Wekui ni Ayeɔ Abuaa Amɛ Koni Amɛná Wɔsɛɛ Shihilɛ ni Sɛɛ Tsɛɔ ni Yɔɔ Shweshweeshwe
1 Nuu ko ni kɛ shika fiɔ guɔyeli nitsumɔi asɛɛ lɛ kɛɛ nikaselɔi akuu ko ni gbeɔ kɔleji naa lɛ akɛ: “Hiɛjoomɔ hi,” ni ekɛfata he akɛ: “Obaanyɛ ofee hiɛjoolɔ ni onu he yɛ nakai beaŋ nɔŋŋ akɛ oyɛ jogbaŋŋ.” No akɛyɔseɔ je lɛ waa yɛ bɔ ni eteeɔ he-suɔmɔ shi ehaa lɛ he, ákɛ gbɛ ni mɔ ko aaatsɔ nɔ ekɛna akɛ ewɔsɛɛ shihilɛ baahi aha lɛ. Nɔ ni tamɔɔɔ nakai kwraa lɛ, Yesu tsɔɔ akɛ esa akɛ Kristofonyo ‘akwa ehe, ejaakɛ mɛɛ sɛɛ gbɔmɔ náa, kɛji enine shɛ jeŋ muu lɛ fɛɛ nɔ, shi elaaje esusuma lɛ?’ (Mat. 16:24-26) Bɔni afee ni aná wɔsɛɛ shihilɛ ni sɛɛ tsɛɔ ni yɔɔ shweshweeshwe lɛ, esa akɛ mɔ lɛ kɛ eshihilɛ muu lɛ fɛɛ ama Nyɔŋmɔ suɔmɔnaa nifeemɔ nɔ vii—oti ni he hiaa fe fɛɛ ni esa akɛ wekui kɛma amɛhiɛ ŋmɛnɛ lɛ. (Lala 143:10; 1 Tim. 4:8) Akɛ nakai shɛɛ sane lɛ eha yɛ Nɔ Diɛŋtsɛ ni Kɛ Weku Miishɛɛ Baa wolo lɛ naagbee yitso lɛ mli. Nɛkɛ wolo hee nɛɛ yeɔ ebuaa mɛi koni amɛna nɔ ni he hiaa diɛŋtsɛ yɛ shihilɛ mli, kɛ bɔ ni amɛbaanyɛ amɛfee nii ni he baaba sɛɛnamɔ aha amɛwekui lɛ. Yɛ be mli ni wɔyaa nɔ wɔshiɛɔ sanekpakpa lɛ yɛ he fɛɛ he lɛ, mɛni wɔbaanyɛ wɔkɛɛ ni baawo mɛi ni wɔkɛkpeɔ lɛ hewalɛ koni amɛkane Weku Miishɛɛ wolo lɛ? Naa ŋaawoi komɛi:
2 Ekolɛ obaabɔ mɔdɛŋ ni okɛ “Na Weku Shihilɛ mli Ŋɔɔmɔ” dɛhiɛmɔ wolo lɛ atsu nii yɛ shinaa naa kɛ gbɛjegbɛ hu nɔ, koni okɛje sanegbaai ashishi. Obaanyɛ obi akɛ:
◼ “Yɛ yeyeeyefeemɔi fɛɛ ni ŋmɛnɛŋmɛnɛ shihilɛ kɛbaa wɔnɔ lɛ fɛɛ sɛɛ lɛ, ani osusuɔ akɛ abaanyɛ aná weku shihilɛ ni miishɛɛ yɔɔ mli diɛŋtsɛ? [Ŋmɛɛ gbɛ ni ewie.] Nɛkɛ dɛhiɛmɔ wolo nɛɛ maa nɔ mi ehaa wɔ akɛ abaanyɛ aná. Ani obaasumɔ ni okane?” Kɛ akpɛlɛ nɔ lɛ, obaanyɛ otsa nɔ kɛtsɔ enɛ kɛɛmɔ nɔ: “Akɛni oyɔɔ sane nɛɛ he miishɛɛ hewɔ lɛ, ekolɛ obaanyã wolo nɛɛ ni kɛ ŋaawoo babaoo haa yɛ bɔ ni aaafee aná miishɛɛ yɛ weku kɔkrɔɔ lɛ mli lɛ he lɛ kanemɔ hu he.” Okɛ Weku Miishɛɛ wolo lɛ mli saneyitsei ni ato naa lɛ atsɔɔ. Tsɔɔmɔ lɛ saneyitsei ni gbalaa mɔ jwɛŋmɔ lɛ fioo ko. Gbelemɔ baafa 10, ni okane kuku 17 lɛ naagbee sane lɛ kɛyashi kuku 18 lɛ naagbee. Okɛ wolo lɛ aha. Tsɔɔmɔ mli akɛ oyɛ saji babaoo ni okɛ lɛ baasusu he, ni obi ni etsɔɔ be ni obaanyɛ obasara lɛ ekoŋŋ.
