1997 “Nyɔŋmɔ Wiemɔ Mli Hemɔkɛyeli” Yehowa Odasefoi a-Kpokpaa Wulu nɔ Kpee
1 “Gbi kome too ni aaaye yɛ okpoi lɛ anɔ lɛ hi fe gbii akpe ni aaaye yɛ he kroko.” (Lala 84:10, NW) Beni lalatsɛ lɛ jáa yɛ Yehowa sɔlemɔwe lɛ, enyɛ enu he akɛ Nyɔŋmɔ ofe lɛ yɛ jɛmɛ. Beni maŋ lɛ buaa amɛhe naa kɛhaa daa afi gbii juji lɛ ni anɔkwa jálɔi yiɔ Yerusalem obɔ lɛ, Israelbii lɛ náa naanyobɔɔ ni ŋɔɔ yɛ be mli ni amɛbuaa amɛhe naa yɛ sɔlemɔwe lɛ kpo lɛ nɔ lɛ. Akai amɛ yɛ maŋ ekomefeemɔ ni amɛyɔɔ lɛ he akɛ mɛi pɛ ni yɔɔ shikpɔŋ nɔ, ní Yehowa kɛ ejɔɔmɔ kɛ enɔkpɛlɛmɔ eduro amɛ. Daa afi lɛ, wɔnáa hegbɛ akɛ wɔkɛ wɔnyɛmimɛi hii kɛ wɔnyɛmimɛi yei akpei abɔ lɛ aaana ekomefeemɔ kɛ mlifilimɔ henumɔi ni tamɔ nɛkɛ mli ŋɔɔmɔ. Yɛ wɔ ŋmɛnɛŋmɛnɛ beaŋ lɛ, daa afi kpokpaa wulu nɔ kpeei ji gbɛi ni Yehowa tsɔɔ nɔ ebuaa ewebii anaa kɛhaa nitsɔɔmɔ kɛ naanyobɔɔ lɛ ateŋ ekome.
2 Yehowa webii ni fa babaoo ni hi shi yɛ Yerusalem kɛ emasɛi lɛ akwɛmɔ yɛ gbii juji lɛ amli lɛ biɔ gbɛjianɔtoo. Gbɛjianɔtoo kpakpa kɛ toiŋjɔlɛ ni aaahiɛ mli lɛ hu biɔ ni akɛ tsũ taomɔ, kpee bei, kɛ gbɛjianɔtoi krokomɛi he gbɛtsɔɔmɔi aha. Akɛni nɛkɛ saji nɛɛ kɔɔ Israelbii lɛ anɔkwa jamɔ he hewɔ lɛ, amɛkɛ mlifilimɔ baatsu gbɛtsɔɔmɔi nɛɛ ahe nii.—Lala 42:5Ga Bible; 122:1.
3 Nyɛmimɛi hii ohai abɔ kɛ ŋmɛlɛtswai akpei abɔ baatsu nii koni amɛkɛto kpee shishi nitsumɔhei ahe gbɛjianɔ, skul kɛ gbɔiatoohe mli nitsulɔi ni amɛkɛ amɛ aaakpe kɛ amɛkɛ amɛteŋ gbeekpamɔ, kɛ ekrokomɛi. Nɛkɛ nyɛmimɛi hii nɛɛ kɛ Asafo lɛ Kpee Shishi Nitsumɔhe lɛ feɔ ekome kɛtsuɔ nii koni akɛtsu nibii babaoo ni kɔɔ kpeefeemɔ lɛ he lɛ he nii. Ekolɛ wɔ diɛŋtsɛ wɔnaŋ be, nyɛmɔ, kɛ shika babaoo ni akɛtsuɔ wɔ daa afi kpokpaa wulu nɔ kpeei lɛ ahe nii lɛ, shi eka shi faŋŋ akɛ wɔ fɛɛ wɔhiɛ sɔɔ he-kɛ-afɔleshaa mumɔ ni nyɛmimɛi hii anɔkwafoi nɛɛ ateŋ mɔ fɛɛ mɔ yɔɔ lɛ, aloo jeee nakai?
