1998 “Nyɔŋmɔ Shihilɛ Gbɛ” Yehowa Odasefoi a-Kpokpaa Wulu nɔ Kpee
1 Yehowa ŋmɛnɛŋmɛnɛ beaŋ jálɔi ni yɔɔ shikpɔŋ muu lɛ fɛɛ nɔ lɛ kɛ ekãa kpáa henaabuamɔi wuji ni yaa nɔ yɛ kpokpaa wulu nɔ kpeei ashishi lɛ gbɛ daa afi. Yɛ nakai feemɔ mli lɛ, amɛjieɔ mumɔ ni Yehowa anɔkwa sɔɔlɔi ni yɔɔ blema Israel ni amɛkɛ mlifilimɔ la wiemɔi ni yɔɔ Lala 122 lɛ mli lɛ jie lɛ kpo yɛ be mli ni amɛyaa koni amɛyajá Yehowa yɛ Yerusalem lɛ eko kpo amɛtsɔɔ. Nakai lala lɛ mli kuku 1 lɛ kaneɔ akɛ: “Mimii shɛɔ mihe, kɛ́ akɛɛ mi akɛ: Ba ni wɔtee Yehowa we lɛ!” Yɛ bei ni tamɔ nɛkɛ mli lɛ, wɔ hu wɔnaa odaseyeli ni fáa babaoo ni tsɔɔ akɛ Yesaia 2:2, 3 lɛ mli wiemɔi ni jɛ mumɔŋ lɛ miiba mli.
2 Afi nɛɛ, wɔyɛ yiŋtoo krɛdɛɛ ko ni wɔɔdamɔ nɔ, ni wɔha wɔmli afili wɔ yɛ miishɛɛ krɛdɛɛ ni anaa yɛ kpeeiyalɔi akpei abɔ ni jɛ maji ni yɔɔ shikpɔŋ nɔ hei srɔtoi anɔ, ni baaba kpeei wuji ni afeŋ yɛ Ghana lɛ ekomɛi amli lɛ ahe lɛ hewɔ. Maŋsɛɛ sanekpakpa shiɛlɔi ni kuɔ amɛsɛɛ koni amɛbasara wekui kɛ nanemɛi lɛ baaya kpeei lɛ ekomɛi. No hewɔ lɛ, kpee shishi wiemɔ he gbɛjianɔtoo ni yɔɔ he fɛɛ he ni afeɔ yɛ lɛ baawie shiɛmɔyaa mli niiashikpamɔi kɛ amaniɛbɔi ni tsɔɔ bɔ ni Maŋtsɛyeli shiɛmɔ nitsumɔ lɛ yaa nɔ yɛ shikpɔji krokomɛi anɔ lɛ he.
3 Kɛjɛ afi 1978 kɛbaa nɛɛ, enɛ ji klɛŋklɛŋ kwraa ni Nɔyeli Kuu lɛ kɛ hegbɛ ni ji kpeeiyalɔi fioo ni abaaha amɛya majimaji ateŋ kpeei lɛ ekomɛi lɛ eha wɔ. Ehe miihia ni mɔ fɛɛ mɔ ajie bulɛ kpo atsɔɔ mɛi ayibɔ ni atse nɔ nɛɛ bɔni afee ni afee kpeei lɛ fɛɛ yɛ gbɛjianɔtoo kpakpa naa. Miishɛɛ krɛdɛɛ ni mɛi ni jɛ maji srɔtoi amli lɛ jieɔ lɛ kpo lɛ baafee faŋŋ yɛ kpokpaa wulu nɔ kpeei fɛɛ amli yɛ nifeemɔ fãi kɛ amaniɛbɔi komɛi amli kɛ agbɛnɛ kɛtsɔ maŋsɛɛ sanekpakpa shiɛlɔi ni ekolɛ amɛbaaya eko ni baaba jɛmɛ lɛ nɔ.
4 Yɛ be mli ni ayaa nɔ atoɔ wɔ afi 1998 “Nyɔŋmɔ Shihilɛ Gbɛ” Kpokpaa Wulu nɔ Kpee lɛ he gbɛjianɔ lɛ, wɔbaasumɔ ni wɔtĩ saji komɛi ni biɔ ni osusu he jogbaŋŋ lɛ mli. Enɛ ni okɛaatsu nii jogbaŋŋ kɛmɔ shi lɛ baatsɔɔ bɔ ni oyɔɔ hiɛsɔɔ kɛha gbɛjianɔ fɛɛ ni atoɔ ahaa bo lɛ.
