Hiamɔ Kɛha Maŋtsɛyeli Asai Ni Aaashɛ He Yɛ Maji Ni Nibii Fioo Pɛ Amɛyɔɔ Lɛ Amli
1 Yɛ Hɔɔ, October 21, 2000 lɛ, ajɔɔ Maŋtsɛyeli Asa hee kɛha Suhum New Town Asafo lɛ nɔ. Mɛi 610 ni babua amɛhe naa lɛ ná miishɛɛ waa akɛ amɛaana nibii fɛfɛji ni yɔɔ nɛkɛ asa fɛfɛo ni ajɔɔ nɔ aha Yehowa jamɔ nɛɛ mli. Mɛni ji nɔ ni sa kadimɔ yɛ nɛkɛ asa nɛɛ he? Yɛ hesaamɔ nitsumɔ lɛ sɛɛ lɛ, agbe tsũ lɛ diɛŋtsɛ maa naa yɛ otsii etɛ mli!
2 Enɛ ji klɛŋklɛŋ Maŋtsɛyeli Asa ni ama yɛ Kingdom Hall Construction Desk (Nitsumɔhe ni Kwɛɔ Maŋtsɛyeli Asai Amaamɔ Nɔ) ni ato shishi yɛ nitsumɔhe nine lɛ yɛ February afi 2000 mli lɛ kwɛmɔ shishi tɛ̃ɛ. Dani nakai be lɛ baashɛ lɛ, atsuɔ Maŋtsɛyeli Asai amaamɔ yɛ maŋ nɛɛ mli lɛ ahe nii yɛ Regional Building Committee gbɛjianɔtoo lɛ shishi. Mɛni hewɔ ana akɛ ehe miihia ni aje gbɛjianɔtoo hee nɛɛ shishi lɛ?
3 Nɔ Hewɔ ni Ehe Hiaa: Yɛ afi 1998 mli lɛ, jeŋ muu fɛɛ niiamlipɛimɔ ni Nɔyeli Kuu lɛ fee lɛ tsɔɔ hiamɔ krɛdɛɛ kɛha asai 8,000 amaamɔ yɛ maji 40 mli, ni Ghana fata he. Nɛkɛ yibɔ nɛɛ tee hiɛ kɛyashɛ 11,000 yɛ afi 2000 lɛ mli. Ayɔse akɛ Regional Building Committee gbɛjianɔtoo kɛha Maŋtsɛyeli Asai amaamɔ lɛ nyɛŋ atsu hiamɔ ni kã he edaa kɛha asai amaamɔ yɛ maji ni nibii fioo pɛ amɛyɔɔ lɛ amli lɛ he nii. Enɛ jɛ nibii ni bɛ—shika, ŋaa nitsulɔi, dɛŋdadei ni akɛtsuɔ nii, kɛ tsɔnei ni akɛfãa gbɛ lɛ hewɔ.
4 Ákɛ nɔkwɛmɔnɔ lɛ, yɛ May afi 1996 kɛ February 2000 mli lɛ, amamɔ Maŋtsɛyeli Asai ni naa shɛɔ 13 kɛtsɔ Regional Building Committees lɛ ayelikɛbuamɔ nɔ. Yɛ nakai be kome too lɛ nɔŋŋ mli lɛ, ato asafoi heei 237 shishi! Yɛ be mli ni tsũ lɛ maa ji mɔdɛŋbɔɔ ni sa yijiemɔ yɛ nyɛmimɛi ni kɛ amɛhe hã kɛha nitsumɔ nɛɛ agbɛfaŋ lɛ, ehe miihia ni wɔmamɔ Maŋtsɛyeli Asai etɛ yɛ otsi mli yɛ afii enumɔ ni nyiɛ sɛɛ lɛ mli bɔni afee ni anyɛ akɛtsu hiamɔ lɛ he nii!