3 Obaanyɛ odi weku shihilɛ ni yɔɔ miishɛɛ he sane ni nyɛgba klɛŋklɛŋ lɛ sɛɛ kɛtsɔ enɛ kɛɛmɔ nɔ:
◼ “Masumɔ ni matsɔɔ bo nɔ ko ni misusuɔ akɛ obaana he miishɛɛ yɛ wolo ni ohe lɛ mli. Naagbee yitso lɛ gbalaa jwɛŋmɔ kɛyaa nɔ diɛŋtsɛ ni kɛ weku miishɛɛ baa lɛlɛŋ lɛ nɔ. [Kanemɔ kuku 2 yɛ baafa 183.] Kadimɔ akɛ, ní aaatsu nii kutuu kɛha Nyɔŋmɔ suɔmɔnaa nifeemɔ lɛ ji gbɛ ni atsɔɔ nɔ afeɔ enɛ. Wɔmiijie yi koni wekui akase Biblia lɛ kutuu koni amɛkase nɔ ni Nyɔŋmɔ suɔmɔnaa nifeemɔ ji kɛ bɔ ni amɛkɛaatsu nii yɛ shia. Wɔkɛ mɛi kaseɔ Biblia lɛ ni wɔheee nɔ ko, ni eheɔ nyɔji fioo komɛi pɛ ni akɛgbeɔ naa. Kɛ obaaŋmɛ mi gbɛ lɛ, matsɔɔ bo bɔ ni afeɔ lɛ ahaa.” Kuu osɛɛ oya ni okɛ Mɛni Nyɔŋmɔ Taoɔ yɛ Wɔdɛŋ? wolo bibioo lɛ loo Nilee wolo lɛ ayaha lɛ, eko fɛɛ eko ni baahi jogbaŋŋ.
4 Be mli ni okɛ nanemɛi klasbii wieɔ yɛ skul loo okɛ gbekɛbii wieɔ yɛ akutso lɛ mli lɛ, ekolɛ abaaha bo sanebimɔ nɛɛ hetoo:
◼ “Te sanegbaa ni aaaha eya nɔ jogbaŋŋ yɛ fɔlɔi kɛ amɛbii ateŋ lɛ he hiaa ha tɛŋŋ? [Ŋmɛɛ gbɛ ni ewie.] Kadimɔ nɔ ni weku shihilɛ he wolo ni abaanyɛ akɛya he fɛɛ he nɛɛ kɛɔ yɛ saneyitso ni ji ‘Sanegbaa ni Yɔɔ Faŋŋ ni Tsɔɔ Anɔkwayeli’ lɛ he. [Kanemɔ kuku 4 lɛ fɛɛ kɛ kuku 5 lɛ mli klɛŋklɛŋ sane lɛ yɛ Weku Miishɛɛ wolo lɛ baafa 65.] Kukuji ni nyiɛ sɛɛ lɛ kɛ ŋaawoi ni abaanyɛ akɛtsu nii ni tsɔɔ bɔ ni aaaha sanegbaa aya hiɛ yɛ weku lɛ mli lɛ haa. Nɛkɛ wolo nɛɛ yitso ji Nɔ Diɛŋtsɛ ni Kɛ Weku Miishɛɛ Baa. Obaanyɛ ohe enɛ.” Tsɔɔmɔ mli akɛ obaaba ekoŋŋ sɛɛ mli koni obabo nɔ ni eyɔɔ kɛɛmɔ yɛ nɔ ni ekaneɔ lɛ he lɛ toi.