5 Ŋaawoi Kɛha Tsũ Taomɔ: Akɛ “Room Request” woji lɛ eko miimaje asafo fɛɛ asafo. Ofainɛ ni oŋma “Room Request” wolo lɛ eko nɔ nii, kɛ́ ootao wɔɔhe kɛtsɔ kpee shishi gbɛjianɔtoo lɛ nɔ, koni okɛha asafoŋ woloŋmalɔ lɛ ni ema nɔ mi, koni no sɛɛ lɛ okɛmaje kpee ni obaaya lɛ. ESAAA ni akɛ “Room Request” woji kɛ kpee he woji krokomɛi ni aŋmalaa lɛ majeɔ nitsumɔhe nine ni yɔɔ Accra lɛ.
6 Abaaná wɔɔhei lɛ ekomɛi yɛ mɛi ashiai amli. Esa akɛ mɛi ni ahãa amɛ wɔɔhei yɛ nɛkɛ gbɛ nɔ lɛ akai akɛ, efeŋ nɔ ni sa akɛ amɛkɛ amɛ gbɔfeelɔi lɛ agbɔfeemɔ aaatsu nii yɛ gbɛ ni ejaaa nɔ, kɛtsɔ gbɛ ni amɛaakpa akɛ amɛbaahi tsũ lɛ mli be kakadaŋŋ fe gbii pɔtɛɛ ni atsɔɔ yɛ “Room Request” wolo lɛ nɔ lɛ nɔ. Akɛ tsũi nɛɛ miiha kɛha kpee be lɛ PƐ. Mɛi ni nine shɛɔ wɔɔhei ni tamɔ nɛkɛ nɔ lɛ akwɛ koni amɛ kɛ amɛbii lɛ ajie bulɛ kpo amɛtsɔɔ amɛ gbɔfeelɔ lɛ shia lɛ, ní amɛkagbɛ́lɛ gbɔfeelɔ lɛ nibii amli aloo ni amɛkafite enɛɛmɛi loo ni amɛaabote shia lɛ mli hei komɛi ni esaaa akɛ mɛi krokomɛi boteɔ jɛmɛ lɛ. Kɛ shiatsɛmɛi ná naagbai yɛ enɛ gbɛfaŋ lɛ, esa akɛ aha tsũ taomɔ he nɔkwɛlɔ ni yɔɔ kpee lɛ shishi lɛ ale enɛɛmɛi oya nɔŋŋ, ni ebaaná he miishɛɛ akɛ eeeye ebua.
7 Yɛ kpeei ni afee yɛ kooyigbɛ lɛ kɛ maŋ nɛŋ hei komɛi lɛ, gbɔi lɛ ateŋ mɛi saŋŋ kɛ amɛ “Room Request” woji haaa dani amɛyashɛ he ni afeɔ kpee lɛ yɛ lɛ. Enɛ kɛ naagbai baha kpee shishi gbɛjianɔtoo lɛ, ejaakɛ ehe bahia ni amɛtao wɔɔhe amɛha kpeeiyalɔi ni tamɔ nɛkɛ yɛ naagbee mli kwraa. Gbɛjianɔ ni atoɔ yɛ naagbee mli kwraa nɛɛ baanyɛ afite shika babaoo. Shi, eji mɔbɔ sane akɛ wɔɔwie akɛ, beni abi kpeeiyalɔi lɛ ateŋ mɛi komɛi koni amɛkɛ shika aye abua koni akɛwo wɔɔhe lɛ he nyɔmɔ lɛ, amɛfeee nakai. Enɛ kɛ naagbai baa. No hewɔ lɛ, esa akɛ kpeeiyalɔi fɛɛ ni wɔɔhe he baahia amɛ kɛtsɔ kpee shishi gbɛjianɔtoo lɛ nɔ lɛ aŋmala “Room Request” woji lɛ anɔ nii koni amɛkɛ enɛɛmɛi amaje kpee shishi gbɛjianɔtoo lɛ kɛtsɔ hiɛ kwraa. Ehe miihia ni wɔsaa wɔhe hu koni wɔkɛ shika aye abua kɛha wɔɔhe lɛ, kɛ́ eji skulbii awɔɔhe loo wɔɔhe yɛ mɔ ko shia mli.
