Okɛ Ekãafeemɔ Awie
1 Yɛ nyɛsɛɛ afii nɛɛ amli lɛ shiɛlɔi ni yɔɔ hei komɛi lɛ miina akɛ eewa kɛmiiha amɛ be fɛɛ be akɛ amɛkɛ mɛi aaawie yɛ amɛ shiai amli. Mɛi babaoo bɔɔ amaniɛ akɛ mɛi ni fa fe oha mlijaa 50 bɛ shia kɛ aaya mɛi aŋɔɔ yɛ shia kɛ shia nitsumɔ mli yɛ amɛ shikpɔŋkuku lɛ mli. Enɛ hewɔ lɛ, afiteɔ be lɛ babaoo ni yibiiwoo ko kwraa jɛɛɛ mli kɛbaaa.
2 Yɛ afii ni eho lɛ amli lɛ anaa mɛi babaoo yɛ shia Hɔgbaa ni abuɔ no yɛ hei pii akɛ hejɔɔmɔ gbi lɛ. Kusumii etsake. Efɔɔ kaa akɛ aaana ni mɛi miitsu heloonaa nitsumɔ, ni amɛmiitsu weku lɛ hiamɔ nii tamɔ nihemɔ yɛ shwapo mli he nii, loo ni aaajie hiɛtserɛ, ni no hu haa amɛshiɔ shia. No hewɔ lɛ ni aaana mɛi Hɔgbaa po yɛ shia kɛ shia nitsumɔ mli lɛ etsɔ naagba.
3 Kɛ mɛi bɛ shia lɛ, eka shi faŋŋ akɛ amɛyɛ he kroko. Akɛni wɔyiŋtoo ji ni wɔkɛ mɛi awie hewɔ lɛ, mɛni hewɔ wɔkɛ mɛi ni wɔkɛkpeɔ lɛ ewieee—yɛ gbɛjegbɛ nɔ, yɛ jara nɔ, loo yɛ nitsumɔ he. Nɔ ni Paulo fɔɔ feemɔ ji ni ebɛŋkɛ “mɛi ni kɛ lɛ kpeɔ daa nɛɛ,” ni eye amɛ odase. (Bɔf. 17:17) Enɛ bafee odaseyeli nifeemɔ ko ni woɔ yibii yɛ nakai beaŋ, ni eji odaseyeli nifeemɔ ni woɔ yibii yɛ wɔgbii nɛɛ amli.
4 Kɛ wɔtee shia kɛ shia lɛ, bei pii lɛ, wɔnaa ni mɛi miinyiɛ kɛkɛ loo ni ekolɛ amɛmiimɛ mɔ ko. Kɛ amɛmiijɔɔ amɛhe lɛ, ekolɛ amɛbaatara tso ko shishi loo ni amɛmiitsu nɔ ko yɛ amɛtsɔne he loo ni amɛmiifɔ he. Ekolɛ naanyobɔɔ su kɛ ŋmɔlɔ kɛ ŋamɔ kpakpa ko ji nɔ̃ pɛ ni he baahia kɛha sanegbaa shishijee. Kɛ amɛyɛ jɛmɛ gbɛ nɔŋŋ lɛ, wɔbaanyɛ wɔtsi ta po akɛ etamɔ nɔ ni wɔnaaa amɛ yɛ amɛ shia, ni eŋɔɔ wɔnaa amrɔ nɛɛ akɛ wɔna hegbɛ nɛɛ ni wɔkɛ amɛ aaawie. Akɛni mɛi babaoo ejie ekaafeemɔ fioo kpo kɛtsɔ hiɛ hewɔ lɛ, amɛna niiashikpamɔi ni woɔ yibii amli ŋɔɔmɔ.
5 Ekãafeemɔ Woɔ Yibii: Nyɛmi nuu ko kɛɛ akɛ ebɛŋkɛɔ mɛi ni damɔ shi ni mɛɔ bɔs, ni sheraa shi, loo ni amɛtara amɛtsɔne mli. Ekɛ miishɛɛ ŋmɔlɔ kɛ gbee kpakpa ko feɔ enii tamɔ naanyo ko ni yɔɔ akutso lɛ mli ni miisumɔ ni esara mɛi kɛkɛ. Kɛtsɔ nɛkɛ gbɛ nɔ lɛ, jeee akɛ ekɛ woji babaoo eha kɛkɛ shi eje Biblia mli nikasemɔi babaoo hu shishi.
6 Nyɛmi nuu ko kɛ eŋa miiya mɛi aŋɔɔ yɛ shinaai anaa ni amɛkɛ yoo ko ni nyiɛ amɛmasɛi ni hiɛ baagi wulu ko ni nihɔɔmɔ nibii yɔɔ mli kpe. Amɛje sanegbaa shishi, ni amɛjie eyi yɛ ekãa ni eyɔɔ akɛ ekɛaatsu eweku lɛ hiamɔ nii ahe nii lɛ. Amɛbi akɛ: “Shi namɔ baanyɛ atsu adesai ahiamɔ nii ahe nii?” No tee yoo lɛ miishɛɛ shi. Sanegbaa kuku ko ha efɔ amɛnine kɛba eshia, ni amɛje Biblia mli nikasemɔ shishi yɛ jɛmɛ.
7 No hewɔ lɛ kɛ ooye odase yɛ shinaai anaa be kroko lɛ, kɛ Hɔgbaa loo yɛ otsi lɛ mli gbi kroko nɔ, ni ona akɛ mɛi bɛ shia lɛ, mɛni hewɔ ofeee ekaa fioo ni okɛ mɛi ni okɛkpeɔ lɛ awie—yɛ gbɛjegbɛ lɛ nɔ loo yɛ he kroko? (1 Tes. 2:2) Ekolɛ osɔɔmɔ lɛ baawo yibii babaoo, ni obaana miishɛɛ babaoo yɛ osɔɔmɔ lɛ mli.