Okɛ Shika Aye Abua Ghana Nitsumɔ He Nine Lɛ
1 Akɛ maŋsɛɛ sanekpakpa shiɛlɔ lɛ, bɔfo Paulo sumɔɔɔ ni ekɛ esɔɔmɔ nitsumɔ lɛ yeɔ jara. (2 Tes. 3:7-9) Yɛ nɔkwɛmɔ nɛɛ sɛɛnyiɛmɔ hewɔ lɛ, onukpai kɛ asafoŋ sɔɔlɔi heee nyɔmɔwoo kɛjɛɛɛ asafoi ni amɛsɔmɔɔ amɛ lɛ adɛŋ. Shi moŋ amɛhaa amɛwekui lɛ ahiamɔ nii taakɛ mɔ fɛɛ mɔ feɔ lɛ nɔŋŋ, ni titri lɛ kɛtsɔ heloonaa nitsumɔ nɔ. Be-fɛɛ gbɛgbalɔi sɔɔlɔi hu taoɔ amɛ diɛŋtsɛ amɛhiamɔ nii. Odasefoi komɛi kɛ amɛ diɛŋtsɛ amɛshika faa gbɛ daa afi kɛyaa hei ni yɔɔ shɔŋŋ ni akɛ sanekpakpa lɛ efɔɔɔ jɛmɛ yaa lɛ koni amɛyashiɛ. No hewɔ lɛ akɛ Odasefoi lɛ asɔɔmɔ nitsumɔ lɛ yeee jara yɛ gbɛ ko gbɛ ko nɔ.—2 Kor. 11:7.
2 Shika ni Akɛaaye Abua He Miihia: Belɛ, mɛni hewɔ ehe hiaa ni akɛ shika aye abua lɛ? Yɛ nyɛsɛɛ afii nyɔŋmai abɔ nɛɛ amli lɛ Yehowa Odasefoi ayifalɛ etee hiɛ waa. Ajieee bɔ ni eji yɛ maŋ nɛɛ mli lɛ kɛjɛɛɛ mli. Ato asafoi 217 ni abaptisi shiɛlɔi heei 21,376 yɛ nyɛsɛɛ afii nyɔŋma nɛɛ mli. Bɔni afee ni atsu yifalɛ ni yaa hiɛ oyayaayai nɛɛ he nii lɛ, ehe bahia ni asafoi komekomei lɛ kɛ nitsumɔ he nine lɛ afite shika babaoo diɛŋtsɛ.
3 Bɔni afee ni ana bɔ ni shihilɛ lɛ ji yɛ faŋŋ mli lɛ, nyɛhaa wɔŋɔa 1994 sɔɔmɔ afi lɛ akɛ nɔkwɛmɔ nɔ. Kɛ aja mli lɛ, nitsumɔ he nine lɛ fite sidii akpekpei 50 daa nyɔŋ nɔ koni akɛsaa tsũi ni yɔɔ Betel lɛ, akɛkwɛ Betel weku lɛ mlibii 80 lɛ, gbɛgbalɔi krɛdɛɛi 142 kɛ nɔkwɛlɔi gbɛfalɔi 37 kɛ amɛŋamɛi, akɛwo sarawa hewalɛ kɛ nu he nyɔmɔ, mu ni akɛwoɔ tsɔne mli lɛ he nyɔmɔ kɛ tsɔnei (tsɔnei ni akɛyajaa woji, kpokpaa wulu nɔkwɛlɔi atsɔnei ni akɛloɔ nibii, kɛ ekrokomɛi) lɛ asaamɔ, Wɔ Maŋtsɛyeli Sɔɔmɔ komekomei 60,000 ni ajaa daa nyɔŋ nɔ ni aheee he nyɔmɔwoo, shika ni akɛfaa kɛha Maŋtsɛyeli Asa maa, shika ni afiteɔ yɛ Sɔɔlɔi a-Tsɔsemɔ Skul lɛ he lɛ, kɛ ekrokomɛi.