5 No hewɔ lɛ, bɔni afee ni anyɛ ashɛ nɛkɛ hiamɔ krɛdɛɛ nɛɛ he lɛ, gbɛjianɔtoo hee lɛ kɛ tsumaa he gbɛjianɔtoi ni hi bɔ ni sa kɛ tsumaa gbɛ̀i ni yɔɔ oya tsuɔ nii koni amɛkɛma Maŋtsɛyeli Asai ni bɛ haŋtsii shi moŋ bulɛ yɔɔ he. Ákɛ nɔkwɛmɔnɔ lɛ, Awoshie East Maŋtsɛyeli Asa ni yɔɔ Accra ní tsumaa kuu lɛ ateŋ ekome ku sɛɛ amɛma lɛ ekoŋŋ lɛ he otsii enumɔ, eyɛ mli akɛ nɔ ni fata he ji tsũ ni yɔɔ momo lɛ kuumɔ kɛ emaa ekoŋŋ.
6 Kɛji ato tsumaa kui krokomɛi ahe gbɛjianɔ afata he lɛ, anaa akɛ bɔ ni amamɔɔ Maŋtsɛyeli Asa yɛ maŋ nɛɛ mli ahaa lɛ baaya hiɛ oyayaayai. Bɔni afee ni anyɛ atsu oti nɛɛ he nii lɛ, aawo nyɛmimɛi hii kɛ yei fɛɛ ni yɔɔ ŋaa yɛ tsumaa nitsumɔ he lɛ hewalɛ ni amɛkɛ sɔlemɔ asusu shihilɛi amli ni amɛyɔɔ lɛ he koni amɛkɛ amɛhe aha kɛye abua Maŋtsɛyeli Asa ni amaa he gbɛjianɔtoo ni mli lɛɛɔ lɛ. Obaanyɛ oŋma akɛ mɔ ni kɛ ehe eha kɛtsɔ gbɛbimɔ wolo ni ji A-25 ni nine baanyɛ ashɛ nɔ kɛtsɔ woloŋmalɔ lɛ nɔ, ni okɛ owaonaa gbɛi baawo shishi lɛ nɔ. Mɛni ji gbɛjianɔtoo hee lɛ fãi srɔtoi lɛ?
7 Shishitoo: Kɛtsɔ Sɛinɔtalɔ Ajinafoi Akuu ni yɔɔ Nɔyeli Kuu lɛ mli lɛ gbɛtsɔɔmɔ nɔ lɛ, Design/Build Committee lɛ kwɛɔ Maŋtsɛyeli Asai ni amaa yɛ maji ni nibii fioo pɛ amɛyɔɔ lɛ anɔ. Kɛtsɔ nɔkwɛmɔ ni Regional Kingdom Hall Offices lɛ kɛhaa lɛ nɔ lɛ, atsɔ nakai nitsumɔ lɛ nɔ ato Kingdom Hall Contsruction Desk shishi yɛ nitsumɔhe nine fɛɛ nine, ni akɛ Kingdom Hall Construction Groups (Maŋtsɛyeli Asa Tsumaa Kui) ni feɔ nyɛmimɛi hii ni le ŋaa tsuɔ nii koni akɛye abua asafoi lɛ ni amɛkɛmamɔ Maŋtsɛyeli Asai ni bɛ haŋtsii shi moŋ bulɛ yɔɔ he.
8 Kɛha maji ni yɔɔ Afrika lɛ, Regional Kingdom Hall Office ni yɔɔ South Africa lɛ tsuɔ Kingdom Hall Projects overseers (Maŋtsɛyeli Asa He Nitsumɔi anɔkwɛlɔi) mɛi ni yɛ be kɛ bei amli lɛ amɛyasaraa nitsumɔhe nine fɛɛ nitsumɔhe nine ni kɛ Maŋtsɛyeli Asa maa yɔɔ tsakpaa lɛ.