8 Gbeekpamɔ Tsɔɔ Toiboo ni Afeɔ Ahaa Asafo lɛ Gbɛtsɔɔmɔi: Esa akɛ sane titri nɛɛ afee saji ni wɔsusuɔ he waa diɛŋtsɛ lɛ ateŋ ekome. Hebribii 13:17 kɛɔ akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.” Abiɔ koni wɔfee toiboo yɛ sane nɛɛ mli gbii enyɔ loo gbii etɛ pɛ daa afi. Kɛ esoro nɔ ni wɔ diɛŋtsɛ wɔhalaa po lɛ, nɔkwɛmɔnɔ kpakpa ni wɔfeɔ, taakɛ wɔnyɛmimɛi lɛ kɛ je lɛ naa lɛ, haa suɔmɔ, ekomefeemɔ kɛ sɛɛfimɔ mumɔ shwereɔ.—Kwɛmɔ 1 Korintobii 16:16; Filipibii 2:1-4.
9 Hiamɔ Nii Krɛdɛɛ: Ekolɛ ehe baahia ni aye abua mɛi ni egbɔlɔ, mɛi ni bɛ gbɔmɔtsoŋ hewalɛ, mɛi ni yɔɔ be-fɛɛ sɔɔmɔ lɛ mli, loo mɛi krokomɛi yɛ kpee ni abaaya lɛ hewɔ. Wekumɛi, onukpai, kɛ mɛi krokomɛi ni yɔɔ asafo lɛ mli ni le mɛi ni yɔɔ hiamɔ nii krɛdɛɛ lɛ ashihilɛi ni yɔɔ srɔto lɛ baanyɛ amɛkɛ suɔmɔ ato gbɛjianɔ ni he hiaa lɛ, ní akɛ weku kɛ asafo lɛ gbɛnaa nii lɛ akafɔ kpee shishi gbɛjianɔtoo lɛ nɔ.—Okɛto 1 Timoteo 5:4 he.
10 Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔnɔ kpakpa, kɛ mɛi ni yɔɔ bii ni baa amɛjeŋ jogbaŋŋ ni Asafoŋ Sɔɔmɔ Ajinafoi lɛ kpɛlɛɔ amɛnɔ lɛ pɛ. Dani oooŋmala “Room Request” wolo lɛ nɔ nii lɛ, kanemɔ sane ni yɔɔ wolo lɛ shishigbɛ lɛ jogbaŋŋ. Esa akɛ akɛ nibimɔi nɛɛ amaje Rooming Department oya nɔŋŋ. Nyɛfainɛ, nyɛkɛ kpee shishi adrɛs ni atsɔɔ yɛ nɔ ni aŋma ahɔ mli nɛɛ baafa 6 lɛ atsua nii.
11 Shi kɛlɛ, Rooming Department lɛ baabɔ mɔdɛŋ ni amɛná wɔɔhei ni sa kɛha shiɛlɔi ni yɔɔ hiamɔ nii krɛdɛɛ lɛ kɛ́ asafo lɛ mli bii nyɛŋ aye abua. Shiɛlɔi nɛɛ baanyɛ amɛkɛ asafoŋ woloŋmalɔ lɛ agba amɛ shihilɛ lɛ he sane. Esa akɛ woloŋmalɔ lɛ kɛ Asafoŋ Sɔɔmɔ Ajinafoi lɛ mli bii krokomɛi lɛ awie he, koni amɛkwɛ kɛji asafo lɛ baanyɛ aye abua aŋkroaŋkroi nɛɛ koni amɛná amɛ diɛŋtsɛ amɛ wɔɔhei. Kɛ asafo lɛ nyɛŋ ekɛ yelikɛbuamɔ ni he hiaa aha lɛ, mɔ ni taoɔ tsũ lɛ baaŋma “Room Request” wolo lɛ nɔ nii koni ekɛha woloŋmalɔ lɛ ekoŋŋ, ni lɛ hu ebaakwɛ kɛji nɔ fɛɛ nɔ ja yɛ nɔ lo, kɛ shihilɛi amli ni mɔ lɛ yɔɔ ni haa efeɔ mɔ ni sa akɛ asusu ehe yɛ nɛkɛ gbɛ nɔ lɛ. Esa akɛ woloŋmalɔ lɛ aŋma wolo ni EKƐTSƆƆ shihilɛi ni mɔ lɛ yɔɔ mli lɛ MLI FITSOFITSO. Esa akɛ afee enɛ fɛɛ kɛtsɔ hiɛ kwraa dani kpee be lɛ ashɛ. Beni sɔɔmɔ ajinafoi lɛ ema nɔ mi sɛɛ lɛ, kɛkɛ lɛ woloŋmalɔ lɛ kɛ wolo lɛ baamaje Rooming Department lɛ. Abaana mɔ ni biɔ tsũ lɛ tɛ̃ɛ koni aha ni ele wɔɔhe lɛ he gbɛjianɔtoo.