4 Yɛ nakai be lɛ mli nɔŋŋ lɛ, shika fɛɛ ni akɛyeɔ abuaa ni anaa kɛjɛɔ asafoi lɛ kɛ shiɛlɔi fɛɛ ni yɔɔ Ghana lɛ ŋɔɔ daa nyɔŋ nɔ lɛ bafeɔ ₵1,206,000. Enɛ feɔ shika fɛɛ ni afiteɔ daa nyɔŋ nɔ lɛ mli oha mlijaa 2.4! Nɔ ni enɛ tsɔɔ ji akɛ yɛ ₵1,000.00 fɛɛ ni Ghana nitsumɔ he nine lɛ fite lɛ mli lɛ, nyɛmimɛi ni yɔɔ maŋ nɛɛ mli lɛ kɛ ₵24.00 yeɔ amɛbuaa! Woji amli ni akwɛ lɛ tsɔɔ akɛ asafoi fioo ko pɛ yɔɔ “yiŋkpɛɛ ni tsakeee” ni amɛaatsɔ nɔ amɛkɛ shika amaje nitsumɔ he nine ni yɔɔ Accra lɛ. Agbɛnɛ hu, shiɛlɔi fioo ko pɛ kɛ shika bakeɔ Buu Mɔɔ Asafo lɛ nitsumɔ he nine lɛ tɛɛ be fɛɛ be. Shika ni ajɛɔ suɔmɔ mli akɛkeɔ lɛ efee subaŋ ko ni anaa yɛ ŋmɛnɛŋmɛnɛ beaŋ Yehowa sɔɔlɔi lɛ ateŋ. Shi kɛlɛ, bei komɛi yɛ ni mɛi komɛi kɛ hegbɛ ni amɛyɔɔ akɛ amɛkɛ shika aaafi Nyɔŋmɔ nitsumɔ lɛ sɛɛ lɛ tsuuu nii kɛmɔɔɔ shi. Belɛ mɛni abaanyɛ afee?
5 Kristofoi Fɛɛ Agbɛnaa Nii: Yehowa kɛ e-Bi, Yesu Kristo, ji nihalɔi ni yɔɔ miishɛɛ fe fɛɛ. (Abɛi 8:30, 31; Kol. 1:13-17; Bɔf. 14:17; 17:25; Yoh. 3:16; Mat. 20:28) Israelbii lɛ yɛ hegbɛ kɛ gbɛnaa nii akɛ amɛkɛ nibii ake kɛha anɔkwa jamɔ tsũi lɛ maa kɛ amɛmli saamɔ. Amɛke nibii kɛha kpeebuu lɛ kɛ emli saamɔ, ni yɛ sɛɛ mli lɛ amɛnyiɛ Maŋtsɛ David nɔkwɛmɔ nɔ kpakpa ni ekɛke shikatsuru, jwiɛtɛi, kɛ nibii krokomɛi ni jara wawai kɛha sɔlemɔtsu ni yɔɔ Yerusalem lɛ maa lɛ sɛɛ. (1 Kron. 29:1-9) Yɛ afii ohai abɔ ni ho lɛ mli lɛ, Israelbii lɛ na hegbɛ akɛ amɛaafi kpeebuu lɛ, sɔlemɔtsui ni amamɔ yɛ sɛɛ mli, kɛ osɔfoi kɛ Levibii asɔɔmɔ lɛ sɛɛ. Akɛ nɔkwɛmɔ nɔ lɛ, Yudafoi ni yɔɔ Nehemia gbii amli lɛ kpɛ amɛyiŋ akɛ amɛkɛ nibii aaake koni amɛkɛha jamɔ krɔŋŋ aya hiɛ, ni amɛhiɛ yɛ amɛhe nɔ akɛ esaaa akɛ amɛkuɔ amɛhiɛ amɛshwieɔ Nyɔŋmɔ we lɛ nɔ.—Neh. 10:32-39.
