Kafomɔ Yehowa “Gbi Fɛɛ Gbi”
1 Shiwoo ni Maŋtsɛ David kɛha Yehowa akɛ: “Makafoo, mi-Nyɔŋmɔ, maŋtsɛ, ni majie ogbɛi lɛ yi daa kɛaatee naanɔ” lɛ yɛ Lala 145:2. Wɔ hu wɔyɛ nɔ ni wɔɔdamɔ nɔ wɔkafo wɔ ŋwɛi Tsɛ lɛ ni wɔjie eyi! Shi mɛɛ gbɛ nɔ wɔɔtsɔ wɔkase David nɔkwɛmɔ nɔ lɛ yɛ Yehowa maŋtsɛyeli lɛ yi ni wɔɔjie “gbi fɛɛ gbi” lɛ mli?
2 Wɔkɛ Hiɛsɔɔ ni Wɔyɔɔ Kɛha Yehowa lɛ Awo Wɔtsuii Amli Obɔ: Nyɔŋmɔ Wiemɔ lɛ kasemɔ daa haa hiɛsɔɔ ni wɔyɔɔ kɛhaa nɔ ni Yehowa efee, kɛ nɔ ni efeɔ, kɛ nɔ ni ebaafee eha wɔ wɔsɛɛ lɛ yaa hiɛ. Be mli ni hiɛsɔɔ ni wɔyɔɔ kɛhaa enitsumɔi ni yɔɔ naakpɛɛ lɛ yaa hiɛ lɛ, wɔbaana akɛ wɔmiigba enibii kpakpai lɛ ahe sane yɛ gbɛ ni waaa nɔ. (Lala 145:7) Wɔkɛ ekãafeemɔ baajie Yehowa yi be fɛɛ be ni sa mli.
3 Jiemɔ Yehowa Yi yɛ Daa Gbi Sanegbaa Mli: Kɛ wɔkɛ nanemɛi, skulbii, nitsumɔ mli bii, kɛ mɛi krokomɛi ni wɔkɛ amɛ kpeɔ daa gbi lɛ miigba sane lɛ, ekolɛ wɔnaa hegbɛi ni wɔɔtsɔ nɔ wɔkɛ amɛ agba wɔ hiɛnɔkamɔ lɛ he sane. Ekolɛ akutsoŋnyo ko baatsɔɔ bɔ ni esusuɔ awuiyeli he waa yɛ akutso lɛ mli; ekolɛ skulnyo ko baasusu tsofai fɔji kɛ nitsumɔ loo jeŋba shara he; ekolɛ naanyo nitsulɔ baatsɔɔ ejwɛŋmɔ yɛ maŋkwramɔŋ sane ko he. Wɔbaanyɛ wɔgbala jwɛŋmɔ kɛya shishitoo mlai kɛ shiwoi ni yɔɔ Nyɔŋmɔ Wiemɔ lɛ mli ni tsɔɔ gbɛ ni ja ni esa akɛ wɔtsɔ nɔ amrɔ nɛɛ, kɛ naagbai nɛɛ anaa tsabaa ni abaaná yɛ naagbee mli lɛ anɔ. Wiemɔi ni tamɔ nɛkɛ ni awieɔ yɛ “be ni sa” mli lɛ baanyɛ afee jɔɔmɔ!—Abɛi 15:23.
4 Wiemɔ Yehowa He yɛ Be-Fɛɛ Mli: Mɔ ni hiɛ sɔɔ Yehowa jogbaŋŋ lɛ miisumɔ ni ena sanekpakpa ni eeegba mɛi krokomɛi babaoo bɔ ni eeenyɛ lɛ mli gbɛfaŋnɔ. (Lala 40:9-11) Yɛ enɛ gbɛfaŋ lɛ, esa akɛ wɔbi wɔhe akɛ, ‘Ani miifee bɔ fɛɛ bɔ ni mishihilɛ baaŋmɛ gbɛ?’ Mɛi babaoo ena akɛ, beni amɛfee tsakemɔi kpakpai komɛi lɛ, amɛnyɛ amɛtsɔmɔ daa gbɛgbalɔi. Kɛ amrɔ nɛɛ shihilɛ eŋmɛɛɛ nakai feemɔ gbɛ lɛ, ani wɔbaanyɛ wɔtsu nii akɛ gbɛgbalɔi awalɔi? Akɛni Kaimɔ be ni baa lɛ ji be kɛha nitsumɔ babaoo hewɔ lɛ, March kɛ April nyɔji lɛ baafee be kpakpa ni wɔkɛaaha wɔsɔɔmɔ lɛ aya hiɛ kɛtsɔ gbɛgbalɔi awalɔi anitsumɔ nɔ.
5 Ye Obua Mɛi Heei lɛ ni Amɛbafata Wɔhe Kɛjie Yehowa Yi: Yesu gbele lɛ Kaimɔ lɛ kaiɔ wɔ daa yɛ yiŋtoi ni wɔɔdamɔ nɔ wɔhiɛ asɔ Yehowa ni wɔjie E-gbɛi yi lɛ he. Be ni sa jogbaŋŋ diɛŋtsɛ ni wɔkɛbaawo wɔ Biblia mli nikaselɔi ahewalɛ ni amɛfata wɔhe kɛwie Yehowa maŋtsɛyeli lɛ he yɛ faŋŋ mli lɛ nɛ. Wo amɛ hewalɛ ni amɛkɛ sɔlemɔ asusu nɔ ni aŋma yɛ Nilee Ni Kɛ Mɔ Yaa Naanɔ Wala Mli wolo lɛ baafai 173-5, kukuji 7-9 lɛ he jogbaŋŋ. Kɛ amɛsa lɛ, ehe ehiaaa ni amɛshashaoɔ shi yɛ niiashikpamɔ ni amɛbɛ hewɔ. Shiɛlɔi ni he esa yɛ ni baatsɔɔ amɛ bɔ ni atsuɔ Maŋtsɛyeli shiɛmɔ nitsumɔ lɛ ahaa. Kɛ mɛi heei lɛ baanyɛ ana ekãa ni amɛwie sanekpakpa lɛ he lɛ, amɛbaanyɛ amɛna nɔmimaa akɛ Yehowa baaye ebua amɛ.—Bɔf. 4:31; 1 Tes. 2:2.
6 Kɛ wɔbɔ mɔdɛŋ akɛ wɔɔkafo Yehowa gbi fɛɛ gbi lɛ, ekɛ naanɔ sɛɛnamɔi bahaa wɔ kɛ mɛi krokomɛi fɛɛ.