Ye Obua Mɛi Krokomɛi ni Amɛhiɛ Asɔ Sɛɛnamɔ ni Yɔɔ Biblia lɛ He
1 Yesu kɛ nɔ ni he hiaa ekaselɔi lɛ ha. Luka 24:45 bɔɔ amaniɛ akɛ: “Egbele amɛjwɛŋmɔ naa, koni amɛna ŋmalɛi lɛ anaa.” Ele akɛ kɛji amɛmiisumɔ ni amɛna e-Tsɛ hiɛ duromɔ lɛ, no lɛ ehe miihia ni amɛkase ni amɛnu Nyɔŋmɔ Wiemɔ, Biblia lɛ shishi. (Lala 1:1, 2) Wɔ shiɛmɔ nitsumɔ lɛ hiɛ yiŋtoo ni tamɔ nɛkɛ nɔŋŋ. Oti ni ma wɔhiɛ ji ni wɔje Biblia mli nikasemɔi ashishi, koni wɔnyɛ ‘wɔtsɔɔ mɛi lɛ ni amɛye nii fɛɛ ni Yesu ekɛɛ lɛ nɔ.’ (Mat. 28:20) Be mli ni enɛ yɔɔ ojwɛŋmɔ mli lɛ, ŋaawoi ni baaye abua yɛ be mli ni ofeɔ sɛɛsaramɔi lɛ ji nɔ ni nyiɛ sɛɛ nɛɛ.
2 Kɛ okɛ lɛ egba “The Bible—God’s Word or Man’s?” wolo lɛ he sane kɛtsɔ hiɛ lɛ, obaanyɛ otsa osanegbaa lɛ nɔ nɛkɛ:
◼ “Masumɔ ni matsɔɔ bo nɔ kroko hu ni tsɔɔ bɔ ni Biblia mli ŋaawoo he yɔɔ sɛɛnamɔ diɛŋtsɛ ha. Ewaa kɛhaa mɛi babaoo akɛ amɛkɛ mɛi krokomɛi aaahi shi yɛ toiŋjɔlɛ mli. Te wɔɔfee tɛŋŋ ni wɔnyɛ wɔha wɔkɛ mɛi ni bɛŋkɛ wɔ lɛ ateŋ shihilɛ lɛ ahi? [Kɛ eha hetoo lɛ, gbelemɔ baafai 167-8, kuku 15, ni okane Mateo 7:12. Okɛ saji ni asusu he yɛ kuku 16 lɛ afata he.] Enɛ ji nilee ni yɔɔ Biblia ŋaawoo mli lɛ he nɔkwɛmɔ nɔ kroko. Kɛ miba be kroko lɛ, masumɔ ni matsɔɔ bo ŋaawoo ni Biblia lɛ kɛhaa koni eye ebua ni gbalashihilɛ mli hefatalɔi ana miishɛɛ babaoo yɛ amɛ wekukpaa lɛ mli.” Too gbɛjianɔ ni oku osɛɛ okɛ lɛ ayasusu baafai 170-2, ni tsɔɔ nɔ ni Biblia lɛ tsɔɔ akɛ ehi kɛha weku shihilɛ ni yɔɔ miishɛɛ lɛ he.
3 Kɛ otsɔ hiɛ okɛ mɔ ko ni tsɔɔ miishɛɛ yɛ Biblia lɛ he wie lɛ, no lɛ ekolɛ gbɛ ni tamɔ nɛkɛ baamɔ shi kɛha nikasemɔ shishijee:
◼ “Etamɔ nɔ ni mɛi fɛɛ ni okɛaawie lɛ baakɛɛ bo akɛ amɛbaasumɔ ni amɛhi jeŋ ni toiŋjɔlɛ kɛ shweshweeshwe shihilɛ yɔɔ mli lɛ mli. Kɛ no ji nɔ ni mɔ fɛɛ mɔ taoɔ lɛ, mɛni hewɔ ni wɔyɔɔ je ni basabasafeemɔ kɛ awuiyeli eyi mli obɔ mli lɛ? [Ŋmɛɛ gbɛ ni ewie.] New World Translation lɛ tsɔɔ he ni obaanyɛ ona sanebimɔ nɛɛ hetoo yɛ, yɛ Biblia lɛ mli.” Gbelemɔ baafa 1659, ni otsɔɔ lɛ Bible Topics for Discussion No. 43a ni ji, “Mɔ ni je lɛŋ haomɔi lɛ jɛ” lɛ. Kanemɔ 2 Korintobii 4:4. Tsɔɔmɔ bɔ ni Nyɔŋmɔ baakpata Abonsam hiɛ ni ekɛ jeŋ ni naanɔ toiŋjɔlɛ kɛ miishɛɛ yɔɔ mli aba lɛ mli. Kanemɔ Kpojiemɔ 21:3, 4. No sɛɛ lɛ obaanyɛ okɛɛ akɛ: “Kɛ miba be kroko lɛ, masumɔ ni matsɔɔ bo ŋmalɛi komɛi ni tsɔɔ nɔ hewɔ ni wɔbaanyɛ wɔkpa jeŋ ni haomɔ bɛ mli gbɛ lɛ.”
4 Kɛ okɛ gbɛ ni yɔɔ tɛɛ lɛ tsu nii kɛje nikasemɔ shishi ni ahere nɔ jogbaŋŋ lɛ, obaanyɛ okɛɛ enɛ beni oku osɛɛ otee lɛ:
◼ “Beni wɔwie nyɛsɛɛ ko lɛ, wɔgba yiŋtoi komɛi ahewɔ ni ehe yɔɔ sɛɛnamɔ akɛ aaakase Biblia lɛ he sane. Mɔdɛŋ ni aaabɔ yɛ anɔkwayeli mli ni akɛtsu enɛ babaoo lɛ baanyɛ aye abua ni wɔhiɛ asɔ nɔ ni Nyɔŋmɔ esaa eto wɔ lɛ. [Kanemɔ Yohane 17:3.] Wɔto Biblia kasemɔ he gbɛjianɔ ni eye ebua mɛi akpei abɔ, koni amɛkase nɔ ni Nyɔŋmɔ ewo shi yɛ he lɛ he nii babaoo, kɛ bɔ ni wɔɔnyɛ wɔsa ehiɛ.” Okɛ Obaanyɛ Ohi Shi wolo lɛ atsɔɔ, ni otĩ saneyitsei lɛ amli, ni ofee bɔ ni wɔfeɔ Biblia mli nikasemɔ wɔhaa lɛ he nɔkwɛmɔ nɔ.
5 Kɛ obaanyɛ oye obua anɔkwafoi koni amɛhiɛ asɔ Nyɔŋmɔ Wiemɔ lɛ he sɛɛnamɔ ni nɔ bɛ lɛ, no lɛ oye obua amɛ yɛ gbɛ ni hi fe fɛɛ nɔ. Nilee ni amɛbaanyɛ amɛkase kɛtsɔ ebaafai lɛ anɔ lɛ baanyɛ afee “wala tso” ni baanyɛ eha amɛna miishɛɛ babaoo.—Abɛi 3:18.