Fɔlɔi—Nyɛtɛoa Subaŋi Kpakpai yɛ Nyɛbii Amli
1 Atsɔɔɔ fɔmɔ nɔ anáaa subaŋi kpakpai, ni asaŋ ebaaa trukaa hu. Agbɛnɛ hu subaŋi kpakpai ni atɛoɔ awoɔ gbekɛbii amli lɛ heɔ be. “Atɛo” tsɔɔ akɛ “akɛha fiofio” aloo “aha ebote mli kɔ́i kɔ́i.” Nii ni akãa he afeɔ kɛ shiŋŋfeemɔ he hiaa fɔlɔi bɔni afee ni ‘amɛya nɔ amɛlɛ amɛbii lɛ yɛ Yehowa tsɔsemɔ kɛ ŋaawoo lɛ mli.’—Efe. 6:4.
2 Jee Shishi Kɛjɛ Abifabiiaŋ: Nyɛmɔ ni gbekɛbii bibii yɔɔ ni amɛkɛaakase nii ni amɛkɛfee nibii heei lɛ yɛ naakpɛɛ. Eyɛ mli akɛ bei pii lɛ ewa kɛha onukpai akɛ amɛaakase wiemɔ hee ko moŋ, shi gbekɛbii ni ejeko skul shishi lɛ baanyɛ akase wiemɔi enyɔ loo etɛ yɛ be kome too lɛ nɔŋŋ mli. Kaanu he kɔkɔɔkɔ akɛ obi lɛ edako bɔ ni eeenyɛ ená subaŋi kpakpai. Kɛji akɛ aje Biblia mli anɔkwalei lɛ akasemɔ shishi mra ni atee nɔ yɛ mli lɛ, beni gbekɛ lɛ aaaye afii fioo afata he lɛ, ejwɛŋmɔ mli baayi obɔ kɛ nilee ni baanyɛ ekɛ lɛ aya “yiwalaheremɔ mli” lɛ.—2 Tim. 3:15.
3 Ha Sɔɔmɔ Nitsumɔ lɛ Afee Esubaŋ: Subaŋ kpakpa ni abaanyɛ atɛo yɛ gbekɛ lɛ dalɛ afii lɛ amli ji Nyɔŋmɔ Maŋtsɛyeli lɛ he sanekpakpa lɛ shiɛmɔ be fɛɛ be. Fɔlɔi pii jeɔ enɛ feemɔ shishi kɛtsɔ amɛbii lɛ ni amɛfataa amɛhe kɛyaa shia-kɛ-shia sɔɔmɔ lɛ mli beni amɛji abifabii lolo lɛ nɔ. Odaseyeli nitsumɔ ni fɔlɔi lɛ kɛ amɛhe woɔ mli daa lɛ yeɔ buaa amɛbii lɛ ní amɛná hiɛsɔɔ kɛ ekãa kɛha sɔɔmɔ nitsumɔ lɛ, ni etsɔɔ amɛ bɔ ni amɛaaná odaseyeli lɛ mli gbɛfaŋnɔ yɛ shiɛmɔ nitsumɔ lɛ fãi lɛ eko fɛɛ eko mli.
4 Teokrase Sɔɔmɔ Skul lɛ mli ni amɛkɛ amɛhe aaawo lɛ hu yeɔ ebuaa gbekɛbii lɛ. Etsɔɔ amɛ nikasemɔ sui kpakpai, kɛ bɔ ni amɛaafee amɛkane nii kɛ shishinumɔ. Amɛkaseɔ bɔ ni agbaa Biblia lɛ he sane atsɔɔ, afeɔ sɛɛsaramɔi, kɛ bɔ ni afeɔ Biblia mli nikasemɔi ahaa. Tsɔsemɔ ni tamɔ nɛkɛ baanyɛ akanya amɛ ni amɛfee gbɛgbalɔi, ni amɛtao sɔɔmɔ hegbɛi krɛdɛɛi. Betelbii kɛ maŋsɛɛ sanekpakpa shiɛlɔi pii kɛ miishɛɛ kaiɔ be mli ni amɛkɛ amɛhe wo skul lɛ mli beni amɛdarako lɛ, ni amɛbuɔ enɛ akɛ gbɛjianɔtoo ni ye ebua amɛ ni ha amɛná sui kpakpai.
5 Wɔ fɛɛ wɔtamɔ sũ yɛ Shɔ̃lɔ Kpeteŋkpele, Yehowa, dɛŋ. (Yes. 64:8) Kɛji akɛ sũ lɛ yɛ bɔdɔɔ lɛ, ekɛ nishɔ̃ɔ waaa. Beni egbiɔ lɛ, kɛkɛ lɛ eewa. Nakai eji yɛ gbɔmɛi ahe. Beni amɛdarako lolo lɛ, anyɛɔ akudɔɔ amɛ—ni kɛ́ amɛdarako lɛ, no moŋ hi. Afii ni amɛkɛdaraa lɛ ji afii ni akɛtsɔseɔ amɛ, beni amɛkudɔmɔ yaa nɔ kɛhaa ekpakpa loo efɔŋ lɛ. Ákɛ fɔlɔ ni susuɔ ebii ahe lɛ, jee shishi mra ni otɛo Kristofoi asɔɔmɔ nitsumɔ lɛ mli sui kpakpai owo obii lɛ amli.