1996 “Nyɔŋmɔ Toiŋjɔlɛ He Bɔfoi” Yehowa Odasefoi a-Kpokpaa Wulu nɔ Kpee
1 Anu saji ni akɛ anɔkwayeli ewie ni tsɔɔ hiɛsɔɔ ni ana yɛ wiemɔ he gbɛjianɔtoo ni kanyaa mɔ yɛ mumɔŋ lɛ he lɛ kɛjɛ gbɔmɛi 126,456 ni tee 1995 “Miishɛɛ Yijielɔi” Kpokpaa Wulu nɔ Kpeei lɛ yɛ Ghana lɛ ateŋ mɛi babaoo naa. Miishɛɛ yimɔ wɔtsuii amli obɔbɔ beni wɔna Yehowa yijielɔi 2,197 ni kɛ nu mli baptisimɔ fee amɛ henɔjɔɔmɔ he okadi lɛ. Wɔmii shɛ wɔhe akɛ wɔnine shɛ woji enyɔ ni ji Yehowa Odasefoi kɛ Wolo-Kasemɔ kɛ Nilee Ni Kɛ Mɔ Yaa Naanɔ Wala Mli lɛ nɔ. Esa akɛ wiemɔ he gbɛjianɔtoo ni kanyaa mɔ tamɔ nɛkɛ ni wɔna mli miishɛɛ nyɛsɛɛ afi lɛ akanya wɔ lɛlɛŋ ni wɔbɔ mɔdɛŋ fɛɛ ni wɔɔnyɛ ni wɔyabo wiemɔi ni atoɔ he gbɛjianɔ kɛhaa 1996 “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei lɛ toi. Eka shi faŋŋ akɛ esa akɛ wɔ fɛɛ wɔfɔ nine wɔtsɛ wɔ Biblia mli nikaselɔi ni wɔye wɔbua amɛ ni amɛkɛ wɔ aya jɛmɛ. Nɛkɛ kpeei nɛɛ baafee hewalɛwoo kɛ kanyamɔ jɛɛhe diɛŋtsɛ yɛ be mli ni wɔyaa nɔ wɔkɛ mlifilimɔ sɔmɔɔ Yehowa yɛ naagbee gbii nɛɛ amli lɛ.
2 Kwɛmɔ ni oto okpeeyaa lɛ he gbɛjianɔ jogbaŋŋ kɛtsɔ hiɛ kwraa, koni oba jɛmɛ ni onyɛ ona gbii etɛ lɛ fɛɛ mli mumɔŋ wiemɔ he gbɛjianɔtoo ni ŋɔɔ lɛ mli ŋɔɔmɔ, kɛjɛ be ni akɛ sɔlemɔ jeɔ shishi lɛ nɔ kɛyashi be ni akɛ sɔlemɔ aaagbe naa. Okɛ suɔmɔ atsu nii koni okɛ mɛi ni yelikɛbuamɔ he aaahia amɛ lɛ afata ogbɛjianɔtoi lɛ ahe, titri lɛ mɛi heei ni yɔɔ wiemɔ lɛ he miishɛɛ lɛ, bɔni afee ni amɛ hu amɛnyɛ amɛbabo kpee lɛ fai sɔrɔtoi lɛ fɛɛ toi. Ebaaye ebua waa akɛ, okɛ Biblia mli nikaselɔi fɛɛ ni aaato gbɛjianɔ akɛ amɛaaya lɛ aaasusu sane ni yɔɔ nɔ ni aŋma ahɔ mli nɛɛ he. (Gal. 6:6, 10) Wiemɔ he gbɛjianɔtoo lɛ kɛ lala baaje shishi Sohaa leebi 9:30 ni ebaaba naagbee aaafee shwane 4:40. Hɔɔ wiemɔ he gbɛjianɔtoo lɛ baaje shishi leebi 9:30, ni ekɛ lala kɛ sɔlemɔ baagbe naa aaafee shwane 4:30. Hɔgbaa leebi nifeemɔ lɛ baaje shishi leebi 9:30, ni gbi lɛ nifeemɔ lɛ baaba naagbee kwraa aaafee shwane 4:00. Saji ni nyiɛ sɛɛ nɛɛ baaye abua bo yɛ gbɛjianɔ ni otoɔ kɛtsɔɔ hiɛ lɛ mli.
