1999 “Nyɔŋmɔ Gbalɛ Wiemɔ” Yehowa Odasefoi a-Kpokpaa Wulu nɔ Kpee
1 Beni Israelbii lɛ yɔɔ ŋa lɛ nɔ lɛ, Yehowa kɛɛ Mose koni efee jwiɛtɛi tɛtɛrɛmantɛrɛi enyɔ. Kɛ akpã tɛtɛrɛmantɛrɛ kome pɛ lɛ, esa akɛ akutsei lɛ anɔ lumɛi lɛ ababua amɛhe naa yɛ kpeebuu lɛ shinaa lɛ naa. Tɛtɛrɛmantɛrɛi enyɔ lɛ fɛɛ agbɛɛmɔ baafee okadi aha Israel asafo muu lɛ fɛɛ koni amɛbabua amɛhe naa. (4 Mose 10:1-4) Ŋmɛnɛ, ani wɔmli efiliii wɔ, kɛ́ wɔnu adafitswai ni tamɔ tɛtɛrɛmantɛrɛ gbɛɛmɔi ni buaa wɔnaa kɛyaa wɔ daa afi kpokpaa wulu nɔ kpeei ashishi lɛ? Wɔnine shɛɔ Yehowa tsɔsemɔi kɛ gbɛtsɔɔmɔ nɔ kɛtsɔɔ e-Wiemɔ kɛ enajiaŋdamɔlɔi ni ehala amɛ lɛ anɔ yɛ wɔkpeei ashishi. Enɛ yeɔ ebuaa wɔ koni wɔya nɔ wɔdamɔ shi shiŋŋ yɛ sɔɔmɔ ni wɔkɛhaa Nyɔŋmɔ lɛ mli. Ani wɔmli efiliii wɔ kɛ́ wɔna gbɔmɛi akpekpei abɔ—ekolɛ akpei nyɔŋmai abɔ—ni ji nanemɛi jálɔi anɔkwafoi ni kɛ ekomefeemɔ ebua amɛhe naa yɛ suɔmɔ kɛ toiŋjɔlɛ mli? Eka shi faŋŋ akɛ wɔmli filiɔ wɔ!—Lala 122:1, 7, 8.
2 Yɛ December 1998 kɛ January 1999 lɛ, afee “Nyɔŋmɔ Shihilɛ Gbɛ” Kpokpaa Wulu nɔ Kpeei ni fɛɛ feɔ 31 lɛ yɛ hei 17 yɛ Ghana fɛɛ. Nyɛmimɛi hii kɛ yei 62 ni jɛ Ghana lɛ fata gbɔi ni jɛ maji wuji ni yɔɔ shikpɔŋ lɛ nɔ he fɛɛ he lɛ amli lɛ ahe kɛba majimaji ateŋ kpokpaa wulu nɔ kpee ni afee yɛ Pontiac, Michigan, U.S.A. yɛ June 1998 lɛ. Gbɔi krokomɛi 60 ni ji kuu tee majimaji ateŋ kpee wulu ni afee yɛ Abidjan, Côte d’Ivoire yɛ nyɛsɛɛ December mli lɛ. Wiemɔi srɔtoi babaoo ni awie lɛ tsɔɔ akɛ gbɛtsiinii ko kwraa bɛ sanegbaa ni suɔmɔ kɛ miishɛɛ yɔɔ mli lɛ ni tee nɔ yɛ kpeei lɛ ashishi lɛ mli. Nyɛmimɛi ni kɛ amɛshiai ha koni akɛná wɔɔhe aha gbɔi lɛ ná naanyobɔɔ ni miishɛɛ yɔɔ mli babaoo. Maŋsɛɛ sanekpakpa shiɛlɔi kɛ gbɛgbalɔi krɛdɛɛi ni sɔmɔɔ yɛ maji wuji krokomɛi amli lɛ ku amɛsɛɛ kɛba Ghana koni amɛya kpeei lɛ. Jɛmɛ ni amɛyɔɔ lɛ fee mumɔŋ hewalɛwoo kɛha mɛi lɛ fɛɛ. Be mli ni wɔkɛ ekomefeemɔ buaa wɔhe naa wɔhaa wɔ afi 1999 kpokpaa wulu nɔ kpee lɛ, wɔbaaná hegbɛ wɔfata he koni wɔnine ashɛ wɔnyɛmimɛi anaanyobɔɔ ni jara wa lɛ nɔ koni wɔda Yehowa shi yɛ ekomefeemɔ ni ekɛha wɔ lɛ hewɔ.
