Kɛ́ Ewoɔ Yibii lɛ, Okɛtsu Nii!
1 Wɔ Maŋtsɛyeli Sɔɔmɔ lɛ yaa nɔ ekɛ shiɛmɔ wiemɔi sɔrɔtoi haa wɔ koni wɔkɛtsu nii yɛ sɔɔmɔ lɛ mli. Enɛ kɛ susumɔi heei haa wɔ yɛ bɔ ni wɔɔtée miishɛɛ shi yɛ Maŋtsɛyeli shɛɛ sane lɛ mli. Ekolɛ obɔɔ mɔdɛŋ daa nyɔŋ nɔ koni okase shiɛmɔ wiemɔi nɛɛ ekome loo babaoo. Shi kɛlɛ, shiɛlɔi komɛi baana akɛ ekolɛ yɛ be mli ni amɛkɛ amɛteŋ ekome etsu nii bei fioo ko mli lɛ, Wɔ Maŋtsɛyeli Sɔɔmɔ kroko kɛ shiɛmɔ wiemɔi heei baaha. Eyɛ faŋŋ akɛ ekolɛ enyɛŋ eba akɛ mɔ fɛɛ mɔ baanyɛ akase shiɛmɔ wiemɔ hee ko dani ehe asa yɛ ekome ni tsɔ hiɛ lɛ mli.
2 Eji anɔkwale akɛ, gbɛgbalɔi akpei abɔ kɛ shiɛlɔi krokomɛi yɛ ni kɛ be babaoo tsuɔ nii yɛ shiɛmɔ nitsumɔ lɛ mli. Kɛfata he lɛ, asafoi babaoo kɛ otsii fioo tsuɔ amɛshikpɔŋkuku lɛ fɛɛ mli nii. Yɛ shihilɛi ni tamɔ nɛkɛ mli lɛ, shiɛlɔi náa he miishɛɛ akɛ amɛaaná gbɛ̀i kɛ susumɔi heei kɛha shɛɛ sane lɛ kɛhamɔ. Enɛ yeɔ ebuaa amɛ ni amɛyaa hiɛ yɛ amɛhesaai amli. Ehaa amɛsɔɔmɔ lɛ hu ŋɔɔ babaoo, ni ewoɔ yibii, ni eyeɔ ebuaa amɛ ni amɛkpeeɔ kaai ni amɛkɛkpeɔ lɛ anaa.
3 Yɛ fɛɛ mli lɛ, kɛ oto shiɛmɔ wiemɔ ko ni mɔɔ shi ni kanyaa miishɛɛ he gbɛjianɔ lɛ, bɔ fɛɛ bɔ ni fee lɛ, yaa nɔ ni okɛtsu nii! Ehe ehiaaa ni ofɔ̃ɔ shiɛmɔ wiemɔ ko ní miiwo yibii lɛ kɛ nitsumɔ. Tsakemɔ lɛ owo woji ni akɛtsuɔ nii yɛ nyɔŋ ni ayɔɔ mli lɛ mli kɛkɛ. Yɛ be mli ni okaseɔ ŋaawoi ni akɛha yɛ Wɔ Maŋtsɛyeli Sɔɔmɔ lɛ mli lɛ, taomɔ otii ni yɔɔ miishɛɛ ni ekolɛ obaasumɔ koni okɛfata oshiɛmɔ wiemɔ lɛ he.
4 No hewɔ lɛ, kɛ onine shɛ Wɔ Maŋtsɛyeli Sɔɔmɔ lɛ ehee nɔ lɛ, kaimɔ akɛ shiɛmɔ wiemɔi ni yɔɔ mli lɛ ji ŋaawoi kɛkɛ. Kɛ obaanyɛ okɛtsu nii lɛ, ehi jogbaŋŋ. Shi kɛ oyɛ shiɛmɔ wiemɔ ko ni woɔ yibii yɛ oshikpɔŋkuku lɛ mli momo lɛ, okɛtsu nii! Nɔ ni he hiaa ji ni ‘ogbe osɔɔmɔ lɛ naa kwraa’ yɛ gbɛ kpakpa nɔ, ni otao mɛi ni sa lɛ ni oye obua amɛ ni amɛbatsɔmɔ kaselɔi.—2 Tim. 4:5.