3 Ŋaawoi Kɛha Tsu Taomɔ: Akɛ Room Request woji lɛ eko emaje asafo fɛɛ asafo. Ofainɛ ni oŋma Room Request wolo lɛ eko nɔ nii, kɛ ootao wɔɔ he kɛtsɔ kpee he gbɛjianɔtoo lɛ nɔ, koni okɛha asafo lɛ woloŋmalɔ lɛ ni ema nɔ mi, koni no sɛɛ lɛ okɛmaje kpee ni obaaya lɛ. ESAAA ni akɛ tsũbimɔ woji kɛ kpee he woji krokomɛi ni aŋmalaa lɛ majeɔ nitsumɔ he nine ni yɔɔ Accra lɛ.
4 Abaana wɔɔ hei lɛ ekomɛi yɛ mɛi ashiai amli. Esa akɛ mɛi ni ahãa amɛ tsũi yɛ nɛkɛ gbɛ nɔ lɛ akai akɛ, efeŋ nɔ ni sa akɛ amɛkɛ amɛ gbɔfeelɔi lɛ agbɔfeemɔ aaatsu nii yɛ gbɛ ni ejaaa nɔ, kɛtsɔ gbɛ ni amɛaakpa akɛ amɛbaahi tsu lɛ mli be kakadaŋŋ fe gbii pɔtɛɛ ni atsɔɔ yɛ Room Request wolo lɛ nɔ lɛ nɔ. Akɛ tsũi nɛɛ ha kɛha kpee be lɛ PƐ. Mɛi ni nine shɛɔ wɔɔ hei ni tamɔ nɛkɛ nɔ lɛ akwɛ koni amɛ kɛ amɛbii lɛ atsɔɔ bulɛ yɛ amɛ gbɔfeelɔ lɛ shia lɛ mli nibii ahe, ni jeee akɛ amɛaagbɛ́lɛ gbɔfeelɔ lɛ nibii amli loo ni amɛaafite enɛɛmɛi loo ni amɛaabote shia lɛ mli hei komɛi ni esaaa akɛ mɛi krokomɛi boteɔ jɛmɛ lɛ. Kɛ shiatsɛmɛi ná naagbai yɛ enɛ gbɛfaŋ lɛ, esa akɛ aha tsũ taomɔ he nɔkwɛlɔ ni yɔɔ kpee lɛ shishi lɛ ale enɛɛmɛi oya nɔŋŋ, ni ebaana he miishɛɛ akɛ eeeye ebua.
5 Hiamɔ Nii Krɛdɛɛ: Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔ nɔ kpakpa, kɛ amɛbii ni baa amɛjeŋ jogbaŋŋ ni Asafo Sɔɔmɔ Ajinafoi Akuu lɛ kpɛlɛɔ amɛnɔ lɛ pɛ. Esa akɛ asafo ni mɛi ni yɔɔ hiamɔ nii krɛdɛɛ yɔɔ mli lɛ ato gbɛjianɔ ni amɛye amɛbua amɛ fe nɔ ni amɛkɛ gbɛnaa nii nɛɛ aaafɔ kpee gbɛjianɔtoo lɛ nɔ. Onukpai kɛ mɛi krokomɛi ni le mɔ aŋkro lɛ hiamɔ nii lɛ baanyɛ aye abua nakai mɔ lɛ yɛ suɔmɔ mli. Bei pii lɛ, enɛ biɔ ni shiɛlɔi asusu mɛi ni yɔɔ be-fɛɛ sɔɔmɔ lɛ mli, mɛi ni edara yɛ afii amli, mɛi ni bɛ gbɔmɔtsoŋ hewalɛ, kɛ ekolɛ mɛi krokomɛi lɛ ahiamɔ nii ahe. Shiɛlɔi lɛ baanyɛ aye abua kɛtsɔ ya ni amɛkɛ mɛi ni tamɔ nɛkɛ aaaya loo amɛ hiamɔ nii ni amɛaatsu he nii yɛ gbɛi krokomɛi anɔ lɛ nɔ.—Yak. 2:15-17; 1 Yoh. 3:17, 18.
