Wɔnáko Mumɔŋ Nibii Babaoo Tamɔ Nɛkɛ Pɛŋ!
1 Mɛi babaoo miishwe ni gbi ko aba koni amɛnyɛ amɛkɛɛ akɛ, “Wɔnáko lɛ babaoo tamɔ nɛkɛ pɛŋ!” Yɛ amɛ jwɛŋmɔ mli lɛ, nakai gbi ni amɛbaana heloonaa nii babaoo koni eha ‘amɛjɔɔ amɛhe, amɛye nii, amɛnu nii, ni amɛtsui anyɔ amɛmli lɛ baaba.’ (Luka 12:19) Nɔ ni tamɔɔɔ nakai lɛ, amrɔ nɛɛ wɔnyɛɔ wɔkɛɔ akɛ, yɛ mumɔŋ shishinumɔ naa lɛ, wɔyɛ nibii kpakpai fɛɛ. (Lala 34:11) Te feɔ tɛŋŋ ebaa lɛ nakai hu?
2 Abɛi 10:22 jajeɔ akɛ “Yehowa jɔɔmɔ lɛ, no feɔ mɔ niiatsɛ.” Wɔ mɛi ni wɔnaa ŋwɛi duromɔ ni tamɔ nɛkɛ lɛ baanyɛ akɛɛ lɛlɛŋ akɛ, Nyɔŋmɔ “ŋɔɔ nibii fɛɛ ehaa wɔ babaoo, akɛ wɔye mli ŋɔɔmɔ.” (1 Tim. 6:17) Enɛ feɔ wɔ niiatsɛmɛi fe fɛɛ yɛ shikpɔŋ nɔ!
3 Wɔ Jɔɔmɔi lɛ ni Wɔɔle: Wɔteŋ mɛi fioo pɛ yɔɔ heloonaa nii babaoo. Ni kɛlɛ, ajɔɔ wɔ ejaakɛ wɔfeee yeyeeye babaoo tsɔ yɛ gbi fɛɛ gbi hiamɔ nii ahe. Yehowa le nibii ni he hiaa wɔ, ni ewo wɔ shi akɛ ekɛ enɛɛmɛi baaha wɔ. (Mat. 6:31-33) Nɔmimaa ni ekɛhaa lɛ haa wɔnaa jwɛŋmɔŋ toiŋjɔlɛ ni jara wa waa diɛŋtsɛ.
4 Shi, jɔɔmɔi ni wɔnaa yɛ mumɔŋ lɛ fa kwraa fe nakai. Wɔ wala damɔ mumɔŋ niyenii ni jɛɔ Yehowa ŋɔɔ kɛbaa lɛ nɔ. (Mat. 4:4) Hɔmɔ yeɔ mɛi ni kpaa gbɛ akɛ mumɔŋ niyenii baajɛ je lɛŋ hei komɛi kɛbaha amɛ lɛ, shi wɔ lɛ, wɔyeɔ nii ni wɔnuɔ nii ni shɛɔ wɔnaa jogbaŋŋ. (Yes. 65:13) “Tsulɔ anɔkwafo” lɛ haa wɔnine shɛɔ nilee babaoo ni etãaa ni kɛ mɔ yaa naanɔ wala mli lɛ nɔ.—Mat. 24:45; Yoh. 17:3.
5 Wɔ jeŋ muu fɛɛ nyɛmifeemɔ ni jara wa lɛ kɛ nyɛmimɛi hii kɛ yei ni yɔɔ shikpɔŋ nɔ he fɛɛ he lɛ anaanyobɔɔ ni yɔɔ miishɛɛ lɛ haa wɔ. (Yoh. 13:35) Asafo ni wɔyɔɔ mli lɛ ji abobaahe ni toiŋjɔlɛ yɔɔ mli, he ni wɔbaanyɛ wɔna miishɛjemɔ kɛ miishɛɛ yɛ. Onukpai lɛ miibu wɔ susumai ahe, ni amɛyeɔ amɛbuaa wɔ ni wɔdamɔ naagbai sɔrɔtoi babaoo naa. (Heb. 13:17) Wɔ nyɛmimɛi ni wɔbɛŋkɛɔ amɛ lɛ haa wɔwoɔ wɔhe hewalɛ ni wɔnaa ekaa koni wɔfi shi.—Rom. 1:11, 12.
6 Wɔ nitsumɔ lɛ po feɔ jɔɔmɔ. Nitsumɔi babaoo yɛ ni wa waa ni wooo yibii. Sanekpakpa lɛ shiɛmɔ ni wɔkɛ wɔhe woɔ mli lɛ kɛ mlifilimɔ bahaa mɛi krokomɛi, ni ekɛ miishɛɛ bahaa wɔ. (Bɔf. 20:35) Wɔnyɛɔ wɔyeɔ nii kpakpai amli ŋɔɔmɔ diɛŋtsɛ yɛ wɔ deŋmegbomɔ lɛ fɛɛ mli.—Jaj. 2:24.
7 Nɔ ni fe fɛɛ lɛ, wɔyɛ wɔsɛɛ be he hiɛnɔkamɔ ni yɔɔ naakpɛɛ. (Rom. 12:12) Wɔmiikpa jeŋ hee ni yeɔ emuu ni jalɛ yɔɔ mli lɛ gbɛ, he ni wɔkɛ wɔsuɔlɔi baahi shi yɛ, yɛ miishɛɛ kɛ toiŋjɔlɛ mli kɛya naanɔ! Nɛkɛ hiɛnɔkamɔ nɛɛ ji jwetri ko ni fe nɔ fɛɛ nɔ ni je nɛɛ baanyɛ ekɛha wɔ.—1 Tim. 6:19.
8 Te Wɔɔfee Tɛŋŋ Wɔjie Wɔ Hiɛsɔɔ Kpo Wɔtsɔɔ? Wɔnyɛŋ wɔto Yehowa najiaŋ yɛ nɔ ni efee eha wɔ lɛ hewɔ. Gbɛ pɛ ni wɔɔtsɔ nɔ wɔjie hiɛsɔɔ kpo ji ni (1) wɔda lɛ shi daa yɛ eduromɔ ni esaaa wɔ lɛ hewɔ (Efe. 5:20), (2) wɔjie suɔmɔ ni wɔyɔɔ lɛ kpo kɛtsɔ toiboo nɔ (1 Yoh. 5:3), (3) wɔtse egbɛi lɛ he kɛtsɔ sanekpakpa lɛ shiɛmɔ nɔ (Lala 83:19), kɛ (4) Kristofoi asafo lɛ ni wɔɔfi sɛɛ kɛtsɔ wɔtsui mli ni wɔɔjɛ wɔfee ekome kɛtsu nii lɛ nɔ.—1 Tim. 3:15.
9 Wɔyɛ yiŋtoi ni yeɔ emuu ni wɔɔdamɔ nɔ wɔfee mɛi ni yɔɔ miishɛɛ fe shikpɔŋ nɔ bii fɛɛ. (Lala 144:15b) Eba akɛ wɔ subaŋ, jeŋba, kɛ sɔɔmɔ lɛ baajie miishɛɛ ni wɔnaa yɛ wɔ mumɔŋ paradeiso lɛ mli lɛ kpo etsɔɔ. Wɔnáko lɛ babaoo tamɔ nɛkɛ pɛŋ!