Gbekɛbii—Nyɛji Wɔmiishɛɛnamɔ Jɛɛhe!
1 Gbekɛbii hii kɛ yei, ani nyɛle Yehowa fãmɔ akɛ nyɛbaafata he kɛtsu nii yɛ asafo lɛ mli lɛ? (5 Mose 31:12; Lala 127:3) Eyɛ miishɛɛ akɛ nyɛaafata wɔhe yɛ be mli ni wɔfeɔ ekome kɛjaa Yehowa lɛ! Kɛ nyɛtara shi dioo yɛ kpeei ashishi kɛbo saji atoi jogbaŋŋ lɛ, nyɛhaa wɔtsuii nyaa. Wɔnaa miishɛɛ, titri lɛ, kɛ nyɛbɔ mɔdɛŋ koni nyɛha saji ahetoo yɛ nyɛ diɛŋtsɛ nyɛ wiemɔ mli lɛ. Asafo muu lɛ fɛɛ naa miishɛɛ kɛ nyɛtsu nifeemɔ ni akɛha nyɛ yɛ Teokrase Sɔɔmɔ Skul lɛ mli lɛ he nii, kɛ nyɛkɛ ekãa fata wɔhe yɛ shiɛmɔ nitsumɔ lɛ mli, kɛ agbɛnɛ kɛ wɔnu akɛ nyɛkɛ ekãa shiɛɔ nyɛtsɔɔ nyɛskulbii kɛ nyɛtsɔɔlɔi lɛ.—Lala 148:12, 13.
2 Wɔmiisumɔ koni nyɛle akɛ wɔmii shɛɔ wɔhe fe nine kɛ wɔna nyɛ jeŋba kpakpa lɛ, nyɛpuemɔ ni yɔɔ fɛo lɛ, nyɛ jeŋba ni he tse lɛ, kɛ bulɛ ni nyɛjieɔ lɛ kpo nyɛtsɔɔ onukpai lɛ. Wɔnaa miishɛɛ, titri lɛ, kɛ nyɛtsɔɔ akɛ ‘nyɛmiikai nyɛ-Bɔlɔ Kpeteŋkpele’ lɛ kɛtsɔ teokrase otii ni nyɛkɛmamɔɔ nyɛhiɛ lɛ nɔ lɛ.—Jaj. 12:1, NW; Lala 110:3.
3 Nyɛgbaa Wɔ Otii ni Nyɛkɛmamɔ Nyɛhiɛ: Gbekɛ nuu ko ni eye afii kpaanyɔ lɛ kɛɛ kpokpaa wulu nɔkwɛlɔ ko akɛ: ‘Klɛŋklɛŋ lɛ masumɔ ni abaptisi mi, no sɛɛ lɛ masumɔ ni maye mabua yɛ asafo lɛ mli kɛtsɔ tsɔne ni awieɔ awoɔ mli lɛ ni mikɛaaha mɛi lɛ nɔ, ni mafee mɔ ni kwɛɔ shitaramɔ nɔ, ni maye mabua kɛ woji ahɔɔmɔ, ni makane nii yɛ woloŋ nikasemɔi kɛ Buu-Mɔɔ lɛ Nikasemɔi lɛ ashishi. No sɛɛ lɛ, masumɔ ni matsɔ asafoŋ sɔɔlɔ, kɛkɛ lɛ onukpa. Masumɔ ni matsɔ gbɛgbalɔ hu, ni maya gbɛgbalɔi askul lɛ eko. No sɛɛ lɛ, masumɔ ni mayatsu nii yɛ Betel, matsɔ kpokpaa nɔkwɛlɔ aloo kpokpaa wulu nɔkwɛlɔ.’ Kwɛ hiɛsɔɔ kpakpa ni ejie kpo etsɔɔ hegbɛ ni ekɛaasɔmɔ Nyɔŋmɔ!
4 Yɛ be mli ni nyɛyaa nyɛhiɛ yɛ gbɔmɔtsoŋ kɛ mumɔŋ lɛ wɔnaa miishɛɛ akɛ wɔɔna akɛ nyɛmiishɛ nyɛ otii lɛ ahe. (Okɛto Luka 2:52 he.) Daa afi lɛ nyɛteŋ mɛi akpei abɔ batsɔmɔɔ shiɛlɔi ni abaptisiko amɛ, ni nyɛhe saa kɛhaa baptisimɔ akɛ Yehowa tsuji ni ejɔɔ amɛhe nɔ. Wɔmiishɛɛ lɛ daa kɛ wɔna ekoŋŋ akɛ nyɛtsɔ gbɛgbalɔi awalɔi, ni nyɛkɛ nyɛhe ewo be-fɛɛ sɔɔmɔ lɛ mli po lɛ. Lɛɛlɛŋ, gbekɛbii, nyɛji wɔmiishɛɛnamɔ jɛɛhe kɛ yijiemɔ ni yɔɔ naakpɛɛ jɛɛhe kɛha wɔ ŋwɛi Tsɛ lɛ. Eba akɛ Yehowa aaajɔɔ nyɛ babaoo!—Abɛi 23:24, 25.