Ní Aaashiɛ Sanekpakpa lɛ kɛ Jwɛŋmɔ Kpakpa
1 Wɔ fɛɛ wɔsumɔɔ ni wɔna miishɛɛ yɛ nɔ ni wɔfeɔ lɛ mli ni wɔgbe ehe nitsumɔ naa, titri lɛ, yɛ kaselɔ-feemɔ nitsumɔ lɛ mli. Mɛni ji nɔ ni kɛ wɔtsui ni nyɔɔ wɔmli nɛɛ baa? Nɔ ni ekɛjeɔ shishi ji jwɛŋmɔ kpakpa mli, ni wɔhiɛɔ yɛ be mli ni wɔyaa nɔ wɔkɛ hiɛdɔɔ yeɔ buaa mɛi krokomɛi yɛ nitsumɔ ni he yɔɔ sɛɛnamɔ lɛ mli lɛ. (Abɛi 11:25) Esa akɛ subaŋ ni wɔjieɔ lɛ kpo yɛ sanekpakpa lɛ kɛhamɔ mli lɛ atsɔɔ akɛ wɔheɔ nɔ ni wɔkɛɔ lɛ wɔyeɔ diɛŋtsɛ. Kɛ wɔwie kɛjɛ wɔtsuiŋ lɛ, belɛ anɔkwa ni wɔyeɔ kɛ hemɔkɛyeli ni wɔyɔɔ lɛ baaje kpo faŋŋ yɛ mli. (Luka 6:45) Kɛ wɔfee wɔ shiɛmɔ wiemɔ lɛ he nɔkwɛmɔ nɔ wɔkwɛ lɛ, wɔbaana nɔmimaa babaoo yɛ be mli ni wɔkɛ mɛi ni yɔɔ shikpɔŋkuku lɛ mli lɛ wieɔ lɛ. Enɛ he baaba sɛɛnamɔ jogbaŋŋ, titri lɛ, yɛ be mli ni wɔkɛ Life—How Did It Get Here? By Evolution or by Creation? wolo lɛ haa yɛ September mli lɛ. Ekolɛ ŋaawoi ni nyiɛ sɛɛ nɛɛ baaye abua bo yɛ sanekpakpa lɛ shiɛmɔ kɛ jwɛŋmɔ kpakpa lɛ mli.
2 Beni okɛ “Creation” wolo lɛ haa lɛ, obaanyɛ okɛɛ enɛ yɛ klɛŋklɛŋ saramɔ lɛ mli:
◼ “Beni wɔkɛ wɔ akutso lɛ mli bii wieɔ lɛ, wɔna akɛ mɛi komɛi kɛ amɛhe fɔ̃ɔ Nyɔŋmɔ nɔ. Ewaa kɛhaa mɛi krokomɛi akɛ amɛaahe lɛ amɛye. Te osusuɔ tɛŋŋ? [Ŋmɛɛ gbɛ ni ewie.] Kadimɔ nɔ ni Biblia lɛ susuɔ yɛ sane nɛɛ he. [Kanemɔ Romabii 1:20.] Wɔbaanyɛ wɔnà Nyɔŋmɔ ‘naanɔ hewalɛ kɛ [Nyɔŋmɔyeli, NW]’ lɛ he odaseyeli kɛtsɔ nibii ni ebɔ lɛ kwɛmɔ nɔ.” Kanemɔ Creation wolo lɛ baafa 48 lɛ naagbee kuku lɛ, ni ogbala jwɛŋmɔ kɛba walayibii ni yɔɔ hwanyaŋŋ lɛ nɔ. Aloo okɛ baafa 147 lɛ kuku 18 lɛ atsu nii, ni okɛtsɔɔ bɔ ni tso mli nui lɛ ashibɔlemɔ he gbɛjianɔtoo ni yɔɔ naakpɛɛ lɛ maa Bɔlɔ ko nitsumɔ lɛ nɔ mi hã. Okɛ wolo lɛ aha yɛ tooyeli diɛŋtsɛ ni atsɔɔ lɛ naa.