6 Shi kɛlɛ, Rooming Department lɛ baabɔ mɔdɛŋ ni amɛna wɔɔ hei ni sa kɛha shiɛlɔi ni yɔɔ hiamɔ nii krɛdɛɛ lɛ kɛ́ asafo lɛ mli bii nyɛŋ aye abua. Shiɛlɔi nɛɛ baanyɛ amɛkɛ asafo lɛ woloŋmalɔ lɛ agba amɛ shihilɛ lɛ he sane. Esa akɛ woloŋmalɔ lɛ kɛ Asafo Sɔɔmɔ Ajinafoi Akuu lɛ mli bii krokomɛi lɛ awie he koni amɛkwɛ kɛji asafo lɛ baanyɛ aye abua aŋkroaŋkroi nɛɛ koni amɛna amɛ diɛŋtsɛ amɛ wɔɔ hei. Kɛ asafo lɛ nyɛŋ ekɛ yelikɛbuamɔ ni he hiaa aha lɛ, mɔ ni taoɔ tsu lɛ baaŋma Room Request wolo lɛ nɔ nii, ni no sɛɛ lɛ ekɛha woloŋmalɔ lɛ ekoŋŋ, ni lɛ hu ebaakwɛ kɛji nɔ fɛɛ nɔ ja yɛ nɔ lo, kɛ shihilɛ mli ni mɔ lɛ yɔɔ ni ehe hiaa akɛ atao tsu aha lɛ lɛ. Esa akɛ woloŋmalɔ lɛ aŋma wolo ni EKƐTSƆƆ MLI FITSOFITSO. Esa akɛ afee enɛ kɛtsɔ hiɛ kwraa dani kpee be lɛ ashɛ. Beni sɔɔmɔ ajinafoi akuu lɛ ema nɔ mi sɛɛ lɛ, kɛkɛ lɛ woloŋmalɔ lɛ kɛ wolo lɛ baaha Rooming Department. Abaana mɔ ni biɔ tsũ lɛ tɛɛ koni aha ni ele wɔɔ he lɛ he gbɛjianɔtoo.
7 Kɛ mɛi ni yɔɔ hiamɔ nii krɛdɛɛ lɛ shɛ hei ni afeɔ kpee lɛ yɛ amrɔ nɔŋŋ lɛ, amɛfata Asafo Sɔɔmɔ Ajinafoi Akuu lɛ ateŋ mɔ kome loo onukpa kroko he, koni amɛyabi enɛ he sane yɛ Rooming Department kɛha amɛtsu ni akɛbaaha amɛ lɛ.
8 Ogbeekpamɔ He Miihia: Omanye ni nɛkɛ tsũ taomɔ he gbɛjianɔtoo nɛɛ baaye lɛ damɔ mɛi fɛɛ ni ekɔɔ amɛhe lɛ agbeekpamɔ nɔ. (Okɛto Hebribii 13:17 he.) Nyɛmimɛi hii kɛ yei babaoo kɛ Asafo lɛ tsũ taomɔ he gbɛjianɔtoo lɛ tsuɔ nii kɛmɔɔ shi, ni amɛhiɔ hei ni akɛhaa amɛ lɛ, ni no hewɔ lɛ ehaaa afa tsɔ yɛ he kome.
9 Mɛi ni Yaa Kpee lɛ yɛ He ni Atsɔɔko akɛ Amɛya yɛ Lɛ: Yɛ shihilɛi fɛɛ mli lɛ, he ni ato he gbɛjianɔ aha bo ni oya lɛ ji nɔ ni bɛŋkɛ asafo mli ni oyɔɔ lɛ fe fɛɛ lɛ. Gbɛjianɔ ni atoɔ koni ana sɛii ni fa, woji, wɔɔ hei, kɛ ekrokomɛi lɛ damɔ jwɛŋmɔ ni ahiɛ akɛ, shiɛlɔi lɛ ateŋ mɛi ni fa baaya kpee lɛ yɛ he ni akɛha asafo ni amɛyɔɔ mli lɛ nɔ. Akɛ he ni akɛha ni aya yɛ lɛ mli saji titrii lɛ eha yɛ nɔ ni aŋma ahɔ mli nɛɛ baafa 6. Shi kɛlɛ, kɛ yɛ yiŋtoo kpakpa hewɔ ni obaaya kpee lɛ yɛ he kroko fe ni oooya yɛ he ni ato akɛ oya yɛ, ni wɔɔ hei ahe baahia bo lɛ, no lɛ esa akɛ oŋma Room Request wolo lɛ nɔ nii, ni oha woloŋmalɔ lɛ kɛmaje kɛtsɔ kpee ni sa lɛ adrɛs nɔ.
