Kpeei Kanyaa Wɔ Kɛyaa Nitsumɔi Kpakpai Ahe
1 Nibii enyɔ ni he hiaa jogbaŋŋ yɛ wɔjamɔ lɛ mli ji asafoŋ kpeei ni wɔɔya kɛ shiɛmɔ nitsumɔ lɛ ni wɔkɛ wɔhe aaawo mli. Enyɔ lɛ fɛɛ nyiɛɔ pɛpɛɛpɛ. Ekome naá ekroko lɛ nɔ hewalɛ. Kristofoi akpeei kanyaa mɔ kɛhaa nitsumɔi kpakpai, ni nitsumɔi kpakpai lɛ ateŋ nɔ ni fe fɛɛ ji Maŋtsɛyeli shiɛmɔ kɛ kaselɔi-afeemɔ nitsumɔ lɛ. (Heb. 10:24) Kɛji akɛ wɔɔkpa kpeeiyaa lɛ, ekolɛ etsɛŋ ni wɔbaakpa shiɛmɔ ejaakɛ akanyaŋ wɔ koni wɔfee nakai.
2 Wɔnine shɛɔ mumɔŋ gbɛtsɔɔmɔ ni ato he gbɛjianɔ koni ewo wɔ ekãa ni wɔshiɛ lɛ nɔ yɛ otsi kpeei ashishi. Amaa bɔ ni bei nɛɛ ahe hiaa lɛ nɔ mi ahaa wɔ daa, ni enyɛɔ wɔnɔ koni wɔkɛ Biblia mli shɛɛ sane ni haa wala lɛ ayaha mɛi krokomɛi. Awoɔ wɔ ekãa kɛ hewalɛ koni wɔmia wɔhiɛ yɛ shiɛmɔ nitsumɔ lɛ mli. (Mat. 24:13, 14) Kɛtsɔ hegbɛi ni wɔŋɔɔ ni wɔkɛhaa saji ahetoo yɛ kpeei ashishi lɛ nɔ lɛ, wɔhe basaa yɛ mɛi krokomɛi ni wɔɔgba amɛ wɔhemɔkɛyeli lɛ he sane lɛ mli. (Heb. 10:23) Kɛtsɔ wɔhe ni wɔkɛwoɔ Teokrase Sɔɔmɔ Skul lɛ mli lɛ nɔ lɛ, wɔbanáa tsɔsemɔ ni haa wɔfeɔ sɔɔlɔi ni nitsumɔ mɔɔ shi, ni ehaa wɔnitsɔɔmɔ hesaai yaa hiɛ.—2 Tim. 4:2.
3 Bɔ ni Sɔɔmɔ Kpeei Kanyaa Wɔ Koni Wɔshiɛ: Awoɔ wɔ fɛɛ hewalɛ koni wɔkase nibii ni yɔɔ Wɔ Maŋtsɛyeli Sɔɔmɔ lɛ mli lɛ kɛtsɔ hiɛ. Nɛkɛ saji nɛɛ kaa wɔjwɛŋmɔi amli yɛ be mli ni wɔyaa Sɔɔmɔ Kpee shishi ni wɔnaa shiɛmɔ wiemɔi ahe nɔkwɛmɔnii ni afeɔ yɛ wielɔi akpoku lɛ nɔ lɛ. Beni wɔnyiɛ shiɛmɔ nɔ lɛ, wɔbaanyɛ wɔkai Wɔ Maŋtsɛyeli Sɔɔmɔ lɛ mli saji lɛ, ni wɔkai shiɛmɔ wiemɔi ahe nɔkwɛmɔnii ni akɛha yɛ mli lɛ, koni wɔtsɔ nɔ wɔye odase ni mɔɔ shi. Enɛ efee shiɛlɔi pii aniiashikpamɔ.
4 Ákɛ nɔ ni nyiɛɔ Sɔɔmɔ Kpeei asɛɛ lɛ, mɛi komɛi kɛ mɛi krokomɛi toɔ gbɛjianɔ koni amɛkɛ amɛ aya shiɛmɔ. Shiɛlɔi kaiɔ otii ni anyɛɔ akɛtsuɔ nii yɛ shiɛmɔ nitsumɔ lɛ mli lɛ, ni awoɔ amɛ hewalɛ koni amɛka nomɛi amɛkwɛ ejaakɛ nɛkɛ kpeei nɛɛ ewo amɛ ekãa koni amɛná gbɛfaŋnɔ yɛ shiɛmɔ nitsumɔ lɛ mli daa otsi.
5 Anyɛŋ akɛ nɔ ko ato wɔ Kristofoi akpeei anajiaŋ, he ni wɔkɛ nanemɛi jálɔi kpeɔ yɛ ni akanyaa wɔ kɛhaa nitsumɔi kpakpai lɛ. Kɛ́ wɔshiɛmɔ nitsumɔ lɛ baashwere lɛ, no lɛ esa akɛ wɔya asafoŋ kpeei daa. Eba akɛ wɔbaajie hiɛsɔɔ kpo yɛ nikeenii ni yɔɔ naakpɛɛ ni jɛ Yehowa ŋɔɔ nɛɛ he, koni “wɔkakwa wɔhe naabuamɔ.”—Heb. 10:25.