“Nyɛbɔa Mɔdɛŋ Fɛɛ ni Nyɛaanyɛ”

¹ Beni wɔjɔɔ wɔhe nɔ wɔha Yehowa lɛ, wɔwo lɛ shi akɛ wɔkɛ wɔsɔɔmɔ ni hi fe fɛɛ baaha lɛ. Bɔfo Petro wo klɛŋklɛŋ afii oha lɛ mli Kristofoi lɛ hewalɛ yɛ gbɛ ni ja nɔ koni amɛfee bɔ fɛɛ bɔ ni amɛaanyɛ ni amɛna nɔmimaa yɛ amɛshidaamɔ he yɛ Yehowa hiɛ. (2 Pet. 1:10, NW) Eka shi faŋŋ akɛ wɔmiisumɔ ni wɔbɔ mɔdɛŋ fɛɛ ni wɔɔnyɛ koni wɔsa Yehowa hiɛ yɛ sɔɔmɔ ni wɔkɛhaa lɛ ŋmɛnɛ lɛ mli. Mɛni fata enɛ he? Yɛ be mli ni wekukpãa ni kã wɔkɛ Yehowa teŋ lɛ mli waa ni wɔjwɛŋɔ nibii fɛɛ ni efee kɛha wɔ lɛ nɔ lɛ, wɔtsui tsirɛɔ wɔ daa koni wɔfee bɔ fɛɛ bɔ ni wɔɔnyɛ yɛ esɔɔmɔ lɛ mli. Wɔmiisumɔ ni wɔha wɔsɔɔmɔ lɛ ahi kɛya hiɛ, ni kɛ aaahi lɛ, ni wɔha efa.—Lala 34:9; 2 Tim. 2:15.

² Nyɛmi nuu obalanyo ko ni miisumɔ ni efee babaoo yɛ sɔɔmɔ nitsumɔ lɛ mli lɛ na akɛ, Nyɔŋmɔ Wiemɔ lɛ ni ekaseɔ daa lɛ ha hiɛsɔɔ ni eyɔɔ kɛha Yehowa lɛ mli wa, ni eha ená ekãa babaoo. Enɛ kanya lɛ ni ekɛ ehe wo gbɛgbamɔ sɔɔmɔ lɛ mli. Nyɛmi yoo ko ni naa akɛ ewa kɛha lɛ ákɛ ekɛ gbɔi aaawie lɛ kase shiɛmɔ wiemɔi komɛi ni yɔɔ Reasoning wolo lɛ mli lɛ, ni etsɛɛɛ ni ebɔi omanye babaoo ni eyeɔ yɛ sɔɔmɔ nitsumɔ lɛ mli lɛ mli miishɛɛ namɔ. Enyɛ ekɛ gbalashihilɛ mli hefatalɔi kase Biblia lɛ, ni amɛbale anɔkwale lɛ.

³ Omli Afili Bo yɛ Nɔ ni Obaanyɛ Ofee lɛ Mli: Wɔteŋ mɛi komɛi kɛ shihilɛi ni mli wawai, tamɔ gbɔmɔtsoŋ hewalɛnamɔ kpakpa ni bɛ, weku shitee-kɛ-woo, ohia, loo wiemɔ lɛ toi ni abooo kpeɔ yɛ shikpɔŋkuku lɛ mli. Naagbai krokomɛi babaoo ni anaa daa yɛ naagbee gbii nɛɛ amli lɛ baanyɛ atsĩ wɔsɔɔmɔ lɛ naa. (Luka 21:34, NW shishigbɛ niŋmaa; 2 Tim. 3:1) Ani enɛ tsɔɔ akɛ wɔnyɛɛɛ wɔtsu wɔhe nɔ ni wɔjɔɔ wɔha Yehowa lɛ he nii? Ejeee nakai, kɛji wɔkɛ mɔdɛŋbɔɔ fɛɛ miisɔmɔ.

⁴ Nilee bɛ mli akɛ wɔɔdamɔ nɔ ni mɛi krokomɛi nyɛɔ amɛtsuɔ lɛ nɔ wɔkɛkojo wɔhe. Yɛ no najiaŋ lɛ, Ŋmalɛi lɛ woɔ wɔ hewalɛ koni “mɔ fɛɛ mɔ aka lɛ diɛŋtsɛ enitsumɔ ekwɛ.” Wɔhe ni wɔkɛaawo sɔɔmɔ nitsumɔ lɛ mli kɛmɔ shi kɛyashɛ he ni wɔ diɛŋtsɛ wɔɔnyɛ lɛ saa Yehowa hiɛ, ni ehaa ‘wɔmli filiɔ wɔ.’—Gal. 6:4; Kol. 3:23, 24.

⁵ Eba akɛ, wɔɔjwɛŋ Petro wiemɔi lɛ anɔ jogbaŋŋ, koni ‘wɔbɔ mɔdɛŋ fɛɛ ni wɔɔnyɛ, koni yɛ naagbee lɛ Nyɔŋmɔ ana wɔ ni muji loo kpa ko bɛ wɔhe yɛ hejɔlɛ mli.’ (2 Pet. 3:14) Nakai ekãa lɛ baaha wɔnu he akɛ wɔyɛ shweshweeshwe, ni ebaaha wɔna jwɛŋmɔŋ toiŋjɔlɛ ni Yehowa pɛ baanyɛ ekɛha lɛ eko.—Lala 4:9.