Ye Obua Mɛi Krokomɛi Koni Amɛná Miishɛjemɔ
1 Nibii ahiɛkpatamɔi, tai, awuiyeli kɛ amanehulu he saji ni mɛi babaoo nuɔ lɛ eje amɛ tsine. Eyɛ mli akɛ miishɛjemɔ bɛ ŋmɛnɛŋmɛnɛ adafitswai amli kwraa moŋ, shi eji nɔ ko ni he hiaa adesai waa diɛŋtsɛ. Miishɛjemɔ shishi ji “nyɛmɔ kɛ hiɛnɔkamɔ ni akɛaaha mɔ” kɛ mɔ kroko “awerɛhoyeli loo naagba ni aaajie kɛya.” Akɛ Yehowa Odasefoi lɛ, awula wɔ koni wɔye wɔbua mɛi yɛ nɛkɛ gbɛ nɔ. (2 Kor. 1:3, 4) Anɔkwale lɛ he shɛɛ saji ni shɛjeɔ mɔ mii yɛ wɔ woji bibii ni damɔ Biblia nɔ ni wɔkɛbaaha yɛ July kɛ August mli lɛ amli. (Rom. 15:4) Naa gbɛtsɔɔmɔi komɛi ni tsɔɔ bɔ ni abaafee koni akɛha yɛ shihilɛi sɔrɔtoi amli:
2 Adafitswaa sane ko ni yɔɔ awerɛho baanyɛ aha aná hegbɛ ni akɛaaye odase ni ashɛje mɛi krokomɛi amii, ekolɛ kɛtsɔ nɔ ko tamɔ nɛkɛ kɛɛmɔ nɔ:
◼ “Kɛ nibii tamɔ nɛkɛ ba lɛ, mɛi komɛi susuɔ akɛ ani Nyɔŋmɔ yɛ lɛɛlɛŋ lo, ni kɛ nakai lɛ, esusuɔ wɔhe lo. Te osusuɔ tɛŋŋ? [Ŋmɛɛ gbɛ ni ewie.] Gbɛ kome ni oootsɔ nɔ otsɔɔ akɛ Nyɔŋmɔ ko yɛ lɛ ji ni okɛ anɔkwa sane ko atsu nii.” Kanemɔ Hebribii 3:4. Tsɔɔmɔ nibii krokomɛi ni bɔle wɔhe ni tsɔɔ faŋŋ akɛ feelɔ ko yɛ lɛɛlɛŋ lɛ. No sɛɛ lɛ yaa nɔ okɛɛ akɛ: “Miyɛ wolo bibioo ko ni mile akɛ ebaashɛje omii. Eyitso ji Ani Nyɔŋmɔ Susuɔ Wɔhe Lɛlɛŋ? [Kanemɔ sanebimɔi ni yɔɔ wolo lɛ sɛɛgbɛ lɛ.] Odaseyeli ni kɔneɔ mɔ yiŋ ni tsɔɔ akɛ Nyɔŋmɔ yɛ, ni agbɛnɛ etsɛŋ ni ekɛ shihilɛi ni ehiii ni wɔkɛkpeɔ ŋmɛnɛ lɛ fɛɛ baaba naagbee lɛ yɔɔ mli. Masumɔ ni okane.” Too gbɛjianɔ ni oku osɛɛ oba.
3 Ekolɛ obaanyɛ okɛɛ yɛ sɛɛsaramɔ lɛ mli akɛ:
◼ “Beni mishi wolo bibioo ni ji Ani Nyɔŋmɔ Susuɔ Wɔhe Lɛlɛŋ? lɛ miha bo lɛ, no mli lɛ wɔmiiwie odaseyeli ni tsɔɔ akɛ Nyɔŋmɔ yɛ lɛ he sane. Ekolɛ oyɔse sane oti nɛɛ yɛ baafa 7 lɛ. [Okɛ mfoniri lɛ atsɔɔ ni owie kuku 15 lɛ mli sane fioo ko.] Enɛ ji nɔkwɛmɔ nɔ kome pɛ kɛkɛ ni tsɔɔ akɛ Nyɔŋmɔ ni susuɔ mɔ he lɛ yɛ lɛɛlɛŋ. [Kanemɔ kuku 27 yɛ baafa 9.] Biblia lɛ kasemɔ yɛ teemɔŋ lɛ eye ebua mi koni madamɔ daa gbi shihilɛ mli naagbai anaa, ejaakɛ ekɛ bɔ ni Nyɔŋmɔ jwɛŋmɔ ji yɛ saji ahe lɛ haa.” Kɛɛmɔ lɛ akɛ obaafee nikasemɔ he nɔkwɛmɔ nɔ otsɔɔ lɛ.