3 Ŋaawoi Kɛha Tsũ Taomɔ: Akɛ “Room Request” woji lɛ eko miimaje asafo fɛɛ asafo. Ofainɛ ni oŋma “Room Request” wolo lɛ eko nɔ nii, kɛ́ ootao wɔɔhe kɛtsɔ kpee shishi gbɛjianɔtoo lɛ nɔ, koni okɛha asafoŋ woloŋmalɔ lɛ ni ema nɔ mi, koni no sɛɛ lɛ okɛmaje kpee ni obaaya lɛ. ESAAA ni akɛ “Room Request” woji kɛ kpee he woji krokomɛi ni aŋmalaa lɛ majeɔ nitsumɔhe nine ni yɔɔ Accra lɛ.
4 Abaaná wɔɔhei lɛ ekomɛi yɛ mɛi ashiai amli. Akɛ tsũi nɛɛ miiha kɛha kpee be lɛ PƐ. Mɛi ni nine shɛɔ wɔɔhei ni tamɔ nɛkɛ nɔ lɛ akwɛ koni amɛ kɛ amɛbii lɛ ajie bulɛ kpo amɛtsɔɔ amɛ gbɔfeelɔ lɛ shia lɛ, ní amɛkagbɛ́lɛ gbɔfeelɔ lɛ nibii amli aloo ni amɛkafite enɛɛmɛi loo ni amɛaabote shia lɛ mli hei komɛi ni esaaa akɛ mɛi krokomɛi boteɔ jɛmɛ lɛ. Kɛ shiatsɛmɛi ná naagbai yɛ enɛ gbɛfaŋ lɛ, esa akɛ aha tsũ taomɔ he nɔkwɛlɔ ni yɔɔ kpee lɛ shishi lɛ ale enɛɛmɛi oya nɔŋŋ, ni ebaaná he miishɛɛ akɛ eeeye ebua.
5 Yɛ kpeei ni afee kɛtsɔ hiɛ lɛ ashishi lɛ, gbɔi lɛ ateŋ mɛi saŋŋ kɛ “Room Request” woji haaa dani amɛyashɛ he ni afeɔ kpee lɛ yɛ lɛ. Enɛ kɛ naagbai baha kpee shishi gbɛjianɔtoo lɛ, ejaakɛ ehe bahia ni amɛkɛ be ni faaa atao wɔɔhe aha kpeeiyalɔi ni tamɔ nɛkɛ lɛ. Gbɛjianɔ ni atoɔ yɛ naagbee mli kwraa nɛɛ baanyɛ afite shika babaoo. Shi, eji mɔbɔ sane akɛ wɔɔwie akɛ, kɛ́ abi kpeeiyalɔi lɛ ateŋ mɛi komɛi koni amɛkɛ shika aye abua koni akɛwo wɔɔhe lɛ he nyɔmɔ lɛ, amɛfeee nakai. Enɛ kɛ naagbai baa. No hewɔ lɛ, esa akɛ kpeeiyalɔi fɛɛ ni wɔɔhe he baahia amɛ kɛtsɔ kpee shishi gbɛjianɔtoo lɛ nɔ lɛ aŋmala “Room Request” woji lɛ anɔ nii koni amɛkɛ enɛɛmɛi amaje kpee shishi gbɛjianɔtoo lɛ kɛtsɔ hiɛ kwraa. Nyɛsɛɛ afi lɛ, nɔtsamɔ skultsui srɔtoi komɛi ni akɛfee wɔɔhe aha kpeeiyalɔi lɛ bi koni awo nyɔmɔ ni fa aha kpeeiyalɔ fɛɛ kpeeiyalɔ kɛha gbɛkɛ fɛɛ gbɛkɛ ni akɛaawɔ jɛmɛ. No hewɔ lɛ, ehe miihia ni wɔsaa wɔhe koni wɔkɛ shika aye abua kɛha wɔɔhe lɛ, kɛ́ eji skultsu ni akɛbaafee wɔɔhe loo wɔɔhe yɛ mɔ ko shia mli.