10 Kɛ abaafee kpeei enyɔ yɛ wiemɔ kome too lɛ nɔŋŋ mli yɛ maŋtiase ko mli lɛ, nyɛmimɛi komɛi baasumɔ ni amɛya kpeei enyɔ lɛ fɛɛ. Yɛ be mli ni ŋwanejee ko bɛ he akɛ enɛ baaha amɛna hegbɛ kɛha hewalɛwoo babaoo lɛ, fɛɛ sɛɛ lɛ, ekɛ naagbai baa yɛ nibii ni akɛtsuɔ nii ni akɛfeɔ kpee lɛ gbɛfaŋ, ni no haaa yiŋtoo hewɔ ni asumɔɔ ni mɛi ayifalɛ lɛ afee nɔ ni sa, koni nitsumɔ ni tsɔɔ kpee lɛ hiɛ kɛ nɔ ni atsuɔ yɛ kpee lɛ sɛɛ lɛ akafa tsɔ lɛ aye omanye. Yɛ enɛ hewɔ lɛ wɔmiibi ni nyɛmimɛi ni yɔɔ maŋtiasei amli lɛ aya kpee ni ato aha amɛ yɛ nakai maŋtiase lɛ mli lɛ pɛ. Kɛ amɛmiitao ni amɛya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba kɛha wɔ. Yɛ nyɛmimɛi ni akɛ kpee shishi nitsumɔi komɛi ni he hiaa woɔ amɛdɛŋ ni amɛtsuɔ he nii ni no hewɔ lɛ amɛnaaa hegbɛ ni amɛbo wiemɔi lɛ fai komɛi atoi lɛ agbɛfaŋ lɛ, aŋmɛɔ amɛ gbɛ ni amɛya kpee ni ji enyɔ ni abaafee yɛ nakai maŋtiase lɛ nɔŋŋ mli lɛ. Kɛfata he lɛ, kɛji wiemɔ he naagba hewɔ lɛ, nyɛmimɛi komɛi baasumɔ ni amɛya kpee lɛ yɛ maŋtiase kroko mli, shi jeee he ni atsɔɔ ni amɛ asafo lɛ aya lɛ, no hu gbɛ yɛ akɛ amɛfeɔ nakai.
11 Yɛ asafoi ni yɔɔ shɔŋŋ lɛ agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ, fe he ni ato ni amɛya lɛ. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ ni amɛhalaa he ni amɛbaaya. Shi kɛlɛ, esa akɛ asafoi ni baakpɛ yiŋ akɛ amɛbaaya kpee kroko ni jeee nɔ ni ato ni amɛya lɛ atswa kpokpaa nɔkwɛlɔ lɛ adafi kɛtsɔ hiɛ kwraa koni ekato amɛsaramɔ be he gbɛjianɔ kɛmiiha nakai otsi ni amɛbaaya kpee lɛ.
12 Bolgatanga Kpee: Abaafee “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei ni atoɔ he gbɛjianɔ lɛ naagbee nɔ̃ yɛ Bolgatanga, kɛjɛ January 10-12, 1997. Taakɛ afɔɔ feemɔ lɛ, wiemɔi ni abaawie lɛ ji Twi kɛ Frafra. Aawo nyɛmimɛi fɛɛ ni jɛ wuoyigbɛ ni baanyɛ aya lɛ hewalɛ ni amɛya kpee nɛɛ. Asafo lɛ miito tsɔne he gbɛjianɔ krɛdɛɛ afi nɛɛ kɛha gbɛfaa lɛ. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛɛ, ni amɛfee trukaa odaseyeli hu beni amɛyɔɔ Bolgatanga lɛ. Wɔmiiwo mɛi fɛɛ ni yɔɔ he miishɛɛ akɛ amɛaaya lɛ hewalɛ koni amɛbɔi amɛhe saamɔ kɛha kpee lɛ.