3 Kɛ ooku osɛɛ oyasara mɛi ni okɛ amɛ susu Bɔlɔ ni Nyɔŋmɔ ji lɛ he lɛ, ekolɛ obaasumɔ ni owie nɛkɛ:
◼ “Beni mibasara bo nyɛsɛɛ ko lɛ, wɔgba odaseyeli ni tsɔɔ akɛ Nyɔŋmɔ yɛ lɛ he sane—ebɔɔ nii ni yɔɔ naakpɛɛ lɛ. Ani ewa akɛ ooohe oye akɛ Mɔ ni bɔ jeŋ muu lɛ fɛɛ lɛ yɛ wɔ wɔsɛɛ shihilɛ he miishɛɛ hu? [Ŋmɛɛ gbɛ ni ewie.] Eyɛ miishɛɛ akɛ ooole akɛ Bɔlɔ lɛ ekpɛ eyiŋ momo kɛha wɔsɛɛ be.” Kanemɔ Yesaia 46:9, 10. Okɛ Creation wolo lɛ yitso 19 lɛ mli mfonirii kɛ niŋmaa ni wieɔ mfonirii ahe lɛ atsu nii yɛ bɔ ni mɔ lɛ naa he miishɛɛ ehaa lɛ naa, ni okɛma shihilɛ kpakpa ni Nyɔŋmɔ ewo shi yɛ he lɛ nɔ mi. Kanemɔ yitso 20 lɛ mli kuku 1 lɛ, ni okɛɛ lɛ akɛ okɛ lɛ baafee Biblia mli nikasemɔ. Kɛ ekpɛlɛ nɔ lɛ, okɛ Nilee wolo lɛ atsu nii ni okɛje nikasemɔ lɛ shishi.
4 Obaanyɛ oka shiɛmɔ wiemɔ nɛɛ okwɛ, beni okɛ “Creation” wolo lɛ miihã:
◼ “Beni mikɛ akutsoŋ bii lɛ wieɔ lɛ, miyɔse akɛ mɛi babaoo miishwe ni amɛna akutso ko ni yɔɔ shweshweeshwe kɛ jeŋ ni toiŋjɔlɛ yɔɔ mli. Te osusuɔ tɛŋŋ yɛ nɔ hewɔ ni gbɔmɔ nyɛɛɛ ana shihilɛ ni tamɔ nɛkɛ lɛ he? [Ŋmɛɛ gbɛ ni ewie.] Ekolɛ maŋ hiɛnyiɛlɔi komɛi baaye anɔkwa, ni amɛfee nɔ̃ kpakpa ko, shi kadimɔ ŋaawoo ni Biblia lɛ kɛhaa yɛ nilee mli lɛ.” Kanemɔ Lala 146:3, 4; koni obi akɛ: “Ani mɔ ko yɛ ni baanyɛ aha adesa hiamɔ nibii?” Kanemɔ kukuji 5 kɛ 6. Okɛ mfoniri ni yɔɔ Creation wolo lɛ baafa 251 lɛ atsɔɔ lɛ, ni ogbala ejwɛŋmɔ kɛba Nyɔŋmɔ nɔyeli lɛ mli sɛɛnamɔi anɔ. Okɛ wolo lɛ aha, ni otsɔɔ lɛ gbɛjianɔ ni wɔto kɛha sɛɛsaramɔ.
5 Kɛ asusu Nyɔŋmɔ nɔyeli lɛ he klɛŋklɛŋ lɛ, obaanyɛ oka gbɛtsɔɔmɔ nɛɛ okwɛ yɛ sɛɛsaramɔ lɛ mli:
◼ “Beni miba biɛ gbii fioo ko ni eho nɛ lɛ, wɔgba nyɛ́ ni gbɔmɔ nyɛɛɛ ekɛ toiŋjɔlɛ diɛŋtsɛ aba shikpɔŋ nɔ lɛ he sane. Ekolɛ obaakai akɛ wɔna nɔ ni Biblia lɛ tsɔɔ, ní tsɔɔ nɔ hewɔ ni ayeee omanye ni tamɔ nɛkɛ lɛ. [Kanemɔ Lala 146:3 ekoŋŋ.] Ani oyɔse nɔ hewɔ ni Nyɔŋmɔ woɔ wɔ ŋaa ni wɔkɛ wɔ hiɛnɔkamɔ akafɔ̃ adesai anɔ lɛ? [Ŋmɛɛ gbɛ ni ewie.] Ekolɛ obaakpɛlɛ nɔ akɛ esa akɛ hiɛnɔkamɔ fɛɛ hiɛnɔkamɔ ni kɛ tsabaa ni hiɔ shi daa baaba lɛ ajɛ Nyɔŋmɔ ŋɔɔ kɛba. Atsɔɔ nɔ hewɔ ni wɔbaanyɛ wɔna nɔmimaa nɛɛ lɛ mli yɛ Lala 146:10. [Kanemɔ.] Kɛ wɔmiisumɔ ni wɔtsɔmɔ Nyɔŋmɔ Maŋtsɛyeli lɛ shishibii lɛ, mɛni esa akɛ wɔfee?” Gbelemɔ Creation wolo lɛ baafa 250, kanemɔ kuku 13, ni oma Yohane 17:3 nɔ mi. Kɛɛmɔ lɛ akɛ obaafee bɔ ni mɛi akpekpei abɔ etsɔ Biblia lɛ kasemɔ nɔ amɛna nilee ni kɛ mɔ yaa naanɔ wala mli lɛ he nɔkwɛmɔ nɔ otsɔɔ lɛ. Kɛ eŋmɛ bo gbɛ lɛ, okɛ Nilee wolo lɛ atsɔɔ lɛ, ni oje nikasemɔ lɛ shishi.