6 Gbeekpamɔ Tsɔɔ Toiboo ni Afeɔ Ahaa Asafo lɛ Gbɛtsɔɔmɔi: Esa akɛ sane titri nɛɛ afee saji ni wɔsusuɔ he waa diɛŋtsɛ lɛ ateŋ ekome. Hebribii 13:17 kɛɔ akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.” Abiɔ koni wɔfee toiboo yɛ sane nɛɛ mli gbii enyɔ loo gbii etɛ pɛ daa afi. Kɛ esoro nɔ ni wɔ diɛŋtsɛ wɔhalaa po lɛ, nɔkwɛmɔnɔ kpakpa ni wɔfeɔ, taakɛ wɔnyɛmimɛi lɛ kɛ je lɛ naa lɛ, haa suɔmɔ, ekomefeemɔ kɛ sɛɛfimɔ mumɔ shwereɔ.—Kwɛmɔ 1 Korintobii 16:16; Filipibii 2:1-4.
7 Mɛi ni Yɔɔ Hiamɔ Nii Krɛdɛɛ lɛ Ahesusumɔ: Ofainɛ ni ohiɛ ahi hiamɔ nii krɛdɛɛ ni mɛi ni egbɔlɔ, mɛi ni bɛ gbɔmɔtsoŋ hewalɛ, mɛi ni yɔɔ be-fɛɛ sɔɔmɔ lɛ mli, loo mɛi krokomɛi ni yɔɔ asafo ni oyɔɔ mli lɛ yɔɔ ni ekolɛ ehe baahia ni aye abua amɛ yɛ kpee ni abaaya lɛ hewɔ lɛ nɔ. Wekumɛi, onukpai, kɛ mɛi krokomɛi ni yɔɔ asafo lɛ mli ni le mɛi ni yɔɔ hiamɔ nii krɛdɛɛ lɛ ashihilɛi ni yɔɔ srɔto lɛ baanyɛ amɛkɛ suɔmɔ aye abua amɛ koni amɛto gbɛjianɔ ni he hiaa.—Okɛto 1 Timoteo 5:4 he.
8 Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔnɔ kpakpa, kɛ mɛi ni yɔɔ bii ni baa amɛjeŋ jogbaŋŋ ni Asafoŋ Sɔɔmɔ Ajinafoi lɛ kpɛlɛɔ amɛnɔ lɛ pɛ. Dani oooŋmala “Room Request” wolo lɛ nɔ nii lɛ, kanemɔ sane ni yɔɔ wolo lɛ shishigbɛ lɛ jogbaŋŋ. Esa akɛ akɛ nibimɔi nɛɛ amaje Rooming Department lɛ oya nɔŋŋ. Nyɛfainɛ, nyɛkɛ kpee shishi adrɛs ni atsɔɔ yɛ nɔ ni aŋma ahɔ mli nɛɛ baafa 6 lɛ atsua nii.