9 Engineering offices ni kɛ Regional Kingdom Hall Offices tsuɔ nii lɛ fiteee shika shi moŋ amɛkɛ gbɛjianɔtoo ni tsuɔ nii haa kɛha Maŋtsɛyeli Asa tsumaa. Gbɛjianɔtoi nɛɛ damɔ niiashikpamɔ ni aná yɛ Teokrase nitsumɔi amli yɛ jeŋ fɛɛ afii babaoo lɛ nɔ.
10 Mɛi ni feɔ be-fɛɛ Maŋtsɛyeli Asa Tsumaa Kuu lɛ ji mɛi ni kɛ amɛhe eha be kakadaŋŋ loo be kukuoo ni le ŋaa ni akpɛlɛɔ amɛnɔ akɛ amɛtsu nii yɛ Maŋtsɛyeli Asa maa nitsumɔi amli kɛtsɔ Kingdom Hall Construction Desk ni yɔɔ nitsumɔhe nine lɛ gbɛtsɔɔmɔ shishi. Kuu fɛɛ kuu yɛ tsumaa nɔkwɛlɔ kɛ esɛɛyelɔ ni ahala.
11 Gbɛjianɔtoo: Ákɛ mɛi ni kɛ Service Department ni yɔɔ Betel lɛ feɔ ekome kɛtsuɔ nii lɛ, Kingdom Hall Construction Desk lɛ kpɛɔ eyiŋ yɛ Maŋtsɛyeli Asai heei abɔ ni ehe baahia ni asaa ama lɛ ekoŋŋ, aloo akɛ eko ato najiaŋ lɛ he. Kɛtsɔ asafoi heei abɔ ni atoɔ shishi daa afi lɛ nɔ lɛ, abaanyɛ atsɔɔ Maŋtsɛyeli Asai abɔ ni he baahia koni akɛtsu shiɛlɔi ayifalɛ ni kã he eyaa hiɛ lɛ he nii. Abɔɔ mɔdɛŋ ni atsu nitsumɔi ni aje shishi momo lɛ ahe nii klɛŋklɛŋ.
12 Esa akɛ asafo fɛɛ asafo ni miisusu Maŋtsɛyeli Asa nitsumɔ shishijee loo enaagbee he lɛ atswa Kingdom Hall Construction Desk ni yɔɔ Betel lɛ adafi. Abaato kpee he gbɛjianɔ kɛha kuu lɛ najiaŋdamɔlɔi kɛ asafoi fɛɛ ni ekɔɔ amɛhe lɛ mli onukpai akuu lɛ. Abaasusu asafoi lɛ ahiamɔ nii kɛ taomɔ nibii ni he hiaa bɔni afee ni amɛhe asa kɛha Asafo lɛ yelikɛbuamɔ ni akɛaahe ni esaa ema tsũ ko ni yɔɔ momo lɛ ekoŋŋ loo ni ehé shikpɔŋ ko ni kã shi efolo koni ema asa hee yɛ nɔ lɛ he yɛ kpee ni tsɔɔ hiɛ nɛɛ mli.
13 Abaasusu gbɛjianɔ ni ato koni akɛ Tsumaa Kuu lɛ atsu nii koni amɛye amɛbua asafoi lɛ yɛ Maŋtsɛyeli Asa lɛ maa mli kɛyashi abaajɔɔ nɔ lɛ he kɛmɔ shi jogbaŋŋ. Abaakpɛ yiŋ yɛ bɔ ni aaafee koni ahé nibii ni akɛwo asafo lɛ gbɛi amli yɛ mla naa lɛ hu he yɛ kpee lɛ shishi.
14 Shika ni Akɛbaatsu He Nii: Kɛtsɔ niiamlipɛimɔi ni Asafo lɛ fee lɛ nɔ lɛ, abu akɔntaa akɛ ehe miihia ni ama Maŋtsɛyeli Asai 750 yɛ Ghana yɛ afii enumɔ ni nyiɛ sɛɛ lɛ mli. Kɛ aja mli lɛ ebaafee ₵140 million ($20,000), enɛ baabi ní aná shika ni naa shɛɔ ₵105 billion ($15 million) yɛ afii enumɔ ni nyiɛ sɛɛ lɛ mli.
