Ha Onine Ashɛ O-Biblia Kaselɔ Iɛ Tsui Nɔ
1 Ani oosumɔ ni o-Biblia kaselɔ lɛ kɛ nɔ ni ekaseɔ lɛ atsu nii? Esa akɛ efee nakai kɛji eeena nilee ni enaa lɛ he sɛɛ. Bɔni afee ni owo o-Biblia kaselɔ lɛ hewalɛ ni ekɛtsu nii lɛ, esa akɛ onine ashɛ etsui nɔ. Yɛ Pentekoste gbi afi 33 ŊB. lɛ, bɔfo Paulo maŋshiɛmɔ ni kanyaa mɔ waa lɛ
2 Saamɔ Ohe Jogbaŋŋ: Kaabɔ mɔdɛŋ akɛ okɛ lɛ aaasusu nibii babaoo he yɛ be mli ni be fioo pɛ yɔɔ ni okɛ nikaselɔ lɛ aaasusu sane lɛ he. Tsɔ hiɛ ohala otii ni obaama nɔ mi lɛ, ni ona nɔmimaa akɛ onuɔ ŋmalɛi lɛ ashishi ni akɛ obaanyɛ okɛtsu nii jogbaŋŋ. Tsɔ hiɛ osusu sanebimɔi ni baanyɛ ate shi yɛ nikaselɔ lɛ jwɛŋmɔ mli lɛ he yɛ eniiashikpamɔ ni eyɔɔ lɛ hewɔ. Kɛ ole onikaselɔ lɛ jogbaŋŋ lɛ, no lɛ nilee ni tamɔ enɛ baaye abua bo ni okɛ shɛɛ sane ni baakɔ ehe pɔtɛɛ lɛ asaa ohe.
3 Kasemɔ Yesu Nitsɔɔmɔ Gbɛ Lɛ: Yesu kɛ nɔkwɛmɔ nii tsu nii koni ekɛha saji otii ni amɛ shishinumɔ wa lɛ afee mlɛo ni eye ebua enikaselɔi lɛ ni amɛna jwɛŋmɔ kɛ henumɔ ni hɔ shihilɛ lɛ sɛɛ lɛ. (Luka 10:29-37) Nakai nɔŋŋ hu obaanyɛ okɛ nitsɔɔmɔi kpakpai awo o-Biblia kaselɔ lɛ tsui mli kɛtsɔ onɔkwɛmɔ nii lɛ ni oooha amɛfee nɔ ni yɔɔ mlɛo lɛ nɔ, yɛ be mli ni ohalaa kɛjɛɔ shihilɛ mli nibii ni ale momo lɛ amli, ni okɛtsu nii ni ekɔ nikaselɔ lɛ shihilɛi pɔtɛɛ he.
4 Sanebimɔi yeɔ buaa titri lɛ yɛ Biblia kaselɔi lɛ atsuii ni nine shɛɔ nɔ lɛ mli, taakɛ Yesu fee he nɔkwɛmɔ nɔ shii abɔ lɛ. (Luka 10:36) Shi otsui akanyɔ omli yɛ be mli ni nikaselɔ lɛ kaneɔ hetoo lɛ kɛjɛɔ wolo lɛ mli kɛkɛ lɛ. Okɛ sanebimɔi ni baakudɔ lɛ atsu nii ni okɛgbala ejwɛŋmɔ kɛba sane naamuu ni esusuko he nakai da lɛ nɔ. Gbɛ ni tamɔ nɛkɛ hu baanyɛ aye abua nikaselɔ lɛ ni ekɛ ejwɛŋmɔŋ nyɛmɔ atsu nii. Bi lɛ saji ni baaha etsɔɔ ejwɛŋmɔ ni okɛna nɔ ni lɛ diɛŋtsɛ eheɔ eyeɔ yɛ sane lɛ he. Kɛkɛ lɛ, obaayoo hei ni yelikɛbuamɔ he baahia yɛ, ni obaanyɛ okɛ yelikɛbuamɔi titrii komɛi atsu nii kɛnyiɛ sɛɛ.
5 Akɛ Biblia kaselɔ ko eyaaa ehiɛ lɛ, ehe baahia ni otao nɔ hewɔ ni ebaa lɛ nakai. Enɛ baabi ni osara lɛ yɛ be kroko mli fe be ni okɛ lɛ yakaseɔ nii daa lɛ. Mɛni hewɔ ni eshashaoɔ shi akɛ ekɛ aatsu nii lɛ? Ani ŋmalɛ mli oti ko yɛ ni enuuu shishi? Ahi eeshashao shi akɛ eeefee tsakemɔi komɛi yɛ eshihilɛ mli? Kɛ Biblia kaselɔ ko ‘miididãa yɛ saji sɔrɔtoi enyɔ ateŋ’ lɛ, ye obua lɛ ni ena osharai ni yɔɔ nakai feemɔ mli lɛ.—1 Man 18:21.
6 Bɔfo Paulo yoo akɛ ni akɛ Biblia mli anɔkwalei aaatsɔɔ mɛi ni yɔɔ he miishɛɛ lɛ anii lɛ ji yiwalaheremɔ nitsumɔ, no hewɔ lɛ ewo Kristofoi fɛɛ ŋaa koni ‘amɛhiɛ ahi amɛ tsɔɔmɔ lɛ nɔ.’ (1 Tim. 4:16) Esa akɛ mɛi ni okɛfeɔ Biblia mli nikasemɔi lɛ ana nilee babaoo fe Biblia lɛ kɛ nibii ni yaa nɔ yɛ je lɛŋ lɛ ahe anɔkwa saji ni amɛaale kɛkɛ. Esa akɛ amɛna Yehowa kɛ Yesu he anɔkwale nilee ni aye abua amɛ ni amɛna amɛkɛ amɛteŋ wekukpaa ni miishɛɛ yɔɔ mli. Nakai ni abaafee lɛ pɛ baakanya mɛi ni yɔɔ he miishɛɛ lɛ ni amɛkɛ nitsumɔi ajie amɛ hemɔkɛyeli kpo. (Yak. 2:17, 21, 22) Kɛ nine shɛ nikaselɔ lɛ tsui nɔ lɛ, ebaakanya lɛ ni enyiɛ gbɛ ni kɛ woo baaha Yehowa, ni buɔ lɛ diɛŋtsɛ ewala he lɛ sɛɛ.—Abɛi 2:20-22.