9 Shi kɛlɛ, Rooming Department lɛ baabɔ mɔdɛŋ ni amɛná wɔɔhei ni sa kɛha shiɛlɔi ni yɔɔ hiamɔ nii krɛdɛɛ lɛ kɛ́ asafo lɛ mli bii nyɛŋ aye abua. Shiɛlɔi nɛɛ baanyɛ amɛkɛ asafoŋ woloŋmalɔ lɛ agba amɛ shihilɛ lɛ he sane, ni esa akɛ ekɛ Asafoŋ Sɔɔmɔ Ajinafoi lɛ mli bii krokomɛi lɛ awie he, koni amɛkwɛ kɛji asafo lɛ baanyɛ aye abua aŋkroaŋkroi nɛɛ koni amɛná amɛ diɛŋtsɛ amɛ wɔɔhei lo. Kɛ asafo lɛ nyɛŋ ekɛ yelikɛbuamɔ ni he hiaa aha lɛ, mɔ ni taoɔ tsũ lɛ baaŋma “Room Request” wolo lɛ nɔ nii koni ekɛha woloŋmalɔ lɛ ekoŋŋ, ni lɛ hu ebaakwɛ kɛji nɔ fɛɛ nɔ ja yɛ nɔ lo, kɛ shihilɛi amli ni mɔ lɛ yɔɔ ni haa efeɔ mɔ ni sa akɛ asusu ehe yɛ nɛkɛ gbɛ nɔ lɛ. Esa akɛ woloŋmalɔ lɛ aŋma wolo ni EKƐTSƆƆ shihilɛi ni mɔ lɛ yɔɔ mli lɛ MLI FITSOFITSO. Esa akɛ afee enɛ fɛɛ kɛtsɔ hiɛ kwraa dani kpee be lɛ ashɛ. Beni sɔɔmɔ ajinafoi lɛ ema nɔ mi sɛɛ lɛ, kɛkɛ lɛ woloŋmalɔ lɛ kɛ wolo lɛ baamaje Rooming Department lɛ. Abaana mɔ ni biɔ tsũ lɛ tɛ̃ɛ koni aha ni ele wɔɔhe lɛ he gbɛjianɔtoo.
10 Esa akɛ mɛi ni yɔɔ hiamɔ nii krɛdɛɛ lɛ kɛ Asafoŋ Sɔɔmɔ Ajinafoi lɛ ateŋ mɔ kome loo onukpa kroko aya koni eyabi amɛ tsũ lɛ kɛhamɔ he sane yɛ Rooming Department kɛ́ amɛshɛ he ni afeɔ kpee lɛ yɛ amrɔ nɔŋŋ.
11 Hiɛsɔɔ Kpojiemɔ: Odasefoi aweku ko ŋma kɛyaha gbɔiatoohe ni amɛyahi mli lɛ nɔkwɛlɔ lɛ akɛ: “Nyɛ gbɔiatoohe lɛ ji gbɔiatoohe ni hi fe fɛɛ eko ni wɔweku lɛ ehi mli pɛŋ. Áha tsũi lɛ amli etse keŋkeŋ ni akɛ nɔ fɛɛ nɔ ni ekolɛ ehe baanyɛ ahia wɔ lɛ ewo mli fɛɛ obɔ. Wɔná otsi naagbee ni tamɔ nɛkɛ ni ŋɔɔ lɛ mli miishɛɛ yɛ ekome ni mɔ fɛɛ mɔ ni yɔɔ nyɛ gbɔiatoohe lɛ kɛ wɔ fee hewɔ. Wɔmiisumɔ ni wɔda nyɛ shi yɛ nyɛhe ni nyɛkɛwo gbɛjianɔ ni Watchtower Convention lɛ to lɛ mli lɛ hewɔ yɛ jara ni baa shi ni nyɛha wɔwo he nyɔmɔ lɛ hewɔ.” Ani bo hu oyɛ hiɛsɔɔ kɛha gbɛjianɔ babaoo ni atoɔ ahaa bo lɛ hewɔ? Asafo lɛ yɛ he miishɛɛ akɛ ekɛ wɔɔhei ni sa, ni jara waaa aaaha yɛ kpee be lɛ mli, ní no aha wɔ fɛɛ wɔkɛ wɔjwɛŋmɔ ama mumɔŋ sɛɛnamɔi ni jɛɔ kpee lɛ kɛ nifeemɔ lɛ mli kɛbaa lɛ nɔ.