6 Eyɛ mli akɛ mra be mli Kristofoi lɛ kɛ plɛtei ni akɛheɔ shika tsɔɔɔ mɛi ahiɛ loo amɛkɛ mlijaai nyɔŋma mli ekome haaa yɛ jamɔ yiŋtoi ahewɔ moŋ, shi amɛkɛ amɛheloonaa nibii lɛ eko ke koni amɛkɛha Maŋtsɛyeli nitsumɔ lɛ aya nɔ. (Rom. 15:26; 2 Kor. 9:13) Asafo muu, tamɔ nɔ ni yɔɔ Filipi lɛ kɛ amɛheloonaa nibii tsu nii yɛ nɛkɛ gbɛ nɔ. (Fil. 4:15-17) Beni Paulo heɔ shika kɛhaa mɛi ni ehia amɛ yɛ Yudea lɛ, etsɔɔɔ shika falɛ pɔtɛɛ ko ni esa akɛ akɛha. Shi moŋ ekɛɛ akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli: ejaakɛ tsuijurɔnaa halɔ Nyɔŋmɔ sumɔɔ.”—2 Kor. 9:7.
7 Nɔkwɛmɔ nii ni tsɔ hiɛ lɛ tsɔɔ akɛ, Yehowa jalɔi ekpɛlɛ gbɛnaa nii ni ka amɛnɔ akɛ amɛkɛ shika afi anɔkwa jamɔ sɛɛ yɛ be fɛɛ mli lɛ nɔ. (Abɛi 3:9, 10) Yɛ be mli ni amɛkpɛlɛɔ nɔ akɛ heloonaa nii fɛɛ ni amɛyɔɔ lɛ jɛ Yehowa ŋɔɔ lɛ, amɛbuɔ shika ni amɛkɛkeɔ lɛ akɛ gbɛ kroko ni amɛtsɔɔ nɔ amɛjieɔ suɔmɔ kpo kɛhaa Yehowa nitsumɔ lɛ kɛ esɛɛfimɔ. (Okɛto 1 Kronika 29:11, 14 he.) Ŋmɛnɛ, mumɔ ni haa akeɔ nii lɛ nɔŋŋ tsirɛɔ Odasefoi kɛ mɛi heei koni amɛkɛ shika afi nitsumɔ lɛ sɛɛ lɛ. Yɛ be mli ni amɛyeɔ amɛbuaa koni amɛwo amɛ asafo lɛ mli shika he nyɔmɔ daa lɛ, amɛfiɔ jeŋ muu fɛɛ nitsumɔ lɛ sɛɛ hu ni amɛkɛ shika keɔ Watch Tower Bible and Tract Society lɛ kɛtsɔɔ enitsumɔ he niji lɛ anɔ.
8 Ani Wɔmiiye Ohia Tsɔ Bɔ ni Wɔnyɛŋ Wɔkɛ Shika Aye Abua?: Levibii lɛ bɛ gboshinii ko, ni “mlijaai nyɔŋma mli ekome” ni Israelbii krokomɛi kɛhaa lɛ akɛyeɔ abuaa amɛ. Kɛlɛ, aakpa gbɛ akɛ amɛ hu amɛkɛ “mlijaai nyɔŋma mli ekome” ni amɛnine shɛɔ nɔ lɛ mli “mlijaai nyɔŋma mli ekome” aha osɔfo nukpa lɛ.—4 Mose 18:26-28.
9 Wɔyɛ Yosef kɛ Maria nɔkwɛmɔ nɔ lɛ yɛ Yesu Kristo fɔmɔ sɛɛ yɛ klɛŋklɛŋ afii oha lɛ mli lɛ hu. Mose mla lɛ biɔ ni Maria kɛ toobi abaha akɛ hetsuumɔ afɔle. Eyɛ mli akɛ amɛ ohia shihilɛ lɛ eŋmɛŋ enɛ gbɛ moŋ, shi amɛfee bɔ ni amɛaanyɛ, ni amɛkɛ loofɔji bibii enyɔ yaha.—3 Mose 12:6-8; Luka 2:22-24.