4 Yɛ be mli ni ayaa nɔ atoɔ gbɛjianɔ kɛhaa wɔ 1997 “Nyɔŋmɔ Wiemɔ Mli Hemɔkɛyeli” Kpokpaa Wulu nɔ Kpee lɛ, wɔyɛ saji otii komɛi ni biɔ ni okɛ mlihilɛ afee toiboo yɛ mli ni okɛ hiɛdɔɔ asusu he. Gbeekpamɔ ni okɛaaha lɛ baatsɔɔ hiɛsɔɔ ni oyɔɔ kɛhaa gbɛjianɔi fɛɛ ni atoɔ yɛ ohewɔ lɛ. Eyɛ mli akɛ asusu nɛkɛ saji nɛɛ ekomɛi ahe pɛŋ moŋ, shi ehe miihia ni wɔteŋ mɔ fɛɛ mɔ ana gbɛnaa nii ni kã wɔnɔ yɛ Yehowa hiɛ yɛ kpee he gbɛjianɔtoi lɛ sɛɛfimɔ mli lɛ.
5 Ŋaawoi Kɛha Tsũ Taomɔ: Akɛ Room Request woji lɛ eko emaje asafo fɛɛ asafo. Ofainɛ ni oŋma Room Request wolo lɛ eko nɔ nii, kɛ ootao wɔɔhe kɛtsɔ kpee he gbɛjianɔtoo lɛ nɔ, koni okɛha asafoŋ woloŋmalɔ lɛ ni ema nɔ mi, koni okɛmaje kpee ni obaaya lɛ. ESAAA ni akɛ Room Request woji kɛ kpee he woji krokomɛi ni aŋmalaa lɛ majeɔ nitsumɔ he nine ni yɔɔ Accra lɛ.
6 Abaaná wɔɔhei lɛ ekomɛi yɛ mɛi ashiai amli. Esa akɛ mɛi ni ahãa amɛ wɔɔhei yɛ nɛkɛ gbɛ nɔ lɛ akai akɛ, efeŋ nɔ ni sa akɛ amɛkɛ amɛ gbɔfeelɔi lɛ agbɔfeemɔ aaatsu nii yɛ gbɛ ni ejaaa nɔ, kɛtsɔ gbɛ ni amɛaakpa akɛ amɛbaahi tsũ lɛ mli be kakadaŋŋ fe gbii pɔtɛɛ ni atsɔɔ yɛ Room Request wolo lɛ nɔ lɛ nɔ. Akɛ tsũi nɛɛ ha kɛha kpee be lɛ PƐ. Mɛi ni nine shɛɔ wɔɔhei ni tamɔ nɛkɛ nɔ lɛ akwɛ koni amɛ kɛ amɛbii lɛ atsɔɔ bulɛ yɛ amɛ gbɔfeelɔ lɛ shia lɛ mli nibii ahe aloo ni amɛaafite enɛɛmɛi loo ni amɛaabote shia lɛ mli hei komɛi ni esaaa akɛ mɛi krokomɛi boteɔ jɛmɛ lɛ. Kɛ shiatsɛmɛi ná naagbai yɛ enɛ gbɛfaŋ lɛ, esa akɛ aha tsũ taomɔ he nɔkwɛlɔ ni yɔɔ kpee lɛ shishi lɛ ale enɛɛmɛi oya nɔŋŋ, ni ebaaná he miishɛɛ akɛ eeeye ebua.