13 Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ be ni eho lɛ mli lɛ jogbaŋŋ. Taakɛ afɔɔ feemɔ lɛ, abaama agba, abaatao wɔɔ hei, kɛ nitsumɔi krokomɛi. Wɔyɛ hiɛnɔkamɔ akɛ mɛi fɛɛ ni yɔɔ he ni abaafee kpee lɛ yɛ kɛ asafoi ni bɛŋkɛ jɛmɛ fɛɛ lɛ baato amɛ nitsumɔi ahe gbɛjianɔ koni amɛfata he kɛtsu nitsumɔ ni he hiaa nɛɛ kɛmɔ shi yɛ otsii lɛ anaagbee kɛ otsi lɛ mli gbii lɛ amli. Nyɛsɛɛ afi lɛ, amaniɛbɔi ni nine shɛ nɔ lɛ tsɔɔ akɛ nyɛmimɛi babaoo etooo gbɛjianɔ kpakpa koni amɛye amɛbua yɛ nitsumɔ ni tsɔɔ kpee lɛ hiɛ lɛ mli. Enɛ ha ewa waa kɛha mɛi fioo ni kɛ amɛhe ha kɛha nitsumɔ lɛ, titri lɛ yɛ naagbee gbii fioo ni tsɔɔ hiɛ dani kpeei lɛ jeɔ shishi lɛ mli. Kɛ mɛi ni fa saŋŋ baanyɛ ato gbɛjianɔ koni amɛba jɛmɛ gbi kome loo enyɔ ni tsɔɔ kpee lɛ shishijee hiɛ koni ato nɔ fɛɛ nɔ he gbɛjianɔ lɛ, enɛ baaye ebua waa. Mɛi pii ni kɛ amɛhe baawo volunteer nitsumɔ lɛ mli koni amɛye amɛbua lɛ ahe baahia hu yɛ kpee lɛ shishi, no hewɔ lɛ, okɛ oweku lɛ ato gbɛjianɔ koni nyɛfata he kɛtsu enɛ yɛ kpee ni nyɛbaaya lɛ shishi.
14 Niyenii He Nitsumɔ: Nyɛmimɛi babaoo eŋma woji ni amɛkɛtsɔɔ bɔ ni amɛhiɛ esɔ tsakemɔ ni afee akɛ, akɛ niyenii ni ehe nitsumɔ fa tsuŋ nii yɛ wɔ kpeei bibii kɛ kpeei wuji ashishi lɛ. Agbɛnɛ mɛi babaoo buaaa amɛhe naa kɛtooo sɛrɛnɛɛ, ni nyɛmimɛi lɛ na be babaoo koni amɛkɛsara amɛhe yɛ bei sɔrɔtoi ni akɛkpaa fioo lɛ amli. Shi kɛlɛ, nyɛmimɛi ateŋ mɛi fioo ko nuuu oti ni gbɛjianɔ ni atoɔ nɛɛ tsuɔ he nii, ákɛ atsuŋ niyenii he nii babaoo tsɔ lɛ shishi, no hewɔ lɛ amɛhoo amɛ diɛŋtsɛ amɛ niyenii koni amɛbahɔɔ amɛha nyɛmimɛi lɛ yɛ hei ni afeɔ kpee lɛ yɛ lɛ. Aŋmɛɛɛ enɛ feemɔ gbɛ. Mɛi krokomɛi hu etooo gbɛjianɔ akɛ amɛkɛ niyenii aaaya kpee lɛ shishi, ni no hewɔ lɛ ebaa lɛ akɛ amɛhereɔ niyenii hɔɔlɔi lɛ ahiɛmɛɛ kɛbaa hei ni afeɔ kpee lɛ yɛ lɛ, tamɔ nɔ ni nɔ ko pɔtɛɛ ko yɛ ni atsuko he nii yɛ kpee shishi niyenii he gbɛjianɔtoo lɛ mli. Oti ni yɔɔ gbɛjianɔ hee ni ato lɛ sɛɛ ji, ni mɔ fɛɛ mɔ kɛ nɔ ko ajɛ shia kɛba, ni ebaye beni akpa fioo shwane lɛ. No hewɔ lɛ mɔ fɛɛ mɔ baanyɛ ekɛ ejwɛŋmɔ ama mumɔŋ wiemɔ he gbɛjianɔtoo lɛ nɔ jogbaŋŋ kɛmɔ shi. He fɛɛ he ni wɔɔtara kɛha niyeli lɛ, nyɛhaa wɔkwɛa jogbaŋŋ ni wɔkɛ nɔ ko akakpa sɛii lɛ anɔ loo ni wɔkɛ jwɛi aaashwie jɛmɛ.
