Yaa Nɔ Okɛ Ekãa Ajaje Nyɔŋmɔ Wiemɔ Lɛ
1 Ákɛ sɔɔlɔi ni ji Kristofoi lɛ, wɔle akɛ jeee mɛi fɛɛ baabo wɔshiɛmɔ lɛ toi. (Mat. 10:14) Shi wɔhaaa ni sane lɛ toi ní amɛteaŋ mɛi komɛi booo lɛ atsĩ wɔnaa ni wɔkashiɛ sanekpakpa lɛ. (Abɛi 29:25) Mɛni yeɔ ebuaa wɔ koni wɔya nɔ wɔkɛ ekãa ajaje Nyɔŋmɔ wiemɔ lɛ?
2 Bɔfo Paulo hiɛ sɔ “Kristo Yesu . . . he nilee ni fe fɛɛ lɛ.” Enɛ tsirɛ lɛ ni ekɛ “nɔmimaa babaoo” wie. (Fil. 3:8; 1 Tes. 1:5) Eyɛ mli akɛ mɛi komɛi bu shɛɛ sane ni eshiɛɔ lɛ akɛ hewalɛ bɛ mli ni eji kwashiai asane moŋ, shi ele akɛ eji “Nyɔŋmɔ hewalɛ ni aŋɔhereɔ mɔ fɛɛ mɔ ni heɔ yeɔ lɛ yiwala.” (Rom. 1:16) No hewɔ lɛ, be mli ní ekɛ kaa miikpe po lɛ, etee nɔ ekɛ “ekãa wie yɛ Yehowa hewalɛ naa.”—Bɔf. 14:1-7; 20:18-21, 24, NW.
3 Wɔhewalɛ Jɛɛhe: Jeee Paulo diɛŋtsɛ hewalɛ naa enyɛ ekɛ ekãa ye odase lɛ. Beni Paulo wieɔ ekɛ Sila he lɛ, eŋma akɛ: ‘Wɔná ekaa yɛ wɔ-Nyɔŋmɔ lɛ mli, ni wɔkɛjaje Nyɔŋmɔ sanekpakpa lɛ wɔtsɔɔ nyɛ yɛ pelemɔ babaoo mli, tsɛ wɔna nɔ dã, ni afee wɔ niseniianii hu yɛ Filipi.’ (1 Tes. 2:2; Bɔf. 16:12, 37) Kɛfata he lɛ, beni awo Paulo tsuŋ yɛ Roma lɛ, ebi koni mɛi krokomɛi asɔle aha lɛ bɔni afee ni enyɛ ‘ekɛ ekãa ní sa akɛ ekɛwie lɛ’ aya nɔ ajaje sanekpakpa lɛ. (Efe. 6:18-20) Akɛni Paulo kɛ ehiɛ efɔ̃ɔɔ lɛ diɛŋtsɛ ehe nɔ, shi moŋ ekɛ ehiɛ fɔ̃ Yehowa nɔ hewɔ lɛ, enyɛ etee nɔ ekɛ ekãa jaje Nyɔŋmɔ wiemɔ lɛ.—2 Kor. 4:7; Fil. 4:13.
4 Nakai nɔŋŋ eji ŋmɛnɛ. Nyɛmi nuu ko ni ewa waa kɛha lɛ akɛ eeeha ale yɛ enitsumɔhe lɛ akɛ eji Yehowa Odasefoi lɛ ateŋ mɔ kome, ni enyɛɛɛ eye trukaa odase hu yɛ jɛmɛ lɛ sɔle yɛ sane lɛ he, ni ebɔi odaseyeli. Nuu ko ni ekɛ lɛ tsuɔ nii lɛ kpoo esane lɛ yɛ shishijee mli, shi gbohiiashitee he hiɛnɔkamɔ lɛ tã ni etsĩ etsɔɔ lɛ lɛ gbele gbɛ kɛha Biblia lɛ kasemɔ. Kɛjɛ no sɛɛ kɛyaa lɛ, nyɛmi nuu lɛ kɛ hegbɛ fɛɛ hegbɛ ni enáa lɛ yeɔ odase. Beni eshi kɛtee nitsumɔhe kroko lɛ, enyɛ eye ebua enitsulɔi lɛ ateŋ mɛi 34 kɛshɛ baptisimɔ he yɛ afii 14 mli. Wɔbaanyɛ wɔná nɔmimaa akɛ Yehowa baaye abua wɔ koni ‘wɔya nɔ wɔkɛ ekãa pii ajaje ewiemɔ lɛ.’—Bɔf. 4:29.