Ani Esa akɛ Mabi Yelikɛbuamɔ Kɛjɛ Maŋsɛɛ?

Bei komɛi lɛ, shiɛlɔi komɛi ŋmalaa woji kɛyahaa Asafo lɛ nitsumɔhe niji ni yɔɔ maŋsɛɛ lɛ ni amɛbiɔ nibii srɔtoi fɛɛ. Ákɛ nɔkwɛmɔnɔ lɛ, mɛi komɛi biɔ koni aha amɛ maŋsɛɛ nanemɛi, gbalashihilɛ mli hefatalɔi, nibii ni amɔmɔ awo kasɛtii loo vidio kasɛtii anɔ, loo shika po ni akɛbaafa.

Wɔbaasumɔ ni mɔ fɛɛ mɔ ale akɛ, Asafo lɛ nitsumɔhe niji lɛ nyɛŋ atsu nibimɔi nɛɛ ahe nii. Buu Mɔɔ Asafo lɛ ji gbɛjianɔtoo ko ni hãa nii waa ni taooo shika he sɛɛnamɔ. Too ni aŋkroaŋkroi jɛɔ suɔmɔ mli amɛyeɔ yɛ je lɛŋ he fɛɛ he koni akɛtsu yiŋtoo pɛ ni ji Nyɔŋmɔ Maŋtsɛyeli lɛ he shɛɛ sane lɛ ni abaashiɛ yɛ shikpɔŋ ni ayɔɔ nɔ lɛ nɔ fɛɛ lɛ he nii ji nɔ ni akɛfĩɔ sɛɛ. (Mat. 24:14) Akɛni nɛkɛ ji sane lɛ hewɔ lɛ, akɛ shika fɛɛ shika ni akɛyeɔ abuaa lɛ fĩɔ shiɛmɔ nitsumɔ lɛ sɛɛ, ni yɛ no hewɔ lɛ anyɛŋ akɛfa aŋkroaŋkroi.

Mɛi krokomɛi ŋmalaa nanemɛi kɛ mɛi krokomɛi ni yɔɔ maŋsɛɛ lɛ woji ni amɛkɛbiɔ heloonaa yelikɛbuamɔ. Ani wɔbaakɛɛ akɛ “jaramɔ bei” lɛ miisa wɔ pɛ wɔhe yɛ be mli ni esaaa mɛi krokomɛi ni wɔmumɔŋ nyɛmimɛi ni yɔɔ maŋsɛɛ lɛ fata he lɛ ahe?—2 Tim. 3:1.

Kristofoi asafo lɛ eto gbɛjianɔ koni aye abua mɛi ni ehia amɛ lɛ kɛ mɛi ni osharai enina amɛ ni amɛyɔɔ wɔteŋ lɛ. Akɛ gbɛjianɔtoo nɛɛ mlitsɔɔmɔ eha yɛ wolo ni ji Organized to Accomplish Our Ministry lɛ baafai 122 kɛ 123. No hewɔ lɛ ejeee nɔ ni sa akɛ aaaŋmala woji kɛyaha asafoi kɛ nitsumɔhe niji ni yɔɔ maŋsɛɛ lɛ koni akɛbi yelikɛbuamɔ.

Agbɛnɛ hu, adrɛs srɔtoi ni yɔɔ Asafo lɛ woji amli kɛha asafoi kɛ mɛi ni shɛɔ wɔwoji lɛ ji teemɔŋ sane ni anyɛŋ akɛha aŋkroaŋkroi ni sumɔɔ ni amɛná maŋsɛɛ nanemɛi loo gbalashihilɛ mli hefatalɔi koni amɛ sɔŋŋ amɛkɛŋmala amɛhe woji. Kɛ oyaasara maŋsɛɛ lɛ, obaanyɛ oŋma kɛyaha Asafo lɛ nitsumɔhe nine ni yɔɔ nakai maŋ lɛ mli lɛ ni obi adrɛs ni yɔɔ kɛha Maŋtsɛyeli Asa ni bɛŋkɛ fe fɛɛ lɛ kɛ bei ni amɛkɛyaa kpeei.

Gbɛtsɔɔmɔi nɛɛ ni wɔkɛaatsu nii lɛ haŋ Asafo lɛ afite be babaoo ni ehaŋ lɛ nitsumɔ babaoo.—Okɛto 1 Korintobii 14:20 he.