7 Gbeekpamɔ Tsɔɔ Toiboo ni Ofeɔ Ohaa Asafo lɛ Gbɛtsɔɔmɔi: Esa akɛ sane titri nɛɛ afee saji ni wɔsusuɔ he waa diɛŋtsɛ lɛ ateŋ ekome. Hebribii 13:17 kɛɔ akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.” Akɛni wɔnyɛmimɛi hii lɛ toɔ wɔ kpokpaa wulu nɔ kpee lɛ he gbɛjianɔ babaoo hewɔ lɛ, wɔmiisumɔ ni amɛnu he akɛ wɔmiifi amɛsɛɛ jogbaŋŋ kɛmiimɔ shi. Akɛni aabi ni wɔkɛ gbeekpamɔ atsu nii yɛ sane nɛɛ mli gbii enyɔ loo gbii etɛ pɛ afi fɛɛ afi hewɔ lɛ, enɛ ji gbɛ kpakpa ni aaatsɔ nɔ afi amɛ mɔdɛŋbɔi asɛɛ. Nɔkwɛmɔ nɔ kpakpa ni wɔfeɔ, taakɛ wɔnyɛmimɛi lɛ kɛ je lɛ naa lɛ, haa suɔmɔ, ekomefeemɔ kɛ sɛɛfimɔ mumɔ shwereɔ.—Fil. 2:1-4.
8 Hiamɔ Nii Krɛdɛɛi: Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔ nɔ kpakpa, kɛ amɛbii ni baa amɛjeŋ jogbaŋŋ ni Asafoŋ Sɔɔmɔ Ajinafoi Akuu lɛ kpɛlɛɔ amɛnɔ lɛ pɛ. Mɛi ni yɔɔ hiamɔ nii krɛdɛɛ lɛ ji wɔ nyɛmimɛi hii kɛ wɔ nyɛmimɛi yei, ni wɔmiisumɔ ni wɔye wɔbua amɛ.
9 Ekolɛ ehe baahia ni aye abua mɛi ni edara yɛ afii amli, mɛi ni bɛ gbɔmɔtsoŋ hewalɛ, mɛi ni yɔɔ be-fɛɛ sɔɔmɔ lɛ mli, loo mɛi krokomɛi ni yaa kpee lɛ. Wekumɛi, onukpai, kɛ mɛi krokomɛi ni yɔɔ asafo lɛ mli ni le amɛ shihilɛi ni yɔɔ sɔrɔto nɛɛ baanyɛ ni amɛkɛ suɔmɔ ato gbɛjianɔ ni he hiaa, ni akɛ weku kɛ asafo lɛ gbɛnaa nii lɛ akafɔ kpee he gbɛjianɔtoo lɛ nɔ. (Okɛto 1 Timoteo 5:4 he.) Shiɛlɔi baanyɛ aye abua kɛtsɔ ya ni amɛkɛ mɛi ni tamɔ nɛkɛ aaaya loo amɛ hiamɔ nii ni amɛaatsu he nii yɛ gbɛi krokomɛi anɔ lɛ nɔ.—Yak. 2:15-17; 1 Yoh. 3:17, 18.
10 Shi kɛlɛ, Rooming Department lɛ baabɔ mɔdɛŋ ni amɛna wɔɔhei ni sa kɛha shiɛlɔi ni yɔɔ hiamɔ nii krɛdɛɛ lɛ kɛ́ asafo lɛ mli bii nyɛŋ aye abua. Shiɛlɔi nɛɛ baanyɛ amɛkɛ asafoŋ woloŋmalɔ lɛ agba amɛ shihilɛ lɛ he sane. Esa akɛ woloŋmalɔ lɛ kɛ Asafoŋ Sɔɔmɔ Ajinafoi Akuu lɛ mli bii krokomɛi lɛ awie he, koni amɛkwɛ kɛji asafo lɛ baanyɛ aye abua aŋkroaŋkroi nɛɛ koni amɛna amɛ diɛŋtsɛ amɛ wɔɔhei. Kɛ asafo lɛ nyɛŋ ekɛ yelikɛbuamɔ ni he hiaa aha lɛ, mɔ ni taoɔ tsũ lɛ baaŋma Room Request wolo lɛ nɔ nii koni ekɛha woloŋmalɔ lɛ ekoŋŋ, ni lɛ hu ebaakwɛ kɛji nɔ fɛɛ nɔ ja yɛ nɔ lo, kɛ shihilɛi amli ni mɔ lɛ yɔɔ ni haa efeɔ mɔ ni sa akɛ asusu ehe yɛ nɛkɛ gbɛ nɔ lɛ. Esa akɛ woloŋmalɔ lɛ aŋma wolo ni EKƐTSƆƆ shihilɛi ni mɔ lɛ yɔɔ mli lɛ MLI FITSOFITSO. Esa akɛ afee enɛ fɛɛ kɛtsɔ hiɛ kwraa dani kpee be lɛ ashɛ. Beni sɔɔmɔ ajinafoi akuu lɛ ema nɔ mi sɛɛ lɛ, kɛkɛ lɛ woloŋmalɔ lɛ kɛ wolo lɛ baamaje Rooming Department. Abaana mɔ ni biɔ tsũ lɛ tɛ̃ɛ koni aha ni ele wɔɔhe lɛ he gbɛjianɔtoo.
