW) Ŋmalɛi pii tsɔɔ Maŋtsɛyeli lɛ he saji sɔrɔtoi amli. Akɛ nɔkwɛmɔ nɔ lɛ, ŋmalɛ ni awie he yɛ November 22, 1994 lɛ ji Mateo 13:4. Ehe saji lɛ susu Maŋtsɛyeli hiɛnɔkamɔ lɛ he ni ekai wɔ yɛ osharai ni yɔɔ naanyobɔɔ fɔŋ ni aaaka wɔ kɛ wekumɛi kɛ nanemɛi ateŋ lɛ he. Anɔkwale ni eji akɛ yɛ Betel shiai ni yɔɔ je lɛŋ fɛɛ amli lɛ, akɛ minitii 15 susuɔ daa gbi ŋmalɛ lɛ he yɛ daa nitsumɔ gbi leebi lɛ, maa sɛɛnamɔi kɛ hiɛdɔɔ ni yɔɔ gbi lɛ ŋmalɛ lɛ ni aaasusu he kutuu lɛ mli lɛ nɔ mi. Ani oweku lɛ kɛ sane hesusumɔ ni tamɔ nɛkɛ fataa nyɛ daa gbi nifeemɔi ahe?
4 Be mli ni odaa yɛ hiɛsɔɔ ni oyɔɔ kɛha Maŋtsɛyeli lɛ he lɛ mli babaoo lɛ, obaaná kanyamɔ babaoo koni ogba Maŋtsɛyeli lɛ he sane otsɔɔ mɛi krokomɛi. Buu-Mɔɔ kɛ Awake! lɛ kɛ nɔ ni aaanyɛ akɛto jwɛŋmɔŋ niyenii ni kɛ saji heei ni yɔɔ ebe naa pɛpɛɛpɛ lɛɔ wɔjwɛŋmɔi lɛ haa lɛ he. Amɛyeɔ amɛbuaa wɔ koni wɔya nɔ wɔha wɔhiɛ ahi bɔ ni Nyɔŋmɔ Maŋtsɛyeli lɛ he hiaa je lɛ ehaa lɛ nɔ waa. Amɛyeɔ amɛbuaa wɔ koni wɔtsɔmɔ mumɔŋ gbɔmɛi ni “hiɛ Kristo jwɛŋmɔ” lɛ. (1 Kor. 2:15, 16) Enɛɛmɛi fɛɛ baanyɛ awaje wɔhiɛnɔkamɔ lɛ ni eha wɔna ekãa babaoo ni wɔgba Maŋtsɛyeli hiɛnɔkamɔ lɛ he sane wɔtsɔɔ mɛi krokomɛi.—1 Pet. 3:15.
5 Ehe miihia ni wɔ diɛŋtsɛ wɔnu Maŋtsɛyeli shɛɛ sane lɛ shishi. Maŋtsɛyeli lɛ ji nɔ ni Nyɔŋmɔ kɛbaatsu nii koni ebu ejeŋ muu fɛɛ nɔyeli lɛ bem ni ekɛ awuiyeli aba naagbee ni ekɛ jeŋ hee aba—paradeiso. Yesu fã wɔ koni wɔkɛwo klɛŋklɛŋ gbɛhe yɛ wɔshihilɛi amli. Esa akɛ wɔtsɔmɔ tamɔ tooi ni baahi nɔyeli lɛ shishi. (Mat. 6:10, 33) Okɛ hegbɛ ni oyɔɔ lɛ atsu nii kɛmɔ shi ni okɛna emli jɔɔmɔi amli ŋɔɔmɔ.