“Te Aaafee Tɛŋŋ ni Amɛaanu?”
1 Yesu kɛ nɔmimaa wie akɛ: “Ja ashiɛ sanekpakpa lɛ atsɔɔ jeŋmaji fɛɛ dã.” (Mar. 13:10) Yɛ bɔ ni wɔbɔɔ mɔdɛŋ jogbaŋŋ lɛ fɛɛ sɛɛ lɛ, gbɔmɛi akpekpei ohai abɔ yɛ lolo ni mɔ ko yeko amɛ odase pɛŋ. Nɔyelii komɛi tsĩɔ wɔnitsumɔ lɛ naa. Shikpɔji babaoo yɛ ni gbɔmɛi fa waa yɛ nɔ, ni amɛyifalɛ lɛ miiya hiɛ oyayaayai. No hewɔ lɛ, “te aaafee tɛŋŋ ni amɛaanu?”—Rom. 10:14.
2 Ná Hekɛnɔfɔɔ yɛ Yehowa Mli: Esa akɛ wɔkai akɛ Yehowa le gbɔmɛi fɛɛ atsuiiaŋ. Yɛ bɔ ni mɔ shihilɛ ji ha fɛɛ sɛɛ lɛ, kɛ́ ekɛ tsui kpakpa tao anɔkwale ni kɔɔ Nyɔŋmɔ he lɛ, ebaana.—1 Kron. 28:9.
3 Abraham fee yeyeeye yɛ mɛi ni yɔɔ Sodom kɛ Gomora lɛ ahe. Shi Nyɔŋmɔ ma nɔ mi kɛha lɛ akɛ akpataŋ Sodom hiɛ kɛ́ aná jalɔi nyɔŋma pɛ yɛ mli po. (1 Mose 18:20, 23, 25, 32) Yehowa kpatako jalɔi ahiɛ kɛfatako efɔŋfeelɔi ahe pɛŋ, taakɛ Lot kɛ ebiyei lɛ akpɔmɔ tsɔɔ lɛ.—2 Pet. 2:6-9.
4 Be ko lɛ Elia susu akɛ anɔkwa Nyɔŋmɔ lɛ fataaa ehe kwraa yɛ sɔɔmɔ ni ekɛhaa lɛ lɛ mli. Shi kɛlɛ, Yehowa ma nɔ mi kɛha lɛ akɛ eshwɛko ekome pɛ, ni ákɛ abaagbe nitsumɔ ni eje shishi lɛ naa. (1 Maŋ. 19:14-18) Ni shihilɛ ni yɔɔ wɔgbii nɛɛ amli lɛ hu?
5 Tsu Nii yɛ Nyɔŋmɔ Sɔɔmɔ Mli Be Fɛɛ Be: Wɔleee be babaoo ni akɛaatsu odaseyeli nitsumɔ lɛ lolo. Yehowa ji mɔ ni kwɛɔ koni nitsumɔ nɛɛ aya nɔ, ni ekɛ ebɔfoi lɛ miitsu nii koni ekɛkwɛ nɔ. (Kpoj. 14:6, 7) Lɛ ji mɔ ni baatsɔɔ he ni abaaye majimaji lɛ fɛɛ odase kɛyashɛ. Kɛ Yehowa miisumɔ lɛ, ebaanyɛ ekwɛ koni agbɛ Maŋtsɛyeli shɛɛ sane lɛ ashwã yɛ gbɛ̀i ni wɔnyɛŋ wɔsusu he kwraa lɛ nɔ bɔni afee ni mɛi babaoo anyɛ “anu sanekpakpa wiemɔ lɛ . . . ni amɛhe amɛye.” (Bɔf. 15:7) Nɔ ni Yehowa feɔ lɛ kɛ bɔ ni eji—Nyɔŋmɔ ni yɔɔ suɔmɔ, ní le nii, ni yeɔ anɔkwa—lɛ baakpã gbee kwraa kɛmɔ shi.
6 Eji hegbɛ ni wɔná akɛ wɔɔtsu nii yɛ Yehowa suɔmɔnaa nii lɛ kɛ gbeekpamɔ naa, ni wɔfee bɔ fɛɛ bɔ ni wɔɔnyɛ ni wɔha mɔ fɛɛ mɔ anu sanekpakpa lɛ.—1 Kor. 9:16.