15 Kpee Shishi Badge kɛ Nɔ ni Akɛhɔɔ Mli: Aawo asafo fɛɛ asafo ŋaa ni amɛkɛ Literature Request Form (S-14) lɛ atsu nii ni amɛkɛshɛ badge kɛ plastik ni akɛhɔɔ mli lɛ kɛha “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei lɛ. Nyɛfainɛ, nyɛkwɛa ni nyɛŋmaa nɔ fɛɛ nɔ fɛfɛo yɛ wolo lɛ nɔ, ni nyɛkɛ klɛŋklɛŋ nɔ lɛ amajea Asafo lɛ AMRƆ NƆŊŊ koni anyɛ atsu nyɛ kpee lɛ he nibii ni nyɛtaoɔ lɛ ahe nii yɛ be ni sa mli. Nyɛhaa ahia nyɛjwɛŋmɔ mli akɛ nyɛnaŋ badge kɛ nɔ ni akɛhɔɔ mli lɛ eko yɛ kpeei lɛ ashishi.
16 Lalai: Ato lalai ni nyiɛ sɛɛ nɛɛ ahe gbɛjianɔ koni ala yɛ nifeemɔ lɛ mli yɛ bɔ ni ato naa aha lɛ naa: 159, 59, 26, 211, 215, 174, 123, 16, 207, 111, 42, 38, 127, 170, 8, 187, 15, kɛ 212. Yɛ ŋaawoo ni akɛha yɛ Efesobii 5:19 lɛ hewɔ lɛ, aawo wɔ fɛɛ hewalɛ ni wɔfata he kɛla yɛ be mli ni atswaa saŋku-lalai lɛ yɛ kpeei lɛ ashishi lɛ.
17 Wiemɔi ni Amɔmɔɔ loo Video Mfoniri-Shamɔi: Asafo lɛ etoŋ gbɛjianɔ ko kɛhaŋ wiemɔi loo drama lɛ mɔɔmɔ yɛ kpãa nɔ. Esa akɛ aŋkroaŋkroi ni baamɔmɔ wiemɔi lɛ yɛ kpãai anɔ kɛha amɛhe lɛ afee nakai yɛ gbɛ ni gbaŋ mɛi krokomɛi ni eba kpee lɛ shishi lɛ anaa loo egbalaŋ amɛjwɛŋmɔ kɛjɛŋ wiemɔ lɛ nɔ. Titri lɛ, esaaa akɛ amɛtaà sarawa hewalɛ kpãa kɛ wiemɔ lɛ kpãai lɛ ahe. Wɔhiɛ baasɔ ekome ni nyɛkɛ wɔ aaafee yɛ enɛ mli lɛ waa diɛŋtsɛ.
18 Naagbee: Wɔnine baashɛ nitsɔɔmɔ kɛ hewalɛwoo babaoo nɔ yɛ wɔ “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei lɛ ashishi, koni wɔkɛha gbɛfaŋnɔ ni wɔnaa yɛ nitsumɔ ni wɔtsuɔ akɛ “Nyɔŋmɔ Toiŋjɔlɛ He Bɔfoi” lɛ aya hiɛ. Abaafee enɛɛmɛi kɛtsɔ wiemɔi, nɔkwɛmɔ nii, kɛ drama kome, kɛ niiashikpamɔi ni aaagba lɛ anɔ. Nyɛhaa wɔteŋ mɔ fɛɛ mɔ atoa gbɛjianɔ bianɛ koni eya jɛmɛ, kɛha “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei lɛ gbii etɛ lɛ fɛɛ, kɛjɛ lala ni akɛgbeleɔ kpee lɛ nɔ yɛ Sohaa leebi kɛyashi naagbee sɔlemɔ lɛ nɔ yɛ Hɔgbaa shwane.