10 Yesu bu yoo okulafo ohiafo lɛ kaplɛji bibii enyɔ ni faaa kwraa lɛ ni ekɛbaye ebua lɛ akɛ ‘efa kwraa fe nɔ ni mɛi krokomɛi lɛ fɛɛ kɛbaye amɛbua’ lɛ ejaakɛ ejɛ etsui fɛɛ mli eke nii. (Mar. 12:41-44) Ekɛ ehia shihilɛ lɛ ejieee enaa. Shi moŋ efi gbɛjianɔ ni Yehowa eto ema shi kɛha jamɔ krɔŋŋ lɛ sɛɛ bɔ ni eeenyɛ.—2 Kor. 8:12.
11 Yɛ be mli ni eji anɔkwale akɛ Yehowa Odasefoi fioo pɛ ji heloonaa niiatsɛmɛi lɛ, nɔkwɛmɔ nii etɛ ni yɔɔ yiteŋgbɛ lɛ tsɔɔ akɛ wɔteŋ mɔ ko mɔ ko bɛ ni baanyɛ ekɛ ohiayeli ajie enaa akɛ no hewɔ ni ekɛ shika yeee ebuaaa koni akɛfi Maŋtsɛyeli nitsumɔ lɛ sɛɛ lɛ. Eyɛ mli akɛ ekolɛ Odasefoi ni nii fioo pɛ amɛyɔɔ lɛ kɛ shika fioo baaha koni amɛkɛha Maŋtsɛyeli nitsumɔ lɛ aya hiɛ moŋ, shi kɛlɛ, kɛ abua amɛ shika lɛ fɛɛ naa lɛ, efaa saŋŋ.—Lala 102:17; okɛto Mateo 18:10 he.
12 Bei komɛi lɛ, mumɔŋ nitsumɔi ni wɔnyɛɛɛ wɔkɛ shika aye abua daa lɛ jɛɔ nibii ni wɔkɛyeee klɛŋklɛŋ gbɛhe jogbaŋŋ. Nyɛhaa wɔbia wɔhe akɛ: Shii enyiɛ miyaa yarafeemɔ shishi yɛ nyɔŋ kome mli ni miyakeɔ shika loo mifũɔ? Yɛ be mli ni tɔmɔ bɛ he akɛ aaaya yarafeemɔ shishi koni ayashɛje mɛi ni agbo ashi amɛ lɛ amii lɛ, ani ebaafee nii ni akɛyeɔ klɛŋklɛŋ gbɛhe jogbaŋŋ akɛ Kristofonyo aaatsu egbɛnaa nii ahe nii daa yɛ yarafeemɔi ashishi, shi ekɛ shika yeee ebuaaa daa koni ekɛfi Maŋtsɛyeli nitsumɔ lɛ sɛɛ? (Okɛto Yohane 6:25-27; 1 Timoteo 4:8 he.) Wɔkɛ yarafeemɔi miitsu nii yɛ biɛ akɛ nɔkwɛmɔ nɔ, shi abaanyɛ akɛ shishitoo mla lɛ ato maŋ nifeemɔi krokomɛi ahe.
13 Te Wɔ Fɛɛ Wɔɔfee Tɛŋŋ Wɔna Mli Gbɛfaŋnɔ?: Asafo fɛɛ asafo baanyɛ ekɛ oniatsumɔ adeka ko ama Maŋtsɛyeli Asa lɛ nɔ koni akadi yɛ nɔ faŋŋ akɛ “Oniatsumɔi Kɛha Asafo Lɛ Jeŋ Muu Fɛɛ Nitsumɔ—Mateo 24:14.” Asafo lɛ baabu shika fɛɛ ni akɛwo adeka nɛɛ mli lɛ he akɔntaa daa nyɔŋ nɔ koni akɛ shika lɛ fɛɛ ayaha nitsumɔ he nine lɛ koni akɛye abua nitsumɔ lɛ.