5 Obaanyɛ otsa fɔlɔ kɛ bi teŋ sanegbaa ni okɛ gbekɛ ko gba he sane klɛŋklɛŋ lɛ nɔ kɛtsɔ enɛ kɛɛmɔ nɔ:
◼ “Minyã miishɛɛ ni ojie kpo otsɔɔ lɛ he, yɛ bɔ ni sanegbaa kpakpa ni aaaya nɔ yɛ oweku lɛ mli lɛ he hiaa ha lɛ he. Mɛni obaanyɛ okɛɛ akɛ no ji sane ni he hiaa fe fɛɛ ni esa akɛ fɔlɔi kɛ amɛbii agba he sane?” Ŋmɛɛ gbɛ ni ewie. No sɛɛ lɛ, gbelemɔ Weku Miishɛɛ wolo lɛ baafa 68, ni okane hetoo ni yɔɔ kuku 11 lɛ klɛŋklɛŋ fã lɛ mli lɛ. “Ní aaakase Biblia lɛ daa otsi lɛ ji gbɛ ni hi jogbaŋŋ ni aaatsɔ nɔ aná Nyɔŋmɔ he nilee.” Okɛ Mɛni Nyɔŋmɔ Taoɔ yɛ Wɔdɛŋ? wolo bibioo lɛ aha. Tsɔɔmɔ mli akɛ emli nikasemɔi 16 lɛ kɛ Biblia mli shishijee shɛɛ saji ni ato naa haa. Kanemɔ hiɛkpamɔ wiemɔ ni yɔɔ baafa 2 lɛ, koni no sɛɛ lɛ, okɛ lɛ fɛɛ agba klɛŋklɛŋ nikasemɔ lɛ he sane.
6 Kɛ okɛ fɔlɔ ko kpe yɛ shia-kɛ-shia nitsumɔ lɛ mli, loo ekolɛ okɛ lɛ kpe yɛ shwɛmɔ hé ko lɛ, obaanyɛ otee miishɛɛ shi kɛtsɔ enɛ kɛɛmɔ nɔ:
◼ “Miyɛ nɔmimaa akɛ okɛ mi baakpa gbee akɛ ewa waa akɛ aaatsɔse bii ŋmɛnɛ. Mɛni osusuɔ akɛ ebaanyɛ ebu oweku lɛ he koni nibii fɔji akana amɛnɔ hewalɛ? [Ŋmɛɛ gbɛ ni ewie.] Náa ŋaawoo kpakpa ko ni miná he miishɛɛ.” Gbaa sane mlitsɔɔmɔ ni yɔɔ kuku 1 lɛ he sane otsɔɔ, ni okane kuku 2 lɛ yɛ Weku Miishɛɛ wolo lɛ baafa 90. Tsɔɔmɔ bɔ ni ekɛ gbɛtsɔɔmɔ ni ŋmɛɔ pɛpɛɛpɛ ni tsuɔ nii diɛŋtsɛ haa, koni ekɛbu wekui ahe koni nibii ni kpatãa mɔ hiɛ akana amɛnɔ hewalɛ. Kɛɛmɔ lɛ akɛ obaashi eko oha lɛ, koni oba ni obaha sanebimɔi fɛɛ ni baate shi lɛ ahetoo.
7 Kɛ otee fɔlɔ ko ni he “Weku Miishɛɛ” wolo lɛ ŋɔɔ nɔ ni ji shii enyɔ lɛ, obaanyɛ otsa sanegbaa lɛ nɔ nɛkɛ:
◼ “Beni wɔkpe klɛŋklɛŋ lɛ, nɔ ni minyɛ mina ji akɛ osusuɔ obii ahe waa diɛŋtsɛ, ni ákɛ oosumɔ ni ofee bɔ fɛɛ bɔ ni obaanyɛ koni obu amɛhe ni jeŋba gbohii akana amɛnɔ hewalɛ. Ekolɛ okaneko he sane lolo, shi nɔ ko yɛ ni ayɔse ni he hiaa waa ni átsɔɔ yɛ wolo ni mishi miha bo lɛ mli ní esa akɛ ona. [Kanemɔ kuku 19 yɛ baafa 59.] Ní wɔɔná wɔkɛ Nyɔŋmɔ teŋ wekukpaa lɛ biɔ ni wɔle lɛ kɛtsɔ e-Wiemɔ ni aŋma, ni ji Biblia lɛ baafai lɛ anɔ. Ani obaasumɔ ni mafee bɔ ni wɔkaseɔ Biblia lɛ wɔhaa akɛ weku lɛ he nɔkwɛmɔ nɔ matsɔɔ bo?”
8 Je lɛŋ ŋaawolɔi nyɛŋ atsɔɔ bɔ ni wekui baafee aná miishɛɛ, ni eka shi faŋŋ akɛ amɛbaaha amɛnijiaŋ aje wui. Nyɛhaa wɔkɛ Weku Miishɛɛ wolo lɛ babaoo ahaa koni Nyɔŋmɔ Wiemɔ lɛ anyɛ aye abua gbɔmɛi ni yɔɔ he fɛɛ he lɛ, koni amɛná wɔsɛɛ shihilɛ ni sɛɛ tsɛɔ ni yɔɔ shweshweeshwe.—1 Tim. 6:19.