Weku Be He Gbɛjianɔtoo—Daa Gbi Ŋmalɛ Lɛ
1 Fɔlɔi ni yɔɔ suɔmɔ lɛ bɔɔ mɔdɛŋ jogbaŋŋ koni amɛha amɛbii lɛ niyenii kpakpa daa gbi. Shi kɛlɛ mumɔŋ niyenii ni yɔɔ Nyɔŋmɔ Wiemɔ lɛ mli ní amɛkɛaaha amɛ lɛ he hiaa kwraa po fe nakai. (Mat. 4:4) Gbɛ kome ni obaanyɛ otsɔ nɔ oha obii lɛ aná suɔmɔ ni mli wa kɛha mumɔŋ niyenii koni ‘amɛdara kɛná yiwalaheremɔ’ ji ni nyɛná be kɛsusu daa gbi ŋmalɛ lɛ kɛ emlitsɔɔmɔi lɛ ahe daa akɛ weku. (1 Pet. 2:2) Mɛɛ be obaanyɛ ohala kɛha enɛ feemɔ yɛ oweku be he gbɛjianɔtoo lɛ mli?
2 Beni Ayeɔ Nii: Kɛ́ nyɛsusu ŋmalɛ lɛ he kɛje gbi lɛ shishi lɛ, ebaanyɛ eha oweku lɛ mlibii lɛ akai Yehowa yɛ gbi muu lɛ fɛɛ mli. (Lala 16:8) Nyɛ ko kpɛ eyiŋ akɛ daa leebi kɛji ekɛ ebinuu lɛ baaye nii lɛ, ekɛ lɛ baakane ŋmalɛ lɛ kɛ emlitsɔɔmɔi lɛ koni amɛsusu he, ní amɛsɔle dani gbekɛ lɛ aya skul. Enɛ wo gbekɛ lɛ hewalɛ ni enyɛ edamɔ maŋhedɔɔ kɛ jeŋba shara he kaai anaa, ni eŋmɛɛɛ saji ahe kɛsaaa, ni ekɛ ekãa ye skulbii kɛ tsɔɔlɔi fɛɛ odase. Eyɛ mli akɛ lɛ pɛ ji Odasefonyo yɛ skul lɛ mli moŋ, shi enuuu he akɛ ehe efee shoo.
3 Kɛji akɛ ŋmalɛ lɛ kasemɔ ehiii haaa nyɛ leebi lɛ, nyɛbaanyɛ nyɛfee enɛ sɛɛ mli yɛ gbi lɛ mli, ekolɛ beni nyɛbaaye nyɛgbɛkɛ niyenii. Mɛi krokomɛi hu gbaa shiɛmɔ nitsumɔ lɛ mli niiashikpamɔi loo saji ni amɛná he miishɛɛ yɛ Biblia lɛ ni amɛ diɛŋtsɛ amɛkane lɛ mli lɛ ahe sane yɛ nɛkɛ be nɛɛ mli. Mɛi babaoo kɛ miishɛɛ kaiɔ nakai niyeli bei lɛ akɛ be ni amɛfee ekome kɛná miishɛɛ fe fɛɛ akɛ weku.
4 Gbɛkɛ: Yɛ wekui komɛi agbɛfaŋ lɛ, gbɛkɛ dani weku lɛ baabote saa mli lɛ ji be ni hi jogbaŋŋ kɛha daa gbi ŋmalɛ lɛ he susumɔ. Bei ni tamɔ nɛkɛ hu baanyɛ afee be ni hi jogbaŋŋ ni akɛaasɔle kutuu. Be mli ni obii lɛ nuɔ ni owieɔ Yehowa he, ni osɔleɔ ohaa lɛ lɛ, ebafeɔ mɔ ni yɔɔ diɛŋtsɛ kɛha amɛ.
5 Eba akɛ Yehowa baajɔɔ mɔdɛŋ ni obɔɔ koni okɛ Ŋmalɛi lɛ Amli ni Wɔɔkwɛ Daa wolo lɛ atsu nii jogbaŋŋ ni okɛdũ anɔkwale lɛ owo obii lɛ amli lɛ nɔ.