Sanebimɔ He
◼ Kɛ abi ni asafo lɛ aye abua yɛ yarafeemɔ ko he gbɛjianɔ ni atoɔ lɛ mli lɛ, sanebimɔi ni nyiɛ sɛɛ nɛɛ baanyɛ ate shi:
Namɔ sa akɛ eha yarafeemɔ shishi wiemɔ lɛ? Enɛ ji nɔ ko ni esa akɛ weku lɛ mli bii akpɛ yiŋ yɛ he. Amɛbaanyɛ amɛhala nyɛmi nuu fɛɛ nyɛmi nuu ni ábaptisi lɛ ni eda yɛ mumɔŋ. Kɛ abi ni onukpai akuu lɛ kɛ wielɔ ko aha lɛ, no lɛ taakɛ eji daa lɛ, amɛbaahala onukpa ko ni sa koni eha wiemɔ ni damɔ Asafo lɛ wiemɔ he gbɛjianɔtoo wolo lɛ nɔ. Eyɛ mli akɛ ajieŋ mɔ ni eje mli lɛ yi tsɔ̃ moŋ, shi eeefee nɔ ni sa akɛ aaagbala jwɛŋmɔ kɛya subaŋ kpakpai ni ejie kpo etsɔɔ lɛ nɔ.
Ani abaanyɛ akɛ Maŋtsɛyeli Asa lɛ atsu nii? Abaanyɛ akɛtsu nii, kɛ onukpai akuu lɛ kɛ hegbɛ eha akɛ afee nakai, ni kɛ egbaaa kpee ni atoɔ he gbɛjianɔ daa lɛ eko naa lɛ. Kɛ ale mɔ ni eje mli lɛ akɛ éhiɛ jeŋba ni he tse mli ni eji asafo lɛ mli nyo loo eji asafoŋbii lɛ ateŋ mɔ kome bi ni yɔɔ ekwɛmɔ shishi lɛ, no lɛ, abaanyɛ akɛ asa lɛ atsu nii. Kɛ ale mɔ aŋkro lɛ waa yɛ maŋ akɛ mɔ ni kɛ ehe woɔ jeŋba ni esaaa Kristofonyo lɛ mli, loo kɛ shihilɛi komɛi yɛ ni baaha awie asafo lɛ he bɔ ni esaaa lɛ, no lɛ onukpai lɛ baanyɛ akpɛ yiŋ akɛ amɛhaŋ ni akɛ asa lɛ atsu nii.—Kwɛmɔ Our Ministry wolo lɛ baafai 62-3.
Taakɛ eji daa lɛ, akɛ Maŋtsɛyeli Asai lɛ tsuuu nii kɛhaaa mɛi ni heee yeee lɛ ayarafeemɔi. Kɛ weku lɛ mli bii ni agbo ashi amɛ lɛ kɛ asafo lɛ bɔɔ waa akɛ shiɛlɔi ni abaptisi amɛ, ní asafo lɛŋ bii komɛi le lɛ akɛ mɔ ni yɔɔ anɔkwale lɛ he jwɛŋmɔ kpakpa ni ale lɛ yɛ akutso lɛ mli akɛ étsu jeŋba kpakpa he nii, ní akɛ jeŋbii akusum nifeemɔi woŋ yarafeemɔ lɛ mli lɛ, no lɛ abaanyɛ akɛ Asa lɛ atsu nii.
Kɛ akɛ Maŋtsɛyeli Asa lɛ miiha koni akɛtsu nii lɛ, onukpai lɛ baasusu he akwɛ, kɛ́ eji nɔ ni afɔɔ feemɔ akɛ abaakpa gbɛ akɛ akɛ gbonyo adeka lɛ aaaba yarafeemɔ shishi. Kɛ nakai ni lɛ, no lɛ amɛbaanyɛ amɛha akɛba asa lɛ nɔ.
Ni yara ni afeɔ ahaa jeŋbii hu? Kɛ mɔ ni eje mli lɛ efee gbɛi kpakpa yɛ akutso lɛ mli lɛ, no lɛ, nyɛmi nuu ko baanyɛ aha Biblia mli miishɛjemɔ wiemɔ yɛ shia ni afeɔ yara lɛ yɛ lɛ loo yɛ gbonyobu lɛ naa. Asafo lɛ baakpoo akɛ eeetsu yarafeemɔ he nii eha mɔ ni ale lɛ akɛ mɔ ni kɛ ehe woɔ jeŋba shara mli, jeŋba ni teɔ shi ewoɔ mla loo mɔ ni shihilɛ gbɛ teɔ shi ewoɔ Biblia mli shishitoo mlai waa lɛ. Eka shi faŋŋ akɛ nyɛmi ko kɛ osɔfo ko efeŋ ekome yɛ futufutu hemɔkɛyeli nifeemɔ mli loo yɛ yarafeemɔ fɛɛ yarafeemɔ ni afeɔ yɛ Babilon Kpeteŋkpele lɛ sɔlemɔtsu ko mli lɛ.
Ni kɛ mɔ ni eje mli lɛ ji mɔ ni ashwie lɛ kɛjɛ asafo lɛ mli hu? Asafo lɛ kɛ ehe woŋ mli kwraa, asaŋ akɛ Maŋtsɛyeli Asa lɛ tsuŋ nii. Kɛ mɔ lɛ ejie odaseyeli kpo akɛ eesumɔ ni efee tsuitsakemɔ ni ejieɔ kpo etsɔɔ faŋŋ akɛ eesumɔ ni ahe lɛ ekoŋŋ lɛ, no lɛ nyɛmi nuu ko henilee baanyɛ aŋmɛ lɛ gbɛ akɛ eeeha Biblia mli wiemɔ yɛ shia ni afeɔ yara lɛ yɛ lɛ loo yɛ gbonyobu lɛ naa, koni ekɛye mɛi ni jeee heyelilɔi lɛ odase koni ekɛshɛje wekumɛi amii. Shi, dani abaakpɛ yiŋ ni tamɔ nɛkɛ lɛ, eeefee nɔ ni nilee yɔɔ mli akɛ nyɛmi nuu lɛ aaana onukpai akuu lɛ koni esusu nɔ ni amɛaatsɔɔ akɛ afee lɛ he. Yɛ shihilɛi ni ebafeŋ nilee akɛ nakai nyɛmi lɛ kɛ ehe aaawo mli lɛ, eeefee nɔ ni sa akɛ nyɛmi nuu ko ni ji mɔ ni eje mli lɛ weku lɛ mli nyo lɛ aha wiemɔ koni ekɛshɛje wekumɛi lɛ amii.
Abaanyɛ aná gbɛtsɔɔmɔ lolo kɛjɛ Watchtower ni ji October 15, 1990, baafai 30-1; September 15, 1981, baafa 31; March 15, 1980, baafai 5-7; June 1, 1978, baafai 5-8; June 1, 1977, baafai 347-8; March 15, 1970, baafai 191-2; Awake! ni ji September 8, 1990, baafai 22-3; March 22, 1977, baafai 12-15 lɛ; kɛ nɔ ni aŋma ahɔ January 1996 Wɔ Maŋtsɛyeli Sɔɔmɔ lɛ mli lɛ mli.