“Nyɛfea Nyɛnii Fɛɛ yɛ Suɔmɔ Mli”
1 “Nyɛ webii lɛ ji mɛi ni he yɔɔ miishɛɛ yɛ anɔkwale mli; amɛbaa amɛjeŋ jogbaŋŋ diɛŋtsɛ kɛ bulɛ.” Kpeehe kɛ gbɔiatoohe nɔkwɛlɔi akuu ko ni yɔɔ United States maŋtiase ko mli ni here wɔ akɛ gbɔi kɛfee wɔ kpokpaa wulu nɔ kpeei lɛ eko lɛ ji mɛi ni wie nakai wiemɔ lɛ. Yijiemɔ ni tamɔ nɛkɛ ni wɔnine shɛɔ nɔ, ní tsɔɔ bɔ ni wɔbaa wɔjeŋ yɛ mɛi ahiɛ lɛ haa wɔtsui nyɔɔ wɔmli. Enɛ tsɔɔ akɛ, ákɛ kuu lɛ ‘wɔmiifee wɔnii fɛɛ yɛ suɔmɔ mli.’ (1 Kor. 16:14) Yɛ nakai beaŋ nɔŋŋ lɛ, saji komɛi ni he hiaa yɛ ni kɛ awieee he lɛ, ebaagbala mɛi ajwɛŋmɔ kɛjɛ bulɛ kpakpa ni Nyɔŋmɔ webii yɔɔ lɛ he.
2 Tsũtaomɔ: Ato Rooming Department he gbɛjianɔ yɛ he fɛɛ he ni afeɔ kpee yɛ maŋtiase mli lɛ koni amɛkɛ mɛi aye naa koni aná wɔɔhe ni jara waaa koni mɔ fɛɛ mɔ anyɛ aya kpee lɛ. Wɔnyɛmimɛi lɛ kɛ be kɛ mɔdɛŋbɔɔ saŋŋ tsuɔ nii amɛhaa wɔ. Gbɔiatoohei komɛi anɔkwɛlɔi kpɛlɛɔ jara ni waaa nɔ akɛni wɔ Rooming Department lɛ ema nɔ mi eha amɛ akɛ wɔ gbɔi lɛ kɛ gbɔiatoohe lɛ baafee ekome hewɔ.
3 Ani ogbe gbɛjianɔ ni otoɔ koni oná wɔɔhe lɛ naa? Kɛ oyɛ gbɔiatoohe ko lɛ, ani oná nɔmimaa, ni okɛ oshika lɛ emaje kpee he gbɛjianɔtoo lɛ? Kɛbashi amrɔ nɛɛ, esa akɛ asafoŋ woloŋmalɔ lɛ kɛ Room Request fɛɛ ni Asafoŋ Sɔɔmɔ Ajinafoi Akuu lɛ ekpɛlɛ nɔ lɛ emaje kpee adrɛs ni sa lɛ. Kɛ aha bo wɔɔhe yɛ hiamɔ nii he gbɛjianɔtoo krɛdɛɛ lɛ naa ni osumɔɔɔ dɔŋŋ lɛ, ofainɛ kɛɛmɔ Rooming Department ni yɔɔ jɛmɛ lɛ amrɔ nɔŋŋ koni anyɛ akɛ wɔɔhe lɛ aha mɔ kroko. Abaanyɛ ana adrɛs lɛ yɛ nɔ ni aŋma ahɔ June 2000 Wɔ Maŋtsɛyeli Sɔɔmɔ lɛ mli lɛ baafa 6.
4 Kɛ kpee ko he saji he miihia bo lɛ, okɛ adrɛs ni yɔɔ nɔ ni aŋma ahɔ June 2000 Wɔ Maŋtsɛyeli Sɔɔmɔ lɛ mli lɛ atsu nii. Ofainɛ kaatswa loo kaaŋma Asafo lɛ loo kpee shishi gbɛjianɔtoo lɛ.
