Agbele Shinaa Kpeteŋkpele Naa Kɛha Nitsumɔ
1 Ákɛ sanekpakpa shiɛlɔ ni yɔɔ ekãa lɛ, Paulo kɛ mɔdɛŋbɔɔ taoɔ shikpɔŋkukuji ni hiamɔ lɛ da waa yɛ, ni amɛteŋ ekome ji Efeso maŋtiase lɛ. Omanye ni eye yɛ shiɛmɔ nitsumɔ lɛ mli yɛ jɛmɛ lɛ hewɔ lɛ, eŋma nanemɛi Kristofoi lɛ akɛ: “Agbele shinaa kpeteŋkpele naa aha mi.” (1 Kor. 16:9) Paulo tee nɔ esɔmɔ yɛ nakai shikpɔŋkuku lɛ mli ni eye ebua Efesobii babaoo ni amɛbatsɔ heyelilɔi.—Bɔf. 19:1-20, 26.
2 Ŋmɛnɛ, agbele shinaa kpeteŋkpele kɛha nitsumɔ naa aha wɔ. Aafɔ̃ wɔ nine koni wɔyaye wɔbua asafoi ni daa afi lɛ amɛnyɛɛɛ amɛtsu amɛshikpɔŋkuku lɛ mli nii jogbaŋŋ lɛ. Kɛkɛ lɛ, abaanyɛ akɛ wɔmɔdɛŋbɔi lɛ ato hiamɔ ni yɔɔ hei komɛi lɛ anajiaŋ.—Okɛto 2 Korintobii 8:13-15 he.
3 Ani Obaanyɛ Osɔmɔ yɛ He ni Hiamɔ lɛ Da Yɛ? Ani okɛ sɔlemɔ esusu bɔ ni ooonyɛ osɔmɔ yɛ he kroko lɛ he? Ekolɛ obaanyɛ oye obua asafo ko ni yɔɔ maŋ mli loo he ni oyɔɔ lɛ nɔŋŋ lɛ. Mɛni hewɔ okɛ kpokpaa nɔkwɛlɔ lɛ susuuu sane lɛ he koni okwɛ nɔ ni ebaakɛɛ? Aloo ekolɛ eeenyɛ eba akɛ gbɔmɛi babaoo yɛ bo diɛŋtsɛ osafo lɛ shikpɔŋkuku lɛ mli ni amɛtse amɛhe loo amɛwieɔ wiemɔ sɔrɔto ni mɔ ko mɔ ko nyɛko eye ebua amɛ. Bɔni afee ni onyɛ otsu hiamɔ nɛɛ he nii lɛ, ani obaanyɛ okɛ ohe aha koni oyatsu nii yɛ jɛmɛ loo ni okase amɛwiemɔ lɛ? Agbɛnɛ hu, ekolɛ wiemɔ kuu kroko loo asafo ni bɛŋkɛ ni ‘miikpa Nuntsɔ lɛ fai kɛha Maŋtsɛyeli nitsulɔi babaoo,’ yɛ jɛmɛ momo. (Mat. 9:37, 38) Kɛ nakai ni lɛ, ani oonyɛ ooye oobua?
4 Yɛ nyɛsɛɛ afii nyɔŋmai nɛɛ amli lɛ, Kristofoi wekui akpei abɔ efã kɛtee shikpɔji krokomɛi anɔ koni amɛyaná nikpamɔ nitsumɔ lɛ mli gbɛfaŋnɔ kɛmɔ shi. Wu kɛ ŋa ko ni fee enɛ lɛ kɛɛ: “Wɔmiisumɔ ni wɔsɔmɔ Yehowa yɛ he ni wɔbaanyɛ wɔye wɔbua mɛi babaoo.” Kɛ oyɛ nɛkɛ shwelɛ nɛɛ, ni ona akɛ obaanyɛ ofã kɛya he kroko yɛ maŋ nɛɛ mli loo kɛ ohe esa akɛ ooosɔmɔ yɛ shikpɔŋ kroko nɔ lɛ, no lɛ klɛŋklɛŋ lɛ okɛ onukpai ni yɔɔ osafo lɛ mli lɛ agba ogbɛkpamɔi lɛ ahe sane.
5 Kɛ oosumɔ ni obi Asafo lɛ he ni hiamɔ yɔɔ lɛ, okɛ wolo ni oŋma ni otsɔɔ nibii pɔtɛɛ ni otaoɔ yɛ mli lɛ aha Asafoŋ Sɔɔmɔ Ajinafoi Akuu lɛ. Amɛkɛ amɛsusumɔi baafata he, ni amɛkɛbaamaje Asafo lɛ. Yɛ fɛɛ mli lɛ, shii abɔ ni shinaa kpeteŋkpele kɛha nitsumɔ lɛ naa kã nɛɛ lɛ, eba akɛ wɔ fɛɛ wɔɔya nɔ wɔkɛ hiɛdɔɔ awo Yehowa sɔɔmɔ lɛ mli.—1 Kor. 15:58.