Na Teokrase Sɔɔmɔ Skul Kɛha 1996 lɛ He Sɛɛ—Fa 3
1 Bɔfo Paulo miisumɔ ni enyɛmimɛi lɛ asɔle amɛha lɛ koni enyɛ ekɛ ekaa awie sanekpakpa lɛ he. (Efes. 6:18-20) Wɔmiisumɔ ni wɔna nyɛmɔ ni tamɔ nakai nɔŋŋ. Yɛ no hewɔ lɛ, wɔhiɛ sɔɔ yelikɛbuamɔ ni Teokrase Sɔɔmɔ Skul lɛ kɛhaa wɔ lɛ, ni awoɔ mɛi ni he esa ni baa kpee lɛ hewalɛ ni amɛkɛ amɛhe awo mli.
2 Akɛ nikaselɔi lɛ, wɔnine shɛɔ ŋaawoo ni akɛhaa wɔ aŋkroaŋkro lɛ nɔ, koni eye ebua ni wɔya hiɛ yɛ wɔ wiemɔ kɛ nitsɔɔmɔ mli nyɛmɔi amli. (Abɛi 9:9) Wɔbaanyɛ wɔbo ŋaawoo ni nikaselɔi krokomɛi anine shɛɔ nɔ lɛ toi ni wɔna he sɛɛ hu, ni wɔkɛ nɔ ni wɔkaseɔ lɛ ato wɔhe. Kɛ wɔmiisaa wɔhe yɛ nifeemɔ ko mli lɛ, esa akɛ wɔkase sane ni ajie nikasemɔ lɛ kɛjɛ mli lɛ jogbaŋŋ koni wɔkwɛ ni wɔha emlitsɔɔmɔ ni wɔkɛhaa lɛ aja jogbaŋŋ. Esa akɛ saji otii kɛ ŋmalɛi ni wɔkɛbaatsu nii lɛ asa saneyitso ni wɔtsuɔ he nii lɛ jogbaŋŋ. Kɛ mɔ kroko hu yɛ nifeemɔ lɛ mli lɛ, no lɛ esa akɛ okɛ lɛ akase jogbaŋŋ dani nyɛbafee yɛ skul lɛ mli. Yɛ be mli ni wɔyaa hiɛ lɛ, esa akɛ wɔbɔ mɔdɛŋ ni wɔwie kɛji atsɛ wɔ trukaa, ni wɔkɛ nibii fioo ni wɔŋmala atsu nii fe nɔ ni wɔɔŋmala nɔ fɛɛ nɔ yɛ wolo nɔ ni wɔkane.
3 Esa akɛ mɛi fɛɛ ni yɔɔ nifeemɔi yɛ skul lɛ mli lɛ ashɛ shi mra, ni amɛkɛ amɛ Speech Counsel wolo lɛ aha skul nɔkwɛlɔ lɛ, ni amɛyatara asa lɛ hiɛgbɛ. Esa akɛ nyɛmimɛi yei lɛ aha skul nɔkwɛlɔ lɛ ale bɔ ni amɛ nifeemɔ lɛ yɔɔ ha kɛtsɔ hiɛ kɛ agbɛnɛ kɛji amɛbaadamɔ shi loo amɛbaatara shi yɛ amɛ nifeemɔ lɛ mli. Ekome ni aaafee yɛ nɛkɛ gbɛi anɔ lɛ haa nifeemɔ lɛ yaa nɔ jogbaŋŋ ni eyeɔ ebuaa mɛi ni kwɛɔ wiemɔ kpoku lɛ nɔ lɛ koni amɛha nɔ fɛɛ nɔ afee klalo kɛtsɔ hiɛ.
