Nyɛlea Nyɛnyɛmimɛi Lɛ
1 Biblia lɛ wieɔ anɔkwa naanyo he akɛ mɔ ni kpɛtɛɔ mɔ he gbagbalii fe nyɛmi, mɔ ni sumɔɔ mɔ ni eyeɔ anɔkwa daa, kɛ mɔ ni bayeɔ ebuaa naanyo yɛ haomɔ be mli. (Abɛi 17:17; 18:24) Nanemɛi ni tamɔ nɛkɛ lɛ ahe sɛŋ yɛ asafo lɛ mli kɛ́ wɔbɔ mɔdɛŋ ni wɔle wɔhe ni wɔsumɔ wɔhe lɛ.—Yoh. 13:35.
2 Hegbɛi kpakpai yɛ ni wɔkɛaale wɔnyɛmimɛi lɛ dani aje kpeei lɛ ashishi aloo be mli ni agbe naa. Mɛni hewɔ obashɛɛɛ mra ni omɛ fioo yɛ sɛɛ mli bɔni afee ni onyɛ oná suɔmɔ hedɔɔ kɛ naanyobɔɔ ni miishɛɛ yɔɔ mli lɛ mli gbɛfaŋnɔ? Taomɔ nyɛmimɛi srɔtoi, ní mɛi ni fata he ji mɛi ni egbɔlɔ, mɛi ni yɔɔ niiashikpamɔ kɛ gbekɛbii, loo mɛi ni sheɔ gbeyei ni okɛ amɛ agba sane.
3 Jee Sanegbaa Shishi: Kaaŋa onyɛmimɛi lɛ kɛkɛ ni oho. Obaanyɛ oje sanegbaa shishi kɛtsɔ niiashikpamɔ ni oná yɛ shiɛmɔ nitsumɔ lɛ mli ni oogba, sane oti ko ni yɔɔ miishɛɛ ni eje kpo yɛ wolo tɛtrɛɛ lɛ mli nyɛsɛɛ nɛɛ, loo nɔ ko he wiemɔ yɛ kpee ni agbe naa lɛ mli. Obaanyɛ okase nii babaoo kɛjɛ onyɛmimɛi lɛ aŋɔɔ kɛtsɔ toibolɔ kpakpa ni ooofee lɛ nɔ, ni owo amɛ hewalɛ koni amɛgba amɛniiashikpamɔi kɛ nibii ni amɛkaseɔ lɛ he nii amɛtsɔɔ. Ní ooobi mɔ ko bɔ ni fee ni ebale Yehowa lɛ baanyɛ ajie nibii babaoo kpo. Mɛi komɛi ená niiashikpamɔi ni wajeɔ mɔ hemɔkɛyeli yɛ amɛshihilɛi amli, yɛ be mli ni mɛi krokomɛi hu miimia amɛhiɛ yɛ shihilɛi amli ní ebaawa kɛha mɛi krokomɛi akɛ amɛaasusu he amrɔ nɛɛ. Enɛ ni wɔɔyɔse lɛ baaye abua wɔ, akɛ anɔkwa nanemɛi lɛ koni wɔnu mɛi krokomɛi ahiamɔ nii ahe ni wɔtsu he nii hu.
4 Nyɛkɛ Nyɛhe Abɔa Naanyo: Beni ebiyoo egbo sɛɛ lɛ, ebawa waa kɛha nyɛmiyoo ko akɛ eeelá Maŋtsɛyeli lala ni tsĩɔ gbohiiashitee lɛ tã lɛ. Ekaiɔ akɛ: “Be ko lɛ, nyɛmi yoo ko ni ta sɛi ni yɔɔ mimasɛɛ gbɛ lɛ nɔ lɛ na akɛ miifo. Kɛkɛ ni ebadamɔ mimasɛi, ni ekɛ enine fɔ̃ mikɔŋ nɔ, ni efata mihe ni wɔlá lala lɛ kɛgbe naa. Eha mibaná suɔmɔ waa miha nyɛmimɛi hii kɛ yei lɛ fɛɛ ni eŋɔɔ minaa waa akɛ wɔnyɛ wɔtee kpee lɛ, ejaakɛ miyoo akɛ jɛmɛ ji he ni wɔyelikɛbuamɔ yɔɔ, yɛ Maŋtsɛyeli Asa lɛ nɔ.” Esa akɛ wɔkɛ wɔnyɛmimɛi lɛ abɔ naanyo kɛtsɔ miishɛjemɔ ni wɔkɛaaha amɛ kɛ́ ehe miihia lɛ nɔ, kɛ hewalɛwoo hu yɛ bei fɛɛ mli.—Heb. 10:24, 25.
5 Yɛ be mli ni jeŋ momo nɛɛ feɔ nɔ ni nyɛɔ mɔ nɔ babaoo lɛ, nyɛhaa efea wɔfaishitswaa akɛ wɔɔle wɔnyɛmimɛi lɛ jogbaŋŋ. Nɛkɛ hewalɛwoo kpakpa tsakemɔ nɛɛ baafee jɔɔmɔ kɛha mɛi fɛɛ.—Rom. 1:11, 12.