12 Kpee Kroko ni Aaaya: He ni bɛŋkɛ fe fɛɛ ji he ni akɛha asafo fɛɛ asafo akɛ eya kpee lɛ yɛ. Kɛ abaafee kpeei enyɔ yɛ wiemɔ kome too lɛ nɔŋŋ mli yɛ maŋtiase ko mli lɛ, nyɛmimɛi komɛi baasumɔ ni amɛya kpeei enyɔ lɛ fɛɛ. Yɛ be mli ni ŋwanejee ko bɛ he akɛ enɛ baaha aná hegbɛ kɛha hewalɛwoo babaoo lɛ, fɛɛ sɛɛ lɛ, ekɛ naagbai baa yɛ nibii ni akɛtsuɔ nii ni akɛfeɔ kpee lɛ gbɛfaŋ, ni no haaa yiŋtoo hewɔ ni asumɔɔ ni mɛi ayifalɛ lɛ afee nɔ ni sa lɛ aye omanye. Enɛ hewɔ lɛ, wɔmiibi ni nyɛmimɛi ni yɔɔ maŋtiasei amli lɛ aya kpee ni ato aha amɛ yɛ nakai maŋtiase lɛ mli lɛ pɛ. Kɛ amɛmiisumɔ ni amɛya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba kɛha wɔ. Yɛ nyɛmimɛi ni akɛ kpee shishi nitsumɔi komɛi ni he hiaa woɔ amɛdɛŋ ni amɛtsuɔ he nii ni no hewɔ lɛ amɛnáaa hegbɛ ni amɛbo wiemɔi lɛ fãi komɛi atoi lɛ agbɛfaŋ lɛ, aŋmɛɔ amɛ gbɛ ni amɛya kpee ni ji enyɔ ni abaafee yɛ nakai maŋtiase lɛ nɔŋŋ mli. Kɛfata he lɛ, kɛ́ yɛ wiemɔ he naagba hewɔ loo kɛ́ gbi ni abaafee amɛ kpee lɛ nɔŋŋ ji gbi ni abaafee Bolgatanga kpee lɛ hewɔ ni nyɛmimɛi komɛi baasumɔ ni amɛya kpee yɛ maŋtiase lɛ mli fe nɔ ni atsɔɔ akɛ amɛ asafo lɛ aya lɛ, aŋmɛɔ nakai feemɔ gbɛ.
13 Yɛ asafoi ni yɔɔ shɔŋŋ lɛ agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ, fe he ni ato ni amɛya lɛ. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ ni amɛhalaa he ni amɛbaaya. Shi kɛlɛ, esa akɛ asafoi ni baakpɛ amɛyiŋ akɛ amɛbaaya kpee kroko ni jeee nɔ ni ato ni amɛya lɛ atswa kpokpaa nɔkwɛlɔ lɛ adafi kɛtsɔ hiɛ kwraa koni ekato amɛsaramɔ be he gbɛjianɔ kɛmiiha nakai otsi ni amɛbaaya kpee lɛ. Kɛ asafo lɛ baaya kpee ni ato akɛ amɛya loo amɛyaŋ jio, esa akɛ nyɛmimɛi hii ni kwɛɔ tsɔne taomɔ gbɛjianɔtoi anɔ lɛ akwɛ koni tsɔne fɛɛ tsɔne ni amɛaato he gbɛjianɔ lɛ afee tsɔne ni naagba bɛ he ni ekɛ nitsumɔ yɔɔ shweshweeshwe.
14 Bolgatanga Kpee: Abaafee “Nyɔŋmɔ Gbalɛ Wiemɔ” Kpokpaa Wulu nɔ Kpeei lɛ ateŋ ekome yɛ Bolgatanga kɛjɛ January 7 kɛyashi 9, 2000 yɛ Twi kɛ Frafra wiemɔ mli. Aawo nyɛmimɛi fɛɛ ni jɛ wuoyigbɛ ni baanyɛ aya lɛ hewalɛ ni amɛya kpee nɛɛ. Ekolɛ Asafo lɛ baato tsɔne he gbɛjianɔ krɛdɛɛ afi nɛɛ kɛha gbɛfãa lɛ. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛ̃ɛ, ni amɛye trukaa odase hu beni amɛyɔɔ Bolgatanga lɛ. Wɔmiiwo mɛi fɛɛ ni yɔɔ he miishɛɛ akɛ amɛaaya lɛ hewalɛ koni amɛbɔi amɛhe saamɔ kɛha kpee lɛ.