11 Esa akɛ mɛi ni yɔɔ hiamɔ nii krɛdɛɛ lɛ kɛ Asafoŋ Sɔɔmɔ Ajinafoi Akuu lɛ mli bii ateŋ mɔ kome loo onukpa kroko ayabi amɛ tsũ lɛ kɛhamɔ he sane yɛ Rooming Department kɛ́ amɛshɛ he ni afeɔ kpee lɛ yɛ lɛ amrɔ nɔŋŋ.
12 Kpee Kroko ni Aaaya: He ni bɛŋkɛ fe fɛɛ ji he ni akɛha asafo fɛɛ asafo akɛ eya kpee lɛ yɛ. Asafo lɛ damɔ asafoi ayifalɛ kɛha kpee fɛɛ kpee ni atsɔɔ akɛ aya lɛ nɔ etsɔɔ mɛi ayibɔ ni baanyɛ aya kpee lɛ, bɔni afee ni ato gbɛjianɔ kɛha sɛii ni fa, woji, wɔɔhei, kɛ ekrokomɛi. Akɛ hei ni akɛha ni aya yɛ lɛ mli saji titrii lɛ eha yɛ nɔ ni aŋma ahɔ mli nɛɛ baafa 6. Shi kɛlɛ, kɛ yɛ yiŋtoo kpakpa hewɔ ni obaaya kpee lɛ yɛ he kroko fe ni oooya yɛ he ni ato akɛ nyɛ asafo lɛ aya yɛ lɛ, ni wɔɔhe he baahia bo lɛ, no lɛ esa akɛ oŋma Room Request wolo lɛ nɔ nii, ni oha woloŋmalɔ lɛ kɛmaje kɛtsɔ kpee ni sa lɛ adrɛs nɔ. Kɛ abaafee nɔ ni fa fe kpee kome yɛ nakai maŋtiase lɛ mli lɛ, kwɛmɔ ni oŋmala gbii ni akɛbaafee kpee ni obaaya lɛ.
13 Kɛ abaafee kpeei enyɔ yɛ wiemɔ kome too lɛ nɔŋŋ mli yɛ maŋtiase ko mli lɛ, nyɛmimɛi komɛi baasumɔ ni amɛya kpeei enyɔ lɛ fɛɛ. Yɛ be mli ni ŋwanejee ko bɛ he akɛ enɛ baaha amɛna hegbɛ kɛha hewalɛwoo babaoo lɛ, fɛɛ sɛɛ lɛ, ekɛ naagbai baa yɛ nibii ni akɛtsuɔ nii ni akɛfeɔ kpee lɛ agbɛfaŋ, ni no haaa yiŋtoo hewɔ ni asumɔɔ ni mɛi ayifalɛ lɛ afee nɔ ni sa, koni nitsumɔ ni tsɔɔ kpee lɛ hiɛ kɛ nɔ ni atsuɔ yɛ kpee lɛ sɛɛ lɛ akafa tsɔ lɛ aye omanye. Yɛ enɛ hewɔ lɛ wɔmiibi ni nyɛmimɛi ni yɔɔ maŋtiasei amli lɛ aya kpee ni ato aha amɛ yɛ nakai maŋtiase lɛ mli lɛ pɛ. Kɛ amɛmiisumɔ ni amɛya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba kɛha wɔ. Yɛ nyɛmimɛi ni akɛ kpee shishi nitsumɔi komɛi ni he hiaa woɔ amɛdɛŋ ni amɛtsuɔ he nii ni no hewɔ lɛ amɛnaaa hegbɛ ni amɛbo wiemɔi lɛ fai komɛi atoi lɛ agbɛfaŋ lɛ, aŋmɛɔ amɛ gbɛ ni amɛya kpee ni ji enyɔ ni abaafee yɛ nakai maŋtiase lɛ nɔŋŋ mli lɛ. Kɛfata he lɛ, kɛji wiemɔ he naagba hewɔ loo gbi ni amɛkɛbaaya amɛ kpee lɛ nɔŋŋ ji gbi ni abaafee Bolgatanga kpee lɛ hewɔ ni nyɛmimɛi komɛi baasumɔ ni amɛya kpee lɛ yɛ maŋtiase kroko mli, shi jeee he ni atsɔɔ ni amɛ asafo lɛ aya lɛ, no hu gbɛ yɛ akɛ amɛfeɔ nakai.