5 Mɛi Fɛɛ ni Aaafee Amɛ Ejurɔ: Suɔmɔ ni ayɔɔ kɛha Yehowa kɛ wɔnanemɛi gbɔmɛi ji nɔ ni kanyaa sui kpakpai kɛ jeŋba kpakpa. (Mat. 22:37-39; Yak. 3:13) Biblia lɛ woɔ wɔ hewalɛ koni wɔfee mɛi ni yɔɔ suɔmɔ, ni susuɔ mɔ fɛɛ mɔ he. (Gal. 6:10) Nakai shishitoo mlai lɛ tsuɔ nii jogbaŋŋ kɛ́ wɔhi wɔɔhei lɛ fɛɛ. Kɛ wɔsumɔɔɔ ni wɔkɛ mɛi feɔ ekome lɛ, efiteɔ bulɛ ni wɔyɔɔ lɛ, ni efiteɔ gbɛjianɔ ni atoɔ koni wɔwo jara ni waaa lɛ, ni egbaa nyɛmimɛi lɛ ahenumɔi anaa waa. Kɛ gbɔiatoohe loo skul ko tseee jara lɛ nɔ dɔŋŋ lɛ, ebaanyɛ egba mɛi krokomɛi ni yaa kpee lɛ yɛ nakai maŋtiase lɛ mli lɛ anaa waa diɛŋtsɛ, titri lɛ, kɛ́ amɛnyɛɛɛ amɛwo jara ni wa kɛha wɔɔhe lɛ.
6 Kɛ aná tsũ ni hi jogbaŋŋ diɛŋtsɛ aha mɔ ko kɛtsɔ hiɛ, ni yɛ naagbee mli kwraa ni esumɔɔɔ dɔŋŋ lɛ, no tsɔɔ akɛ atsĩ nyɛmi kroko ni ka akɛ eeeha atsɔ hiɛ atao wɔɔhe aha lɛ lɛ naa. Ekolɛ enɛ baabi koni efã gbɛ kɛya he ko shɔŋŋ ni ekpɛlɛ wɔɔhei ni esumɔɔɔ tsɔ̃ lɛ nɔ. Ani enɛ tsɔɔ suɔmɔ loo mɔ hesusumɔ? Kwɛ bɔ ni ehi jogbaŋŋ akɛ wɔɔtsɔɔ suɔmɔ, ni wɔfee mɛi krokomɛi ejurɔ kɛtsɔ amɛhe ni wɔɔsusu jogbaŋŋ lɛ nɔ moŋ fe wɔ diɛŋtsɛ wɔnɔ lɛ!—Mat. 7:12; Yoh. 13:34, 35.
7 Hiamɔ Nii ni Kɔɔ Niyenii Ahe: Wɔmiikai nyɛ akɛ, mɔ fɛɛ mɔ abɔ mɔdɛŋ ni ekɛ lɛ diɛŋtsɛ eniyenii kɛ nu aba kpee lɛ shishi daa gbi. Esa akɛ akai mɛi ni yɔɔ wiemɔ lɛ he miishɛɛ ni baafata nyɛhe kɛba lɛ hu nakai nɔŋŋ ní amɛto amɛ diɛŋtsɛ amɛniyenii ahe gbɛjianɔ.
8 Wɔkɛ miishɛɛ miikpa “Nyɔŋmɔ Wiemɔ lɛ Nɔyelɔi” Kpokpaa Wulu nɔ Kpee lɛ yaa gbɛ. Ani oto ogbɛjianɔ fɛɛ ogbe naa, kɛ tsũbimɔ kɛ gbɛfãa he gbɛjianɔtoi lɛ naa? Eba akɛ bɔ ni wɔbaa wɔjeŋ yɛ wɔɔhei kɛ maŋtiase ni afeɔ kpee lɛ yɛ mli lɛ baajie anɔkwale ni yɔɔ wɔtsuii amli kɛ suɔmɔ ni wɔyɔɔ kɛha wɔ Bɔlɔ lɛ kpo be fɛɛ be.