Feemɔ Mɔ ni Kɛ Miishɛɛ Yeɔ Wiemɔ Nɔ
1 Yesu kɛɛ akɛ mɛi pii baafee ‘mɛi ni hiɛ bɛ amɛhe nɔ,’ yɛ be mli ni eba lɛ mli, taakɛ eji yɛ Noa gbii lɛ amli lɛ. (Mat. 24:37-39) Belɛ akpaa gbɛ akɛ, aŋkroaŋkroi pii boŋ Maŋtsɛyeli sanekpakpa lɛ toi. Mɛni baanyɛ aye abua wɔ ni wɔhiɛ miishɛɛ mumɔ mli yɛ be mli ni wɔtsuɔ wɔsɔɔmɔ nitsumɔ lɛ he nii lɛ?—Lala 100:2.
2 Klɛŋklɛŋ lɛ, esa akɛ wɔha ehi wɔjwɛŋmɔ mli akɛ, wɔ shɛɛ sane lɛ kɛ wɔ nitsumɔ akɛ wɔshiɛ lɛ fɛɛ jɛ Nyɔŋmɔ ŋɔɔ. Kɛji akɛ mɛi hereee wɔ sɔɔmɔ nitsumɔ lɛ nɔ, yɛ wɔ mɔdɛŋbɔɔ ni hi fe fɛɛ lɛ fɛɛ sɛɛ lɛ, etsɔɔ diɛŋtsɛ akɛ amɛ́kpoo Yehowa. Kaimɔ ni wɔɔkai akɛ ekɛ miishɛɛ ŋmɔlɔ kwɛɔ anɔkwa ni wɔyeɔ yɛ shiɛmɔ lɛ mli lɛ baaye abua wɔ ni wɔhiɛ wɔ nyamɔ kɛ mligbɛ miishɛɛ akɛ mɛi ni yeɔ Nyɔŋmɔ wiemɔ lɛ nɔ lɛ mli.—Yak. 1:25.
3 Nɔ ji enyɔ lɛ, aŋkroaŋkroi yɛ lolo ni baakpɛlɛ nɔ ni Yehowa tsɔɔ nɔ ehereɔ mɔ yiwala lɛ nɔ. Eyɛ mli akɛ mɛi ni fa baafee shikpilikpii moŋ, shi mɛi ni tamɔ gwantɛŋi ni abaabua amɛnaa lolo lɛ yɛ, amrɔ nɛɛ po, yɛ be mli ni naagbee be lɛ eshɛ shɔŋŋ nɛɛ mli. Ehe miihia ni wɔya nɔ wɔshiɛ, ni wɔya “maŋ fɛɛ maŋ aloo akrowa fɛɛ akrowa mli” koni ‘wɔyatao mɔ ni sa’ lɛ.—Mat. 10:11-13.
4 Hiɛmɔ Jwɛŋmɔ Kpakpa Mli: Apasa jamɔ shihilɛ ni yɔɔ nyaŋemɔ lɛ elaka mɛi komɛi. Mɛi krokomɛi hu yɛ ni nibii agbɛjianɔtoo nɛɛ eha “etɔ amɛ ni amɛfee yuyaa.” (Mat. 9:36) Mɛi pii baanyɛ afee mɛi ni nitsumɔ ni amɛbɛ, helatsamɔ ni bɛ, kɛ shweshweeshwe shihilɛ ni bɛ lɛ eye amɛnɔ. Enɛ ni wɔɔnu shishi lɛ baaye abua wɔ ni wɔŋmɛ wɔtsui shi yɛ wɔ nitsumɔ mli. Bɔɔ mɔdɛŋ ni oje sanegbaai ni tsuɔ saji wuji ni gbɔmɛi ni yɔɔ wɔshikpɔŋkuku lɛ mli lɛ haoɔ yɛ he waa lɛ ahe nii lɛ shishi. Ye obua amɛ ni amɛna akɛ Nyɔŋmɔ Maŋtsɛyeli lɛ pɛ ji amɛnaa tsabaa. Okɛ Ŋmalɛi lɛ kɛ saji pɔtɛɛ ni yɔɔ woji lɛ amli lɛ atsu nii ni okɛ sanekpakpa lɛ ashɛ amɛtsuii ahe.—Heb. 4:12.
5 Nyɔŋmɔ wiemɔ lɛ nɔyelɔi ni yɔɔ miishɛɛ lɛ kaiɔ be fɛɛ be akɛ: “Yehowa he nyamɔ lɛ ji [wɔ] hewalɛ!” (Neh. 8:10) Ehe ehiaaa ni wɔlaaje wɔ miishɛɛ lɛ. “Kɛji shia lɛ sa lɛ, nyɛhaa nyɛ toiŋjɔlɛ ni nyɛshweɔ lɛ aba nɔ; shi kɛji esaaa lɛ, nyɛhaa nyɛ toiŋjɔlɛ lɛ akpalea kɛbaa nyɛŋɔɔ.” (Mat. 10:13, NW) Yehowa haa wɔ miishɛɛ kɛ hewalɛ feɔ ehee daa, yɛ be mli ni wɔŋmɛɔ wɔtsui shi yɛ esɔɔmɔ krɔŋkrɔŋ lɛ mli lɛ, ni ejɔɔ wɔ anɔkwayeli lɛ nɔ.