12 Esa akɛ mɛi ni yɔɔ hiamɔ nii krɛdɛɛ lɛ kɛ Asafoŋ Sɔɔmɔ Ajinafoi lɛ ateŋ mɔ kome loo onukpa kroko ayabi amɛ tsũ lɛ kɛhamɔ he sane yɛ Rooming Department kɛ́ amɛshɛ he ni afeɔ kpee lɛ yɛ lɛ amrɔ nɔŋŋ.
13 Kpee Kroko ni Aaaya: He ni bɛŋkɛ fe fɛɛ ji he ni akɛha asafo fɛɛ asafo akɛ eya kpee lɛ yɛ. Asafo lɛ damɔ shiɛlɔi ayifalɛ kɛha kpee fɛɛ kpee ni atsɔɔ akɛ aya lɛ nɔ etsɔɔ mɛi ayibɔ ni baanyɛ aya kpee lɛ, bɔni afee ni ato gbɛjianɔ kɛha sɛii ni fa, wɔɔhei, woji, kɛ ekrokomɛi. Kɛ ooto gbɛjianɔ koni oya kpee kroko lɛ, ekolɛ wɔɔhe he saji ahe baahia bo kɛfata nibii krokomɛi ahe. Akɛ hei ni akɛha ni aya yɛ lɛ mli saji titrii lɛ eha yɛ nɔ ni aŋma ahɔ mli nɛɛ baafa 6. Shi kɛlɛ, kɛ́ yɛ yiŋtoo kpakpa hewɔ ni obaaya kpee lɛ yɛ he kroko fe ni oooya yɛ he ni ato akɛ nyɛ asafo lɛ aya yɛ lɛ, ni wɔɔhe he baahia bo lɛ, no lɛ esa akɛ oŋma “Room Request” wolo lɛ nɔ nii, ni oha woloŋmalɔ lɛ kɛmaje kɛtsɔ kpee ni sa lɛ adrɛs nɔ. Kɛ abaafee nɔ ni fa fe kpee kome yɛ nakai maŋtiase lɛ mli lɛ, kwɛmɔ ni oŋmala gbii ni akɛbaafee kpee ni obaaya lɛ.
14 Kɛ abaafee kpeei enyɔ yɛ wiemɔ kome too lɛ nɔŋŋ mli yɛ maŋtiase ko mli lɛ, nyɛmimɛi komɛi baasumɔ ni amɛya kpeei enyɔ lɛ fɛɛ. Yɛ be mli ni ŋwanejee ko bɛ he akɛ enɛ baaha aná hegbɛ kɛha hewalɛwoo babaoo lɛ, fɛɛ sɛɛ lɛ, ekɛ naagbai baa yɛ nibii ni akɛtsuɔ nii ni akɛfeɔ kpee lɛ gbɛfaŋ, ni no haaa yiŋtoo hewɔ ni asumɔɔ ni mɛi ayifalɛ lɛ afee nɔ ni sa, koni nitsumɔ ni tsɔɔ kpee lɛ hiɛ kɛ nɔ ni atsuɔ yɛ kpee lɛ sɛɛ lɛ akafa tsɔ lɛ aye omanye. Yɛ enɛ hewɔ lɛ wɔmiibi ni nyɛmimɛi ni yɔɔ maŋtiasei amli lɛ aya kpee ni ato aha amɛ yɛ nakai maŋtiase lɛ mli lɛ pɛ. Kɛ amɛmiisumɔ ni amɛya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba kɛha wɔ. Yɛ nyɛmimɛi ni akɛ kpee shishi nitsumɔi komɛi ni he hiaa woɔ amɛdɛŋ ni amɛtsuɔ he nii ni no hewɔ lɛ amɛnaaa hegbɛ ni amɛbo wiemɔi lɛ fãi komɛi atoi lɛ agbɛfaŋ lɛ, aŋmɛɔ amɛ gbɛ ni amɛya kpee ni ji enyɔ ni abaafee yɛ nakai maŋtiase lɛ nɔŋŋ mli. Kɛfata he lɛ, kɛ́ yɛ wiemɔ he naagba hewɔ loo kɛ́ gbi ni abaafee amɛ kpee lɛ nɔŋŋ ji gbi ni abaafee Tamale kpee lɛ hewɔ ni nyɛmimɛi komɛi baasumɔ ni amɛya kpee yɛ maŋtiase lɛ mli fe nɔ ni atsɔɔ akɛ amɛ asafo lɛ aya lɛ, aŋmɛɔ nakai feemɔ gbɛ.