15 Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ be ni eho lɛ mli lɛ jogbaŋŋ. Taakɛ afɔɔ feemɔ lɛ, abaama agba, abaatao wɔɔhei, kɛ nitsumɔi krokomɛi ni abaatsu. Wɔyɛ nɔmimaa akɛ mɛi fɛɛ ni yɔɔ maŋtiase ni abaafee kpee lɛ yɛ kɛ asafoi ni bɛŋkɛ jɛmɛ fɛɛ lɛ baato amɛ nitsumɔi ahe gbɛjianɔ koni amɛfata he kɛtsu nitsumɔ ni he hiaa nɛɛ kɛmɔ shi yɛ otsii lɛ anaagbee kɛ otsi lɛ mli gbii lɛ amli. Kɛ mɛi ni fa saŋŋ baato gbɛjianɔ koni amɛba jɛmɛ gbi kome loo gbii enyɔ ni tsɔɔ kpee lɛ shishijee hiɛ koni ato nɔ fɛɛ nɔ he gbɛjianɔ lɛ, enɛ baaye ebua waa. Akɛni shika ni akɛyeɔ abuaa ji nɔ ni akɛtoɔ kpeei ahe gbɛjianɔ ni akɛfeɔ kpee lɛ hewɔ lɛ, kɛ wɔtee koni wɔyatsu nitsumɔ ni tsɔɔ kpee hiɛ lɛ, esaaa akɛ wɔkpaa gbɛ akɛ kpee shishi gbɛjianɔtoo lɛ baaha aha wɔ niyenii yaka. Mɛi pii ni kɛ amɛhe baawo voluntia nitsumɔ lɛ mli lɛ ahe baahia hu yɛ kpee lɛ shishi, no hewɔ lɛ okɛ oweku lɛ ato gbɛjianɔ koni nyɛfata he kɛtsu enɛ yɛ kpee ni nyɛbaaya lɛ shishi.
16 Niyenii He Nitsumɔ: Kaimɔ ni okɛ nɔ ko ni obaaye beni akpa fioo shwane lɛ ajɛ shia kɛba. No hewɔ lɛ, mɔ fɛɛ mɔ baanyɛ ekɛ ejwɛŋmɔ ama mumɔŋ nifeemɔ lɛ nɔ waa. Nyɛhaa wɔkwɛa jogbaŋŋ yɛ he fɛɛ he ni wɔɔtara ni wɔye nii beni akpa fioo lɛ, koni wɔkɛ nɔ ko akakpa sɛii lɛ anɔ loo ni wɔɔshi jwɛi wɔshwie jɛmɛ.
17 Kpee Shishi Tsitsinaa-tsɛɛ Nii kɛ Nɔ ni Akɛhɔɔ Mli: Aawo asafo fɛɛ asafo ŋaa koni amɛkɛ “Literature Order Form” (S-14) lɛ atsu nii ni amɛkɛshɛ tsitsinaa-tsɛɛ woji kɛ plastik ni akɛhɔɔ mli lɛ kɛha “Nyɔŋmɔ Gbalɛ Wiemɔ” Kpokpaa Wulu nɔ Kpeei lɛ. Nyɛfainɛ, nyɛkwɛa ni nyɛŋmaa wolo lɛ nɔ nii, ni enɔ fɛɛ nɔ aja jogbaŋŋ, koni nyɛkɛ klɛŋklɛŋ nɔ lɛ amajea Asafo lɛ AMRƆ NƆŊŊ ni anyɛ atsu nyɛ kpee lɛ hiamɔ nii ni kɔɔ enɛ he lɛ ahe nii yɛ be ni sa mli. Nyɛhaa ahia nyɛjwɛŋmɔ mli akɛ nyɛnaŋ tsitsinaa-tsɛɛ woji kɛ nɔ ni akɛhɔɔ mli lɛ eko yɛ kpeei lɛ ashishi.
18 Lalai: Ato lalai ni nyiɛ sɛɛ nɛɛ ahe gbɛjianɔ koni ala yɛ wiemɔ he gbɛjianɔtoo lɛ mli yɛ bɔ ni ato naa aha lɛ naa: 91, 180, 191, 111, 174, 53, 113, 59, 13, 177, 3, 129, 155, 19, 72, 187, 181, kɛ 15. Yɛ ŋaawoo ni akɛha yɛ Efesobii 5:19 lɛ hewɔ lɛ, aawo wɔ fɛɛ hewalɛ ni wɔfata he kɛla yɛ be mli ni atswaa saŋku-lalai lɛ yɛ kpeei lɛ ashishi lɛ.