14 Yɛ asafoi ni yɔɔ shɔŋŋ lɛ agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ, fe he ni ato akɛ amɛya lɛ. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ ni amɛhalaa he ni amɛbaaya. Shi kɛlɛ, esa akɛ asafoi ni baakpɛ yiŋ akɛ amɛbaaya kpee kroko ni jeee nɔ ni ato ni amɛya lɛ atswa kpokpaa nɔkwɛlɔ lɛ adafi kɛtsɔ hiɛ kwraa koni ekato amɛsaramɔ be he gbɛjianɔ kɛmiiha nakai otsi ni amɛbaaya kpee lɛ. Kɛ asafo lɛ baaya kpee ni ato akɛ amɛya loo amɛyaŋ jio, esa akɛ nyɛmimɛi hii ni kwɛɔ tsɔne taomɔ gbɛjianɔtoi anɔ lɛ akwɛ koni tsɔne fɛɛ tsɔne ni amɛaato he gbɛjianɔ lɛ afee tsɔne ni naagba bɛ he ni ekɛ nitsumɔ yɔɔ shweshweeshwe.
15 Bolgatanga Kpee: Abaafee “Nyɔŋmɔ Wiemɔ Mli Hemɔkɛyeli” Kpokpaa Wulu nɔ Kpeei ni atoɔ he gbɛjianɔ lɛ naagbee nɔ̃ lɛ ateŋ ekome yɛ Bolgatanga, kɛjɛ January 9-11, 1998. Taakɛ afɔɔ feemɔ lɛ, wiemɔi ni abaawie ji Twi kɛ Frafra. Aawo nyɛmimɛi fɛɛ ni jɛ wuoyigbɛ ni baanyɛ aya lɛ hewalɛ ni amɛya kpee nɛɛ. Asafo lɛ miito tsɔne he gbɛjianɔ krɛdɛɛ afi nɛɛ kɛha gbɛfãa lɛ. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛ̃ɛ, ni amɛfee trukaa odaseyeli hu beni amɛyɔɔ Bolgatanga lɛ. Wɔmiiwo mɛi fɛɛ ni yɔɔ he miishɛɛ akɛ amɛaaya lɛ hewalɛ koni amɛbɔi amɛhe saamɔ kɛha kpee lɛ.