15 Yɛ asafoi ni yɔɔ shɔŋŋ lɛ agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ, fe he ni ato ni amɛya lɛ. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ ni amɛhalaa he ni amɛbaaya. Shi kɛlɛ, esa akɛ asafoi ni baakpɛ amɛyiŋ akɛ amɛbaaya kpee kroko ni jeee nɔ ni ato ni amɛya lɛ atswa kpokpaa nɔkwɛlɔ lɛ adafi kɛtsɔ hiɛ kwraa koni ekato amɛsaramɔ be he gbɛjianɔ kɛmiiha nakai otsi ni amɛbaaya kpee lɛ. Kɛ asafo lɛ baaya kpee ni ato akɛ amɛya loo amɛyaŋ jio, esa akɛ nyɛmimɛi hii ni kwɛɔ tsɔne taomɔ gbɛjianɔtoi anɔ lɛ akwɛ koni tsɔne fɛɛ tsɔne ni amɛaato he gbɛjianɔ lɛ afee tsɔne ni naagba bɛ he ni ekɛ nitsumɔ yɔɔ shweshweeshwe.
16 Tamale Kpee: Abaafee “Nyɔŋmɔ Shihilɛ Gbɛ” Kpokpaa Wulu nɔ Kpeei ni atoɔ he gbɛjianɔ lɛ naagbee nɔ̃ lɛ ateŋ ekome yɛ Tamale kɛjɛ January 8 kɛyashi 10, 1999. Taakɛ afɔɔ feemɔ lɛ, wiemɔi ni abaawie ji Twi kɛ Frafra. Aawo nyɛmimɛi fɛɛ ni jɛ wuoyigbɛ ni baanyɛ aya lɛ hewalɛ ni amɛya kpee nɛɛ. Ekolɛ Asafo lɛ baato tsɔne he gbɛjianɔ krɛdɛɛ afi nɛɛ kɛha gbɛfãa lɛ. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛ̃ɛ, ni amɛye trukaa odase hu beni amɛyɔɔ Tamale lɛ. Wɔmiiwo mɛi fɛɛ ni yɔɔ he miishɛɛ akɛ amɛaaya lɛ hewalɛ koni amɛbɔi amɛhe saamɔ kɛha kpee lɛ.
17 Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ be ni eho lɛ mli lɛ jogbaŋŋ. Taakɛ afɔɔ feemɔ lɛ, abaama agba, abaatao wɔɔhei, kɛ nitsumɔi krokomɛi ni abaatsu. Wɔyɛ nɔmimaa akɛ mɛi fɛɛ ni yɔɔ maŋtiase ni abaafee kpee lɛ yɛ kɛ asafoi ni bɛŋkɛ jɛmɛ fɛɛ lɛ baato amɛ nitsumɔi ahe gbɛjianɔ koni amɛfata he kɛtsu nitsumɔ ni he hiaa nɛɛ kɛmɔ shi yɛ otsii lɛ anaagbee kɛ otsi lɛ mli gbii lɛ amli. Nyɛsɛɛ afi lɛ, amaniɛbɔi ni nine shɛ nɔ lɛ tsɔɔ akɛ nyɛmimɛi babaoo to gbɛjianɔ kpakpa koni amɛye amɛbua yɛ nitsumɔ ni tsɔɔ kpee lɛ hiɛ lɛ mli. Wɔmiijie nyɛ fɛɛ nyɛyi yɛ mumɔ kpakpa nɛɛ hewɔ. Kɛ mɛi ni fa saŋŋ baato gbɛjianɔ koni amɛba jɛmɛ gbi kome loo gbii enyɔ ni tsɔɔ kpee lɛ shishijee hiɛ koni ato nɔ fɛɛ nɔ he gbɛjianɔ lɛ, enɛ baaye ebua waa. Akɛni shika ni akɛyeɔ abuaa ji nɔ ni akɛtoɔ kpeei ahe gbɛjianɔ ni akɛfeɔ kpee lɛ hewɔ lɛ, kɛ wɔtee koni wɔyatsu nitsumɔ ni tsɔɔ kpee hiɛ lɛ, esaaa akɛ wɔkpaa gbɛ akɛ kpee shishi gbɛjianɔtoo lɛ baaha aha wɔ niyenii yaka. Mɛi pii ni kɛ amɛhe baawo voluntia nitsumɔ lɛ mli lɛ ahe baahia hu yɛ kpee lɛ shishi, no hewɔ lɛ okɛ oweku lɛ ato gbɛjianɔ koni nyɛfata he kɛtsu enɛ yɛ kpee ni nyɛbaaya lɛ shishi.