15 Nɛkɛ yibɔ nɛɛ damɔ shi kɛha maŋ kome pɛ hiamɔ nii, Ghana. Ŋwanejee ko bɛ he akɛ enɛ haa wɔnaa bɔ ni ehe hiaa koni wɔtsu too daa kɛha maŋ lɛ Maŋtsɛyeli Asa gbɛjianɔtoo lɛ kɛ Asafo lɛ jeŋ muu fɛɛ nitsumɔ lɛ hu.—Mat. 24:14.
16 Kɛha nitsumɔ lɛ eko fɛɛ eko lɛ, asusuɔ gbɛ̀i anɔ ni atsɔɔ ni nine shɛɔ shika nɔ lɛ he tamɔ akɛ amrɔmrɔ aŋkro onia nɔ, shiɛlɔi aniiamlipɛimɔ koni akɛna bɔ ni abaanyɛ atsu kɛha nitsumɔ lɛ yɛ daa nyɔŋ, asafo lɛ nibii memeji lɛ ahɔ̃ɔmɔ aloo shika faa he gbɛjianɔtoo.
17 Nitsulɔi ni kɛ Amɛhe Eha: Yɛ gbɛjianɔtoo kɛha Maŋtsɛyeli Asa ni amaa yɛ maji ni nibii fioo ko pɛ amɛyɔɔ lɛ amli lɛ, mɛi ni kɛ amɛhe eha kɛha nitsumɔ akui etɛ yɔɔ. Kingdom Hall Construction Volunteers (Mɛi ni kɛ Amɛhe Eha Kɛha Maŋtsɛyeli Asa Maa) lɛ hiɛ tsumaa he ŋaai komɛi ni amɛkɛbaafata be-fɛɛ Maŋtsɛyeli Asa Tsumaa Kui lɛ he kɛsɔmɔ be kukuoo yɛ amɛ diɛŋtsɛ amɛ asafo lɛ shikpɔŋ kuku lɛ sɛɛ. Nɛkɛ nyɛmimɛi hii kɛ yei nɛɛ sɔmɔɔ yɛ be kɛ bei amli kɛjɛ otsii enyɔ kɛyashi nyɔji etɛ mli. Kɛ ehe bahia lɛ, ayeɔ abuaa amɛ yɛ shika gbɛfaŋ koni amɛkɛwo shika ni amɛfiteɔ, wɔɔhe, kɛ niyenii kɛha be ni amɛkɛaatsu amɛnitsumɔ lɛ he nii agbe naa lɛ he nyɔmɔ.
18 Kingdom Hall Construction Servants lɛ ji nyɛmimɛi ni atsɔse amɛ ni kɛ Kingdom Hall Construction Group lɛ sɔmɔɔ be kakadaŋŋ yɛ amɛ diɛŋtsɛ amɛmaŋ lɛ mli. Nitsulɔi Ajinafoi Akuu ni yɔɔ Nɔyeli Kuu lɛ mli lɛ ji mɛi ni halaa amɛ ni amɛnine shɛɔ shika ni tamɔ nɔ ni akɛhaa Betel weku lɛ mli bii lɛ anɔ. Mɛi fɛɛ ni akpɛlɛ amɛnɔ akɛ Kingdom Hall Construction Volunteers loo Servants lɛ hiɛ ŋaai yɛ tsumaa he nitsumɔi srɔtoi amli tamɔ gbogbotswaa, kapintɛ nitsumɔ, paipi he nitsumɔ, sarawa he nitsumɔ, kɛ pɛntemɔ.
