Nyɛnine Ashɛa Hefatalɔi ni Jeee Odasefoi lɛ Anɔ
1 Kɛ gbalashihilɛ hefatalɔi fee ekome yɛ anɔkwa jamɔ mli lɛ, ekɛ miishɛɛ babaoo baa. Shi kɛlɛ, yɛ wekui babaoo amli lɛ, gbalashihilɛ mli hefatalɔ kome pɛ ji mɔ ni ekpɛlɛ anɔkwale gbɛ lɛ nɔ. Mɛɛ gbɛ nɔ wɔɔtsɔ ni wɔnine anyɛ ashɛ hefatalɔi ni jeee Odasefoi lɛ anɔ, koni wɔwo amɛ hewalɛ ni amɛkɛ wɔ ajá Yehowa?—1 Tim. 2:1-4.
2 Nu Amɛsusumɔi lɛ Ashishi: Eyɛ mli akɛ ekolɛ hefatalɔi ni jeee Odasefoi lɛ ekomɛi teɔ shi amɛwoɔ moŋ, shi bei pii lɛ, naagba lɛ kɔɔ shikpilikpiifeemɔ loo niiashishinumɔ ni anaaa lɛ he. Ekolɛ mɔ ko baanu he akɛ akpoo lɛ, loo ebaaye awuŋa yɛ ehefatalɔ lɛ mumɔŋ miishɛɛ hee ni ena lɛ hewɔ. Wu ko kaiɔ akɛ: “Beni eshwɛ mikometoo yɛ shia lɛ, minu he akɛ ajo foi ashi mi.” Mɔ kroko hu kɛɛ: “Minu he tamɔ nɔ ni miŋa kɛ mibii lɛ fɛɛ eshi mi.” Hii komɛi baanyɛ asusu akɛ amɛweku lɛ miije amɛdɛŋ yɛ sɔlemɔ hewɔ. (Kwɛmɔ August 15, 1990, Buu-Mɔɔ, [Vol. 111, No. 16GA] baafai 20-3.) Enɛ hewɔ ni ehi jogbaŋŋ akɛ, kɛ aaaho lɛ, wu lɛ afata eŋa lɛ he yɛ shia Biblia mli nikasemɔ gbɛjianɔtoo lɛ mli kɛjɛ shishijee lɛ.
3 Nyɛtsua Nii akɛ Kuu: Gbalashihilɛ mli bii komɛi ni ji Odasefoi tsu nii jogbaŋŋ kɛmɔ shi akɛ kuu ni amɛye amɛbua gbalashihilɛ mli bii kɛba anɔkwale lɛ mli. Beni nyɛmiyoo lɛ kɛ ŋa lɛ eto nikasemɔ feemɔ he gbɛjianɔ sɛɛ lɛ, nyɛminuu lɛ hu yasaraa wu lɛ. Bei pii lɛ, enyɛɔ ekɛ wu lɛ jeɔ nikasemɔ shishi.
4 Okɛ Naanyobɔɔ kɛ Gbɔfeemɔ Su Atsu Nii: Wekui ni yɔɔ asafo lɛ mli lɛ baanyɛ aye abua kɛtsɔ miishɛɛ ni amɛaaná yɛ wekui ni nako afee ekome yɛ anɔkwa jamɔ mli lolo lɛ ahe lɛ nɔ. Saramɔi fioo ni naanyobɔɔ su yɔɔ mli baanyɛ aye abua hefatalɔ ni jeee Odasefonyo lɛ koni ena Yehowa Odasefoi lɛ akɛ Kristofoi ni yɔɔ mɛi ahe suɔmɔ, ni amɛsusuɔ mɛi krokomɛi ahilɛ-kɛ-hamɔ he.
5 Yɛ be kɛ bei amli lɛ, onukpai lɛ baanyɛ asusu mɔdɛŋ ni anyɛ abɔ nyɛsɛɛ nɛɛ koni nine anyɛ ashɛ hefatalɔi ni jeee Odasefoi lɛ anɔ koni amɛkwɛ nɔ ni abaanyɛ afee lolo ni nine ashɛ amɛnɔ kɛba Yehowa ŋɔɔ lɛ he.—1 Pet. 3:1, NW shishigbɛ niŋmaa.