6 Be mli ni otsuɔ nii yɛ shwapoi anaa lɛ, obaanyɛ okɛ gbɛtsɔɔmɔ kuku nɛɛ atsu nii yɛ “Creation” wolo lɛ gbɛfaŋ:
◼ “Ŋmɛnɛ lɛ, wɔkɛ sɔɔmɔ krɛdɛɛ ko miiha jarayelɔi ni yɔɔ akutso lɛ mli lɛ. Awuiyeli kɛ basabasa-feemɔ ní mli ewo wu waa yɛ wɔ akutso lɛ mli lɛ gbaa wɔ fɛɛ wɔnaa. Ani onuɔ he akɛ mɔ ko yɛ naagba lɛ naa tsabaa diɛŋtsɛ? [Ŋmɛɛ gbɛ ni ewie.] Nyɔŋmɔ yɛ tsabaa lɛ.” Gbelemɔ Creation wolo lɛ baafa 196; kanemɔ Abɛi 2:21, 22 ni yɔɔ kuku 19 lɛ, ni owie he. Okɛ saneyitso ni yɔɔ yitso 16 lɛ atsɔɔ lɛ, ni okɛ wolo lɛ aha lɛ.
7 Kɛ otee jarayelɔ ko ni okɛ “Creation” wolo lɛ eko eha lɛ lɛ ŋɔɔ koni oyafee sɛɛsaramɔ lɛ, obaanyɛ okɛɛ akɛ:
◼ “Beni mibasara bo nyɛsɛɛ ko lɛ, mitsĩ tã akɛ Nyɔŋmɔ pɛ ji mɔ ni yɔɔ awuiyeli kɛ basabasa-feemɔ naa tsabaa diɛŋtsɛ ni hiɔ shi daa lɛ. Yɛ eshiwoo lɛ naa lɛ, wɔbaanyɛ wɔna hekɛnɔfɔɔ akɛ shikpɔŋ ni toiŋjɔlɛ yɔɔ nɔ baaba diɛŋtsɛ. Kadimɔ nihalamɔ ni akɛfɔ̃ wɔ fɛɛ wɔ hiɛ lɛ.” Kanemɔ Creation wolo lɛ baafa 250 lɛ kuku 11, ni Lala 37:37, 38 fata he. Wiemɔ mfoniri ni yɔɔ baafa 251 lɛ he, ni okane kuku 14 lɛ mli klɛŋklɛŋ wiemɔi lɛ. Kɛɛmɔ lɛ akɛ okɛ lɛ baafee Biblia mli nikasemɔ ni aheee nɔ ko, koni afee yɛ amɛ nihɔɔmɔ he lɛ loo yɛ amɛshia mli.
8 Ákɛ “Nyɔŋmɔ hefatalɔi nitsulɔi” lɛ, wɔyɛ yiŋtoo hewɔ ni wɔɔdamɔ nɔ wɔna jwɛŋmɔ kpakpa yɛ sanekpakpa lɛ kɛhamɔ mli. (1 Kor. 3:9) Nɔ ni baajɛ su nɛɛ mli aba ji, Yehowa jɔɔmɔi babaoo.