14 Asafo lɛ hu baanyɛ ana “yiŋkpɛɛ ni tsakeee” koni akɛjie shika falɛ pɔtɛɛ ko kɛjɛ amɛ asafo lɛ shika mli daa nyɔŋ nɔ koni akɛmaje Watch Tower Society, Ghana Branch lɛ. Kɛ afee enɛ agbe naa lɛ, nyɛmi ni kwɛɔ shika nɔ lɛ baanyɛ ekɛ shika nɛɛ kɛ shikai krokomɛi ni akɛmajeɔ tamɔ woji kɛ woji tɛtrɛbii ashika lɛ fɛɛ amaje Asafo lɛ daa nyɔŋ nɔ. Ehi akɛ aaati yiŋkpɛɛi ni tsakeee ni tamɔ nɛkɛ mli akwɛ yɛ be kɛ be mli koni akɛsusu nibii ajara ni yaa hiɛ lɛ hu he.
15 Aŋkroaŋkroi baanyɛ amɛkɛ shika loo nibii krokomɛi ayaha Watch Tower Bible and Tract Society, Ghana Branch, Box 760, Accra, lɛ tɛɛ koni ekɛfi Maŋtsɛyeli nitsumɔ lɛ sɛɛ yɛ maŋ nɛɛ mli. Kɛfata he lɛ, nyɛmimɛi aŋkroaŋkroi baanyɛ ato gbɛjianɔ koni amɛ shika-tolɔi lɛ ajie shika ko kɛjɛ amɛ bank shika lɛ mli koni akɛwo Watch Tower Society shika mli. Mɛi ni miisumɔ ni amɛfee enɛ lɛ ana asafo lɛ woloŋmalɔ kɛha Asafo lɛ bank shika lɛ he nɔmba lɛ. Amɛ hu amɛbaanyɛ amɛŋma kɛyaha nitsumɔ he nine ni yɔɔ Accra lɛ kɛha enɛ he sane kɛ ehe miihia.—Kwɛmɔ December 1, 1994 Buu-Mɔɔ lɛ baafa 19 hu.
16 Shika ni akɛhaa koni akɛye abua Maŋtsɛyeli nitsumɔi lɛ jeee gbɛ ni atsɔɔ nɔ akɛtoɔ Yehowa ni nibii fɛɛ ji enɔ̃ lɛ najiaŋ, loo ni akɛhaa etsɔɔ niiatsɛ. (1 Kron. 29:14-17) Shi kɛlɛ, nihamɔ ni tamɔ nɛkɛ lɛ haa wɔnaa hegbɛ ni wɔjieɔ wɔsuɔmɔ kpo wɔtsɔɔ Nyɔŋmɔ. Shika ni akɛyeɔ akɛbuaa, ni jɛɛɛ pɛsɛmkunya kanyamɔ, loo koni mɛi fɛɛ ana kɛ yijiemɔ, shi ajɛɔ nihamɔ mumɔ mli akɛhaa koni akɛha anɔkwa jamɔ aya hiɛ lɛ kɛ miishɛɛ kɛ Yehowa jɔɔmɔ bahaa mɔ ni kɛhaa lɛ. (Mat. 6:1-4; Bɔf. 20:35) Esa akɛ ekpakpa ni wɔ ŋwɛi Tsɛ lɛ feɔ wɔ lɛ akanya wɔ jogbaŋŋ diɛŋtsɛ koni wɔfee mɛi ni kɛ miishɛɛ keɔ nii. Belɛ, nyɛhaa wɔkɛ hiɛsɔɔ ni jɛ tsuiŋ afee bɔ fɛɛ bɔ ni wɔɔnyɛ koni wɔha wɔ Nyɔŋmɔ nihalɔ, Yehowa, klɛŋklɛŋ mɔ ni kɛ miishɛɛ keɔ nii fe fɛɛ lɛ nitsumɔ lɛ aya hiɛ.—1 Kor. 16:2.