“Nyɛhaa Nyɛla Atsoa”
1. Mɛni wɔná hegbɛ akɛ wɔɔha mɛi krokomɛi hu aná he sɛɛ?
1 Kɛjɛ leebi maŋkpa kɛyashi gbɛkɛnaashi lɛ, hulu la lɛ kɛ yijiemɔ haa Yehowa Nyɔŋmɔ. Kɛlɛ, Yesu bi ni ekaselɔi lɛ aná la kroko—“wala la lɛ.” (Yoh. 8:12) Eji hegbɛ kpele akɛ mɔ aaaná mumɔŋ la, ni ji Nyɔŋmɔ he anɔkwa nilee nɛɛ, shi ekɛ sɔ̃i ni tsiitsii bafɔ̃ɔ mɔ nɔ. Yesu fã akɛ: “Nyɛhaa nyɛla atsoa yɛ gbɔmɛi ahiɛ,” koni mɛi aná he sɛɛ. (Mat. 5:16) Yɛ jeŋ ni ŋmɛnɛ lɛ emli ewo duŋ kpii yɛ mumɔŋ nɛɛ mli lɛ, esa akɛ wɔha mɛi krokomɛi hu aná la nɛɛ he sɛɛ fe bei fɛɛ ni eho! Te wɔɔfee tɛŋŋ wɔha wɔla lɛ atso taakɛ Yesu fee lɛ?
2. Mɛɛ gbɛ nɔ Yesu tsɔɔ akɛ ehe miihia ni aha mɛi anine ashɛ mumɔŋ la lɛ nɔ?
2 Kɛtsɔ Shiɛmɔ Nɔ: Yesu kɛ ebe, enyɛmɔ, kɛ nibii fɛɛ ni eyɔɔ lɛ tsu nii ni ekɛha mɛi anine shɛ anɔkwale la lɛ nɔ yɛ amɛshĩai, maŋjaanɔi, gɔji anɔ—he fɛɛ he ni ebaana mɛi yɛ. Eyɔse akɛ sɛɛnamɔ ni nɔ bɛ yɛ mumɔŋ la lɛ ni eeeha mɛi anine ashɛ nɔ lɛ he. (Yoh. 12:46) Bɔni afee ni mɛi babaoo nine ashɛ la nɛɛ nɔ lɛ, Yesu saa ekaselɔi lɛ eto koni amɛfee “je lɛŋ la lɛ.” (Mat. 5:14) Amɛhaa amɛla lɛ tsoɔ kɛtsɔ nibii kpakpai ni amɛfeɔ amɛhaa amɛkutsoŋbii kɛ Biblia mli anɔkwalei ni amɛtsɔɔ mɛi lɛ nɔ.
3. Te wɔɔfee tɛŋŋ wɔtsɔɔ akɛ wɔhiɛ sɔɔ anɔkwale la lɛ lɛɛlɛŋ?
3 Nyɔŋmɔ webii kɛ hiɛdɔɔ boɔ famɔ akɛ, ‘amɛnyiɛ tamɔ la bii’ lɛ toi, ni amɛshiɛɔ yɛ he fɛɛ he ni amɛbaana mɛi yɛ. (Efe. 5:8) Biblia lɛ loo Kristofoi awoji krokomɛi ni wɔɔkane yɛ hei ni mɛi baana wɔ beni wɔba hejɔɔmɔ yɛ nitsumɔhe loo skul lɛ baanyɛ agbele gbɛ kɛha Biblia mli sanegbaa. Nyɛmii yoo fioo ko tsɔ gbɛ ni tamɔ nɛkɛ nɔ eje Biblia mli nikasemɔ shishi ni eha eklasbii lɛ woji 12!
4. Mɛni hewɔ bɔ ni wɔbaa wɔjeŋ jogbaŋŋ wɔhaa lɛ haa ‘wɔla lɛ tsoɔ’ lɛ?
4 Kɛtsɔ Nitsumɔi Kpakpai Anɔ: Bɔ ni wɔbaa wɔjeŋ wɔhaa daa gbi lɛ hu haa wɔla lɛ tsoɔ. (Efe. 5:9) Mɛi naa bɔ ni wɔbaa wɔjeŋ akɛ Kristofoi lɛ yɛ wɔnitsumɔhei, wɔskul, kɛ maŋ-te-lɛŋ hei krokomɛi, ni no gbeleɔ hegbɛi kɛhaa wɔ koni wɔkɛ mɛi agba Biblia mli anɔkwalei lɛ ahe sane. (1 Pet. 2:12) Akɛ nɔkwɛmɔnɔ lɛ, gbekɛ nuu ko ni eye afii enumɔ lɛ jeŋba kpakpa ha etsɔɔlɔ lɛ tswa gbekɛ nuu lɛ fɔlɔi tɛlifoŋ. Tsɔɔlɔ lɛ kɛɛ akɛ, “Minako gbekɛ ko ni naa hiɛdɔɔ ni yɔɔ bɔ ni ehe hiaa ni mɔ aba ejeŋ jogbaŋŋ lɛ he tamɔ nɛkɛ pɛŋ!” Hɛɛ, wɔshiɛmɔ nitsumɔ lɛ kɛ wɔjeŋba kpakpa lɛ gbalaa mɛi kɛbaa “wala la lɛ” he, ni no kɛ yijiemɔ haa Nyɔŋmɔ.