Obalahii kɛ Obalayei—Mɛɛ Mumɔŋ Otii Nyɛkɛmamɔ Nyɛhiɛ?
1 Yehowa le bɔ ni nitsumɔ ni sɛɛnamɔ yɔɔ he, kɛ otii ni nine nyɛɔ eshɛɔ nɔ lɛ he hiaa kɛha miishɛɛnamɔ. (Kwɛmɔ 1 Mose 1:28; 2:15, 19.) Ŋmɛnɛ, Yehowa kɛ nitsumɔ ni ji shiɛmɔ kɛ nitsɔɔmɔ ewo ewebii lɛ adɛŋ. Wɔyɛ oti ni fe fɛɛ ni ji naanɔ wala ni wɔɔna yɛ Paradeiso lɛ hu. Kɛ wɔɔkwa wɔ hewalɛi kɛ nibii ni wɔyɔɔ ni wɔkɛaatsu nii yɛ gbɛ ni ejaaa nɔ lɛ, belɛ ehe miihia ni wɔkɛ mumɔŋ otii ni yaa hiɛ amamɔ wɔhiɛ yɛ nɛkɛ bei nɛɛ amli.—1 Kor. 9:26.
2 Otii ni Obalahii kɛ Obalayei Anine Baanyɛ Ashɛ Nɔ: Esa akɛ obalahii kɛ obalayei kɛ teokrase otii ni amɛ aŋkroaŋkro nyɛmɔi baanyɛ ashɛ he lɛ amamɔ amɛhiɛ. (1 Tim. 4:15) Gbekɛbii bibii komɛi anine eshɛ oti ni amɛkɛma amɛhiɛ akɛ amɛaatsɛ woji ni yɔɔ Biblia lɛ mli lɛ agbɛi dani amɛkase nikanemɔ po lɛ nɔ. Gbekɛbii tsɔɔ weku nikasemɔ lɛ nɔ amɛkaseɔ bɔ ni akaneɔ nii jogbaŋŋ, kɛ bɔ ni asaa he kɛhaa kpeei, bɔni afee ni amɛnine anyɛ ashɛ otii ni ji saji ahetoohamɔ ni shishinumɔ yɔɔ mli kɛ amɛhe ni amɛkɛaawo Teokrase Sɔɔmɔ Skul lɛ mli lɛ anɔ. Kɛ́ gbekɛbii kɛ amɛ fɔlɔi tee shiɛmɔ lɛ, amɛkaseɔ bɔ ni amɛaafee amɛye odase, ni amɛyaa amɛhiɛ kɛyashɛɔ oti ni ji shiɛlɔi ni abaptisiko amɛ ni amɛaatsɔ lɛ he. Esa akɛ fɔlɔi ama oti ni ji henɔjɔɔmɔ kɛ baptisimɔ lɛ nɔ mi amɛha amɛbii bibii lɛ be fɛɛ be.
3 Kɛ oye kɛjɛ afii 13 kɛyashi 19 lɛ, mɛni fata mumɔŋ otii ni okɛmamɔ ohiɛ lɛ ahe? “Kaimɔ Obɔlɔ Kpeteŋkpele lɛ bianɛ” kɛtsɔ shihilɛ mli otii ni he hiaa diɛŋtsɛ lɛ ni okɛaamamɔ ohiɛ lɛ nɔ. (Jaj. 12:1, NW; Lala 71:17) Mɛni hewɔ okɛ ohe wooo gbɛgbalɔi awalɔ nitsumɔ lɛ mli yɛ nyɔji ni okɛyaaa skul lɛ amli? Ani osusu ohe ni okɛaawo be-fɛɛ sɔɔmɔ lɛ mli ákɛ daa gbɛgbalɔ lɛ he? Ni wiemɔ kroko ni oookase, bɔni afee ni wɔsɛɛ ko lɛ onyɛ oye obua kuu loo asafo ni wieɔ wiemɔ kroko ni yɔɔ he ni oyɔɔ lɛ loo yɛ he kroko lɛ hu? Mɛi babaoo ni sɔmɔɔ yɛ Betel loo ákɛ gbɛgbalɔi krɛdɛɛi loo nɔkwɛlɔi gbɛfalɔi lɛ kɛ oti ni ji be-fɛɛ sɔɔmɔ krɛdɛɛ lɛ ma amɛhiɛ yɛ be mli ni amɛyaa skul lolo. Mɛni hewɔ bo hu ofeee nakai nɔŋŋ?
4 Yɛ be mli ni oji gbekɛ lolo nɛɛ, bɔɔ mɔdɛŋ ni okase Yesu nɔkwɛmɔ nɔ lɛ. Beni eji gbekɛ ni eye afii 12 po lɛ, ewie mumɔŋ nibii ahe yɛ heyeli mli. (Luka 2:42-49, 52) Otii ni sɛɛnamɔ yɔɔ he ni okɛaamamɔ ohiɛ koni ofee teemɔŋ nikasemɔ, okane Biblia lɛ daa, ni okɛ Kristofoi ni edara yɛ mumɔŋ agba sane daa yɛ kpeei ashishi kɛ sɔɔmɔ nitsumɔ lɛ mli lɛ, baaye abua bo koni ohe asa ni onyɛ otsɔɔ mɛi krokomɛi Nyɔŋmɔ Maŋtsɛyeli lɛ he nii taakɛ Yesu fee lɛ.