“Nyɛhaa Nyɛla Atsoa”
1 Jeŋ ni ebɔle wɔhe kɛkpe lɛ yɛ jeŋba kɛ mumɔŋ duŋ mli. Anɔkwale la lɛ kpáa duŋ “nitsumɔi lɛ ni wooo yibii lɛ” ahe mama koni anyɛ akwa pampii ni gbeɔ mɔ nɛɛ. No hewɔ lɛ, bɔfo Paulo wo Kristofoi lɛ hewalɛ akɛ: “Nyɛnyiɛa tamɔ la bii.”—Efe. 5:8, 11.
2 Esoro “la lɛ yibii” lɛ kwraa yɛ jeŋ ni ewo duŋ lɛ nɔ̃ he. (Efe. 5:9) Dani wɔɔwo yibii ni tamɔ nɛkɛ lɛ belɛ ebiɔ ni wɔfee nɔkwɛmɔnɔ kpakpa yɛ Kristofoi ashihilɛ mli, koni wɔtsɔmɔ gbɔmɛi ni Yesu kpɛlɛɔ amɛnɔ. Agbɛnɛ hu, esa akɛ wɔjie sui ni tamɔ tsui muu fɛɛ mli ni ajɛɔ afeɔ nii, anɔkwayeli, kɛ miishɛɛ kɛha anɔkwale lɛ kpo. Ehe miihia ni yibii nɛɛ aje kpo yɛ wɔ daa gbi shihilɛ kɛ wɔsɔɔmɔ nitsumɔ lɛ mli.
3 Kpɛ́ yɛ Hegbɛ Fɛɛ Hegbɛ ni Oooná Mli: Yesu kɛɛ ekaselɔi lɛ akɛ: “Nyɛhaa nyɛla atsoa yɛ gbɔmɛi ahiɛ.” (Mat. 5:16) Yɛ Yesu kasemɔ mli lɛ, wɔhaa Yehowa la lɛ tsɔɔ wɔnɔ ekpɛ́ɔ kɛtsɔ Nyɔŋmɔ Maŋtsɛyeli lɛ kɛ eyiŋtoi ni wɔshiɛɔ wɔtsɔɔ lɛ nɔ. Wɔkpɛ́ɔ tamɔ kanei kɛ́ wɔyasara gbɔmɛi yɛ amɛshiai amli, ni agbɛnɛ kɛ́ wɔgbɛ anɔkwale lɛ wɔshwã yɛ nitsumɔhe, yɛ skul, yɛ wɔ akutseiaŋbii ateŋ, aloo yɛ he fɛɛ he ni wɔɔná hegbɛ lɛ yɛ.—Fil. 2:15.
4 Yesu kɛɛ akɛ mɛi komɛi baanyɛ̃ la lɛ. (Yoh. 3:20) No hewɔ lɛ, kɛji akɛ mɛi babaoo lɛ ekpɛlɛɛɛ ni “Kristo . . . anunyam sanekpakpa lɛ la ni tsoɔ lɛ” akpɛ́ aha amɛ lɛ, wɔnijiaŋ ejeee wui. (2 Kor. 4:4) Yehowa le adesai atsuii amli saji, ni etaooo mɛi ni feɔ nibii ni ejaaa lɛ yɛ ewebii ateŋ.
5 Kɛji akɛ wɔnyiɛ Yehowa gbɛ̀i lɛ asɛɛ ni wɔná mumɔŋ la mli ŋɔɔmɔ lɛ, wɔbaanyɛ wɔkpɛ́ wɔshwie mɛi krokomɛi anɔ. Kɛji akɛ amɛtsɔ wɔ jeŋba nɔ amɛyoo akɛ ‘wɔyɛ wala la lɛ,’ kɛkɛ lɛ ebaakanya amɛ hu ni amɛfee tsakemɔi ni he hiaa bɔni afee ni amɛbatsɔmɔ la hiɛlɔi.—Yoh. 8:12.
6 Kɛji akɛ wɔha wɔla lɛ kpɛ́ lɛ, wɔkɛ yijiemɔ bahaa wɔ-Bɔlɔ lɛ ni wɔyeɔ wɔbuaa anɔkwafoi lɛ koni amɛbale lɛ koni amɛná naanɔ wala hiɛnɔkamɔ lɛ. (1 Pet. 2:12) Akɛni wɔhiɛ la lɛ hewɔ lɛ, nyɛhaa wɔkɛtsua nii ni wɔkɛye wɔbua mɛi krokomɛi ni amɛna gbɛ ni amɛaatsɔ nɔ amɛje mumɔŋ duŋ lɛ mli koni amɛtsu la nitsumɔi.