Esa akɛ Mɛi Fɛɛ ‘Akpɛlɛ Wiemɔ lɛ Nɔ kɛ Tsuijurɔ’!
1 Yehowa Odasefoi kɛ gbɔmɛi akpekpei abɔ miikase Biblia lɛ. Bɔni afee ni amɛhe asa kɛha naanɔ wala lɛ, esa akɛ ‘amɛkpɛlɛ wiemɔ lɛ nɔ kɛ tsuijurɔ,’ taakɛ mɛi 3,000 ní tsake amɛtsui lɛ fee ní abaptisi amɛ yɛ Pentekoste gbi lɛ nɔ yɛ afi 33 Ŋ.B. lɛ. (Bɔf. 2:41) Mɛɛ sɔ̃ enɛ kɛfɔ̃ɔ wɔnɔ ŋmɛnɛ?
2 Ehe miihia ni wɔye wɔbua wɔ Biblia mli nikaselɔi lɛ koni amɛtuu amɛhe amɛha Yehowa. (1 Tim. 4:7-10) Enɛ hewɔ lɛ, nɔ ni aŋma ahɔ July 1996 Wɔ Maŋtsɛyeli Sɔɔmɔ lɛ mli, yɛ kuku 20 lɛ mli lɛ woɔ ŋaa akɛ: “Taomɔ hegbɛi ni oootsɔ nɔ otswa hiɛsɔɔ ni aaaná aha Yehowa sui lɛ oma shi, yɛ nikasemɔ lɛ fɛɛ mli. Tsɔɔmɔ bɔ ni bo diɛŋtsɛ oyɔɔ henumɔi ni mli kwɔ ohaa Nyɔŋmɔ. Ye obua nikaselɔ lɛ ni esusu bɔ ni eeefee ená ekɛ Yehowa teŋ wekukpaa ni yɔɔ miishɛɛ lɛ he.”
3 Kaa ni Wɔkɛkpeɔ: Mɛi pii ni apasa jamɔ ená amɛnɔ hewalɛ lɛ atsui nyɔɔ amɛmli yɛ jamɔ ko ni heɔ be fioo kɛ nyɛmɔ fioo pɛ, ni ebiii tsakemɔ wulu ko yɛ amɛshihilɛ gbɛ mli lɛ he. (2 Tim. 3:5) Kaa ni wɔkɛkpeɔ lɛ ji koni wɔye wɔbua wɔ Biblia mli nikaselɔi lɛ koni amɛna akɛ anɔkwa jamɔ biɔ babaoo fe Nyɔŋmɔ wiemɔ lɛ ni amɛaafee enulɔi kɛkɛ. Esa akɛ amɛkɛ nɔ ni amɛkaseɔ lɛ atsu nii yɛ amɛshihilɛ mli. (Yak. 1:22-25) Kɛ Nyɔŋmɔ ekpɛlɛɛɛ nɔ ko ni kɔɔ amɛjeŋba he lɛ nɔ lɛ, no lɛ, esa akɛ amɛyɔse sɔ̃ ni kã amɛnɔ akɛ ‘amɛaatsake’ ni amɛfee nɔ ni ja koni amɛkɛsa ehiɛ. (Bɔf. 3:19) Bɔni afee ni amɛná naanɔ wala lɛ, esa akɛ ‘amɛpele amɛhe’ ni amɛkɔ shidaamɔ ni yɔɔ shiŋŋ kɛha anɔkwale lɛ.—Luka 13:24, 25.
4 Beni nyɛsusuɔ jeŋbai srɔtoi ni yɔɔ lɛ he lɛ, bi o-Biblia kaselɔ lɛ bɔ ni esusuɔ saji nɛɛ ahe diɛŋtsɛ ehaa kɛ nɔ ni esa akɛ efee kɛ́ ena akɛ ehe miihia koni efee tsakemɔi yɛ eshihilɛ mli lɛ. Gbalamɔ ejwɛŋmɔ kɛba gbɛjianɔtoo ní etsɔɔ nɔ ekaseɔ anɔkwale lɛ nɔ, ni owo lɛ hewalɛ koni eya asafoŋ kpeei daa.—Heb. 10:25.
5 Nyɛhaa efea oti ni ma wɔhiɛ akɛ wɔɔha wɔ nitsɔɔmɔ lɛ ashɛ nikaselɔ lɛ tsui he. Wɔbaaná miishɛɛ beni wɔkanyaa mɛi heei lɛ ni amɛkpɛlɛ Nyɔŋmɔ Wiemɔ lɛ nɔ kɛ tsuijurɔ, ni abaptisiɔ amɛ lɛ!—1 Tes. 2:13.