19 Mɛi ni kɛ amɛhe eha lɛ akuu ni ji etɛ lɛ feɔ nyɛmimɛi hii kɛ yei ni le ŋaa kɛ mɛi ni lé ŋaa ko ni jɛ asafo lɛ mli ni kɛ amɛhe eha koni amɛye kɛbua yɛ Maŋtsɛyeli Asa ni amaa yɛ amɛ diɛŋtsɛ amɛshikpɔŋkuku lɛ mli lɛ mli. Yɛ be mli ni amɛteŋ mɛi komɛi nyɛɔ amɛkɛ amɛhe haa yɛ otsi lɛ mli lɛ, amɛteŋ mɛi babaoo kɛ amɛ otsi lɛ naagbee be ni amɛkɔ kɛjɛ nitsumɔ mli lɛ tsuɔ nii koni amɛkɛye kɛbua Maŋtsɛyeli Asa ni amaa lɛ.
20 Namɛi Agbɛnaa Nii Ni? Kɛtsɔ Kingdom Hall Construction Desk ni yɔɔ nitsumɔhe nine lɛ nɔ lɛ, Asafo lɛ efee klalo koni ekɛ yelikɛbuamɔ fɛɛ yelikɛbuamɔ aha kɛha jamɔhei ni bulɛ yɔɔ he kɛha asafoi lɛ. Yɛ be mli ni enɛ yɔɔ nakai lɛ, esa akɛ ana Maŋtsɛyeli Asa ni amaa lɛ akɛ eji asafo lɛ nitsumɔ. No hewɔ lɛ eji shiɛlɔ fɛɛ shiɛlɔ sɔ yɛ asafo lɛ mli akɛ ebaafee nɔ fɛɛ nɔ ni ebaanyɛ koni ekɛ ehe awo Maŋtsɛyeli Asa lɛ maa lɛ mli. No sɛɛ lɛ, esa akɛ mɔ fɛɛ mɔ kɛ ehe awo mli ni efi asa lɛ kwramɔ sɛɛ bɔni afee ni eya nɔ ewie sanekpakpa lɛ he jogbaŋŋ yɛ akutso lɛ mli.
21 Esa akɛ akwra Maŋtsɛyeli Asa lɛ nɔ daa kɛji abaanyɛ akɛtsu nii be kakadaŋŋ yɛ enɔjɔɔmɔ sɛɛ. Yiŋtoo nɛɛ hewɔ lɛ ehe miihia ni akwɛ amɛsaamɔ daa afi. Kɛfata emli saamɔ kɛ pɛntemɔ he lɛ, nibii ni fata ehe kwramɔ he ji tsũ lɛ fãi krokomɛi fɛɛ, sarawa kɛ paipi he nibii, tsɔne ni haa tsũ mli feɔ ŋanii loo ehaa anaa kɔɔyɔɔ, kɛ shikpɔŋ lɛ shikamɔ loo afabaŋ lɛ saamɔ.
22 Be mli ni Yehowa yaa nɔ ehaa Yesaia 60:22 lɛ baa mli ni ‘mɔ bibioo batsɔɔ mɛi akpe’ lɛ, nyɛhaa wɔ fɛɛ wɔtsua nii waa, ni wɔha wɔ shinaai lɛ anaa akãmɔ daa koni wɔkɛhere jeŋmaji lɛ fɛɛ “anii ni jara wa” lɛ kɛba mli. (Yes. 60:11; Hag. 2:7) Yɛ Lala 110:3 lɛ kɛ gbeekpamɔ naa lɛ, eba akɛ wɔ fɛɛ wɔkɛ wɔhe aaaha kɛjɛ wɔtsui mli kɛha Yehowa nitsumɔ yɛ naagbee be nɛɛ mli.
[Captions on page 4]
Awoshie East Maŋtsɛyeli Asa lɛ ni kpaako aama
Awoshie East Maŋtsɛyeli Asa lɛ be mli ni agbe naa
[Caption on page 5]
Tema Community 5 Maŋtsɛyeli Asa lɛ ni kpaako aama
[Captions on page 6]
Suhum New Town Maŋtsɛyeli Asa lɛ ni kpaako aama
be mli ni ama agbe naa