16 Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ be ni eho lɛ mli lɛ jogbaŋŋ. Taakɛ afɔɔ feemɔ lɛ, abaama agba, abaatao wɔɔhei, kɛ nitsumɔi krokomɛi. Wɔyɛ hiɛnɔkamɔ akɛ mɛi fɛɛ ni yɔɔ he ni abaafee kpee lɛ yɛ kɛ asafoi ni bɛŋkɛ jɛmɛ fɛɛ lɛ baato amɛ nitsumɔi ahe gbɛjianɔ koni amɛfata he kɛtsu nitsumɔ ni he hiaa nɛɛ kɛmɔ shi yɛ otsii lɛ anaagbee kɛ otsi lɛ mli gbii lɛ amli. Nyɛsɛɛ afi lɛ, amaniɛbɔi ni nine shɛ nɔ lɛ tsɔɔ akɛ nyɛmimɛi babaoo to gbɛjianɔ kpakpa koni amɛye amɛbua yɛ nitsumɔ ni tsɔɔ kpee lɛ hiɛ lɛ mli. Wɔmiijie nyɛ fɛɛ nyɛyi yɛ mumɔ kpakpa nɛɛ hewɔ. Kɛ mɛi ni fa saŋŋ baato gbɛjianɔ koni amɛba jɛmɛ gbi kome loo enyɔ ni tsɔɔ kpee lɛ shishijee hiɛ koni ato nɔ fɛɛ nɔ he gbɛjianɔ lɛ, enɛ baaye ebua waa. Mɛi pii ni kɛ amɛhe baawo voluntia nitsumɔ lɛ mli koni amɛye amɛbua lɛ ahe baahia hu yɛ kpee lɛ shishi, no hewɔ lɛ, okɛ oweku lɛ ato gbɛjianɔ koni nyɛfata he kɛtsu enɛ yɛ kpee ni nyɛbaaya lɛ shishi.
17 Niyenii He Nitsumɔ: Kaimɔ ni okɛ nɔ ko ni obaaye beni akpa fioo shwane lɛ ajɛ shia kɛba. No hewɔ lɛ mɔ fɛɛ mɔ baanyɛ ekɛ ejwɛŋmɔ ama mumɔŋ nifeemɔ lɛ nɔ waa. Nyɛhaa wɔkwɛa jogbaŋŋ yɛ he fɛɛ he ni wɔɔtara ni wɔye nii beni akpa fioo lɛ, koni wɔkɛ nɔ ko akakpa sɛii lɛ anɔ loo ni wɔɔshi jwɛi wɔshwie jɛmɛ.
18 Kpee Shishi Badge kɛ Nɔ ni Akɛhɔɔ Mli: Aawo asafo fɛɛ asafo ŋaa ni amɛkɛ Literature Order Form (S-14) lɛ atsu nii ni amɛkɛshɛ badge kɛ plastik ni akɛhɔɔ mli lɛ kɛha “Nyɔŋmɔ Wiemɔ Mli Hemɔkɛyeli” Kpokpaa Wulu nɔ Kpeei lɛ. Nyɛsɛɛ afi lɛ, asafoi komɛi kpe sɛɛ tsɔ dani amɛshɛ eko loo amɛshɛɛɛ kwraa, ni no hewɔ lɛ nyɛmimɛi lɛ ateŋ mɛi komɛi naaa badge lɛ eko. Nyɛfainɛ, nyɛkwɛa ni nyɛŋmaa wolo lɛ nɔ nii, ni nɔ fɛɛ nɔ aja jogbaŋŋ, ni nyɛkɛ klɛŋklɛŋ nɔ lɛ amajea Asafo lɛ AMRƆ NƆŊŊ koni anyɛ atsu nyɛ kpee lɛ he nibii ni nyɛtaoɔ lɛ ahe nii yɛ be ni sa mli. Nyɛhaa ahia nyɛjwɛŋmɔ mli akɛ nyɛnaŋ badge kɛ nɔ ni akɛhɔɔ mli lɛ eko yɛ kpeei lɛ ashishi.
19 Lalai: Ato lalai ni nyiɛ sɛɛ nɛɛ ahe gbɛjianɔ koni ala yɛ wiemɔ he gbɛjianɔtoo lɛ mli yɛ bɔ ni ato naa aha lɛ naa: 155, 46, 138, 183, 43, 180, 156, 130, 13, 98, 164, 160, 195, 144, 77, 4, 191, kɛ 10. Yɛ ŋaawoo ni akɛha yɛ Efesobii 5:19 lɛ hewɔ lɛ, aawo wɔ fɛɛ hewalɛ ni wɔfata he kɛla yɛ be mli ni atswaa saŋkulalai lɛ yɛ kpeei lɛ ashishi lɛ.