4 Abaanyɛ atsɔ tɛlifon nɔ akɛ “Mɛni Ji Yiŋtoo ni Yɔɔ Shihilɛ Sɛɛ?—Te Ooofee Tɛŋŋ Ole Hu?” wolo bibioo lɛ atsu nii koni akɛye odase. Obaanyɛ ojie ohe kpo ni okɛɛ akɛ:
◼ “Miitswa bo tɛlifon koni mikɛ shɛɛ sane ko ni he hiaa aha bo ejaakɛ mi diɛŋtsɛ minyɛŋ maba koni mibana bo.” Kanemɔ wolo bibioo lɛ baafa 4 lɛ mli klɛŋklɛŋ kuku lɛ, ni okɛ miishɛɛ afee nakai, tamɔ nɔ ni oona mɔ aŋkro lɛ ni okɛ lɛ miigba sane. Bi lɛ nɔ ni esusuɔ, ni oŋmɛ gbɛ ni ewie. “Migbele Yesaia 45:18 yɛ mi-Biblia lɛ mli. Kuku nɛɛ tsɔɔ akɛ abɔ shikpɔŋ lɛ yɛ wɔhe susumɔ hewɔ. Ani mikane koni obo toi lo?” No sɛɛ lɛ, tsɔɔmɔ wolo bibioo lɛ yiŋtoo, ni obi bɔ ni ooofee okɛ eko abaha lɛ.
5 Beni otswaa tɛlifon koni okɛdi sɛɛ lɛ, obaanyɛ oka gbɛ ni tamɔ nɛkɛ okwɛ koni okɛje nikasemɔ shishi:
◼ “Masumɔ ni mikɛ sane ni wɔgba nyɛsɛɛ ko lɛ atsu nii koni mikɛfee mɔ ni baanyɛ akɛɛ wɔ yiŋtoo ni yɔɔ shihilɛ sɛɛ lɛ he mfoniri. [Wiemɔ kukuji 1 kɛ 2 ni yɔɔ Yiŋtoo ni Yɔɔ Shihilɛ Sɛɛ wolo bibioo lɛ baafa 6 lɛ he sane.] Kpojiemɔ 4:11 tsɔɔ mli akɛ Yehowa Nyɔŋmɔ ji wɔ Bɔlɔ. [Kanemɔ.] Eka shi faŋŋ akɛ eyɛ yiŋtoo pɔtɛɛ ko hewɔ ni ebɔ wɔ. Mɛi ni sumɔɔ ni amɛle nɔ ni no ji lɛ ekase Nyɔŋmɔ Wiemɔ ni aŋma ni ji Biblia lɛ. Masumɔ ni mikɛ nakai hegbɛ lɛ aha bo.” Tsɔɔmɔ bɔ ni afeɔ wɔ shia Biblia mli nikasemɔ ni aheee nɔ ko lɛ ahaa, ni oto nikasemɔ shishijee he gbɛjianɔ.
6 Ekolɛ gbɛ ni hi nɛɛ baashɛje mɛi ni amɛsuɔlɔ ko egbo lɛ amii:
◼ “Miitsu maŋsɔɔmɔ nitsumɔ ko miiha mɛi fɛɛ ni amɛlaaje amɛsuɔlɔ ko yɛ gbele mli lɛ. Akɛni enɛ baanyɛ afee nibii ni mli wa fe fɛɛ lɛ ateŋ ekome, ni ebaabi ni wɔteŋ mɔ fɛɛ mɔ adamɔ naa be fɛɛ be hewɔ lɛ, afee wolo bibioo nɛɛ ni ji Beni Mɔ Ko ni Osumɔɔ Lɛ Egbo lɛ. Eye ebua gbɔmɛi akpekpei abɔ. Masumɔ ni matsɔɔ bo nɔ ni ekɛɔ ni tsɔɔ shiwoo ko ni teeɔ miishɛɛ shi ni Yesu Kristo kɛha. [Kanemɔ kuku ni ji enumɔ lɛ yɛ baafa 26 kɛ Yohane 5:21, 28, 29 hu.] Kadimɔ mfoniri nɛɛ ni yɔɔ baafa 29 ni feɔ Yesu ni miitee Lazaro shi kɛmiijɛ gbohii ateŋ lɛɛlɛŋ lɛ he Sanekpakpa lɛ he mfoniri lɛ. Masumɔ ni mashi wolo bibioo ni shɛjeɔ mɔ mii nɛɛ maha bo.”
7 Kɛ oku osɛɛ oba lɛ, obaanyɛ okɛ mfoniri ni yɔɔ “Beni Mɔ Ko ni Osumɔɔ Lɛ Egbo” wolo bibioo lɛ baafa 29 lɛ atsɔɔ ekoŋŋ ni okɛɛ:
◼ “Kaimɔ sane ni wɔgba ni tsɔɔ Kristo ni teeɔ Lazaro shi lɛ. [Kanemɔ mfoniri he niŋmaa ni yɔɔ baafa 28 lɛ, ni nyɛsusu sane ni yɔɔ yitso bibioo ni ji “Ani Eba Mli Lɛlɛŋ?” lɛ shishi lɛ ni jeɔ shishi kɛjɛɔ baafa 27 lɛ he.] Kɛ otsui miishwe ni ohe oye akɛ obaanyɛ ona osuɔlɔ ko ni eje mli lɛ ekoŋŋ lɛ, no lɛ ha maye mabua bo ni oná gbohiiashitee lɛ mli hiɛnɔkamɔ.” Kɛɛmɔ lɛ akɛ okɛ lɛ baafee shia Biblia mli nikasemɔ.
8 Eba akɛ wɔɔfee bɔ fɛɛ bɔ ni wɔɔnyɛ yɛ nyɔji ni kã wɔhiɛ lɛ amli koni wɔkase Yesu kɛtsɔ ‘ŋkɔmɔyelɔi fɛɛ amiishɛjemɔ’ nɔ.—Yes. 61:2.