18 Niyenii He Nitsumɔ: Kaimɔ ni okɛ nɔ ko ni obaaye beni akpa fioo shwane lɛ ajɛ shia kɛba. No hewɔ lɛ mɔ fɛɛ mɔ baanyɛ ekɛ ejwɛŋmɔ ama mumɔŋ nifeemɔ lɛ nɔ waa. Nyɛhaa wɔkwɛa jogbaŋŋ yɛ he fɛɛ he ni wɔɔtara ni wɔye nii beni akpa fioo lɛ, koni wɔkɛ nɔ ko akakpa sɛii lɛ anɔ loo ni wɔɔshi jwɛi wɔshwie jɛmɛ.
19 Kpee Shishi Tsitsinaa-tsɛɛ Nii kɛ Nɔ ni Akɛhɔɔ Mli: Aawo asafo fɛɛ asafo ŋaa koni amɛkɛ “Literature Order Form” (S-14) lɛ atsu nii ni amɛkɛshɛ tsitsinaa-tsɛɛ woji kɛ plastik ni akɛhɔɔ mli lɛ kɛha “Nyɔŋmɔ Shihilɛ Gbɛ” Kpokpaa Wulu nɔ Kpeei lɛ. Nyɛfainɛ, nyɛkwɛa ni nyɛŋmaa wolo lɛ nɔ nii, ni nɔ fɛɛ nɔ aja jogbaŋŋ, ni nyɛkɛ klɛŋklɛŋ nɔ lɛ amajea Asafo lɛ AMRƆ NƆŊŊ koni anyɛ atsu nyɛ kpee lɛ hiamɔ nii ni kɔɔ enɛ he lɛ ahe nii yɛ be ni sa mli. Nyɛhaa ahia nyɛjwɛŋmɔ mli akɛ nyɛnaŋ tsitsinaa-tsɛɛ woji kɛ nɔ ni akɛhɔɔ mli lɛ eko yɛ kpeei lɛ ashishi.
20 Lalai: Ato lalai ni nyiɛ sɛɛ nɛɛ ahe gbɛjianɔ koni ala yɛ wiemɔ he gbɛjianɔtoo lɛ mli yɛ bɔ ni ato naa aha lɛ naa: 174, 151, 105, 89, 164, 43, 91, 211, 202, 177, 191, 79, 155, 19, 10, 85, 109, kɛ 42. Yɛ ŋaawoo ni akɛha yɛ Efesobii 5:19 lɛ hewɔ lɛ, aawo wɔ fɛɛ hewalɛ ni wɔfata he kɛla yɛ be mli ni atswaa saŋku-lalai lɛ yɛ kpeei lɛ ashishi lɛ.
21 Wiemɔi ni Amɔmɔɔ loo Vidio Mfoniri-Shamɔi: Asafo lɛ etoŋ gbɛjianɔ ko kɛhaŋ wiemɔi loo drama lɛ mɔɔmɔ yɛ kpãa nɔ. Esa akɛ aŋkroaŋkroi fɛɛ ni baamɔmɔ wiemɔi lɛ yɛ kpãai anɔ kɛha amɛhe lɛ afee nakai yɛ gbɛ ni egbaŋ mɛi krokomɛi ni eba kpee lɛ shishi lɛ anaa loo koni ekagbala amɛjwɛŋmɔ kɛjɛ wiemɔ lɛ nɔ. Titri lɛ, esaaa akɛ amɛtaa sarawa hewalɛ kpãa kɛ wiemɔ kpãai lɛ ahe. Wɔhiɛ baasɔ ekome ni nyɛkɛ wɔ aaafee yɛ enɛ mli lɛ waa diɛŋtsɛ.