4 Hesaamɔ Kɛha Nifeemɔ ni Ji 2: Biblia kanemɔ lɛ yiŋtoo kome ji ni eye ebua nikaselɔ lɛ ni eya ehiɛ yɛ enikanemɔ mli. Mɛɛ gbɛ ni hi fe fɛɛ abaanyɛ atsɔ nɔ atsu enɛ he nii? Sane lɛ kanemɔ waa shii abɔ ji gbɛ ni hi fe fɛɛ ni aaatsɔ nɔ ana nɔ hewalɛ. Kɛji nikaselɔ lɛ miitao akase wiemɔi ni wa lɛ shishinumɔ kɛ etsɛmɔ jogbaŋŋ lɛ, esa akɛ etao enɛɛmɛi yɛ wiemɔ komekomei ashishitsɔɔmɔ wolo mli. Ekolɛ enɛ hu baabi ni enu okadii kɛha wiemɔi atsɛmɔ ni akɛtsuɔ nii yɛ wiemɔ komekomei ashishitsɔɔmɔ wolo lɛ mli lɛ shishi.
5 New World Translation lɛ yeɔ ebuaa yɛ mɛi agbɛi tsɛmɔ kɛ wiemɔi ni wawai ni yɔɔ Biblia lɛ mli lɛ tsɛmɔ mli. Efeɔ enɛ kɛtsɔɔ wiemɔi lɛ ni ejaraa mli ewoɔ wiemɔ tsɛmɔ kui bibii amli kɛ wiemɔ okadii ni ekɛhaa lɛ nɔ. (Kwɛmɔ “All Scripture Is Inspired of God and Beneficial,” baafai 325-6, kukuji 27-8.) Kɛha gbɛtsɔɔmɔ lɛ, esa akɛ atsɛ wiemɔ kuu ni tsɔɔ wiemɔ okadi lɛ hiɛ lɛ waa diɛŋtsɛ ni egbɛɛ. Kɛ gbeeŋgbɛɛmɔ wiemɔ (vowel) ko baa yɛ wiemɔ tsɛmɔ kuu ni wiemɔ okadi yɔɔ nɔ lɛ naagbee gbɛ lɛ, no lɛ akpãa gbeeŋgbɛɛmɔ lɛ tsɛmɔ mli yɛ wiemɔ ni atsɛɔ lɛ mli. Kɛ daaŋ gbɛɛmɔ niŋmaa (consonant) baa yɛ wiemɔ tsɛmɔ kuu ko naagbee gbɛ lɛ, no lɛ akpãŋ nakai wiemɔ kuu lɛ tsɛmɔ lɛ mli. (Okɛ Saʹlu ato Salʹlu he.) Nyɛmimɛi komɛi boɔ Asafo lɛ audiocassette lɛ toi bɔni afee ni no asaa amɛ kɛha Biblia kanemɔ nifeemɔi lɛ.
6 Fɔlɔi baanyɛ aye abua amɛ bii bibii lɛ ni amɛsaa amɛhe yɛ nikanemɔ nifeemɔ lɛ mli. Nɔ ni baanyɛ afata enɛ he ji ni ooobo toi yɛ be mli ni gbekɛ lɛ kaseɔ lɛ koni no sɛɛ lɛ okɛ ŋaawoi ni yeɔ ebuaa ni baaha eya hiɛ lɛ aha lɛ. Be ni ato aha no lɛ biɔ ni akpa wiemɔ lɛ hiɛ kuku ni akɛ sane naamuu ni sa ni haa akɛ otii kukuji lɛ tsuɔ nii lɛ aha. Yɛ nakai feemɔ mli lɛ nikaselɔ lɛ haa nyɛmɔ ni eyɔɔ akɛ eeewie ni ekwɛɛɛ wolo nɔ lɛ yaa hiɛ.
7 Lalatsɛ lɛ tsɔ sɔlemɔ nɔ ebi enɛ akɛ: “[Oo Yehowa, NW] gbelemɔ minaabu, ni midaaŋ ajaje oyijiemɔ lɛ atsɔɔ!” (Lala 51:17) Eba akɛ Teokrase Sɔɔmɔ Skul ni wɔkɛ wɔhe woɔ mli lɛ baaye abua ni wɔtsu suɔmɔ ni tamɔ nɛkɛ nɔŋŋ he nii.