Yehowa Odasefoi—Anɔkwa Sanekpakpa Jajelɔi
1 Yesu Kristo kɛ sanekpakpa lɛ jajemɔ he sɔ̃ fɔ̃ ekaselɔi fɛɛ nɔ, ni eje gbɛ efã amɛ akɛ amɛshiɛ Maŋtsɛyeli lɛ he sanekpakpa lɛ. (Mat. 24:14; Bɔf. 10:42) Emra be mli kaselɔi lɛ fee nɔkwɛmɔnɔ amɛfɔ̃ shi yɛ enɛ gbɛfaŋ yɛ be mli ni amɛwieɔ Maŋtsɛyeli lɛ he sane ni amɛfɔ̃ɔɔ lɛ—jeee yɛ jamɔhei pɛ kɛkɛ, shi moŋ yɛ he fɛɛ he ni amɛkɛ gbɔmɛi kpeɔ yɛ, yɛ maŋ kɛ be mli ni amɛyaa shia kɛ shia lɛ. (Bɔf. 5:42; 20:20) Ákɛ Yehowa Odasefoi ni yɔɔ ŋmɛnɛ lɛ, wɔkɛ wɔhe etsɔɔ akɛ wɔji anɔkwa Kristofoi sanekpakpa jajelɔi, ni wɔshiɛɔ Maŋtsɛyeli lɛ he shɛɛ sane lɛ yɛ shikpɔji 232 nɔ, ni wɔbaptisi kaselɔi heei ni fa fe akpei-akpe kome yɛ nyɛsɛɛ afii etɛ ni eho lɛ pɛ mli! Mɛni hewɔ wɔ sanekpakpa jajemɔ nitsumɔ lɛ eye omanye nɛkɛ lɛ?
2 Sanekpakpa lɛ Kanyaa Wɔ: Sanekpakpa jajelɔi ji shiɛlɔi loo sanekpakpa he bɔfoi. Yɛ no hewɔ lɛ, wɔyɛ miishɛɛ hegbɛ ko akɛ wɔtswa Yehowa Maŋtsɛyeli lɛ he adafi—ni ji anɔkwa sanekpakpa pɛ ni abaanyɛ akɛha adesai ni ehao lɛ. Wɔyɛ miishɛɛ babaoo yɛ nilee ni wɔtsɔ hiɛ wɔná yɛ ŋwɛi hee ko ni kɛ jalɛ baaye shikpɔŋ hee ko ni feɔ adesai aweku ni yeɔ anɔkwa yɛ Paradeiso ni baa lɛ mli nɔ lɛ hewɔ. (2 Pet. 3:13, 17) Wɔji mɛi pɛ ni ekpɛlɛ hiɛnɔkamɔ nɛɛ nɔ, ni wɔmiisumɔ ni wɔkɛ mɛi krokomɛi aja.
3 Anɔkwa Suɔmɔ Kanyaa Wɔ: Sanekpakpa jajemɔ ji yiwalaheremɔ nitsumɔ. (Rom. 1:16) No hewɔ ni wɔnáa miishɛɛ kpele yɛ Maŋtsɛyeli shɛɛ sane lɛ gbɛɛ-kɛ-shwamɔ mli lɛ. Akɛ anɔkwa sanekpakpa jajelɔi lɛ, wɔsumɔɔ gbɔmɛi, ni no tsirɛɔ wɔ ni wɔgba amɛ sanekpakpa lɛ he sane—wɔ wekui, nanemɛi, mɛi ni wɔle, kɛ mɛi krokomɛi babaoo ni wɔɔnyɛ. Wɔ susuma muu fɛɛ mli ni wɔɔjɛ wɔtsu nitsumɔ nɛɛ ji gbɛi kpakpai ni wɔbaanyɛ wɔkɛtsɔɔ anɔkwa suɔmɔ ni wɔyɔɔ kɛha mɛi krokomɛi lɛ ateŋ ekome.—1 Tes. 2:8.
4 Nyɔŋmɔ Mumɔ lɛ Fiɔ Wɔsɛɛ: Nyɔŋmɔ Wiemɔ lɛ maa nɔ mi ehaa wɔ akɛ kɛ wɔtsu wɔnitsumɔ ni ji Maŋtsɛyeli wu lɛ dumɔ kɛ enɔ nu-shwiemɔ lɛ, Yehowa ji mɔ ni ‘haa eshwereɔ.’ Nakai pɛpɛɛpɛ ji nɔ ni wɔnaa ni eyaa nɔ yɛ wɔ gbɛjianɔtoo lɛ mli ŋmɛnɛ. (1 Kor. 3:5-7) Nyɔŋmɔ mumɔ lɛ ji nɔ ni fiɔ wɔsɛɛ yɛ wɔ sanekpakpa jajemɔ nitsumɔ lɛ mli, ni ehaa wɔyeɔ omanye babaoo.—Yoel 3:1, 2Ga Bible.
5 Yɛ hewalɛwoo ni yɔɔ 2 Timoteo 4:5 lɛ akɛ “tsu sanekpakpa jajelɔ nitsumɔ lɛ” kɛ yɛ suɔmɔ ni wɔyɔɔ kɛha mɛi fɛɛ lɛ hewɔ lɛ, eba akɛ wɔbaaná kanyamɔ koni wɔgba Maŋtsɛyeli lɛ he sanekpakpa ni yɔɔ miishɛɛ lɛ wɔtsɔɔ yɛ hegbɛ fɛɛ hegbɛ mli, kɛ hekɛnɔfɔɔ akɛ Yehowa baaya nɔ ajɔɔ wɔ nitsumɔ lɛ.