20 Wiemɔi ni Amɔmɔɔ loo Video Mfoniri-Shamɔi: Asafo lɛ etoŋ gbɛjianɔ ko kɛhaŋ wiemɔi loo drama lɛ mɔɔmɔ yɛ kpãa nɔ. Esa akɛ aŋkroaŋkroi fɛɛ ni baamɔmɔ wiemɔi lɛ yɛ kpãai anɔ kɛha amɛhe lɛ afee nakai yɛ gbɛ ni egbaŋ mɛi krokomɛi ni eba kpee lɛ shishi lɛ anaa loo ni egbalaŋ amɛjwɛŋmɔ kɛjɛŋ wiemɔ lɛ nɔ lɛ nɔ. Titri lɛ, esaaa akɛ amɛtaa sarawa hewalɛ kpãa kɛ wiemɔ kpãai lɛ ahe. Wɔhiɛ baasɔ ekome ni nyɛkɛ wɔ baafee yɛ enɛ mli lɛ waa diɛŋtsɛ.
21 Naagbee: Woji ni aŋmalaa Asafo lɛ yɛ kpokpaa wulu nɔ kpeei lɛ sɛɛ afi fɛɛ afi lɛ kɛ odaseyeli saŋŋ haa ni tsɔɔ akɛ wɔ nyɛmimɛi hii kɛ wɔ nyɛmimɛi yei lɛ ahiɛ sɔɔ gbɛjianɔi ni atoɔ ahaa amɛ lɛ. Eyɛ faŋŋ kɛha wɔ fɛɛ akɛ Yehowa miifi daa afi kpeei ahe gbɛjianɔ ni atoɔ lɛ sɛɛ. Akɛni tsũi ahe baahia nyɛmimɛi ni fãa gbɛ kɛyaa kpokpaa wulu nɔ kpeei lɛ ateŋ mɛi babaoo hewɔ lɛ, wɔbaanyɛ wɔna nɔmimaa akɛ Yehowa baatsu hiamɔ nii nɛɛ ahe nii bɔ ni sa. Akɛni nɛkɛ saji nɛɛ kɔɔ wɔ anɔkwa jamɔ he hewɔ lɛ, esa akɛ wɔkɛ mlifilimɔ anyiɛ gbɛtsɔɔmɔi ni akɛha lɛ asɛɛ. Ní wɔɔtsɔɔ akɛ ‘wɔyeɔ nɔ ko bibioo mli anɔkwa lɛ’ haa wɔnyɛɔ wɔnáa jɔɔmɔi babaoo ni mɛɔ mɛi ni Yehowa sumɔɔ amɛ lɛ.—Luka 16:10.
22 Yesaia 33:20 kɛɔ akɛe: “Kwɛmɔ Zion, ni ji wɔgbijurɔyeli maŋ lɛ.” Nɔ̃ pɛ ni wɔbaanyɛ wɔfee he mfoniri yɛ wɔjwɛŋmɔ mli ji asafoi ni yɔɔ miishɛɛ ni yiɔ Yerusalem obɔ ni jɛ amɛsuɔmɔ mli amɛhere Yehowa fãmɔ akɛ “omii ashɛ ohe jogbaŋŋ” lɛ nɔ lɛ. (5 Mose 16:15) Daa afi kpokpaa wulu nɔ kpeei ni wɔfeɔ lɛ ŋmɛɔ gbɛ ni wɔná hegbɛ kpele ni wɔnine ashɛ ŋwɛi nitsɔɔmɔ nɔ koni agbɛnɛ wɔná wɔ nyɛmimɛi hii kɛ wɔ nyɛmimɛi yei lɛ anaanyobɔɔ ni yɔɔ miishɛɛ mli ŋɔɔmɔ. Eba akɛ Yehowa baajɔɔ mɔdɛŋ sɔrɔtoi ni nyɛbɔɔ lɛ nɔ, yɛ be mli ni nyɛsaa nyɛhe kɛhaa 1997 “Nyɔŋmɔ Wiemɔ Mli Hemɔkɛyeli” kpokpaa wulu nɔ kpeei sɔrɔtoi lɛ!
[Kratafa 5 adaka]
Nifeemɔ Bei
Sohaa kɛ Hɔɔ
Leebi 9:30-Gbɛkɛ 4:50
Hɔgbaa
Leebi 9:30-Gbɛkɛ 3:50