Yehowa Jɔɔmɔ Feɔ Wɔ Niiatsɛmɛi
1 Bei pii lɛ, shika ni akɛwoɔ mɔ ko nyɔmɔ yɛ nitsumɔ ni etsuɔ hewɔ lɛ falɛ ji nɔ ni adamɔɔ nɔ akɛtsɔɔ akɛ eye omanye. No hewɔ ni mɛi pii buɔ mɛi ni yɔɔ shika babaoo lɛ akɛ amɛji mɛi ni yɔɔ miishɛɛ fe fɛɛ ní amɛtsui nyɔɔ amɛmli fe fɛɛ lɛ. Shi kɛlɛ, mɛi ni nuɔ he akɛ shika baanyɛ aha aná miishɛɛ lɛ etɔ̃ kwraa. (Jaj. 5:11) “Mɛi ni taoɔ nii pii aná” yɛ heloonaa lɛ amiishɛɛ lɛ ehiii shi daa. (1 Tim. 6:9) Nɔ ni tamɔɔɔ nakai lɛ, Yehowa tsuji yɛ miishɛɛ waa diɛŋtsɛ ni amɛji mɛi ni yɔɔ nii fe fɛɛ yɛ je lɛŋ. (Abɛi 10:22; Kpoj. 2:9) Yɛ mɛɛ gbɛ nɔ?
2 Odaseyeli ni Tsɔɔ akɛ Wɔyɛ Nii Babaoo: Wɔyɛ mumɔŋ nilee babaoo kɛ shishinumɔ babaoo ni yɔɔ Nyɔŋmɔ Wiemɔ ni ji Biblia lɛ mli lɛ. Yehowa yaa nɔ ekɛ eshikpɔŋ nɔ gbɛjianɔtoo lɛ tsuɔ nii ni etsɔɔ wɔ nibii babaoo ní kɔɔ lɛ kɛ e-Bi lɛ he koni wɔná he sɛɛ daa. Sane shishinumɔ ni hi jogbaŋŋ lɛ haa efeɔ mlɛo kɛhaa wɔ akɛ wɔɔbɛŋkɛ Yehowa ni wɔná wɔkɛ lɛ teŋ wekukpaa ni yɔɔ gbagbalii. (Yak. 4:8) Ekpakpa kɛ efɔŋ yɔsemɔ kɛ Nyɔŋmɔ mlai lɛ atoiboo buɔ wɔhe kɛjɛɔ helai kɛ osharai komɛi ahe. Wɔyɛ nɔmimaa akɛ Yehowa baaha wɔ nɔ ni he hiaa wɔ, koni eha wɔtsui anyɔ wɔmli yɛ Nyɔŋmɔ jamɔ mli ni wɔná jwɛŋmɔŋ toiŋjɔlɛ.—Mat. 6:33.
3 Wɔnáa toiŋjɔlɛ kɛ ekomefeemɔ yɛ wɔmumɔŋ nyɛmifeemɔ lɛ mli, ejaakɛ wɔwoɔ Nyɔŋmɔ mumɔ lɛ yibii lɛ. Akɛni suɔmɔ kpãa ni mli wa lɛ efee wɔ ekome hewɔ lɛ, ehe ehiaaa ni wɔsusuɔ kwraa akɛ Nyɔŋmɔ loo wɔnyɛmimɛi lɛ ekwa wɔ kɛ́ wɔkɛ amanehulu kpe.—Gal. 6:10.
4 Shishinumɔ kɛ yiŋtoo diɛŋtsɛ yɛ wɔshihilɛi amli. Wɔbuɔ enɛ akɛ eji hegbɛ kpele ni wɔná akɛ wɔkɛ wɔhe aaawo jeŋ muu fɛɛ sanekpakpa shiɛmɔ nitsumɔ lɛ mli. Enɛ haa wɔnáa miishɛɛ daa yɛ be mli ni wɔyeɔ wɔbuaa mɛi krokomɛi koni amɛná amɛkɛ Nyɔŋmɔ teŋ wekukpaa kpakpa ni amɛkɛ wɔ afee ekome kɛsɔmɔ yɛ anɔkwa jamɔ mli lɛ. Wɔsɔɔmɔ nitsumɔ ni ji jwetri ni jara wa waa lɛ woɔ Yehowa hiɛ nyam ni ehaa wɔtsui nyɔɔ wɔmli akɛ wɔmiifee nɔ ko ni wɔkɛtsé egbɛi lɛ he. Akɛni wɔle akɛ etsɛŋ ni hiɛnɔkamɔ ni wɔyɔɔ kɛha wɔsɛɛ lɛ baaba mli hewɔ lɛ, wɔhiɛɔ jwɛŋmɔ kpakpa mli daa.
5 Hiɛsɔɔ ni Wɔɔjie Kpo Wɔtsɔɔ: Eba akɛ wɔɔya nɔ wɔjie hiɛsɔɔ kpo wɔtsɔɔ Yehowa jɔɔmɔi lɛ daa, nɔ ni haa wɔfeɔ niiatsɛmɛi diɛŋtsɛ fe fɛɛ yɛ shikpɔŋ nɔ lɛ. (Abɛi 22:4) Ní wɔɔto be daa gbi koni wɔkɛjwɛŋ nɔ ni wɔyɔɔ lɛ nɔ lɛ tsirɛɔ wɔ koni wɔda Yehowa shi yɛ esuɔmɔ babaoo lɛ hewɔ ni wɔya nɔ wɔtu wɔhe wɔha lɛ kwraa.