19 Wiemɔi ni Amɔmɔɔ loo Vidio Mfoniri-Shamɔi: Esa akɛ aŋkroaŋkroi fɛɛ ni baamɔmɔ wiemɔi lɛ yɛ kpãai anɔ kɛha amɛhe lɛ afee nakai yɛ gbɛ ni egbaŋ mɛi krokomɛi ni eba kpee lɛ shishi lɛ anaa loo koni ekagbala amɛjwɛŋmɔ kɛjɛ wiemɔ lɛ nɔ. Titri lɛ, esaaa akɛ amɛtaa sarawa hewalɛ kpãa kɛ wiemɔ kpãai lɛ ahe. Wɔhiɛ baasɔ ekome ni nyɛkɛ wɔ baafee yɛ enɛ mli lɛ waa diɛŋtsɛ.
20 Naagbee: Eji hewalɛwoo akɛ aaanu yijiemɔ ni akɛhaa Yehowa gbɛi lɛ, yɛ wɔnyɛmimɛi hii kɛ yei lɛ ajeŋba fɛfɛo yɛ kpeei lɛ ashishi lɛ hewɔ. Gbɔiatoohe nitsulɔ ko kɛɛ: “Nyɛ gbɔi lɛ ji gbɔmɛi ni yɔɔ biɛ lɛ ateŋ mɛi ni hi fe fɛɛ.” Mɔ kroko hu wie akɛ: “Wɔyɛ miishɛɛ waa akɛ wɔɔná wɔɔhei wɔha nyɛ gbɔmɛi lɛ. Amɛ fɛɛ amɛbuɔ mɔ, ni amɛkɛ nɔ ni abiɔ amɛ lɛ hetoo ni ja lɛ haa amrɔ nɔŋŋ. Ni amɛji kuu ko ni amɛkɛ sharamɔ waaa kwraa.” Niyelihe ko nɔkwɛlɔ kɛɛ: “Wɔnáa he miishɛɛ waa akɛ wɔɔná kuu ko yɛ maŋ lɛ mli ni wɔsumɔɔ amɛ sane waa.” Niyelihe lɛ tseɔ nibii ajara lɛ nɔ oha mlijaa 10 ehaa mɔ fɛɛ mɔ ni tsɛ tsitsinaa-tsɛɛ nii lɛ! Ni gbɔiatoohe nɔkwɛlɔ ko kɛɛ: “Ebafee miishɛɛ akɛ nyɛ gbɔmɛi lɛ yɛ wɔ gbɔiatoohe lɛ.” Nɛkɛ wiemɔi nɛɛ ji odaseyeli kpakpa ni jɛ gbɔmɛi ni yɔɔ sɛɛ lɛ aŋɔɔ. Gbɛi kpakpa ni wɔfee lɛ woɔ Yehowa hiɛ nyam ni ehaa esumɔɔ wɔsane waa.—1 Tes. 4:12; 1 Pet. 2:12.
21 Wɔmiiwo bo hewalɛ koni oto ogbɛjianɔ bianɛ koni oya afi 1999 “Nyɔŋmɔ Gbalɛ Wiemɔ” Kpokpaa Wulu nɔ Kpee lɛ gbii etɛ lɛ fɛɛ. Wɔkɛ bo miikwɛ be mli ni wɔɔbo mɛi ni jáa Nyɔŋmɔ akɛ gbɔmɛi akuu kome lɛ amumɔŋ “nyamɔ lalai kɛ shidaa” lɛ toi. (Lala 42:5) Eba akɛ Yehowa aaajɔɔ gbɛjianɔ fɛɛ ni atoɔ koni wɔmumɔŋ hiɛyaa lɛ afá aahu lɛ nɔ!
[Caption on page 3]
Nifeemɔ Bei
Sohaa kɛ Hɔɔ
Leebi 9:30 – Gbɛkɛ 5:00
Hɔgbaa
Leebi 9:30 – Gbɛkɛ 4:00