22 Naagbee: Nyɛmimɛi hii kɛ yei, saji ni anuɔ kɛjɛɔ hei srɔtoi lɛ tsɔɔ akɛ, esa akɛ ajie nyɛyi yɛ Nyɔŋmɔ jamɔ sui ni nyɛjieɔ lɛ kpo nyɛtsɔɔ hewɔ. Nɔkwɛlɔi ni yɔɔ gbɔiatoohe ko lɛ kɛɛ akɛ, Yehowa Odasefoi ji “kuu ko ni yɔɔ subaŋ ni hi fe fɛɛ ni baa amɛjeŋ jogbaŋŋ fe fɛɛ ni wɔfeɔ amɛ gbɔ.” Mɔ kroko hu kɛɛ: “Minu he akɛ ehe miihia ni madamɔ gbɔiatoohe nitsulɔi lɛ anajiaŋ makɛɛ akɛ miida nyɛ shi. Esa akɛ ajie nyɛ kpeeiyalɔi lɛ ayi akɛ kui ni yɔɔ subaŋ ni hi fe fɛɛ, ni yɔɔ ekomefeemɔ fe fɛɛ, ni yɔɔ mɔhesusumɔ waa fe fɛɛ ní wɔná he miishɛɛ akɛ wɔɔsɔmɔ amɛ lɛ ateŋ ekome.” Beni agbe kpeei ni afee yɛ maŋ nɛɛ mli lɛ ekome naa ní nyɛmimɛi hii ni sɔmɔɔ yɛ kpee shishi gbɛjianɔtoo lɛ mli lɛ tee koni amɛyada skul nɔkwɛlɔi lɛ ashi yɛ amɛshikpɔŋ kɛ nibii ni amɛŋmɛ gbɛ ni akɛtsu nii hewɔ lɛ, skul lɛ tsɔɔlɔ nukpa lɛ jie yi eha onukpai ni kwɛɔ skul lɛ he saji anɔ lɛ akɛ, akɛni nyɛmimɛi lɛ kwɛ skul lɛ shikpɔŋ kɛ nibii anɔ yɛ gbɛ ni nɔ bɛ nɔ hewɔ lɛ, esa akɛ aŋmɛ Yehowa Odasefoi agbɛ daa, be fɛɛ be ni amɛaasumɔ ni amɛkɛ skul lɛ mli nibii atsu nii lɛ. Skul nitsulɔi akuu muu lɛ fɛɛ kɛ onukpai ni kwɛɔ skul lɛ he saji anɔ lɛ kɛ miishɛɛ tswa amɛdɛ kɛkpɛlɛ nɔ. Eji hewalɛwoo akɛ aaanu amaniɛbɔi ni tamɔ nɛkɛ, aloo jeee nakai? Nyɛmimɛi hii kɛ yei lɛ ajeŋba ni ha awie saji ni tamɔ nɛkɛ lɛ haa Yehowa tsui nyaa lɛɛlɛŋ.
23 Eyɛ faŋŋ kɛha wɔ fɛɛ akɛ Yehowa miifi daa afi kpeei ahe gbɛjianɔtoo lɛ sɛɛ. Akɛni tsũi ahe miihia nyɛmimɛi babaoo ni fãa gbɛ kɛyaa kpokpaa wulu nɔ kpeei lɛ hewɔ lɛ, wɔbaanyɛ wɔná nɔmimaa akɛ Yehowa baatsu hiamɔ nii nɛɛ ahe nii hu bɔ ni sa. Ní wɔɔtsɔɔ akɛ ‘wɔyeɔ nɔ ko bibioo mli anɔkwa’ lɛ haa wɔnyɛɔ wɔnáa jɔɔmɔi babaoo ni mɛɔ mɛi ni Yehowa sumɔɔ amɛ lɛ.—Luka 16:10.
[Akrabatsa ni yɔɔ baafa 5]
Nifeemɔ Bei
[Akrabatsa ni yɔɔ baafa 5]
Sohaa kɛ Hɔɔ
Leebi 9:30 - Gbɛkɛ 5:00
Hɔgbaa
Leebi 9:30 - Gbɛkɛ 4:00