Shiɛmɔ Maŋtsɛyeli Sane Lɛ
1 Awoɔ wɔ hewalɛ yɛ Hebribii 10:23 koni ‘wɔmɔ wɔhiɛnɔkamɔ jajemɔ lɛ mli ni awa.’ Ni wɔhiɛnɔkamɔ lɛ fɛɛ damɔ Nyɔŋmɔ Maŋtsɛyeli lɛ nɔ. Yesu kɛ fãmɔ ha faŋŋ akɛ esa akɛ ashiɛ Maŋtsɛyeli lɛ he sanekpakpa lɛ yɛ majimaji fɛɛ mli. (Mar. 13:10) Ehe miihia ni wɔha enɛ ahi wɔjwɛŋmɔ mli yɛ be mli ni wɔkɛ wɔhe woɔ shiɛmɔ nitsumɔ lɛ mli lɛ.
2 Kɛ wɔtee mɛi aŋɔɔ lɛ, wɔbɔɔ mɔdɛŋ ni wɔje nɔ ko ni amɛbaanya he loo ni ekɔɔ amɛhe lɛ he sanegbaa shishi. Bei pii lɛ wɔtsĩɔ nibii ni amɛle jogbaŋŋ lɛ atã, tamɔ awuiyeli ni yɔɔ akutso lɛ mli, nibii ni gbaa obalahii kɛ obalayei bibii anaa, daaŋ-ŋmaa he haomɔi, loo jeŋ saji amli naagbai nɛkɛ. Akɛni mɛi babaoo kɛ amɛjwɛŋmɔ ema nɛkɛ ‘shihilɛ mli yeyeeye feemɔi’ nɛɛ anɔ vii hewɔ lɛ, kɛ wɔtsɔɔ akɛ ekɔɔ wɔhe ni wɔnuɔ shishi lɛ, mɛi baatsɔɔ nɔ ni yɔɔ amɛjwɛŋmɔ mli be fɛɛ be. (Luka 21:34) Enɛ baanyɛ agbele gbɛ aha wɔ ni wɔkɛ mɛi agba wɔhiɛnɔkamɔ lɛ he sane.
3 Shi kɛlɛ, kɛ wɔkwɛɛɛ jogbaŋŋ lɛ, sanegbaa lɛ baadamɔ nibii ni ejaaa nɔ kɛyashi he ni wɔnyɛɛɛ wɔtsu yiŋtoo hewɔ ni wɔyasara lɛ he nii—akɛ wɔshiɛ Maŋtsɛyeli shɛɛ sane lɛ. Eyɛ mli akɛ wɔgbalaa jwɛŋmɔ kɛyaa shihilɛi gbohii ni kɛ haomɔ babaoo baa lɛ nɔ moŋ, shi oti ni ma wɔhiɛ ji ni wɔgbala jwɛŋmɔ kɛya Maŋtsɛyeli ní yɛ naagbee lɛ, ekɛ adesai anaagbai fɛɛ anaa tsabaa baaba lɛ nɔ. Wɔyɛ hiɛnɔkamɔ ni yɔɔ naakpɛɛ lɛlɛŋ ni he miihia gbɔmɛi waa diɛŋtsɛ akɛ amɛaanu he sane. No hewɔ lɛ, yɛ be mli ni ekolɛ wɔbaatsɔ hiɛ wɔgba nɛkɛ “jaramɔ bei” nɛɛ fã ko he sane lɛ, esa akɛ wɔgbala jwɛŋmɔ kɛya shɛɛ sane pɔtɛɛ ni wɔhiɛ ni ji “naanɔ sanekpakpa” lɛ nɔ oya. Yɛ nɛkɛ gbɛ nɔ lɛ, wɔbaagbe wɔsɔɔmɔ lɛ naa kwraa.—2 Tim. 3:1; 4:5; Kpoj. 14:6.